Kasaysayan sa Simbahan
Nawala nga Manuskrito sa Basahon ni Mormon

“Nawala nga Manuskrito sa Basahon ni Mormon,” Mga Hisgutanan sa Kasaysayan sa Simbahan

“Nawala nga Manuskrito sa Basahon ni Mormon”

Nawala nga Manuskrito sa Basahon ni Mormon

Niadtong Hunyo 1828, si Joseph Smith nagduhaduha sa pagpahulam sa 116 ka mga pahina sa orihinal nga manuskrito sa Basahon ni Mormon ngadto sa iyang eskriba nga si Martin Harris. Misaad si Harris nga bantayan ang mga pahina ug ipakita lang kini ngadto sa piho nga mga sakop sa pamilya, apan sa wala madugay ang mga pahina nahanaw ug wala na mahibalik. Nagtinguha si Joseph og balaanong giya kon unsaon sa pagpadayon sa nahabilin nga paghubad ug nakat-on pinaagi sa pagpadayag kon unsaon sa pagkompleto sa paghubad sa Basahon ni Mormon nga dili na motan-aw sa teksto nga sulod sa nawala nga manuskrito.1

talan-awon gikan sa ibabaw sa kaumahan

Umahan ni Martin Harris duol sa Palmyra, 1907.

Kon unsay kasayuran nga nahibaloan nga sulod sa nawala nga manuskrito naggikan ni Joseph Smith ug ni propeta Nephi. Misulat si Joseph nga ang nawala nga mga pahina naglangkob sa basahon ni Lehi. Sama sa kadaghanan sa Basahon ni Mormon, ang rekord ni Lehi mao ang giminubo ni propheta Mormon nga gitawag ni Joseph og mga palid ni Lehi. Ang anak nga lalaki ni Nephi mipasabut nga kining rekord gilangkuban sa mga istorya sa mga damgo ni Lehi, mga panan-awon, mga propesiya, ug mga pagtulun-an ngadto sa iyang mga anak. Giminubo ni Nephi ang mga rekord ni Lehi sa wala pa magsulat sa iyang kaugalingong kasaysayan.2 Sumala sa mga eskolar, ang gihimo ni Nephi nga minubo naglangkob sa nag-unang mga kapitulo sa Basahon ni Mormon. Ang hugon-hugon sa uban nga ang nawala nga manuskrito wala lang naglangkob sa basahon ni Lehi apan sa mga materyal usab nga sinulat sa uban, tingali ni Mormon o sa tawo kinsa nabuhi tali sa panahon ni Lehi ug Haring Benjamin.3

Sa panahon nga nahanaw ang manuskrito, si Joseph Smith ug si Martin Harris wala makahibalo sa minubo nga hinimo ni Nephi. Agig sangputanan, sa dihang nahibaloan ni Joseph nga nawagtang ni Harris ang manuskrito, naghunahuna si Joseph nga napakyas siya sa iyang balaanong tahas. Wala mipadayon si Joseph sa paghubad sulod sa siyam ka bulan. Sa kaulahian, sa dihang siya ug ang iyang bag-ong eskriba, si Oliver Cowdery, hapit nang nahuman sa katapusan sa rekord, si Joseph mihangyo og pagpadayag kabahin kon hubaron ba ang nawala nga mga pahina. Ang pagpadayag (tan-awa sa Doktrina ug mga Pakigsaad 10) nag-ingon nga ang mga palid ni Nephi gilangkuban og usa ka istorya nga susama sa basahon ni Lehi apan mas gitutukan ang espirituhanong kasaysayan sa pamilya ni Lehi. Nahibaloan ni Joseph nga kinahanglan niyang hubaron ang mga palid ni Nephi hangtud sa katapusan nga dapit sa nawala nga manuskristo .4 Ang pagpadayag nagdumili usab kang Joseph nga hubaron pag-usab ang basahon ni Lehi ug gipasidan-an siya nga ang mga kaaway nga naggunit sa nawala nga manuskristo mahimong mosulay sa pag-maniubra sa teksto ug dayon dauton ang gimantala nga bersyon sa Basahon ni Mormon. Nabalaka si Joseph og maayo kabahin sa posibilidad sa pagtuis sa manuskrito nga anaa sa pasiuna sa Basahon ni Mormon, mipasidaan siya sa mga limbungan sa dili pagsupak sa buhat sa Dios. Wala gayuy usa nga mipakita uban sa nawala nga manuskrito.5

May Kalabutan nga Hisgutanan: Book of Mormon Translation [Hubad sa Basahon ni Mormon]

Mubo nga mga sulat

  1. Joseph Smith, “History, circa 1841, fair copy,” 13–14, josephsmithpapers.org; Lucy Mack Smith, “Lucy Mack Smith, History, 1844–1845,” libro 6, pahina 10–libro 7, pahina 7, josephsmithpapers.org. Gihubad ni Joseph ang basahon ni Lehi gikan sa tunga-tungang bahin sa Abril hangtud sa Hunyo 1828. Si Martin Harris miserbisyo isip iyang unang eskriba ug tingali giabagan ni Emma Smith o sa iyang igsoon nga si Reuben Hale.

  2. 1 Nephi 1:16–17.

  3. Joseph Smith, “Preface to Book of Mormon, circa August 1829,” sa Basahon ni Mormon, 1830, iii, josephsmithpapers.org; S. Kent Brown, “Lehi’s Personal Record: Quest for a Missing Source,” BYU Studies, vol. 24, nu. 1 (Winter 1984), 20–21; William J. Critchlow III, “Manuscript, Lost 116 Pages,” sa Encyclopedia of Mormonism, ed. Daniel H. Ludlow, 5 vols. (New York: Macmillan, 1992), 2:854–55; Jack M. Lyon and Kent R. Minson, “When Pages Collide: Dissecting the Words of Mormon,” BYU Studies, vol. 51, nu. 4 (2012), 120–36. Si Joseph mahimong migamit sa numero nga 116 isip bana-bana sa gidaghanon sa nawala nga mga pahina kay sa eksaktong ihap (tan-awa sa “Revelation, Spring 1829 [DC 10],” Historical Introduction, josephsmithpapers.org).

    Kapin na sa 50 ka tuig human si Joseph Smith namatay, si Franklin D. Richards mihisgut nga sa nagpuyo pa ang duha sa Nauvoo, mihisgut si Joseph kabahin sa sulod sa nawala nga manuskrito. Nabasahan ni Richards sa Alma 10:3 kon sa unsang paagi nga si Lehi naggikan ni Manasseh, nga nakapalibog niya tungod kay ang mga Santos kanunay gayud mopasabut sa Basahon ni Mormon isip ang “sungkod ni Ephraim.” Sa dihang nangutana si Richards ni Joseph kabahin niining posible nga kulang, mipasabut si Joseph nga si Ishmael ug ang iyang pamilya naggikan kang Ephraim ug ang nawala nga manuskrito nag-asoy sa kaliwatan ni Ishmael (Franklin D. Richards, “Origin of American Aborigines,” Contributor, vol. 17, nu. 7 [Mayo 1896], 425).

  4. Wala makahibalo si Joseph bahin sa mga palid ni Nephi hangtud na sa tingpamulak sa 1829 (tan-awa sa “Revelation, Spring 1829 [DC 10],” Historical Introduction, josephsmithpapers.org; Doktrina ug mga Pakigsaad 10:38–46).

  5. “Revelation, Spring 1829 [DC 10],” sa Book of Commandments, 22–24, josephsmithpapers.org; Joseph Smith, “Pasiuna sa Basahon ni Mormon,” sa Basahon ni Mormon, 1830, iii.