Endowment House

Taliwala sa pagpamalhin gikan sa Nauvoo niadtong 1846 ug sa pagpahinungod sa Templo sa St. George niadtong 1877, ang mga Santos sa Ulahing mga Adlaw walay templo diin mapahigayon ang mga pagbunyag alang sa mga patay, mga pagtuga, ug mga pagsilyo.¹ Si Brigham Young, hinoon, mitugot sa pagpahigayon og pipila ka mga ordinansa gawas sa mga templo samtang ang mga Santos mipahimutang sa Great Basin ug mitukod og mga templo sa St. George, Logan, Manti, ug sa Siyudad sa Salt Lake. Sa paghimo niini, iyang gisunod ang sundanan nga gihimo sa usa ka pagpadayag nga gihatag ngadto kang Joseph Smith niadtong 1841, nga nagtugot sa mga Santos sa pagpahigayon og pipila ka mga ordinansa gawas sa mga templo “sa mga adlaw sa inyong kakabus, diin kamo dili makatukod og balay ngari kanako.”² Sa Nauvoo, si Joseph mitugot sa mga pagbunyag alang sa mga patay nga ipahigayon sa duol nga mga suba sa mubo nga panahon ug human niana midumala sa unang mga pagtuga sa ibabaw nga kuwarto sa iyang tindahan.³

Pipila lang ka mga ordinansa sa templo ang napahigayon taliwala sa 1847 ug 1850 samtang ang mga Santos mibalhin ug misugod og puyo didto sa Kasadpan.⁴ Sugod pagka Pebrero 1851, ang mga pagtuga ug mga pagsilyo kasagaran na nga gipahigayon sa Council House, ang unang dako nga pampublikong gambalay sa Utah. Ang unang andana maoy himoanan sa pampublikong mga kalihokan, lakip na ang mga bangkete, sayaw, ug mga miting sa balauranan ug mga korte sa teritoryo. Ang ibabaw nga andana maoy gigamit alang sa mga pagtuga ug mga pagsilyo hangtud pagka Abril 1854.⁵

Ang Council House sa Siyudad sa Salt Lake.

Sa katapusan si Brigham Young nakadesisyon nga usa ka mas tago nga dapit ang gikinahanglan alang sa pagpahigayon sa sagradong mga ordinansa. Apan daghan pang katuigan sa dili pa mahuman ang usa ka templo sa Siyudad sa Salt Lake.⁶ Niadtong 1854 si Presidente Young mimando nga usa ka gambalay ang tukuron sa amihanang kasadpan nga eskina sa lugar nga gitukuran sa templo diin ang mga Santos makadawat sa pagtuga ug masilyo ang ilang kaminyoon. Nakompleto niadtong Abril 1855, kining yano nga duha ka andanang estraktura gitawag og Endowment House. Kini nagsilbi, sa mga pulong ni arkitekto Truman Angell, isip “Temple Pro Tem.”⁷

Ang Endowment House mao ang unang estraktura nga nahunahunaan nga idesinyo para lang gayud sa mga panginahanglan sa pagpahigayon og mga pagtuga ug mga pagsilyo ug magsilbing usa ka inspirasyon alang sa mga hulagway sa sulod ug desinyo sa umaabut nga mga templo. Niadtong 1856 usa ka bato nga bunyaganan ang gitaud ug gipahinungod nga gidugang sa kasadpan nga bahin sa gambalay aron gamiton sa mga ordinansa sa mga buhi ug sa mga pagpuli alang sa mga patay.⁸ Lain nga ekstensiyon ang gitukod ulahi nianang tuiga aron pagdugang og espasyo alang sa mga nagtrabaho sa templo nga makaandam sa ilang trabaho ug makaluto ug makakaon sa ilang mga pagkaon.⁹

Litrato sa Endowment house, sa mga 1885.

Taliwala sa 1855 ug 1889, ang mga Santos nakapahigayon og labaw sa 54,000 nga pagtuga, 68,000 nga pagsilyo, ug 134,000 nga pagbunyag alang sa mga patay diha sa Endowment House.¹⁰ Si Brigham Young mitudlo, hinoon, nga ang pipila ka mga ordinansa sa templo, lakip na ang pagpuli nga mga pagtuga alang sa mga patay, dili mapahigayon hangtud ang usa ka templo makompleto. Ang una sa maong mga ordinansa gipahigayon sa Templo sa St. George niadtong 1877.¹¹

Samtang ang mga templo sa St. George, Logan, ug Manti magamit na alang sa buluhaton sa mga ordinansa, ang panginahanglan sa Endowment House mimenos, bisan og gigamit gihapon kini sa mga Santos sa Salt Lake tungod kay ang pagbiyahe padulong sa uban nga mga templo dili kanunayng posible. Niadtong 1889, hinoon, ang pagpahigayon og dinaghan nga kaminyoon sulod sa Endowment House nahimong hinungdan sa panaglalis sa legal ug politikal nga panagbangga sa Simbahan ug sa kagamhanan sa Estados Unidos.¹² Si Wilford Woodruff nakadesisyon sa pagpaguba sa gambalay isip pagpakita nga seryoso siya kabahin sa pagpahunong sa bag-o nga dinaghang kaminyoon.¹³ Ang Endowment House giguba sa misunod nga pipila ka semana.

Bibliyograpiya

Ang mosunod nga mga pagmantala naghatag og dugang nga impormasyon mahitungod niini nga hisgutanan. Pinaagi sa pagpakita o sa pag-link nimo ngadto niining mga kapanguhaan, wala kami mag-endorso o mogarantiya sa sulod o sa mga panglantaw sa mga tagsulat.

Lisle G. Brown, “‘Temple Pro Tempore’: The Salt Lake City Endowment House,” Journal of Mormon History, vol. 34, nu. 4 (Tinglarag 2008), 1–68.

Richard E. Bennett, Temples Rising: A Heritage of Sacrifice (Siyudad sa Salt Lake: Deseret Book, 2019), 165–91.

May Kalabutan nga mga Hisgutanan: Pagtukod og Templo, Pagtuga diha sa Templo, Pagbunyag alang sa mga Patay, Pagsilyo

Mubo nga mga sulat

1. Tan-awa sa Hisgutanan: Pagtukod og Templo.

2. “Pagpadayag, 19 Enero 1841 [D&P 124]” sa Book of the Law of the Lord, 5, josephsmithpapers.org; tan-awa sa Doktrina ug mga Pakigsaad 124:29–32.

3. Tan-awa ang mga Hisgutanan: Pagbunyag alang sa mga Patay, Pagtuga diha sa Templo, Gidihogan nga Korum (“Balaanong Han-ay”).

4. Si Wilford Woodruff mipahigayon og pipila ka pagbunyag alang sa mga patay didto sa Winter Quarters ug pagkahuman didto sa City Creek (diha sa Siyudad sa Salt Lake) niadtong 1853. Gibana-bana nga 150 ka pagsilyo ang napahigayon didto sa Winter Quarters, ug labing menos usa ka kaminyoon ang gisilyo diha sa Salt Lake Fort niadtong 1848. Niadtong 1849 ang pagtuga gihatag sa lumargahay nga misyonaryo nga si Addison Pratt sa ibabaw sa Ensign Peak, usa ka bungtod nga naa sa amihanang bahin sa umaabot nga tukuranan sa templo sa Salt Lake. (Tan-awa sa Richard E. Bennett, “‘The Upper Room’: The Nature and Development of Latter-day Saint Temple Work, 1846–1855,” Journal of Mormon History, vol. 41, nu. 2 [Abril 2015], 7, 15, 23–27.)

5. Gibana-bana nga 2,200 ka pagtuga og sobra sa 2,100 ka pagsilyo ang napahigayon sa Council House (tan-awa sa Bennett, “The Upper Room,” 18, 24, 27; tan-awa usab sa Hisgutanan: Pagsilyo).

6. Tan-awa sa Hisgutanan: Templo sa Salt Lake.

7. Lisle G. Brown, “‘Temple Pro Tempore’: The Salt Lake City Endowment House,” Journal of Mormon History, vol. 34, nu. 4 (Tinglarag 2008), 8.

8. Hangtud 1864 ang bunyaganan kasagaran nga gigamit alang sa mga pagbunyag sa mga buhi. Human niadto gigamit na kini kasagaran alang sa pagpuli nga mga pagbunyag (tan-awa sa Brown, “Temple Pro Tempore,” 20).

9. Sayo sa 1870, usa ka greenhouse ang gidugang ngadto sa habagatan sa habagatang ekstensyon (tan-awa sa Brown, “Temple Pro Tempore,” 27).

10. Richard E. Bennett, Temples Rising: A Heritage of Sacrifice (Siyudad sa Salt Lake: Deseret Book, 2019), 171.

11. Tan-awa sa Hisgutanan: Temple Endowment.

12. Tan-awa sa Hisgutanan: Balaudnon Batok sa Pagpangasawa og Daghan.

13. Tan-awa sa Hisgutanan: Manipesto.