Ang Hubad ni Joseph Smith sa Biblia

Samtang naghubad sa Basahon ni Mormon, nakita ni Joseph Smith ug Oliver Cowdery nga naglain-lain ang ilang mga panglantaw sa kahulugan sa usa ka tudling sa Biblia. Sila “nagkasabut nga husayon” ang pangutana “pinaagi sa Urim ug [Thummim].” Isip resulta, si Joseph nakadawat og pagpadayag nga mihatag sa hubad sa asoy pinaagi sa karaang disipulo nga si Juan, gisulat sa papel katalan [parchment] apan nawala sa kasaysayan. Kining unang kasinatian sa pagtinguha og pagpadayag nga mipalapad sa teksto sa tudling sa Biblia usa ka importanting panig-ingnan. Mga usa ka tuig ang milabay, atol sa ting-init sa 1830, si Joseph ug Oliver nakadawat pinaagi sa pagpadayag sa asoy sa panan-awon ni Moises nga wala makita sa Daang Tugon. Kini nga pagpadayag mitimaan sa sinugdanan sa mga paningkamot ni Joseph Smith sa pag-andam og dinasig nga pag-usab o paghubad sa Biblia. Sulod sa misunod nga tulo ka tuig, si Joseph mipadayon og trabaho sa iyang “bag-o nga hubad sa Biblia,” gikonsiderar ang proyekto nga kabahin sa [iyang] calling” isip usa ka propeta sa Dios.¹

hulagway sa duha ka tawo nga nagtinabangay og trabaho sa mga papel nga anaa ibabaw sa lamesa — Paghulagway sa artist ni Joseph Smith ug Sidney Rigdon nga nagtrabaho sa paghubad sa Biblia.

Si Joseph Smith wala mogamit og Hebreohanon ug Griyego nga mga kapanguhaan, mga lexicon, o kahibalo sa mga pinulongan sa biblia aron sa paghatag og bag-o nga Iningles nga teksto. Hinoon, siya migamit og kopya sa King James Bible isip sinugdanan sa iyang paghubad, magdiktar sa dinasig nga mga kausaban ug ikadugang ngadto sa mga tigsulat kinsa morekord usa niini sa papel ug dayon isip mubo nga mga sulat sa mga kilid sa Biblia mismo. Ang iyang mga gipang-usab mabutang sa nagkalain-lain nga mga kategoriya. Ang iyang nag-unang buhat sa paghubad miresulta sa taas nga gipadayag nga mga tudling nga gidiktar ni Joseph ngadto sa iyang mga tigsulat, sama sa iyang gibuhat sa dihang nakadawat og mga pagpadayag diha sa Doktrina ug mga Pakigsaad.² Kini nga mga tudling usahay makapataas kaayo sa mga teksto sa biblia. Ang labing nailhan nga ehemplo niini nga klase sa pag-usab makita karon diha sa basahon ni Moises diha sa Perlas nga Labing Bililhon. Si Joseph Smith mihimo usab og daghang ginagmay nga mga kausaban nga nakapanindot sa grammar, nakapamoderno sa pinulongan, mikoriher sa mga punto sa doktrina, o mipasabut sa mga wala magkatakdo. Samtang siya nagtrabaho niini nga mga kausaban, sa daghang kahigayunan siya daw mikonsulta sa tinamud nga mga komentaryo sa mga eskolar sa biblia, gitun-an diha sa iyang huna-huna isip kabahin sa proseso sa pagpadayag.³

Si Joseph mipadayon sa pagsugod gikan sa Genesis 1 diha sa Daang Tugon hangtud nga ang usa ka pagpadayag niadtong 1831 nagsugo kaniya sa pagbalhin ngadto sa Bag-ong Tugon. Sa dihang nahuman sa Bag-ong Tugon, si Joseph mipadayon kon diin siya mibiya sa Genesis ug mihuman sa iyang trabaho sa Daang Tugon pagka-Hulyo 1833. Si Joseph sa makadiyut mikonsiderar sa paghubad sa Apokripa, usa ka pinili nga mga basahon nga giila nga kasulatan sa Katoliko ug Orthodox nga mga Kristiyano apan gisalikway sa daghang mga Protestante. Usa ka pagpadayag ang misugo ni Joseph nga dili hubaron ang apokripa nga mga sinulat bisan paman nga ang maong mga sinulat naglangkob sa “daghang mga butang … nga mga tinuod.”⁴

Ang buhat ni Joseph Smith sa pag-usab sa Biblia miresulta sa pipila ka mga pagpadayag nga karon anaa sa Doktrina ug mga Pakigsaad. Tingali ang labing talagsaon niini nahitabo sa dihang si Joseph Smitn ug Sidney Rigdon naghunahuna unsaon paghubad sa Juan 5:29, usa ka tudling nga naghisgut sa pagkabanhaw sa mga patay, ug napanalanginan og usa ka pagpadayag nga panan-awon sa mga ang-ang sa himaya diha sa sunod nga kinabuhi (DP 76).⁵ Ubay-ubay nga mga yugto nahitabo atol sa proseso sa pag-usab sa Biblia, nag-aghat sa mga pagpadayag mahitungod sa Mateo 13; 1 Mga Taga-Corinto 7; ug ang Basahon sa Pinadayag.⁶

Human sa kamatayon ni Joseph Smith, ang mga manuskrito sa paghubad sa Biblia nagpabilin sa iyang asawa nga si Emma hangtud nga siya mihatag niini ngadto sa iyang anak nga si Joseph Smith III, kinsa nangulo sa Reorganized nga Simbahan ni Jesukristo sa mga Santos sa Ulahing mga Adlaw. Ang Reorganized nga Simbahan (nga karon Community of Christ) mimantala sa mga pag-usab ni Joseph niadtong 1867 ubos sa ulohan nga Ang Balaan nga mga Kasulatan, Gihubad ug Gikorehian pinaagi sa Espiritu sa Pagpadayag, apan ang volume dali nga nailhan isip ang “Dinasig nga Bersyon sa Biblia.”⁷ Si Brigham Young, nga niadto mao ang Presidente sa Simbahan, mipahayag og pagduha-duha sa katinuod sa Dinasig nga Bersyon, kay wala siya mismo nahatagi og kahigayunan sa pagribyu sa tinubdan sa manuskrito. Bisan sa paghupot na sa sinulat nga kopya sa ubang nausab nga mga manuskrito, ang Simbahan ubos sa direksyon ni Presidente Young ug human niana wala momantala sa edisyon.⁸

Atol sa mga 1960, ang eskolar sa Reorganized nga mga Santos sa Ulahing mga Adlaw nga si Richard P. Howard ug ang eskolar sa Santos sa Ulahing mga Adlaw nga si Robert J. Matthews tagsa-tagsang mituon sa mga manuskrito aron sa pagmatuod [authenticate] sa gimantala nga mga edisyon gamit ang orihinal nga mga teksto. Ang Reorganized nga Simbahan mihimo nga ang mga manuskrito magamit ug mihatag sa Simbahan sa mga Santos sa Ulahing mga Adlaw og pagtugot sa pagmantala sa mga kinutlo isip mga footnote ug endnote sa 1979 nga Santos sa Ulahing mga Adlaw [LDS] nga edisyon sa Biblia. Ang padayon nga pagsiksik gikan niini nga pagtinabangay misangput sa pagmantala sa kompleto nga pag-usab sa mga manuskrito sa Biblia niadtong 2004 ug usab isip kabahin sa Joseph Smith Papers.⁹

May Kalabutan nga mga Hisgutanan: Ang Panan-awon (DP 76), Hubad sa Basahon ni Mormon, Hubad sa Basahon ni Abraham