Joseph Smith Sr.

Anak ni Asael ug Mary Duty Smith, si Joseph Smith Sr. natawo niadtong Hulyo 12, 1771, sa Massachusetts. Sa edad nga 24 anyos, iyang giminyoan si Lucy Mack ug mipuyo sa Vermont. Ang magtiayon nahimong ginikanan sa 11 ka mga anak ug dako og natampo sa sayo nga mga buhat sa ilang anak nga si Joseph Smith Jr. sa pagtukod sa simbahan.

Niadtong mga 1802, si Joseph Sr. namuhunan sa gamut sa ginseng, usa ka bililhon nga palaliton, apan ang iyang kasosyo mikawat sa ginansya, hinungdan nga ang pamilyang Smith hapit mabangkarote. Si Joseph Sr mibaligya sa iyang umahan ug mibayad sa ubang mga utang gamit ang bugay [dowry] ni Lucy. Human sa padayong kalisud isip usa ka mag-uuma sa Vermont ug New Hampshire, sa katapusan iyang gibalhin ang iyang pamilya ngadto sa Palmyra, New York, mipalit og umahan duol sa Manchester niadtong 1818.

Sa katuigan, si Joseph Sr. mibalibad sa pag-apil og organisado nga relihiyon. Niadtong 1797, siya ug ang iyang amahan ug igsoong lalaki mipasakop sa Universalist society sa Tunbridge, Vermont. Ang mga Universalist nagtuo sa kaluwasan sa tanang katawhan, dili igsapayan ang relihiyuso nga kalambigitan, ug kasagaran momugna og mga kapunongan imbis mga simbahan.

Si Joseph Smith Sr. usa sa unang misuporta sa propetikanhing buhat sa iyang anak nga lalaki. Sa dihang si anghel Moroni unang mibisita ni Joseph Jr., iyang gisultihan ang batan-ong lalaki sa pagpangayo og tambag sa iyang amahan. Si Joseph Sr. nahimong usa sa Walo ka mga Saksi sa Basahon ni Mormon, ug siya nabunyagan sa adlaw nga natukod ang simbahan.¹ Human sa iyang bunyag, iyang gitudlo ang ebanghelyo ngadto sa iyang mga paryente sa New York. Human mobalhin sa Kirtland, Ohio, niadtong 1831, si Joseph Sr. nagtrabaho sa balay sa Ginoo, mitambong sa Tulunghaan sa mga Propeta, miserbisyo isip sakop sa high council, nagmisyon sa silangang bahin sa Estados Unidos, ug gipaluyohan isip kaabag nga magtatambag sa Unang Kapangulohan.²

Niadtong 1834, si Joseph Jr. mitawag sa iyang amahan isip ang Patriyarka sa Simbahan, ug hangtud sa katapusan sa kinabuhi ni Joseph Sr mipanalangin siya sa mga Santos, kasagaran sa pagpahigayon og mga panagtigum diin moabut og 15 ka mga miyembro ang makadawat sa mga panalangin sa iyang mga kamot. Ang mga partisipante niini nga mga panagtigum kasagaran makasinati og kapuno sa Espiritu. Ang umaabut nga Presidente sa Simbahan nga si Lorenzo Snow nakatambong og usa sa samang mga panagtigum sa wala pa mopasakop sa Simbahan. Mibati siya og kadasig nga nagtan-aw sa patriyarka nga mihatag sa mga panalangin nga siya nakahukom nga seryusong magtuon bahin sa pagtuo sa mga Santos sa Ulahing mga Adlaw.³

Niadtong 1838, si Joseph Sr. mibalhin uban sa iyang pamilya ngadto sa Far West, Missouri. Samtang nagpuyo didto, nakadungog siya og dili tinuod nga mga hungihong nga ang iyang anak nga si Joseph Jr. ug si Hyrum gipamatay. Ang kakurat tungod niini nga balita maoy hinungdan nga siya nakuyapan, ug ang kaguol daw nakaapekto ni Joseph Sr. hangtud sa nahabiling katuigan sa iyang kinabuhi.⁴ Wala kaabut og usa ka tuig human mobalhin sa Far West, ang mga manggugubot mipugos sa pamilyang Smith sa paglayas ngadto sa Illinois. Si Joseph Sr. miabut sa Commerce (sa wala madugay gitawag og Nauvoo), Illinois, sa sayong bahin sa 1839. Bisan sa daw malinawon nga kinabuhi sa Nauvoo, ang panglawas ni Joseph Sr. padayon nga migrabe hangtud nga malinawon siyang mipanaw niadtong Septyembre 14, 1840. Ang iyang pangandoy sa hapit na siya mamatay nga si Joseph Jr. mosiguro nga ang proxy nga pagbunyag alang sa patay mapahigayon alang sa iyang namatay nga anak, si Alvin, kinsa namatay sa wala pa matukod ang Simbahan.⁵

Mga Kapanguhaan sa Simbahan

“Joseph Smith Sr.,” josephsmithpapers.org.

“Family of Joseph Smith Sr. and Lucy Mack Smith: The First Family of the Restoration,” Ensign, Dis. 2005, 7–9.

M. Russell Ballard, “The Family of the Prophet Joseph Smith,” Ensign, Nov. 1991, 5–7.

May Kalabutan nga mga Hisgutanan: Pamilya ni Joseph Sr. ug Lucy Mack Smith, Patriyarka

Mubo nga mga Sulat

1. “Testimony of Eight Witnesses, Late June 1829,” diha sa Basahon Mormon, 1830, 590, josephsmithpapers.org; Mark L. McConkie, “Joseph Smith Sr.,” sa United by Faith: The Joseph Sr. and Lucy Mack Smith Family, ed. Kyle R. Walker (American Fork, Utah: Covenant Communications, 2005), 4–5, 7–11.

2. Minute Book 1, 6–8, 29, 192–93, 234–35, josephsmithpapers.org; Lucy Mack Smith, Biographical Sketches of Joseph Smith, the Prophet, and His Progenitors for Many Generations (Liverpool: S. W. Richards, 1853), 213–14.

3. “Blessing to Joseph Smith Sr. and Lucy Mack Smith, between circa 15 and 28 September 1835,” sa Patriarchal Blessing Book 1, page 9, Church History Library, Salt Lake City, josephsmithpapers.org; McConkie, “Joseph Smith Sr.,” 14–17; Joseph Smith, “History, 1834–1836,” 20, josephsmithpapers.org.

4. Lucy Mack Smith, Biographical Sketches, 249; McConkie, “Joseph Smith Sr.,” 22–23.

5. Joseph Smith, “History, 1838–1856, volume C-1 [2 November 1838–31 July 1842],” 885, josephsmithpapers.org; Lucy Mack Smith, Biographical Sketches, 249–57, 261–70; Eliza R. Snow, “Elegy,” Times and Seasons, vol. 1, no. 12 (Oct. 1840), 190–91.