Mormon nga Batalyon

Sa dihang ang mga Santos gipugos sa pagbiya sa Nauvoo niadtong 1846, usa sa labing dako nga mga pagsulay nga ilang giatubang mao ang paggasto sa pagpamalhin. Ang mga lider sa Simbahan gusto nga motabang sa pagsuportar sa tanang Santos sa Ulahing mga Adlaw , ilabi na ang mga kabus, kinsa gusto nga makigpundok.¹ Sa dihang ang mga paningkamot sa pagbaligya sa Templo sa Nauvoo ug uban pa nga mga kabtangan sa Simbahan napakyas, ang mga lider sa Simbahan mipadala ni Jesse Little, usa ka lider sa mga branch sa Simbahan sa silangang bahin sa Estados Unidos, aron sa pagpangayo og hinabang sa gobyerno. Si Little nakigtagbo ni Thomas L. Kane, usa ka aktibista kinsa misimpatiya sa mga kalisdanan sa mga Santos ug mitabang nga makig-atubang sa presidente sa Estados Unidos nga si James K. Polk.²

Pipila ka adlaw lang sa wala pa moabut si Little ug Kane sa Washington, D.C., ang Kongreso sa Estados Unidos mideklarar og gubat batok sa Mexico, ug si Presidente Polk mimando sa mga batalyon sa sundalo nga nadestino sa Habagatang Kasadpan sa Amerika aron sa pag-atake.³ Atol sa iyang miting uban ni Polk, si Little miawhag sa presidente sa pagdugang og mga tropa gikan sa mga Santos sa Ulahing mga Adlaw, kinsa mas duol sa dapit nga nahitaboan sa kagubot kay sa kadaghanan sa ubang mga Amerikano. Nakahibalo si Little nga, ang bayad sa mga sundalo, makatabang nga masuportahan ang pagpamalhin sa mga Santos.⁴

Niadtong Hunyo 1846, ang mga opisyal sa kasundalohan miduol sa mga Santos sa Ulahing mga Adlaw diha sa Teritoryo sa Iowa, nangita aron sa pagdugang og 500 ka sundalo alang sa usa ka tuig nga pagserbisyo. Ang tanyag nakapaduda sa daghang mga Santos, kinsa bag-o lang nga gipugos pagbiya sa ilang mga panimalay nga wala gani bisan unsa nga panalipud gikan sa gobyerno. “Mibati ko og kasuko sa Gobyerno nga mitugot kanako nga hasion ug palayason sa akong panimalay,” miasoy si Daniel B. Rawson. Wala madugay human niana, si Brigham Young ug ang uban nga mga lider sa Simbahan miabut sa kampo. “Miingon sila nga ang kaluwasan sa Israel mag-agad sa pagpadaghan sa kasundalohan,” mipadayon si Rawson. “Sa dihang nadungog ko kini nausab ang akong hunahuna. Mibati ko nga akong katungdanan ang pag-adto.”⁵

Sa dihang ang mga opisyal sa kasundalohan adunay upat ka pundok nga may 100 ka kalalakin-an ang matag usa, si Kapitan James Allen mipahibalo sa pagkapundok sa Mormon nga Batalyon, Kasundalohan sa Estados Unidos sa Kasadpan. Giawhag ni Brigham Young ang kasundalohan sa paghupot sa ilang relihiyusong mga pakigsaad ug sa pagtratar sa mga Mehikano ug uban pa nga ilang matagboan nga adunay pagtahud. Misaad siya nga ang ilang mga pamilya maatiman ug dili sila makasinati og gubat. Pagka Hulyo 20, ang mga pundok sa kasundalohan mibiya padulong sa Fort Leavenworth sa Teritoryo sa Kansas, nga adunay labing menos 34 ka kababayen-an ug 44 ka mga bata nga miapil sa martsa.⁶ Duha ka adlaw ang milabay, usa ka dugang nga pundok sa 100 ka kalalakin-an ang mibiya. Si Zacheus Cheney misulat nga “ang mga luha mitulo sama sa mga lusok sa ulan” sa dihang ang mga pamilya nanamilit sa mga sundalo.⁷

Ang martsa sa batalyon misunod sa uban pa nga mga pundok sa mga sundalo, nagsiguro nga ang kasundalohan nga batalyon milukop sa pagmartsa sa tibuok dapit nga ubos sa pagkontrolar sa Estados Unidos. Bisan og gitawag aron sa pagsakop sa siyudad sa Tucson (karon naa sa Arizona) ug sa pagpanalipud sa Pauma nga mga Indian sa Temecula (karon naa sa California), wala gayud sila moapil sa pakiggubat.⁸ Ang labing grabe nga insidente miabut sa dihang usa ka panon sa ihalas nga mga toro ang nanggukod sa kasundalohan samtang sila mihunong aron moinom og tubig sa Suba sa San Pedro. Ang pagdinaganay mibilin og tulo ka patay nga mula [mule] ug tulo ka samaran nga kalalakin-an, apan walay namatay nga mga sundalo.

Sa pag-abut niini sa San Diego mga unom ka bulan human mobiya sa Iowa, ang batalyon nakalakaw na og hapit 3200 ka kilometro, nga nakapahimo sa pagmartsa nga usa sa labing taas diha sa kasaysayan sa militar sa Estados Unidos. Ang gubat sa California epektibong nahuman niini nga punto, mao nga ang kasundalohan sa batalyon gidestino ngadto sa kuta nga naa sa San Diego, San Luis Rey, ug Los Angeles. Ang ilang bayad napamatud-an nga mahinungdanon sa paggasto sa pagpamalhin sa ilang mga pamilya ug uban pa ngadto sa Walog sa Salt Lake.

Paghulagway sa Mormon nga Batalyon atol sa martsa niini, ni artist George Ottinger.

Ang mga beterano sa batalyon mitadlas sa pipila ka mga ruta nga padulong sa silangan aron mahiusa pag-usab sa ilang mga pamilya sa Utah. Pipila niini nga kasundalohan ang nagtrabaho sa mubo nga panahon sa Sutter’s Mill ug nakadiskubre og bulawan niadtong 1848, nga nakapasugod sa labing dako nga pagdagsa sa katawhan nga mangita og bulawan sa kasaysayan sa Amerika.⁹ Lain nga grupo ang nakadiskubre ug naglubong sa mga minatay sa walay swerte nga grupo sa mga langyaw nga nailhan isip ang Donner Party. Apan ang uban naghimo og bag-o nga dalan latas sa kabukiran sa Sierra Nevada. Kadaghanan sa kasundalohan miabot sa Teritoryo sa Utah sa katapusang bahin sa 1840 ug sayo nga bahin sa 1850.

Ang Mormon Battalion Historic Site sa Simbahan diha sa San Diego nagsaulog sa serbisyo ug mga sakripisyo sa kasundalohan ug sa ilang mga pamilya.

May Kalabutan nga mga Hisgutanan: Thomas L. and Elizabeth Kane, California Gold Rush, Departure from Nauvoo, Mexican-American War