Ang Panan-awon (D&P 76)

Niadtong tinglarag sa 1831, si Elsa ug si John Johnson midawat diha sa ilang panimalay sa Hiram, Ohio, nilang Joseph ug Emma Smith, migahin og usa ka kwarto sa taas isip usa ka opisina diin si Joseph ug ang iyang mga eskriba makatrabaho sa dinasig nga paghubad sa Biblia.¹ Pagka Pebrero 16, 1832, samtang namalandong si Joseph Smith ug Sidney Rigdon sa John 5:29, usa ka tudling kalabut sa pagkabanhaw, nakaangkon sila og nindot kaayo nga panan-awon sa kinabuhi human sa mortal nga kinabuhi. “Pinaagi sa gahum sa espiritu ang among mga mata nabuksan ug ang among mga panabut nalamdagan,” sila misulat, “ aron makakita ug makasabut sa mga butang sa Dios.”² Si Philo Dibble, kinsa anaa usab didto sa lawak nga gihimo ang paghubad nianang adlawa, nakahinumdom nga siya “mibati sa gahum, apan wala makakita sa panan-awon.”³ Ang asoy ni Joseph ug Sidney sa ilang kasinatian sa wala madugay natala diha sa libro sa pagpadayag sa Simbahan, gikopya sa mga misyonaryo para mapaambit sa mga branch sa Simbahan, ug gimantala diha sa pamantalaan sa Simbahan.

“Ang Panan-awon,” nga maoy gitawag sa mga Santos nga bag-ong pagpadayag, mihulagway sa daghang matang sa langit o mga ang-ang sa himaya nga maangkon sa katawhan human sa kinabuhi. Gipadayag usab niini nga tanan apan gamay lang sa mga anak sa Langitnong Amahan ang makapanunod og gingharian sa himaya. Ang pipila sa mga Santos madasigon sa pagpakatap sa balita. Si William W. Phelps, pananglitan, mitawag niini nga “ang labing talagsaon nga balita nga namantala ngadto sa tawo.”⁴ Para sa uban ang Panan-awon nakapahasol. Nagtuo sila nga tingali nagtudlo kini og mga baruganan nga susama sa gitudlo sa Universalism, usa ka relihiyusong kalihokan nga mituo nga ang tanan, maluwas, dili igsapayan sa ilang mga binuhatan. Kini nga pagtulun-an giisip nga usa ka pagyama-yama sa daghang mga Kristiyano kinsa nakasabut nga ang kinabuhi human sa kamatayon nabahin lamang sa langit ug impiyerno. “Usa kadto sa dakong pagsulay sa daghan,” mihisgut si Brigham Young, kinsa nabunyagan sa wala madugay human ang Panan-awon nadawat.⁵ “Ang akong mga tradisyon mao, nga sa dihang ang Panan-awon miabut og una ngari kanako, kini supak gayud ug sukwahi sa akong kanhiay nga edukasyon.” Mapailubon si Young, apan, samtang nagtinguha siya sa pagsabut sa kahulugan niining pagpadayag. “Kanunay akong naghunahuna ug nag-ampo, sa pagbasa ug paghunahuna,” mihinumdom siya, “hangtud nga akong mahibaloan ug hingpit nga masabtan kini mismo.”⁶

Nagpadayon si Joseph sa pagtinguha og kahibalo pinaagi sa pagpadayag kabahin sa kinaiyahan sa kaluwasan, sa mga ang-ang sa himaya, ug sa pagkabanhaw.⁷ Sa Nauvoo, ang iyang mga wali kabahin sa balaan nga kinaiyahan ug potensyal sa katawhan, ingon man ang dugang pagpadayag kabahin sa mahangturon nga kinaiyahan sa relasyon sa pamilya, nakatabang sa mga Santos nga makasabut sa kahulugan sa kahimayaan ug sa celestial nga himaya ug sa gisaad nga panalangin niadtong kinsa mosunod ni Jesukristo. Sama ni Brigham Young, ang mga Santos nag-anam og hangop sa mga pagtulun-an nga gipahayag diha sa Panan-awon, ug karon kini gisaulog isip lahi nga mga tinuohan sa mga Santos sa Ulahing mga Adlaw.

May Kalabutan nga mga Hisgutanan: Revelations of Joseph Smith, Joseph Smith Translation of the Bible