Mga Single Adult
Daghang Santos sa Ulahing mga Adlaw atol sa Progresibo nga Panahon sa sayong bahin sa ika-20 nga siglo ang nagtinguha sa pagpalambo sa katilingban pinaagi sa mga organisasyon ug mga programa. Ang mga partisipante sa nagkalain-laing organisasyon sa Simbahan mipalambo og mga programa sa pagpakigdait ug pagsuporta sa single adult nga mga miyembro nga sa kadugayan mitubo ngadto sa single adult nga mga ward ug mga stake. Niadtong 1913, ang Relief Society mi-esponsor og panimalay alang sa mga batan-ong kababayen-an nga wala pa maminyo kinsa miabot sa Siyudad sa Salt Lake arong mangita og trabaho o kapuy-an. Ang paningkamot sa paghatag og kapasilongan alang sa potensiyal nga huyang nga kababayen-an gipalapdan niadtong 1920 sa pagpabalik sa Beehive House, nga sa sinugdanan mao ang gipuy-an ni Brigham Young ug sa iyang dako nga pamilya, isip dormitoryo alang sa mga batan-ong kababayen-an nga wala pa maminyo. Sa mga sama nga panahon, pipila ka mga fraternity ug mga sorority alang sa mga Santos sa Ulahing mga Adlaw ang midala sa mga estudyante sa kolehiyo ug sa nakauli na nga mga misyonaryo ngadto sa sosyal nga mga grupo nga sama sa bag-o nga “pangkolehiyo nga mga seminary,” nga nahimong mga Institute of Religion, nga gitukod sa mga lider sa Simbahan sa pipila ka kampus sa unibersidad. Ang mga programa sa kalihokan milambo kauban sa nagtubo nga gidaghanon sa mga young adult nga mitambong og kolehiyo.
Ang Huntington Park, California, grupo sa Gleaner Girls, usa ka nag-una nga asosasyon alang sa wala pa maminyo nga Santos sa Ulahing mga Adlaw nga kababayen-an, nagsaulog sa ilang tinuig nga bangkete, 1930.
Pag-abot sa mga 1950, ang mga lider sa Simbahan mikonsiderar og mga paagi sa pagtipon sa eklesiyastikal nga estruktura sa mga ward ug mga stake sa kinabuhi sa kampus. Niadtong 1956, ang BYU Stake namugna nga sa sinugdanan alang lamang sa wala pa maminyo nga mga young adult nga nag-eskwela sa Brigham Young University. Ang napulog duha ka ward niini sa wala madugay mipahiluna og mga estudyante nga adunay mao pay pagsugod nga mga pamilya ug nagpadayon sa kadaghanang sama nga mga organisasyon nga makita sa tradisyonal nga mga ward, sama sa Sunday School ug Primary. Layo gikan sa mga kampus sa kolehiyo, ang ubang mga stake nagpasiugda og mga ward nga giorganisar alang sa mga single adult lamang.
Samtang midaghan ang may-kalambigitan sa kampus nga pagpakigdait nga mga organisasyon, ang mga lider sa Simbahan sa mga 1970 nangita og mga paagi nga ang mga single adult sa tanang pangedaron makabenepisyo gikan sa usa ka pangalagad nga gipahaom sa ilang mga panginahanglan, mga interes, ug mga kabalaka. Daghang wala maminyo nga mga hamtong ang mipaabot sa mga pagbati sa pagkahimulag gikan sa pag-apil sa usa ka komunidad nga kasagaran mitino sa estado sa kaminyoon sa usa ka tawo. Usa ka babaye nga nabiyuda atol niini nga panahon sa wala madugay naghunahuna kon sa unsang paagi nga ang pagtambong sa Simbahan “dili gayod susama” alang sa wala maminyo nga mga miyembro. Ang Mutual Improvement Association (MIA) mipalambo sa “M Men” ug ang “Gleaner Girls” nga mga grupo alang sa mga young adult nga kalalakin-an ug kababayen-an. Niadtong 1972, ang mga paningkamot sa paglambigit sa MIA ngadto sa mga korum sa pagkapari mipahinabo sa bag-o nga programa alang sa mga single adult. Sa pagpaila niini nga programa, si Elder James E. Faust mihinumdom nga nakadungog og mga wala maminyo nga mga Santos sa Ulahing mga Adlaw nga mireport nga mibati nga wala gihatagan og bili ug nawad-an og gana. “Kinahanglan atong sugdan pinaagi sa pagpaningkamot sa pagkab-ot sa usa ka tawo,” siya miingon. “Gusto nato nga ang tanan mobati nga sila nahisakop sa Simbahan.” Ang mga wala pa maminyo nga mga miyembro nga nag-edad og 18 hangtod 25 gigrupo isip “Mga Young Single Adult” ug kadtong nag-edad og 26 pataas gigrupo isip “Mga Espesyal nga Interes.” Ang lokal nga mga bishop mimugna sa mga grupo sa family home evening alang sa wala maminyo nga mga miyembro nga wala nagpuyo kauban sa ilang pamilya nga gigikanan. Sa mga dapit nga adunay igo nga gidaghanon sa mga young single adult, ang mga presidente sa stake ug mga bishop usahay moorganisar og mga grupo sa Sunday School ug Relief Society. Samtang ang gidaghanon sa young single adult (YSA) nga mga ward milabaw sa mga ward alang sa mga estudyante sa sayo nga bahin sa ika-21 nga siglo, ang mga ward alang sa mga estudyante gihunong. Pagka 2016, ang mga young single adult, nag-eskwela man o wala, miapil sa sobra 1,300 ka yunit sa tibuok kalibotan.
Pagka 2021, ang demograpikanhong panglantaw alang sa hamtong nga mga miyembro sa Simbahan mibalhin ngadto sa kadaghanan nila wala maminyo. Sa sayo pa sa mga 1980, ang mga lider nagplano nga palapdan ang mga organisasyon sa YSA ug sa mga Espesyal nga Interes aron mapahimutang ang mao nga kausaban. Sila mihimo og mga paningkamot sa misunod nga mga dekada aron mapanindot ang pagpakigdait ug ang mga programa sa kalihokan aron mas mapaapil ug masuportahan ang mga single adult. Sa 2021 nga Face to Face nga sibya alang sa wala pa maminyo nga mga miyembro nga sobra na sa 30 ang edad, ang mga lider gikan sa Korum sa Napulog Duha ug Kapangulohan sa Relief Society mipahibalo sa nausab nga panglantaw sa pagkamiyembro sa Simbahan sa tibuok kalibotan. “Matag miyembro, bisan unsa pa ang ilang mga sirkumstansya,” miingon si Sharon Eubank niana nga okasyon, “adunay daghan kaayo nga ikatampo ug kami naglaom nga mas maila kini sa mga miyembro sa Simbahan.”
May Kalabotan nga mga Hisgotanan: Mga Seminary ug mga Institute