“Mga Danite,” Mga Hisgutanan sa Kasaysayan sa Simbahan
“Mga Danite”
Mga Danite
Niadtong 1838, si Joseph Smith ug ang ubang mga miyembro sa Simbahan miikyas gikan sa mga manggugubot nga panon sa Ohio ug mibalhin ngadto sa Missouri, diin ang mga Santos sa Ulahing mga Adlaw nakatukod na og mga puy-anan. Si Joseph Smith nagtuo nga ang oposisyon nga gikan sa mga masinupakon nga mitiwalag sa Simbahan ug ubang mga kaaway nakapahuyang ug sa katapusan nakaguba sa ilang komunidad didto sa Kirtland, Ohio. Sa ting-init sa 1838, nakita sa mga lider sa Simbahan ang pagsugod sa samang mga hulga sa ilang komunidad sa Missouri.
Didto sa puy-anan sa mga Santos sa Ulahing mga Adlaw sa Far West, ang ubang Santos sa Ulahing mga Adlaw mitukod og usa ka grupo nga naila nga ang “Mga Anak nga Babaye sa Zion” o ang “Mga Danite,” kansang katuyoan mao ang pagpanalipod sa komunidad batok sa mga oposisyon nga gikan sa mga masinupakon nga mitiwalag sa Simbahan ug sa mga gipahimulag [excommunicated] nga mga Santos sa Ulahing mga Adlaw ug sa ubang mga taga-Missouri usab. Ang mga Danite mihulga sa mga masupilon sa Simbahan ug ubang mga taga-Misouri; sama pananglit, ilang gipahimangnuan ang ubang mga masupilon sa pagbiya sa Distrito sa Caldwell. Atol sa tinglarag sa 1838, samtang ang mga kasungian nagkagrabe atol sa unsay nailhan karon nga ang Mormon-Missouri nga Gubat, ang mga Danite nahimong sakop sa mga militia nga kadaghanan naglangkob sa mga Santos sa Ulahing mga Adlaw. Kini nga mga militia nagsangka batok sa ilang mga kontra sa Missouri, misangpot sa diyutay nga nangamatay sa duha ka habig. Agig dugang, ang Mormon nga mga vigilante, lakip sa daghang mga Danite, miataki sa duha ka lungsod nga gituohan nga mga sentro sa anti-Mormon nga kalihokan, misunog sa mga panimalay ug mikawat og mga butang.1 Samtang ang mga anti-Mormon nga mga vigilante mitumong ug usahay mipatay og mga sibilyan nga mga Santos sa Ulahing mga Adlaw, ang mga Danite mikuha o miguba ilabi na sa mga kabtangan nga ilang gikahadlokan nga mahimong magamit sa ilang mga kontra.2
Ang mga historian kasagaran mouyon nga si Joseph Smith mitugot sa mga Danite apan wala tingali siya mahibalo sa tanan nilang mga plano ug sagad wala magsugo sa tanan nilang mga kalihokan. Ang mga Danite milungtad lamang og lima ka bulan, gikan sa Hunyo hangtud sa Oktubre 1838, ug aktibo lamang sa duha ka distrito sa amihanang kasadpang Missouri. Bisan og wala magdugay ang mga Danite, kini misangput sa dugay ug sobra ra kaayo nga mga dili katuohan nga istorya mahitungod sa sekreto nga kapunongan sa Mormon nga mga vigilante.
May Kalabutan nga mga Hisgutanan: Mormon-Missouri War of 1838, Extermination Order, Hawn’s Mill Massacre