Mga Himno

Ang pagkanta og mga himno agig debosyon sa pribado ug sa publiko masubay balik ngadto sa kinaraan ug mao ang usa ka importanting bahin sa American Christian nga pagsimba sa panahon ni Joseph Smith. Paglabay sa tulo ka bulan human ang Simbahan naorganisar, niadtong Hulyo 1830, si Joseph Smith nakadawat og usa ka pagpadayag alang sa iyang asawa nga si Emma, nagsugo kaniya sa paghimo og seleksyon sa sagrado nga mga himno alang sa Simbahan ni Kristo. “Kay ang akong kalag mahimuot sa awit sa kasingkasing” ang Ginoo mipahayag. “Oo, ang awit sa mga matarung mao ang usa ka pag-ampo ngari kanako” (DP 25:12). Kini nga pagpadayag nagmatuod sa kabililhon sa musika isip kabahin sa pagsimba diha sa Simbahan, ug ang pagkapili ni Emma Smith talagsaon tungod kay ang mga himno dili kasagarang tipunon sa kababayen-an.¹

litrato sa abli nga himno sa uluhang pahina — Usa ka kopya sa unang himno sa Simbahan, gimantala niadtong 1835 nga naglakip sa mga himno nga pinili ni Emma Smith.

Ang labing sayo nga mga himno sa Mormon nakita niadtong 1832 diha sa The Evening and the Morning Star nga pamantalaan nga gimantala ni William W. Phelps ug niadtong 1834 sa The Messenger and Advocate. Ang uban niining mga himno nalakip sa himno ni Emma, Usa ka Koleksyon sa Sagrado nga mga Himno, alang sa Simbahan sa mga Santos sa Ulahing mga Adlaw. Ang himno, opisyal nga gimantala niadtong 1835, naandam alang sa pagmantala pinaagi ni Phelps, ug ang pag-imprinta nakompleto sa sayo nga bahin sa 1836 didto sa Kirtland. Ang libro gamay lang nga igong masulod sa bulsa ug naglangkob og 90 ka mga himno. Tali sa 30 ug 40 niini ang nahisulat sa mga Santos sa Ulahing mga Adlaw; ang nahibilin mga popular nga mga himno sa Protestante. Ang ikaduhang himno ni Emma, gi-imprinta didto sa Nauvoo niadtong 1841, naglangkob sa 304 ka mga himno.² Kini ug ang uban pang nahaunang mga hymnbook naglakip lang sa mga pulong sa mga himno ug walay nota sa musika. Ang mga Santos mipili og mga pamilyar nga mga tuno diin ang mga himno giawit.

Ang mga himno usa ka importanting himan alang sa pagtudlo ug pag-abag sa mga doktrina sa Simbahan. Sa pasiuna ngadto sa 1835 nga himno nagtimaan nga ang koleksyon gilangkuban og “‘Sagradong mga Himno nga gipahiangay ngadto sa ilang hugot nga pagtuo ug tinuohan diha sa ebanghelyo.” Daghang mga himno sa nahaunang mga Mormon mga sinulat sa mga Santos sa Ulahing mga Adlaw, sama ni Eliza R. Snow, Parley P. Pratt, ug William W. Phelps. Ang ubang mga himno gisulat ug gi-awit sa mga tawo sa uban nga mga tradisyon sa tinuohan nalakip, ug ang uban niini giusab ni Phelps aron mahaum sa piho nga mga pagtulun-an sa mga Santos sa Ulahing mga Adlaw. Sukad nianang unang himno sa 1835, ang mga hilisgutanan sama sa Zion, ang Ikaduhang Pag-anhi sa Manluluwas, ang Pagpahiuli sa ebanghelyo, ang Basahon ni Mormon, ug sa kaulahian ang kinabuhi sa wala pa dinhi sa yuta, mga propeta sa ulahing adlaw, ug ang kasinatian sa pioneer milukop sa mga pahina sa mga himno ug nakatugot sa mga Santos sa Ulahing mga Adlaw nga mahatagan og tingog ang gipangga nga tinuohan.

Gawas sa mga himno nga gitipon ni Emma Smith, ang ubang mga himno gitipon sa nagkalain-laing dapit ug alang sa piho nga mga gamit. Usa ka nahaunang himno gi-imprinta didto sa Manchester, England, niadtong 1840 ubos sa direksyon nilang Brigham Young, Parley P. Pratt, ug John Taylor.³ Ang mga Santos nga milalin ngadto sa Utah gikan sa England midala sa ilang mga himno ug gibahandi nga mga himno ngadto sa Walog sa Salt Lake. Ang himno sa Manchester gipadayon sa pagmantala didto sa England hangtud sa 1890. Ang unang dakong koleksyon sa mga himno nga nalakip sa pagbutang og nota sa musika mao ang 1889 nga Latter-Day Saints’ Psalmody, nga gimantala ubos sa direksyon ni Presidente John Taylor. Ang mga organisasyon sa auxiliary sama sa Sunday School, Relief Society, ug Primary mimantala sa ilang kaugalingon nga mga hymnbook sugod niadtong 1880.⁴ Ang Mission sa Amihanang mga Estado, nga nagbase didto sa Chicago, mi-imprinta og 11 ka mga edisyon sa Songs of Zion gikan sa 1908 hangtud 1925. Kini nga libro nahimong usa ka himno sa “natad sa misyon”.

Ang mga lider sa simbahan naghimo og Komite sa Musika sa Simbahan niadtong 1920 aron mas mahan-ay ang musika ug ang produksyon sa mga himno. Niadtong 1927, ang komite mihiusa sa mga himno gikan sa lain-laing mga publikasyon ngadto sa usa ka volume, Mga Himno sa Santos sa Ulahing mga Adlaw. Dayon, niadtong 1948, ang Simbahan mimantala sa usa ka gi-revise nga himno nga giulohan og Mga Himno: Simbahan ni Jesukristo sa mga Santos sa Ulahing mga Adlaw. Sa ika-150 nga anibersaryo sa unang himno ni Emma Smith niadtong 1985, ang Simbahan mimantala og usa ka bag-ong hymnbook, nga mao ang gigamit karon, nga naglangkob sa daghang inila nga mga himno sa mga tradisyon sa mga Santos sa Ulahing mga Adlaw, usa ka nagkadaiyang mga himno nga gikuha gikan sa ubang mga tradisyon sa mga Kristiyano, ug sa daghang bag-ong gi-compose nga mga himno. Ang Simbahan mimantala og mga himno sa daghang mga pinulongan, matag usa naglangkob sa gibanabana nga 200 ka mga himno nga gihubad gikan sa Iningles ingon man sa pamilyar nga kultural ug makasaysayanong mga himno nga gipahaum ngadto sa nagkalainlaing dapit sa kalibutan. Ang himno sa Simbahan alang sa mga kabataan—Songbook sa mga Bata sa Ang Simbahan ni Jesukristo sa mga Santos sa Ulahing mga Adlaw, unang gimantala niadtong 1989—nahubad usab ngadto sa daghang mga pinulongan.

Ang makapadasig nga musika nagpadayon nga usa ka mahinungdanon nga bahin diha sa pagsimba sa mga Santos sa Ulahing mga Adlaw. Ang mga himno sa kongregasyon naghiusa sa mga miyembro, mipalig-on sa kailhanan, ug sa pagtudlo sa doktrina. Niadtong 1985, ang Unang Kapangulohan miawhag sa paggamit sa mga himno dili lang alang sa kalidad sa musika, apan alang usab sa doktrinal nga sulod sa himno: “Nanghinaut kami nga ang mga lider, mga magtutudlo, ug mga miyembro kinsa gitawag sa pagpamulong kanunayng moukab sa hymnbook aron mangita og mga wali nga makapatandog kaayo ug maanindot kaayo nga pagkapresentar diha sa bersikulo. … Nanghinaut kami nga ang hymnbook makahimo og prominenting dapit diha sa mga kasulatan ug sa ubang mga libro sa relihiyon diha sa atong mga panimalay.”⁵

May Kalabutan nga Hisgutanan: Emma Hale Smith