Gordon B. Hinckley
Si Gordon Bitner Hinckley miserbisyo isip ang ika-15 nga Presidente sa Simbahan tali sa 1995 ug sa iyang kamatayon niadtong 2008. Siya natawo niadtong Hunyo 23, 1910, isip unang anak ni Ada ug Bryant Hinckley, kinsa miamuma kaniya diha sa usa ka dako, suod nga pamilya sa Siyudad sa Salt Lake, Utah, ug mipadako niya nga adunay gugma sa pagkat-on ug lig-on nga pagtuo. Sa bata pa, si Gordon dili himsog (kausa gikonsiderar nga usa ka “niwang, maluyahon nga bata”), apan nakat-onan niya ang pagkugi ug lig-on nga batasan sa panarbaho samtang nagsuhid ug naghago sa uma sa iyang pamilya sa dapit sa East Mill Creek sa Walog sa Salt Lake. Migradwar siya gikan sa high school niadtong 1928 ug nagsugod dayon og eskwela sa University of Utah. Human mahagsa ang stock market sa Estados Unidos niadtong 1929, ang kawalay trabaho sa dapit sa Salt Lake misaka pag-ayo, apan nakahimo siya sa pagpadayon sa iyang trabaho isip trabahante sa maintenance ug nakapadayon sa pagbayad sa iyang pag-eskwela. Subo lang, ang iyang inahan nga si Ada namatay tungod sa kanser paglabay sa usa ka tuig, sa dihang 20 pa si Gordon, nagsugod sa panahon sa “kawalay kadasig.” Siya migradwar nga adunay kurso sa English niadtong 1932 ug naglantaw og karera sa peryodismo.
Bisan kon pipila lang ka batan-ong lalaki ang gitawag nga moserbisyo og full-time nga mga misyon atol sa Dakong Pagkahagsa sa Ekonomiya, ang bishop ni Gordon miduol kaniya nga adunay “usa ka makapakurat nga sugyot,” sa nahinumdoman ni Gordon, sa pag-adto og misyon. Ang bangko nga iyang gidepositohan sa iyang tinigom nanira bag-ohay lang, apan ang amahan ni Gordon nga si Bryant misaad nga “buhaton ang tanan kutob sa among mahimo“ aron masuportahan ang misyon. Ang agianan gihawanan alang ni Gordon nga modawat sa tawag salamat sa gamay nga tinigom nga gibilin sa iyang inahan gikan sa mga sukli sa iyang pagpamalit og grocery. Iyang giampingan ang mga sensilyo sa iyang mama, miingon siya, “sa akong dungog.” Siya mibiya alang sa iyang asaynment sa European Mission nga adunay ulohang buhatan sa London, England. Nawad-an og gana sa sinugdanan tungod sa mga hagit sa pagpaambit sa ebanghelyo atol sa panahon sa tibuok kalibotan nga ekonomikanhong kalisod, ang desisyon ni Gordon gipalig-on sa paggiya nga iyang nadawat gikan sa iyang amahan nga “kalimti ang imong kaugalingon ug trabaho.” Kini nakadasig kaniya sa hingpit nga pagpahinungod sa iyang kaugalingon sa iyang misyon, maoy hinungdan sa tiunay nga pagkausab sa iyang panglantaw. Sa sayo sa 1934 siya gibalhin aron motrabaho sa mga opisina sa misyon kauban ni Elder Joseph F. Merrill sa Korum sa Napulog Duha ka Apostoles, kinsa nangulo sa misyon. Sa nahibilin sa iyang misyon, siya mitubag sa mga pangutana sa mga sakop sa media ingon man nagsumiter sa iyang kaugalingon nga mga sulat, mga editoryal, ug puno sa impormasyon nga mga artikulo ngadto sa mga pamantalaan sa paglaom nga mapakgang ang sayop nga mga taho mahitungod sa mga Santos sa Ulahing mga Adlaw ug sa Simbahan.
Si Gordon B. Hinckley isip usa ka misyonaryo, nagsangyaw sa Hyde Park, London, Hulyo 1934.
Wala madugay human mipauli gikan sa iyang misyonaryo nga pagserbisyo niadtong 1935, si Gordon gidapit nga makighimamat sa Unang Kapangulohan aron hisgotan ang mga paagi sa pagpalambo sa mga kapanguhaan ug mga materyal alang sa mga misyonaryo. Ang iyang presentasyon misangpot sa iyang pagkatudlo isip executive secretary sa bag-o lang nga giporma nga Komite sa Radyo, Publisidad, ug Literatura sa Misyon sa Simbahan, usa ka posisyon nga nagkinahanglan og full-time nga trabaho isip empleyado sa Simbahan. Gipadaplin ang iyang mga plano nga mosulod sa graduate school, iyang gidawat ang posisyon ug nagsugod sa pagsulat og mga programa sa radyo ug mga pamphlet sa mga misyonaryo, ingon man ang pagbukas og mga pakig-uban sa media ug pagsiksik sa kasaysayan sa Simbahan. Ang iyang trabaho sa komite nagbutang niya sa inadlaw-adlaw nga pakigtinabangay kauban sa senior nga mga lider sa Simbahan atol sa panahon sa pagpalapad og mga misyon ug pangsibya nga media sa tibuok kalibotan.
Niadtong 1937, si Gordon nakigminyo ni Marjorie Pay, usa ka silingan gikan sa tabok sa kalsada samtang silang duha nagtubo. Sila mibalhin sa balay nga bakasyonan sa mga Hinckley sa East Mill Creek, diin sa kataposan ilang gipadako ang ilang lima ka anak. Isip mga ginikanan, sila naningkamot nga makamugna og mahigugmaon nga palibot diin ang mga anak makasaksi sa hugot nga pagtuo ug dedikasyon sa ilang mga ginikanan. Si Marjorie nagtuo sa pagsalig sa iyang mga anak ug sa pagsulti og “oo” sa kanunay kon posible, naghatag og pipila ka lagda apan nagmintinar og taas nga mga gilaoman. Bililhon sa pamilya ang pagkatawa, naningkamot kada adlaw nga mangita og kataw-anan ug makalipay nga mga interaksyon.
Human sa mubo nga panahon atol sa Ikaduhang Gubat sa Kalibotan isip kaabag nga superintendente alang sa Denver ug Rio Grande nga Rilis, si Gordon mipadayon sa iyang nag-unang mga responsibilidad sa punoang buhatan sa Simbahan ug sa wala madugay gitudlo nga magdumala sa mga sinugdanan sa unsay mahimo unya sa kadugayan nga Departamento sa Misyonaryo. Kauban nila ni Elder Henry D. Moyle ug Stephen L Richards ug Presidente David O. McKay, iyang gipangulohan ang paningkamot sa pagpahapsay sa mga operasyon sa misyon sa Simbahan ug sa pagpauswag sa mga pamaagi sa pagpalambo og mga kandidato sa misyonaryo, pagsuporta sa mga presidente sa misyon, ug sa pagpapauli sa mga misyonaryo kon mahuman na ang ilang serbisyo.
Niadtong 1958, si Presidente David O. McKay mipadangat ni Gordon sa tawag nga moserbisyo isip Kaabag ngadto sa Napulog Duha, usa ka tawag nga mihimo niya nga General Authority sa Simbahan. Ang mga responsibilidad ni Elder Hinckley midala kaniya sa Asia, usa ka rehiyon nga gamay ra kaayo ang iyang nahibaloan kabahin niini. Siya dali ra kaayo nga nakapalambo og gugma alang sa mga tawo didto ug nagpadayon pagbaton og suod nga mga relasyon sa mga misyonaryo, naglantaw og dagko nga mga oportunidad alang sa umaabot nga pagtubo sa stake. Human sa tulo ka tuig niini nga tawag, si Presidente McKay mihangyo ni Elder Hinckley nga moserbisyo sa Korum sa Napulog Duha ka Apostoles. Siya mipadayon sa pagdumala sa buluhaton sa Asia sa misunod nga pito ka tuig, gisundan sa sama nga mga tahas sa South America ug Europe.
Niadtong 1981, si Presidente Spencer W. Kimball mitawag ni Elder Hinckley nga moserbisyo isip ikatulo nga magtatambag sa Unang Kapangulohan, usa ka kalainan sa naandan nga duha ka magtatambag tungod sa dungan nga pagkasakit sa mga sakop sa Unang Kapangulohan. Si Presidente Hinckley mihimo sa mahinungdanong mga responsibilidad, lakip na ang inadlaw-adlaw nga buluhaton sa Unang Kapangulohan ug nag-unang mga paningkamot sa pagtukod ug pagpahinungod sa mga templo. Ang panahon sa multimedia nagdala og dugang nga pagsukit-sukit gikan sa publiko, apan si Presidente Hinckley miawhag sa mga miyembro sa Simbahan nga motutok sa mahimong kaayohan. Ang kapaspason sa iyang pagbiyahe nadugangan pa samtang ang kahimtang sa panglawas ni Presidente Kimball ug sa ubang magtatambag migrabe, ug iya dayon nga nahunahunaan ang panginahanglanon sa pagdelegar sa mga responsibilidad ngadto sa rehiyonal nga pamunoan. Siya nahimong instrumento sa pagmugna og mga Kapangulohan sa Area ug sa paghimo og internasyonal nga pagpahaom sa mga programa sa Simbahan.
Taliwala sa 1981 ug 1985, si Gordon B. Hinckley kanunay nga nag-inusarang nangulo sa kinatibuk-ang komperensiya tungod sa mga hagit sa panglawas sa ubang sakop sa Unang Kapangulohan.
Human sa kamatayon ni Presidente Howard W. Hunter niadtong 1995, si Presidente Hinckley gi-set apart isip Presidente sa Simbahan. Ang iyang kapangulohan naila sa madasigon nga paglambo ug inobasyon niini. Gihimong prayoridad ni Presidente Hinckley ang pagpauswag sa pagpaila sa Simbahan diha sa media ug sa pagpahigayon og mga interbyo sa nasodnong telebisyon ug nagpatawag og mga press conference sa tibuok kalibotan. Iyang gihangop ang teknolohiya ug gisugo ang mga departamento sa Simbahan nga gamiton ang nagtubo nga mga oportunidad sa internet ug multimedia aron sa pagpauswag sa buhat sa ebanghelyo, lakip na ang pagsibya sa mga miting ug pagpalambo sa mga himan alang sa family history. Niadtong 1995, iyang gipaila ang “Ang Pamilya: Usa ka Pamahayag ngadto sa Kalibotan” ug nagdasig og pakigtambayayong sa ubang mga simbahan ug mga organisasyon aron dugangan ang suporta sa katilingban alang sa pamilya. Niadtong 1997, si Presidente Hinckley nangulo sa tibuok simbahan nga pagsaulog sa ika-150 nga anibersaryo sa pag-abot sa mga pioneer sa Walog sa Salt Lake, gihatagan og gibug-aton ang matinud-anon nga pundasyon nga gitukod niadtong unang mga Santos sa Ulahing mga Adlaw alang sa tanang miyembro sa Simbahan, bisan unsa pa man ang indibidwal nga gigikanan.
Si Presidente Hinckley mihatag og importansiya dili lang kay sa pagpangita og bag-o nga mga miyembro pinaagi sa makugihong misyonaryo nga buhat apan sa pag-amuma ug pagbantay usab kanila nga adunay indibidwal nga atensiyon ug suporta. Nadasig sa Perpetual Emigrating Fund nga nakatabang sa daghang pioneer nga makabiyahe padulong sa Utah, si Presidente Hinckley mimando sa paglunsad sa Perpetual Education Fund aron mahatagan og pundo ang mga estudyante nga mga Santos sa Ulahing mga Adlaw nga nagtinguha og mas taas nga edukasyon. Ang pagtukod og mga templo lain nga nag-unang prayoridad, ilabi na ang ideya nga dalhon ang mga templo nga mas duol sa mga miyembro sa Simbahan sa tibuok kalibotan. Iyang gihimo ug gipatuman ang mga plano alang sa mas gagmay nga mga templo, ug sa kataposan sa tuig 2000, ang Simbahan adunay sobra sa 100 ka magamit nga mga templo. Ubos sa iyahang pagpangulo, ang Conference Center gitukod sa downtown sa Siyudad sa Salt Lake, ug sa higayon sa pagpahinungod niini niadtong 2000, usa kini sa labing dako nga indoor nga awditoryum sa kalibotan.
Duha ka adlaw human sa kinatibuk-ang komperensiya niadtong Abril 2004, si Marjorie Hinckley namatay. Si Presidente Hinckley mipadayag sa publiko sa iyang kaguol ug nagsaulog sa “gugma, pagdasig, ug hugot nga pagtuo ni Marjorie.” Sa misunod nga upat ka tuig, siya nagpadayon sa aktibo nga kapaspason bisan samtang ang iyang kaugalingon nga kahimsog padayon nga mikunhod. Niadtong Enero 2008, siya hilom nga mitaliwan sa iyang balay, gilibotan sa iyang lima ka anak ug sa ilang mga kapikas. Ang iyang malukpanon nga mga pagbiyahe ug istilo sa pagpangulo nakapasuod niya sa mga miyembro sa Simbahan, mga lider sa sibiko, ug kinatibuk-ang tumatambong sa tibuok kalibotan.
Alang sa dugang nga impormasyon mahitungod sa kinabuhi ni Gordon B. Hinckley, tan-awa ang Prophets of the Restoration nga mga bidyo sa history.ChurchofJesusChrist.org o diha sa Gospel Library nga app.
May Kalabotan nga mga Hisgotanan: Pagtukod og Templo, Sibya sa Media, Pagtubo sa Misyonaryo nga Buhat, Mga Branch sa Miyembro nga Nagserbisyo sa Militar