Mga Panagna ni Joseph Smith

Samtang kadaghanan sa mga pagpadayag nga nadawat ni Joseph Smith naghatag og mga instruksyon, tambag, ug mga pagtulun-an sa doktrina o subli nga paghulagway sa sagrado nga mga istorya sa nangagi, ang pipila naglangkob og piho nga mga panagna mahitungod sa nagsingabut nga mga panghitabo.¹ Kadtong kasagaran nagtutok sa mga panghitabo sa tibuok kalibutan nga mosangpot ngadto sa Ikaduhang Pag-anhi ni Jesukristo o sa piho nga mga paningkamot diin ang mga Santos gisugo sa pag-apil.

Usa sa labing inila nga milenyal nga panagna ni Joseph Smith may kalabutan ngadto sa Gubat nga Sibil sa Amerika. Niadtong Disyembre 25, 1832, si Joseph Smith nakadawat og pagpadayag nga nanagna nga usa ka gubat tali sa amihanan ug habagatang mga estado sa U.S. magsugod sa South Carolina ug nga ang mga gubat ug mga rebelyon sa tibuok kalibutan sa katapusan moresulta diha sa “pagtapos sa tanang Kanasuran” atol sa panahon sa Ikaduhang Pag-anhi ni Jesukristo. Sa higayon nga ang pagpadayag nadawat, ang South Carolina ug ang federal nga gobyerno sa Estados Unidos nalambigit sa usa ka panaglalis, apan malinawon kining nasulbad pagkasunod Marso. Paglabay sa katuigan, gisubli ni Joseph ang iyang panagna nga ang gubat moulbo sa South Carolina tungod sa panagdebate bahin sa pagpangulipon, nahitabo kini dul-an sa 20 ka tuig human sa kamatayon ni Joseph Smith.²

Kanunay usab gipanagna ni Joseph Smith ang mahitungod sa umaabut nga padulngan sa Ang Simbahan ni Jesukirsto sa mga Santos sa Ulahing mga Adlaw ug ang papel niini sa katapusang mga adlaw. Tingali ang labing dalaygon niining mga panagna nalakip diha sa usa ka sulat niadtong 1842 ngadto sa editor sa pamantalaan sa Chicago nga si John Wentworth. “Walay dili balaan nga kamot ang makapugong sa buhat sa paglambo,” mipamatuod si Joseph, bisan pa sa mga kalisdanan nga gisagubang sa linghud pa nga Simbahan. “Mga pagpanggukod mahimong magkakusog, ang mga manggugubot mahimong maghiusa, mga kasundaluhan magpundok, mga pasangil mahimong modaot sa kadungganan, apan ang kamatuoran sa Dios magpadayon nga maisugon, halangdon ug gawasnon, hangtud nga kini makasulod sa matag yuta, makabisita sa matag dapit, molukop sa matag nasud, ug makasulti sa matag dunggan, hangtud ang mga katuyoan sa Dios matuman, ug ang Halangdong Jehova moingon nga ang buhat nahuman na.”³

Daghan sa mga panagna ni Joseph Smith mga pamahayag sa panan-awon mahitungod sa kabubut-on sa Ginoo alang sa Simbahan, nga nasabtan sa mga Santos ingon nga gipasikad sa ilang hugot nga pagtuo ug sa kabubut-on sa tawo.⁴ Daghan niini nga mga panagna natuman na samtang ang mga Santos mipadayon sa unahan inubanan sa hugot nga pagtuo aron kini matuman. Sa laing higayon, ang mga Santos nakigbisog nga masabtan ang mga kalisud nga ilang nasugatan samtang sila mipadayon sa dinasig nga mga tumong.

Pananglitan, ang labing unang mga pagsabut sa mga Santos sa Ulahing mga Adlaw sa mga panagna kabahin sa umaabut nga Zion nakatutok sa pagtukod sa usa ka siyudad sa Distrito sa Jackson, Missouri. Human sila giabug gikan sa yuta, dugang pa nga pagpadayag ang nakatabang kanila nga makasabut sa ilang kasinatian ug makapangita og bag-ong mga paagi sa pagtumong sa ilang mga kusog ngadto sa pagkompleto sa buhat sa Ginoo. Mipasalig usab kini kanila nga kon “ang ilang mga kaaway mosulong diha kanila ug mopugong kanila gikan sa paghimo niana nga buhat,” ang Ginoo “dili na kinahanglan nga mopabuhat.” ug “modawat sa ilang mga halad.”⁵ Bisan tuod ang pagkawala sa yuta sa Zion misulay sa ilang hugot nga pagtuo, ang mga miyembro sa Simbahan mipadayon sa pagtrabaho sa pagtukod sa Zion sa laing mga dapit ug mga pamaagi.⁶

Ang mga Santos sa Kirtland nakasinati og usa ka pagsulay sa hugot nga pagtuo nga may kalabutan sa laing propetikanhong mga pamahayag ni Joseph Smith. Sa hinapos sa 1836 hangtud sa tingpamulak sa 1837, misulti si Joseph Smith sa mga Santos nga ang Kirtland mouswag sa ekonomikanhon nga paagi kon sila maghupot sa mga sugo ug mosuporta sa usa ka bag-ong lokal nga pinansyal nga institusyon nga gitawag og Kirtland Safety Society.⁷ Sa dihang ang bangko napakyas, pipila ka mga Santos ang mitratar sa gipamulong ni Joseph Smith isip pakyas nga panagna. Ang uban nangita sa mga panalangin sa Dios bisan pa sa ilang ekonomikanhon nga mga pagsulay.⁸ Si Oliver Granger, kinsa midawat sa usa ka buluhaton sa pagdumala sa mga utang nga may kalabutan sa Simbahan atol sa panahon sa mas dakong paghagba sa ekonomiya, sa wala madugay gipasaligan sa Ginoo nga ang “iyang pagsakripisyo mahimo nga labaw nga sagrado ngari kanako, kay sa iyang paglambo.”⁹

Pipila sa labing makapadasig nga mga istorya gikan sa kasaysayan sa Simbahan subling nag-asoy sa mga paningkamot sa mga Santos kinsa mipakita og hugot nga pagtuo diha sa gipadayag nga pamahayag ni Joseph Smith ug nagtrabaho aron sa pagpatuman niini. Niadtong Abril 26, 1838, si Joseph Smith nakadawat og pagpadayag nga misugo sa Napulog Duha ka mga Apostoles sa pagbiya gikan sa Far West alang sa misyon sa England sulod sa usa ka tuig. Sa dihang ang mga Santos giabug ngadto sa Missouri nianang tinglarag, ang uban mitawag niini nga usa ka sayop nga pagpadayag. Bisan pa man nga nagsagubang sa potensyal nga mga kasamok o pagkabilanggo sa pagbalik ngadto sa Missouri, si Brigham Young determinado sa pagbuhat sumala sa gipanagna. Iyang gipangulohan ang Napulog Duha sa usa ka patago nga pagbiyahe balik ngadto sa Far West, Missouri, ug giatol sa tunga-tungang gabii niadtong Abril 26, 1839, simbolikanhon silang mibiya sa ilang misyon agig katumanan sa sugo.¹⁰

Si Joseph Smith miinsister kabahin sa kagawasan sa pagsulti sa iyang kaugalingong mga opinyon. Sa dihang adunay tawo nga misulti kaniya nga nagtuo sila nga ang usa ka propeta kanunayng mamulong isip usa ka propeta, si Joseph mitubag, “ang usa ka Propeta mahimo lamang nga usa ka Propeta kon siya nagbuhat sa ingon.”¹¹ Sa samang higayon, siya wala nagmaulawon sa pagpamulong nga maisugon kon ang Ginoo naghatag kaniya sa gipadayag nga mga instruksyon, ug iyang gibarugan ang iyang propetikanhon nga pagpahayag. Ang gasa sa panagna usa ka importante nga aspeto sa tawag ug kabilin ni Joseph Smith.

May Kalabutan nga mga Hisgutanan: Joseph Smith Jr., Revelations of Joseph Smith