Mga Kausaban sa Organisasyon sa Pagkapari

Sa tibuok kasaysayan sa Simbahan, ang mga Presidente sa Simbahan mitubag sa mga panginahanglan ug oportunidad sa nagtubo nga Simbahan pinaagi sa pag-usab sa organisasyon sa pagkapari. Samtang ang usa ka mahinungdanon nga kausaban sa mga korum sa pagkapari ubos ni Brigham Young gipatuman niadtong 1877, si Apostol Orson Pratt mipasalig sa mga Santos sa Ulahing mga Adlaw nga ang pagpahiangay usa ka mahinungdanon nga bahin sa kapunongan sa pagkapari. “Ang organisasyon mopadayon sa usa ka lakang human sa usa ka lakang,” miingon siya, “gikan sa usa ka ang-ang ngadto sa lain, sama nga ang mga tawo molambo ug motubo sa kahibalo sa mga baruganan ug mga balaod sa gingharian sa Dios, ug samtang ang ilang mga utlanan modako.”¹ Dili igsapayan kon gipasiugda ba sa mga pagpadayag sa Doktrina ug mga Pakigsaad o pinaagi sa dinasig nga instruksyon gikan sa mga lider sa Simbahan nga gipadangat sa kinatibuk-ang komperensya o sa mga tamdanan nga basahon, ang padayon nga mga kausaban sa eklesyastikal nga estraktura sa Simbahan nagpakita sa kalagsik sa pagkapari.

Nag-unang mga Katungdanan ug mga Korum

Alang sa bag-ong naorganisar nga Simbahan ni Kristo niadtong 1830, ang mga Artikulo ug mga Pakigsaad (sa wala madugay gipalambo ngadto sa Doktrina ug mga Pakigsaad 20) mao ang basihan sa organisasyon sa pagkapari. Ang dokumento naglatid sa mga ordinansa (sama sa bunyag), lain-laing mga katungdanan (sama sa priest ug elder), ug usa ka sistema sa pagdumala sa mga buluhaton (mga komperensya matag tulo ka bulan). Samtang nagkadaghan ang mga miyembro sa Simbahan ug ang mga panginahanglan nausab, ang mas ulahing mga pagpadayag mipaila og dugang nga mga ordinansa, mga katungdanan, ug mga sistema sa pag-organisar. Ang mga termino ug mga konsepto mahitungod sa pagkapari nag-usab-usab sulod sa unang lima ka tuig sa Simbahan.²

Dagkong mga kausaban ang nahitabo didto sa Kirtland, Ohio, ug didto sa Nauvoo, Illinois, samtang mitubag si Joseph Smith sa pagpadayag nga nagsugo kaniya sa pagpahiuli sa pagkapari sa kahingpitan niini. Niadtong 1835, samtang nangandam alang sa pagpahinungod sa Templo sa Kirtland, si Joseph miestablisar sa mga korum ug mga pamaagi sa korum sumala sa pagpadayag ug tambag. Mipahayag siya og katagbawan nga siya “mikompleto [sa] organisasyon sa simbahan” sumala sa mga pagpadayag nga iyang nadawat ug nga ang mga korum sa pagkapari makapadayon sa pagtukod sa gingharian sa Dios.³ Niadtong 1842 misugyot siya nga i-organisar ang Female Relief Society sa Nauvoo “subay sa sumbanan, o kapunongan, sa pagkapari” ug mipaila og dugang nga mga ordinansa sa templo.

Ang mga pulpito didto sa Templo sa Kirtland mitakdo ngadto sa lain-laing mga katungdanan sa pagkapari niadtong 1835-1836.

Paghan-ay sa mga Korum, mga Ward, ug mga Stake

Human ni Joseph Smith, pipila sa labing daghan nga mga kausaban ngadto sa organisasyon sa pagkapari nahitabo ubos sa direksyon ni Brigham Young sa hinapos nga bahin niadtong mga 1870 ug ni Joseph F. Smith sa sayong bahin niadtong mga 1900. Niadtong 1876 ug 1877 si Brigham Young mihatag og pagtagad sa lokal nga mga iregularidad sa mga ward ug mga stake uban sa usa ka plano sa pagpahiangay sa sumbanan ug sa pagpili og mga ngalan sa mga stake, mga ward, mga korum, ug mga katungdanan sa pagkapari. Ang kahimtang sa usa ka “sentro nga stake” gihunong, nga naghimo sa tanang mga stake nga managsama.⁴ Bag-ong kriterya naglatid kon unsaon sa pag-organisar sa usa ka stake o usa ka korum. Ang mga apostoles dili na moserbisyo diha sa lokal nga mga kapangulohan, ug ang mga bishop, dili ang mga presidente sa ward, ang modumala sa mga ward. Usa ka mas gipahimutang nga herarkiya sa responsibilidad ang gipatuman diha sa mga presidente sa stake ug mga bishop, nga naghatag og pagkasusama sa mga ward ug stake ug sa pagdumala sa mga korum subay sa klaro nga mga linya sa awtoridad. Ang mga miting sa korum gipahigayon sa gikauyunan nga mga panahon.⁵

Niadtong mga 1906 si Joseph F. Smith mihatag og gibug-aton sa pag-orden sa batan-ong mga lalaki ngadto sa Aaronic nga Pagkapari ug mirekomendar og mga grupo sa ka-edad alang sa pag-orden ngadto sa matag katungdanan, ingon og sama sa pagbahin-bahin ngadto sa mga klase nga nagbase sa edad nga gipaila sa mga lider sa Young Women kaniadto. Mihimo siya og gihiusa ug gigiyahan nga pagtuon sa panggobyerno sa Simbahan, nga nagtinguha sa pag-establisar og doktrinal nga pagkamakanunayon kon sa unsang paagi ang mga opisyales sa pagkapari mobuhat sa ilang mga katungdanan. Gipasabut niya nga ang awtoridad sa pagdumala sa usa ka korum o organisasyon nagkinahanglan og espesyal nga pagtugot sa paggamit sa “mga yawe sa pagkapari”:

“Ang Pagkapari sa kinatibuk-an mao ang awtoridad nga gihatag ngadto sa tawo aron molihok alang sa Dios. Ang matag lalaki nga giordinahan sa bisan unsa nga ang-ang sa Pagkapari, aduna niini nga awtoridad nga gitugyan ngadto kaniya. Apan gikinahanglan nga ang matag lihok nga gipahigayon ubos niini nga awtoridad, kinahanglang buhaton … diha sa tukma nga paagi, ug pinasubay sa tukma nga han-ay. Ang gahum sa paggiya niini nga mga paningkamot naglangkob sa mga yawe sa Pagkapari.”⁶

Si Presidente Smith mipasabut nga ang pagbuhat sa tanan nga mga katungdanan sa korum gidumala pinaagi sa paggamit sa mga yawe nga gitugyan ngadto sa mga presidente sa korum ubos sa direksyon sa Presidente sa Simbahan, kinsa naghupot sa tanang mga yawe nga gihatag sa Ginoo ngadto sa Simbahan.⁷

Correlation sa Pagkapari ug ang Tibuok Kalibutan nga Simbahan

Ang kalamboan sa Simbahan miaghat og daghan nga mga pagsukod sa kasarang sa organisasyon sa mga ward, mga stake, ug mga programa sa tibuok ika-20 nga siglo. Niadtong 1923 si Presidente Heber J. Grant miorganisar og usa ka stake sa Los Angeles, California—usa ka siyudad diin ang mga Santos diyutay ra.⁸ Kini miusab sa sumbanan gikan sa ika-19 nga siglo nga pamaagi sa pagmugna lamang og mga stake sa mga komunidad diin ang kadaghanan sa mga lumulupyo mga Santos sa Ulahing mga Adlaw. Miestablisar usab og bag-o nga posisyon si Presidente Grant, Kaabag ngadto sa Napulog Duha, aron sa pag-alibyo sa nagkadaghan nga mga buluhaton sa Korum sa Napulog Duha ka mga Apostoles. Tali sa 1941 ug 1976, 38 ka kalalakin-an ang miserbisyo isip mga Kaabag ngadto sa Napulog Duha, hangtud nga si Presidente Spencer W. Kimball mitawag kanila ngadto sa Unang Korum sa Seventy ug mipaundang sa posisyon.

Ang Unang Kapangulohan ug ang Korum sa Napulog Duha ka mga Apostoles mipadayon sa paghan-ay sa mga auxiliary sa Simbahan sulod sa usa ka sistema sa pagdumala sa Simbahan nga unang gitawag og “correlation.” Sa wala madugay gipatuman isip ang Correlation sa Pagkapari, kini nga proseso nagkalain-lain ang porma sa lain-laing mga panahon: gikan sa mga paningkamot ni David O. McKay isip Apostol niadtong mga 1910 aron mahiusa ang kurikulum sa Simbahan ngadto sa pag-organisar og usab sa mga auxiliary ubos sa mga komite nga gipangulohan sa pagkapari atol sa kapangulohan nila ni David O. McKay, Joseph Fielding Smith, ug Harold B. Lee.

Ang mga kausaban gisundan og pagkaregular, bisan og ang pipila adunay malukpanon nga mga epekto sa kinatibuk-an ug lokal nga mga lebel. Miporma si Presidente Spencer W. Kimball og usa ka korum sa mga General Authority Seventy, ug mipahunong sa calling sa Kinatibuk-ang Patriyarka ngadto sa Simbahan, ug nakadawat sa pagpadayag sa paghatag sa ordinasyon sa pagkapari ngadto sa mga lalaki nga Aprikano ang kaliwat sa unang higayon sukad niadtong mga 1840.⁹ Niadtong 1986 si Presidente Ezra Taft Benson mipahibalo sa pagtapos sa mga korum sa mga Seventy sa stake.¹⁰ Sa ulahing bahin niadtong mga 1990 gipaila ni Presidente Gordon B. Hinckley ang mga Area Authority (sa katapusan gitawag isip mga Area Seventy) aron mas matubag ang mga panginahanglan sa nagtubo nga Simbahan sa tibuok kalibutan.¹¹

Dugang nga mga kausaban sa organisasyon sa pagkapari mipadayon sa sayong bahin sa ika-21 nga siglo. Niadtong 2018 ang mga high priest group sa ward gihunong, nga ang tanang mga tighupot sa Melchizedek nga pagkapari nahisakop na sa elders quorum; apan, nagpabilin ang mga high priest quorum sa stake (limitado ngadto sa adunay aktibo nga mga calling isip patriyarka sa stake o sa diha sa kapangulohan sa stake, high council, o bishopric). Niadtong 2019 ang Unang Kapangulohan mipahibalo nga ang mga batan-ong lalaki mahimong angayan na alang sa pag-orden sa Aaronic nga Pagkapari sa sinugdanan sa tuig nga sila mag-edad og 12 anyos kay sa maghulat alang sa ilang adlawng natawhan, sama sa pamaagi kaniadto.¹²

May Kalabutan nga mga Hisgutanan: Pagpahiuli sa Aaronic Priesthood [Pagkapari], Pagpahiuli sa Melchizedek Priesthood [Pagkapari], Female Relief Society of Nauvoo [Ang Kababayen-an nga Kapunongan sa Kahupayan]