Mga Panalapi sa Simbahan

Gikan sa labing una nga mga adlaw sa Pagpahiuli, ang pagpadayag naglatid sa mga aspeto sa misyon sa Simbahan nga magkinahanglan og temporal nga mga paagi, lakip sa pag-atiman alang sa kabos, pagmantala sa mga kasulatan ug ubang mga materyal sa Simbahan, ug pagtukod og mga gambalay sa pagsimba. Si Joseph Smith misunod sa pagpadayag ingon man sa mga sumbanan sa patigayon niadtong panahona alang sa pagpundo niining importante nga mga paningkamot. Ang nagsunod nga mga lider sa Simbahan misunod niining sama nga sundanan, nagpahiangay sa mga panalapi sa Simbahan aron matubag ang nag-usab-usab nga mga panginahanglan sa Simbahan. Paglabay sa panahon, ang Simbahan nakasinati og mga higayon sa kalisod sa panalapi ingon man sa mga higayon diin kini nakatigom og mga pundo.¹

Ang mga pagpadayag niadtong 1831 miestablisar sa “balaod sa pagpahinungod ug pagkatinugyanan,” nga misugo sa mga miyembro sa Simbahan sa pagpahinungod sa ilang kabtangan aron sa pagpalambo sa buhat sa Ginoo ug sa pagpamenos sa kakabos. Kini nga mga pagpadayag miestablisar usab sa katungdanan sa bishop sa pagdawat ug pag-apod-apod sa gipahinungod nga mga kabtangan.² Si Joseph Smith ug ang ubang mga lider misunod usab sa mga pagpadayag nga nagtambag kanila sa pagdumala sa mga kalihokan sa Simbahan bahin sa negosyo ug pagmantala pinaagi sa usa ka organisasyon nga gitawag nga Nagkahiusang Kapunongan.³

papel de bangko niadtong mga 1830 — Usa ka papel de bangko sa Kirtland Safety Society Bank nga gipirmahan ni Joseph Smith ug Sidney Rigdon ug gigamit isip kuwarta tali sa 1836 ug 1837.

Sama sa ubang mga simbahan kaniadto sa Amerika, ang mga lider nga Santos sa Ulahing mga Adlaw migamit og pinansiyal nga himan sama sa mga sinulat nga saad sa pagbayad [promissory notes], mga sinulat nga mando sa pagbayad [bills of exchange], mga utang, mga stock, ug mga bond.⁴ Niadtong 1836, sa Kirtland, Ohio, ang mga lider sa Simbahan miestablisar sa Kirtland Safety Society, usa ka bangko nga gipundohan pinaagi sa pagpalit og stock. Ang katuyoan niini nga institusyon mao ang pagpalapad sa abilidad sa mga Santos sa Ulahing mga Adlaw nga makagamit og puhonan ug sa pagpundo sa mga tumong sa Simbahan. Subo lang, usa ka pinansiyal nga kalisod diha sa Estados Unidos ug Britanya niadtong 1837 mihurot sa mga pundo sa bangko, mibalda sa mga pagbaligya og yuta, ug misangpot ngadto sa pagkalugi sa daghang bangko, lakip ang Kirtland Safety Society.⁵

Duha ka pagpadayag niadtong 1838 mitimaan og usa ka kausaban sa pamaagi sa Simbahan sa pagpundo sa mga pagpadagan niini. Kini mihatag og gibug-aton sa importansiya sa ikapulo isip usa ka paagi sa pagpundo sa buhat sa Simbahan ug miestablisar og usa ka konseho sa pagdumala sa mga galastohan sa ikapulo, diin nahimong nailhan isip ang Konseho sa Paggasto sa mga Ikapulo.⁶

Sugod niadtong 1841, si Joseph Smith mipahigayon og patigayon alang sa Simbahan isip “Trustee-in-Trust,” o ang tawo nga legal nga responsable sa mga kabtangan sa Simbahan.⁷ Kini usa ka komon nga sumbanan sa pag-organisar alang sa daghang simbahan ug ubang mga institusyon niadtong panahona.⁸ Human sa kamatayon ni Joseph Smith, ang mga miyembro sa Simbahan mipaluyo sa Korum sa Napulog Duha ka Apostoles “sa pagdumala sa panalapi sa simbahan” hangtod ang Unang Kapangulohan maorganisar pag-usab.⁹

Atol sa nahibilin sa ika-19 nga siglo, ang Trustee-in-Trust milihok kauban ang mga konseho sa Simbahan aron sa pagpalit og kabtangan ug pagpahigayon og ubang mga patigayon alang sa Simbahan, pagpamuhonan sa pagtukod og mga komunidad sa mga Santos sa Ulahing mga Adlaw, ug sa pagpundo sa pagpundok sa mga Santos ngadto sa Kasadpang Amihanang Amerika.¹⁰ Sama pananglit, ang Simbahan mitabang sa pagpahigayon sa paglalin sa mga Santos sa Ulahing mga Adlaw ngadto Kasadpang Amihanang Amerika pinaagi sa pagtanyag og mga pagpautang pinaagi sa Perpetual Emigrating Fund sa Simbahan.¹¹ Niadtong 1877, sa usa ka paningkamot sa pagseguro og mainampingon ug makanunayon nga pagkuwenta, si Presidente John Taylor miorganisar og usa ka komitiba sa pag-audit nga mirebyo sa tanang transaksyon nga gipahigayon ubos sa Trustee-in-Trust.¹²

Ang mga balaod batok sa pagpangasawa og daghan nga gipatuman sa gobyerno sa Estados Unidos niadtong mga 1880 mipuntarya sa mga panalapi sa Simbahan, nga sa kataposan mihikaw sa mga katungod sa Simbahan ug misakmit sa mga pundo ug mga kabtangan niini. Ang nag-usab-usab nga pinansiyal nga mga merkado ug dili maayo nga mga pamuhonan mihurot sa nahibiling mga kapanguhaan sa Simbahan, nga mihatag sa mga Presidente sa Simbahan nga sila si Wilford Woodruff ug Lorenzo Snow og dagko nga mga utang. Human sa 1890 nga Manipesto, si Presidente Woodruff nakigtambayayong uban ang mga magbabalaod ug mga opisyal sa korte aron sa pagbawi sa kabtangan sa Simbahan ug sa pagbalhin sa daghang kaanib sa Simbahan nga mga patigayon ngadto sa pribado nga mga negosyo, usa ka proseso nga gipadayon sa iyang mga sumusunod. Niadtong 1899, nanawagan si Presidente Snow sa mga Santos sa Ulahing mga Adlaw nga dugangan ang ilang pasalig ngadto sa mga amot sa ikapulo nga sa kadugayan nakatabang nga mahibalik ang kapasidad sa Simbahan sa pagbayad sa mga utang niini ug sa pagtigom alang sa umaabot nga mga panginahanglan.¹³

Sa sayong bahin sa ika-20 nga siglo, ang Presidente sa Simbahan nga si Heber J. Grant ug ang Presiding Bishop nga si Charles Nibley, kinsa kanhi nagtrabaho isip mga negosyante, milakip sa mga operasyon sa Simbahan nga kanhiay gidumala lamang sa trustee ngadto sa tulo ka organisasyon. Niadtong 1916, ang Corporation of the Presiding Bishop gimugna aron sa pagdumala sa mga donasyon ug mga galastohan alang sa “mga buhat sa kaluoy ug alang sa publiko nga pagsimba,” lakip ang lokal nga mga meetinghouse. Niadtong 1923, si Presidente Grant miestablisar sa Corporation of the President, nga midumala sa uban pang mga kabtangan sa Simbahan nga gigamit alang sa relihiyoso nga mga katuyoan. Gimugna usab niya ang Zion Securities Corporation aron sa pagdumala sa nahibiling mabuhisan ug dili eklesiyastikanhon nga mga organisasyon ug mga kabtangan. Atol niining panahona, si Bishop Nibley naningkamot sa pagbag-o sa pinansiyal nga mga rekord sa Simbahan aron mahisubay kini sa modernong mga sumbanan sa pagkuwenta. Samtang milambo ang pinansiyal nga kahimtang sa Simbahan, ang mga lider sa Simbahan nagsugod sa paghatag og kutob sa 50 porsiyento sa mga gasto sa pagtukod og lokal nga mga meetinghouse, mitagana sa nahibilin ngadto sa lokal nga mga badyet. Ang pinansiyal nga mga palisiya nga gipatuman ni Presidente Grant nagpabiling susama ra gayod hangtod sa mga 1960.¹⁴

Tali sa 1915 ug 1959, ang tinuig nga mga report sa kinitaan ug mga galastohan sa Simbahan gipahibalo diha sa kinatibuk-ang komperensiya. Kini nga mga report nagpakita nga kadaghanan sa mga pundo gigamit alang sa mga gambalay sa ward ug stake, mga gambalay sa punoang buhatan, mga eskwelahan sa Simbahan, mga misyon, ug mga pagtabang.¹⁵ Human sa 1959, ang mga auditor mipresentar lamang diha sa kinatibuk-ang komperensiya sa mga resulta sa usa ka tinuig nga kinatibuk-ang pag-audit, nagseguro sa publiko nga ang mga lider misunod sa responsable nga pinansiyal nga mga paagi ug nagmatinuoron sa ilang paggamit sa mga pundo sa Simbahan.

Ang nanghinobra nga paggasto sa mapangandoyon nga internasyonal nga programa sa Simbahan sa pagtukod og mga gambalay sa ward ug stake atol sa mga 1960 mihurot sa mga pundo sa mga account sa Simbahan. Si N. Eldon Tanner, kanhiay usa ka propesyonal sa patigayon, gitawag ngadto sa Unang Kapangulohan niadtong 1963 ug mipaila og higpit nga mga pagkontrol sa badyet diha sa mga operasyon sa Simbahan. Milatid siya og usa ka pinansiyal nga plano nga miawhag sa pagtigom og sobra nga pundo, pagmentinar og higpit nga badyet, ug paggasto gikan sa mga reserba nga pundo. Sulod sa mubo nga panahon, ang Simbahan nakakab-ot sa mga badyet niini alang sa operasyon ug sa pagbayad sa mga utang niini.¹⁶

Kining napalambo nga pinansiyal nga kahimtang mitugot sa Simbahan nga mas epektibong makasuporta sa daghang aspeto sa misyon niini. Sama pananglit, sukad sa sayong bahin sa mga 1900, ang lokal nga mga ward ug mga stake mikuha sa ilang badyet pinaagi sa nagsagol nga lokal nga mga donasyon ug mga pundo sa ikapulo. Niadtong 1990, ang Konseho sa Paggasto sa mga Ikapulo mipahibalo nga tanang gasto sa operasyon sa lokal nga mga yunit pagabayaran gikan sa kinatibuk-ang mga pundo sa ikapulo. Pagkasunod tuig, ang usa ka gihiusa nga pundo alang sa misyonaryo mitugot sa binulan nga mga gasto sa full-time nga misyonaryo nga pagserbisyo nga mahimong patas sa tanang misyon.¹⁷

Human sa mga dekada nga paggasto sa sobra nga mga pundo ug mainampingon nga pagplano, ang matinud-anon nga mga amot sa mga Santos sa Ulahing mga Adlaw miresulta sa dakong natigom nga mga reserba nga pundo sa Simbahan, kadaghanan niini gipamuhonan og usab sa mga lider Simbahan, gitigom alang sa umaabot nga mga panginahanglan, o gigamit alang sa makitawhanon ug sa mga proyekto alang sa pagbag-o og usab sa siyudad [urban renewal] sa tibuok kalibotan.¹⁸ Sugod niadtong 2013, ang Simbahan mihimo og tinuig nga report nga nagdetalye sa paggasto niini sa makitawhanon nga mga paningkamot.¹⁹

Niadtong 2019, ang Presidente sa Simbahan nga si Russell M. Nelson midirekta sa pagtipon sa Corporation of the Presiding Bishop ug sa Corporation of the President, ug ang miresulta nga korporasyon giusab ang ngalan ngadto sa Ang Simbahan ni Jesukristo sa mga Santos sa Ulahing mga Adlaw.²⁰ Nianang sama nga tuig, ang Unang Kapangulohan misubli sa ilang pasalig sa maalamon nga paggamit sa sagrado nga mga pundo sa Simbahan: “Seryoso kami sa responsibilidad sa pag-amping sa mga ikapulo ug mga donasyon nga nadawat gikan sa mga miyembro. Ang kadaghanan gayod niini nga mga pundo gigamit dayon aron sa pagtubag sa mga panginahanglan sa nagkadako nga Simbahan lakip sa dugang nga mga meetinghouse, mga templo, edukasyon, makitawhanon nga buhat ug misyonaryo nga mga paningkamot sa tibuok kalibotan.”²¹

May Kalabotan nga mga Hisgotanan: Nagkahiusang Kapunongan (“Balaan nga Kapunongan”), Ang Kirtland Safety Society, Bishop, Pagpahinungod ug Pagkatinugyanan, Ikapulo, Paghusay sa mga Kabtangan ni Joseph Smith, Kooperatiba nga Kalihokan, Nagkahiusang mga Kapunongan, Wilford Woodruff, Lorenzo Snow, Heber J. Grant