“Nagkahiusang mga Kapunongan,” Mga Hisgutanan sa Kasaysayan sa Simbahan
“Nagkahiusang mga Kapunongan”
Nagkahiusang mga Kapunongan
Sa mga 1860 sa Teritoryo sa Utah, nagpaabut si Brigham Young nga ang pag-abut sa mga agianan sa tren modala og bag-ong negosyo ug mousab sa ekonomiya sa Kasadpan.1 Aron sa pagpabilin sa mga palitunon nga barato ug sa pagpanalipod sa lokal nga mga mag-uuma, siya ug ang ubang mga lider mihan-ay og usa ka eksklusibo nga kooperatiba nga network tali sa mga negosyante nga Santos sa Ulahing mga Adlaw ug sa tigsangkap og mga produkto.2 Kining kooperatiba nga mga establisimiyento milampos sa makadiyot sa pagpugong sa pipila ka baligya gikan sa gawas, apan samtang ang lokal nga ekonomiya mitubo lapas sa abilidad sa pag-amuma sa kaugalingon atol sa mga 1870, daghang mga tawo ang namalit og mga baligya nga utangon ug nangita og trabaho kay sa mohimo sa ilang kaugalingong mga produkto. Kasamok sa negosyo kaniadtong 1873 mimatuod sa daghang mga kabalaka ni Brigham Young—mga utang ug mga pagkabangkaruta nagkadaghan sa tibuok teritoryo, ug ang mga tumong sa kooperatiba nga kalihokan ingon og nahinay sa komersyal nga mga kalihokan sa regular nga mga mamamalit.3
Ang mga patigayon ug kooperatiba nga mga institusyon subay sa Labing Dako nga Dalan, Siyudad sa Salt Lake.
Tuyo ang pagsuporta sa mas gagmay nga mga komunidad nga mga kapanguhaan batok sa interes sa gawas, lokal ug kinatibuk-ang mga lider sa Simbahan mipalambo og usa ka sistema sa pagka-mga 1880 nga ilang gitawag og “Nagkahiusang Kapunongan” diha sa mga 150 ka mga panimuyoan. Dili sama sa kooperatiba nga mga network nga kasagaran naglangkob og mga negosyante, kini nga sistema nagtawag sa tanang miyembro sa komunidad sa pagtipon sa ilang mga kahago ug sweldo sa pagbatok sa nagtubo nga mga palitunon gikan sa gawas, pagsuporta sa lokal nga produkto, pagpalambo og bag-ong mga industriya, ug sa pagtubag sa mga panginahanglan sa mga kabus. Samtang gipatuman ni Joseph Smith ang balaod sa pagpahinungod pinaagi sa pagdumala sa mga bishop, ang Nagkahiusang mga Kapunongan migamit sa mga pakigsaad sa pagpahinungod ngadto sa tanang mga relasyong pangsibiko, gikan sa mga nagpatrabaho ug mga nanagtrabaho ngadto sa mga pundok sa mga direktor sa negosyo ug mga tigpamuhunan.
Diha sa dakong mayoriya sa Nagkahiusang mga Kapunongan sa Teritoryo sa Utah, ang mga miyembro miamut ngadto sa usa ka komon nga pundo, modawat og mamalit og stock ug mobayad og mga dibidendo sa kantidad nga gipalit sa stock, ug gikutohan ang ilang kahago ug pamaligya sa lokal nga panginahanglan. Sa kinatibuk-an ang mga kababayen-an ang responsable sa mga buluhaton sa paghimo og mga panapton, edukasyon, pangluto, ug medikal ug mananabang nga pag-amuma, samtang ang mga kalalakin-an naghago sa mga proyekto sa pang-uma ug pagtukod og mga building, paghimo og mga dalan [infrastructure].4 Apan dili tanang Nagkahiusang mga Kapunongan naglihok sa samang paagi. Sa “Nagkahiusang Kapunongan ni Enoch” sa St. George, ang mga aplikante mipakita sa ilang mga saad sa pakigsaad pinaagi sa pagpabunyag og usab ug nagsaad sa pagsunod sa mga lagda sa kapunongan ug mipili sila og mga manager sa hunta sa pagdumala sa nagkalainlaing mga kalihokan sa komunidad; sa Siyudad sa Brigham, usa ka hunta sa mga manager mipalugway og dako sa kooperatiba nga network ngadto sa tanang tagilungsod. Sa Orderville ug Price, ang mga miyembro sa kapunongan mitumong alang sa hingpit nga pagtinabangay sa pagpuyo; ang hunta sa mga manager mihimo og iskedyul sa trabaho, mi-assign og trabaho, ug mi-kontrol sa pagkaon ug sa pagbinayloay og baligya.5
Mapa sa Orderville, Utah, 1875.
Samtang ang mga opisyal sa pederal nanghingusog sa ilang pagpatuman sa mga balaod sa supak sa daghan og asawa kaniadtong mga 1880, daghang Nagkahiusang mga Kapunongan ang nalimbasug sa pagpabilin sa ilang pagkamiyembro taliwala sa mga pagsulong sa gobyerno.6 Mga kalihokang pangnegosyo mipadayon sa pagkadaghan, ug kadaghanan sa mga Santos sa Ulahing mga Adlaw mipili sa pakig-uban ngadto sa nagkadako nga ekonomiya nga walay pagkontrol sa gobyerno. Sa mga 1890 ang kooperatiba nga mga institusyon ug ang Nagkahiusang mga Kapunongan nasira o nabalhin ngadto sa mga pribadong mga negosyo.
Ang Pulong Nagkahiusang Kapunongan diha sa Doktrina ug mga Pakigsaad
Ang pulong Nagkahiusang Kapunongan gigamit ngadto sa nagkalainlaing mga sistema sa tibuok ika-19 nga siglo. Tali sa 1832 ug 1834, si Joseph Smith ug ubang mga kauban nagbinuligay sa pagdumala og daghang negosyo, pang-imprinta, talyer, ug mga pamasin nga pamaligya og yuta pinaagi sa organisasyon nga gitawag og Nagkahiusang Kompaniya, usa ka lahi nga kalihokan sa sistema sa Simbahan sa pagpahinungod ug sa pagkatinugyanan nga gidumala ni Bishop Edward Partridge. Sa dihang ang mga pagpadayag nga naghisgot sa kompaniya unang gimantala diha sa Doktrina ug mga Pakigsaad, tinakpang mga ngalan miilis sa tinuod nga ngalan aron sa pagpreserbar sa pagkapribado ug ang ngalan nga “Nagkahiusang Kompaniya” giilisan ngadto sa “Nagkahiusang Kapunongan.” Ang mga Santos sa Ulahing mga Adlaw kinsa wala mahiapil sa kompaniya naglibug sa pulong Nagkahiusang Kapunongan ngadto sa kang Joseph Smith nga unang mga paningkamot sa pagpasunod sa sistema sa pagpahinungod sa kabtangan nga unang gipadayag sa Ginoo diha sa Doktrina ug mga Pakigsaad 42.7
Kalabut nga mga Hisgutanan: Kooperatiba nga Kalihokan, Pagpahinungod ug Pagkatinugyanan, Nagkahiusang Kompaniya (“Nagkahiusang Kapunongan”)