Ida Hunt Udall

Si Ida Hunt natawo niadtong Marso 8, 1858, sa usa ka tinabunan nga karwahe taliwala sa grabe nga bagyo-nga-yelo, duol sa Cedar City, Utah.¹ Ang iyang mga ginikanan, si John ug Lois Hunt, mipadako ni Ida sa Beaver, Utah, duol sa iyang lola nga si Louisa Barnes Pratt. Sa ulahing bahin sa iyang kabatan-on si Ida mibalhin uban sa iyang pamilya ngadto sa New Mexico ug sa wala madugay ngadto sa silangang Arizona. Siya ginasahan nga mag-aawit ug kasagaran nagtrabaho isip bookkeeper o maestra. Siya nagserbisyo isip unang presidente sa Snowflake Stake’s Young Ladies’ Mutual Improvement Association ug niadtong 1882 nagtudlo sa batan-ong mga babaye sa pagpangita og balaanong pagpadayag. “Kinahanglan kitang molihok alang sa atong kaugalingong kaluwasan,” miingon siya, “ug dili magsalig ni bisan kinsa gawas sa Ginoo.”²

Niadtong Mayo 26, 1882—duha lang gayud ka bulan human mapasa ang Edmunds Act, nga nagdeklarar nga usa ka krimen ang pagpangasawa og daghan—si Ida nasilyo ngadto ni David K. Udall isip iyang ikaduha nga asawa.³ Siya nag-antus sa maong desisyon, nakahibalo nga ang kaminyoon nagpasabut nga makig-ambit ni David sa iyang unang asawa, si Ella, kinsa mikuyog sa duha sa ilang biyahe ngadto sa templo sa St. George sa Utah. Ang kampanya sa gobyerno sa Estados Unidos batok sa mga nangasawa og daghan nakapugos ni Ida nga igahin ang taas nga panahon sa iyang kaminyoon, gikan sa 1883 ngadto sa 1892, nga layo sa iyang bana. Si Ida kanunay nga mibalhin aron makalikay nga mabantayan, ug nag-antus siya sa dili maayo nga kahimtang sa panglawas. Masulub-on siya, nahadlok sa pagpanglutos, ug nabalaka kabahin sa iyang relasyon uban ni Ella, tungod kay usahay ilang gikasilagan ang usag usa. Kadugayan, hinoon, ang duha nakaugmad og suod nga relasyon.⁴ “Sa pagpaningkamot nga motuman sa mga sugo sa Dios, nga adunay tiunay nga motibo sa tanang butang nga ako nagpakabuhi,” si Ida misulat sa iyang kasinatian sa dinaghan nga kaminyoon. “Bisan unsa pa kalisud ang pagsulay, usa ka pribiliheyo ang makasinati niini, sa ingon ka mahimayaon nga katuyoan.”⁵

Ang mga Udall nakasinati og tumang kalisud didto sa Arizona, ug si David, kinsa nagserbisyo isip presidente sa St. John’s Stake, kanunay nga layo tungod sa Simbahan ug sa sibiko nga katuyoan. Si Ida adunay unom ka anak, kinsa mitabang siya nga masuportahan pinaagi sa pagpanguma, pagbaton og kooperatiba nga tindahan, pagtukod og balay sa umahan, ug madaginuton nga paggasto.⁶ Niadtong 1908, sa dihang 50 na siya, si Ida giatake (iyang ikatulo nga pag-atake) nga nakaparalisar sa pikas nga bahin sa iyang lawas. Ang iyang anak nga babaye, si Pauline Udall Smith, ug ang iyang umagad nga lalaki, si Asahel Smith, ang miatiman niya sa misunod nga pito ka tuig hangtud sa iyang kamatayon niadtong Abril 26, 1915.⁷

May kalabutan nga mga Hisgutanan: Antipolygamy Legislation, Louisa Barnes Pratt