“Pag-imprinta ug Pagmantala sa Basahon ni Mormon,” Mga Hisgutanan sa Kasaysayan sa Simbahan
“Pag-imprinta ug Pagmantala sa Basahon ni Mormon”
Pag-imprinta ug Pagmantala sa Basahon ni Mormon
Usa ka gamayng grupo sa mga tumutuo misuporta ni Joseph Smith pinaagi sa proseso sa paghubad sa Basahon ni Mormon, apan walay usa kanila nga nakasinati sa pag-imprinta. Nagkat-on samtang sila mipadayon, si Joseph Smith ug ang iyang mga kaubanan mitrabaho aron makuha ang mga serbisyo sa pag-imprinta, makabayad sa proseso sa pag-imprinta, ug matubag ang lokal nga mga oposisyon sa pagmantala sa sagrado nga rekord. Ang plano nila sa unang pag-imprinta og 5,000 ka kopya sa Basahon ni Mormon dako ra kaayo—molabaw sa kaduha sa igo-igo nga gidak-on alang sa usa ka libro niana nga panahon.1
E. B. Grandin Building, Palmyra, New York
Pagkuha sa Copyright
Napatunhay ni Joseph Smith ang pagkontrolar sa pag-imprinta ug pagpang-apud-apud sa Basahon ni Mormon sa Estados Unidos pinaagi sa pag-angkon og federal copyright alang sa teksto. Gisunod niya ang legal nga mga gikinahanglan alang sa pagkuha og copyright pinaagi sa pag-angkon og usa ka kopya sa ulohan sa pahina nga gideposito sa klerk didto sa korte sa federal district ug nagbayad alang sa sertipiko sa copyright.
Pagpangita og Tigprinta
Ang lokal nga mga tigprinta mibalibad sa giplanong libro nga ipaprinta, ug dili lang tungod sa relihiyusong katahap. Ang pagprinta og usa ka libro nga ingon ka dako ug ingon ka mahal sama sa Basahon ni Mormon gikinahanglan ang kabatid ug puhonan sa bag-ong matang ug mga kagamitan. Gibisita ni Joseph Smith ug Martin Harris ang pipila ka mga printahanan bahin sa proyekto. Tulo ka mga printahanan sa Palmyra ug Rochester—Egbert Grandin, Jonathan Hadley, ug Thurlow Weed—mibalibad kanila, ug si Grandin misulay pa gani sa pagpugong ni Harris sa paghatag og pundo sa libro. Sa dihang ang printahanan sa Rochester nga si Elihu Marshall miuyon sa pagmantala sa libro, si Joseph ug Martin mibalik ngadto ni Grandin sa Palmyra, nanghinaut nga maprinta ang libro nga duol ra sa panimalay. Mitanyag si Harris sa pagprenda og bahin sa iyang uma isip collateral, ug ang mga tawo nakigsabut sa mga termino. Niadtong Agosto 1829, gipirmahan ni Harris ang pagprenda ngadto ni Grandin, ug ang produksyon sa Basahon ni Mormon gisugdan.
Pagpanalipod sa mga Manuskrito
Ang nag-unang pagkawala sa 116 ka mga pahina sa manuskrito sa Basahon ni Mormon gidunganan sa nagkagrabe nga antagonismo didto sa dapit sa Palmyra nakapaagni ni Joseph ug sa iyang mga sumusunod sa pagpanalipod sa teksto panahon sa pag-imprinta. Gihatag ni Olivery Cowdery ang usa ka kopya sa manuskrito sa tigprinta, usa ka kopya sa orihinal aron sa paggamit diha sa proseso sa pag-imprinta. Gibyahe ni Hyrum Smith ang mga pahina sa manuskrito sa tigprinta ngadto sa kompositor nga si John Gilbert, usa sa mga trabahante sa Grandin, nga gianam-anam, usahay taguon ang mga pahina ilalum sa iyang vest alang sa siguridad. Ang matag usa nilang Martin Harris, Oliver Cowdery, Hyrum Smith, ug Peter Whitmer Jr. mibisita og panagsa sa shop sa Grandin aron sa pagdumala sa pagkadala sa manuskristo.
Ang manuskrito sa tigprinta hapit walay panulbok [punctuation], napasagdan nga si Gilbert mismo ang nagbutang og panulbok. Sa sinugdanan, si Hyrum mibalibad nga isalig ang mga pahina og usa ka gabii ni Gilbert apan si Gilbert mikombinser ni Hyrum nga ang pagpabilin sa mga pahina sa igong gidugayon aron mabutangan kini sa mga panulbok makapaminos sa panahon nga gikinahanglan alang sa typesetting.
Pagsagubang sa Oposisyon ug Boycott
Bisan og ang mga pahina sa manuskrito nagpabilin nga luwas, usa ka lokal nga satirista nga ginganlan og Abner Cole mipahimulos sa wala bantayi nga mga panid nga gi-proof sa buhatan sa Grandin pinaagi sa pagkopya sa mga tudling gikan sa Basahon ni Mormon diha sa iyang kaugalingong pamantalaan. Gani sa wala pa gimantala ang Basahon ni Mormon, kinahanglan nga panghingusgan ni Joseph ang awtoridad sa katungod sa copyright aron mahunong ang dili awtorisadong publikasyon ni Cole sa mga kinutlo [excerpts]. Sa dihang mikatap na hugon-hugon nga ang Basahon ni Mormon sa dili madugay mahimo nang ibaligya, ang mga lokal gikataho nga miorganisar og usa ka pag-boycott. Si Martin Harris nabalaka nga mawagtangan siya sa iyang gipanag-iya nga umahan ug mihangyo ni Joseph og usa ka bag-ong kasabutan nga mahatagan siya og usa ka bahin sa kinitaan gikan sa halin sa basahon hangtud nga ang iyang giprenda malukat.
Nabalaka mahitungod sa panalapi sa simbahan nga sa dili madugay ilang iorganisar, si Joseph ug ang uban nangita og dugang nga mga paagi sa pagtigum og pundo gikan sa Basahon ni Mormon. Si Hyrum Smith misugyot ngadto ni Joseph nga ilang ikonsiderar ang pagbaligya sa katungod sa pagpakopya ug pagpang-apud-apod sa Basahon ni Mormon (sa kaugalingon nilang pulong, “ibaligya ang copyright”) sa Canada. Si Hiram Page, kinsa mitabang sa paningkamot, sa kaulahian miingon sa mga kaigsoonan nanghinaut nga ang halin mahimong $8,000. Nakadawat si Joseph og usa ka pagpadayag nga nagsaad kaniya nga ang kasamtangang mga problema dili makababag sa pagmantala ug mihatag kaniya og pagtugot sa pagbaligya sa copyright didto sa Canada “kon ang mga Katawhan dili mopatig-a sa ilang mga kasingkasing batok sa mga pagdani sa akong espiritu & sa akong pulong.” Ang mga ahente nga nagrepresentar ni Joseph Smith mibyahe ngadto sa Kingston, sa ibabaw nga bahin sa Canada, apan nahibalik nga wala molampos.2
Pagpamaligya sa mga Basahon
Sa higayon nga naprinta ug gihugpong [bound], ang Basahon ni Mormon mahimo nang ibaligya sa tindahan sa Grandin. Si Oliver Cowdery, Martin Harris, Samuel Smith, ug ang uban naglibut sa pagsangyaw nga nagtuboy sa basahon. Ang mga kopya wala kaayo mahalin sa sinugdanan sa dapit sa Palmyra, ug usa katuig human sa pagmantala, ang kabtangan ni Harris nabaligya ngadto sa usa ka tigpamuhunan kinsa mipalit sa prenda gikan sa Grandin.3 Apan ang kaikag sa basahon nagkadako sulod sa misunod nga mga tuig samtang ang mga misyonaryo midala og mga kopya sa tibuok nasud. Sa katapusan si Harris naimpasan, ug ang panginahanglan sa basahon taas na nga si Joseph nakigsabut alang sa ikaduha nga pag-imprinta niadtong 1837.
Pagpanalipod sa mga Manuskrito
Sa kasagaran ilabay na sa tagsulat ang mga manuskristo human ang ilang teksto namantala, apan si Joseph Smith ug Oliver Cowdery gipabilin ang orihinal ug ang manuskristo sa tigprinta sulod sa pipila ka higayon. Niadtong 1841, si Joseph mipahimutang sa orihinal nga manuskrito didto sa gawang sa cornerstone sa Nauvoo House. Paglabay sa panahon, ang kadaghanan niining manuskrito nadugta tungod sa tubig nga mituhop ngadto sa cornerstone deposit. Ang nasalbar nga mga pahina—28 ka porsyento sa manuskrito—gibutang sa Church History Library sa Siyudad sa Salt Lake. Ang manuskrito sa tigprinta gipreserbar sa pamilyang Cowdery ug Whitmer ug tibuok nga nakalahutay. Karon gitipigan diha sa Chuch History Library, ang mga manuskrito sa tigprinta nakahatag og lahi nga panglantaw sa paghubad ug produksyon sa Basahon ni Mormon.
May Kalabutan nga mga Hisgutanan: Mga Kritiko sa Basahon ni Mormon, Palmyra ug Manchester, Hubad sa Basahon ni Mormon