Bunyag alang sa mga Patay

Ang mga pagpadayag ngadto kang Joseph Smith mimatuod sa panginahanglan sa bunyag alang sa kaluwasan ug gitudlo nga kini nga ordinansa kinahanglang ipahigayon uban sa gipahiuli nga awtoridad sa priesthood. Ang mga miyembro sa Simbahan, lakip si Joseph ug ang iyang pamilya, nagmatinguhaon nga makahibalo sa kahimtang sa ilang mga sakop sa pamilya nga nangamatay na nga walay bunyag.¹ Sila namalandong sa mga tudling sa Bag-ong Tugon kabahin ni Jesukristo nga nagsangyaw ngadto sa mga espiritu nga nabilanggo, ug pipila ka mga Santos adunay pangagpas nga ang mga elder nga Santos sa Ulahing mga Adlaw mobunyag niadtong kinsa “namatay nga ubos sa napakyas nga pakigsaad” sa panahon sa Ikaduhang Pag-anhi ni Jesukristo.²

Niadtong Agosto 15, 1840, sa wala madugay human ang mga Santos mibalhin ngadto sa umaabut nga mga dapit sa Nauvoo, Illinois, si Joseph Smith misangyaw og usa ka wali diha sa lubong sa usa ka miyembro sa Simbahan nga si Seymour Brunson. Nakamatngon sa usa ka babaye nga mitambong kinsa nawad-an sa iyang anak nga lalaki nga wala pa mabunyagi, si Joseph mipadayag nga ang mga Santos “makalihok na karon alang sa ilang mga higala kinsa mibiya niini nga kinabuhi” pinaagi sa pagpabunyag alang kanila. Mikutlo siya sa mga pagtulun-an sa karaan ni Apostol Pablo kalabut sa bunyag alang sa patay ug miawhag sa mga Santos nga maglipay “nga ang plano sa kaluwasan gihimo aron sa pagluwas niadtong kinsa andam sa pagsunod sa mga gikinahanglan sa balaod sa Dios.”³

Ang mga Santos midawat sa pulong niining buhat inubanan sa kadasig ug misugod sa paghimo og mga bunyag diha sa duol nga mga suba ug mga sapa alang sa mga paryente, higala, ug inila nga mga katawhan.⁴ Ang mga bunyag gipahigayon pinaagi sa kalalakin-an nga naghupot sa Melchizedek Priesthood diha sa atubangan sa mga saksi.⁵ Ang unang natala nga mga bunyag gipahigayon ni Harvey Olmstead, kinsa mibunyag ni Jane Neyman alang sa iyang bag-ohay lang nga namatay nga anak nga lalaki, nga si Cyrus. Ang bunyag nahitabo didto sa Suba sa Mississippi ug gisaksihan ni Vienna Jacques, kinsa miubog nga nagsakay og kabayo ngadto sa suba aron madungog ang pag-ampo.⁶

Niadtong Enero 1841, si Joseph Smith nakadawat og usa ka pagpadayag nga ang bunyag alang sa patay gituyo nga ipahigayon sa templo. Ang Ginoo mipasabut nga “kini nga ordinansa pagahimoon diha sa akong balay” ug misugo sa mga Santos aron sa pagkompleto sa templo sa Nauvoo.⁷ Atol sa misunod nga komperensya sa Oktubre, si Joseph Smith mipahibalo nga walay dugang nga mga bunyag alang sa patay nga tugutan hangtud ang bunyaganan [font] sa Templo sa Nauvoo makompleto.⁸ Nianang pagka-Nobyembre, gitaud ang usa ka gikulit gikan sa kahoy nga bunyaganan diha sa basement sa templo, gitabunan kini sa usa ka temporaryo nga atop, ug gipahinungod kini aron mapadayon ang mga pagbunyag.

Sa pagpamalandong sa pagpadayag nga iyang nadawat, si Joseph Smith mitudlo diha sa usa ka sulat ngadto sa Simbahan niadtong 1842 nga bunyag alang sa mga patay kinahanglan nga madokumento sa mainampingon nga paagi, nagsaad sa mga Santos nga kon unsa ang “gitala dinhi sa yuta itala didto sa langit.”⁹ Mao nga, ang mga klerk gitawag aron sa pagsiguro nga ang tanan nga mga bunyag alang sa patay gitala. Taliwala sa 1840 ug 1845, tungod kay walay nadawat nga mas piho nga direksyon, ang mga tawo usahay naglihok isip mga proxy alang sa mga babaye, ug mga babaye alang sa mga lalake. Niadtong 1845, human sa kamatayon ni Joseph Smith, si Brigham Young mipahibalo nga sukad niana nga panahon ang mga Santos “wala gayud makita ang usa ka lalaki mabunyagan alang sa usa ka babaye, ni usa ka babaye alang sa usa ka lalaki.” Siya mipasabut nga “si Joseph sa iyang tibuok kinabuhi wala makadawat sa tanang butang nga may kalabutan sa doktrina sa katubsanan” apan ang Ginoo nagpadayon sa paggiya sa Simbahan pinaagi sa pagpadayag, “naghatag kanila og karon gamay, ug sa lain nga panahon gamay.”¹⁰ Kining kausaban gihimo atol sa usa ka panahon sa dihang ang mga Santos nagsugod sa pagpahigayon sa ubang mga ordinansa alang sa mga patay, lakip sa ordinasyon sa priesthood ug mga pagsilyo sa kaminyoon.¹¹

Ang bag-ong mga teknolohiya, mas dako nga organisasyon, ug usa ka nagkadako nga paghatag og gibug-aton sa kanunayng pagtambong sa templo misangput ngadto sa dugang nga pag-apil sa mga bunyag alang sa patay sa Ika-20 nga siglo. Agig dugang sa pagpahigayon og bunyag alang sa namatay na nga mga paryente, ang mga Santos sa Ulahing mga Adlaw misugod sa paghimo niini nga ordinansa alang sa uban kansang impormasyon sa genealogy ilang nakuha gikan sa mga rekord nga anaa. Sa pipila ka mga higayon, kini naglakip sa inilang mga tawo ug mga indibidwal nga nalambigit sa makasaysayanong mga panghitabo sama sa Holocaust. Ang mga Santos sa Ulahing mga Adlaw nagtuo nga ang bunyag alang sa patay dili makapahimo sa namatay na nga mga tawo nga mamiyembro sa Simbahan. Simple lang nga naghimo kini sa ordinansa nga magamit ngadto sa espiritu niadtong kinsa mitaliwan ug mopili sa pagdawat niini. Bisan pa niana, niadtong mga tuig 1990, pipila sa taga-gawas nga mga tig-obserbar mipahayag og kabalaka mahitungod sa maong buhat. Isip usa ka pagpakita og pagtahud ug pakigdait, ang mga lider sa Simbahan mitangtang sa mga ngalan niining mga indibidwal gikan sa database sa Simbahan, miisyu og mga lagda nga gituyo aron mapugngan ang padayong pagsumiter sa ilang mga ngalan alang sa bunyag, ug giawhag ang mga miyembro sa Simbahan nga tutokan ang pagpahigayon sa mga ordinansa sa templo alang sa ilang kaugalingong mga katigulangan.¹²

Ang mga bunyag alang sa mga patay maoy nahimong kinadugayan nang gigamit ug giapilan isip aspeto sa pagsimba sa mga Santos sa Ulahing mga adlaw diha sa templo. Sa Nauvoo, usa ka panahon sa dihang ang pagtuga [endowment] sa templo gipaila-ila ngadto lamang sa gamay nga grupo, ang mga Santos sa Ulahing mga Adlaw nga mga lalaki ug babaye mipahigayon og liboan ka mga bunyag alang sa mga patay. Atol sa hinapos nga bahin sa ika-19 nga siglo, ang mga kaliwat sa itom nga mga miyembro sa Simbahan sa Africa mipahigayon og mga bunyag alang sa ilang mga paryente diha sa Endowment House ug sa Salt Lake ug sa Templo sa Logan Utah, bisan og dili sila makadawat og mga ordinansa sa templo hangtud niadtong 1978.¹³ Pagsugod sa mga 1920, ang mga grupo sa kabatan-onan sa ward mihimo og regular nga mga pagbiyahe ngadto sa templo aron magpabunyag alang sa mga patay, naghatag sa batan-ong mga miyembro sa Simbahan og oportunidad sa pagtambong sa templo sa dili pa sila ma-endowed.¹⁴ Ang mga kabatan-onan sa Simbahan karon giawhag sa pagsiksik sa ilang mga katigulangan ug regular nga motambong sa templo aron sa paglihok isip mga proxy alang sa bunyag. Niadtong 2017, ang mga lider sa Simbahan mipahibalo nga ang batan-ong mga lalaki nga naghupot sa Aaronic Priesthood nga katungdanan sa priest makahimo og mga bunyag alang sa mga patay.¹⁵

May Kalabutan nga mga Hisgutanan: Nauvoo Temple