Tabernacle Choir
Duha ka tuig human ang mga Santos sa Ulahing mga Adlaw misulod sa Walog sa Salt Lake, si Brigham Young mipahibalo nga usa ka tabernakulo ang mopuli sa lapad nga kapasilongan nga nahimutang sa Temple Square nga gitawag og bowery. Si Stephen Goddard midumala og usa ka koro [choir] atol sa mga tulumanon sa pagsimba nga gipahigayon sa bowery, ug siya nagpadayon sa mga pagbansay ug sa mga pasundayag sa wala pa ug sa pagkahuman na sa pagpahinungod sa Karaang Tabernakulo niadtong 1852. Walo ka tuig ang milabay, usa ka asosasyon sa mga musikero sa Siyudad sa Salt Lake mitudlo ni Charles John Thomas sa pagdumala sa tabernacle choir ug sa orchestra sa lokal nga teyatro. Si Thomas mipalapad sa talaan sa musika sa koro sa boluntaryo nga mga mag-aawit lapas pa sa mga himno aron maglakip sa klasikal nga European ug ubang inila nga mga kanta. Sa pagka-1863 si Brigham Young ug ang ubang mga lider sa Simbahan naghunahuna sa pagtukod og usa ka bag-o nga tabernakulo nga adunay gibag-o nga lingkoranan, gipalambo nga akostika ug inila nga klase nga organ. Ang bag-ong gambalay makapahiluna dili lamang sa mga sesyon sa kinatibuk-ang komperensiya ug mga miting sa Simbahan apan mga konsiyerto ug kultural nga mga kalihokan usab. Ang bag-ong Tabernakulo sa Salt Lake gipahinungod niadtong 1867 inubanan sa musika nga gidalit sa 150 ka miyembro nga koro nga sa wala madugay ginganlan og sama sa ngalan sa lokasyon niini.1
Orihinal nga tabernakulo ug ang bowery sa Temple Square sa Siyudad sa Salt Lake, circa 1861.
Ang maayo kaayo nga akostika sa Tabernakulo nakapahimo sa gambalay nga usa ka labing nindot nga dapit alang sa konsiyerto sa Kasadpang Amihanang Amerika. Si George Careless, ang direktor sa musika sa Simbahan, padayon nga nanawat og mga boluntaryo nga mga mag-aawit ug nag-organisar og mga konsiyerto uban sa Theater Orchestra sa Salt Lake, nga nakig-alayon sa mga lokal nga mga magtutudlo sa musika aron sa pagpalambo og dungog sa siyudad isip usa ka sentro sa batid nga magpapasundayag. Sa kinatibuk-an sa 1860 ug 1870, uban sa nagkalain-laing mga koro, ang Tabernacle Choir sa Salt Lake kanunay nga mipasundayag sa kinatibuk-ang komperensiya.2
Dugang nga mga direktor, lakip nila ni Ebenezer Beesley ug Evan Stephens, midugang og mga miyembro sa koro, nakapaabot sa kasagarang motambong sa praktis ngadto sa kapin sa 300 sa pag-abot sa mga 1890. Sila usab nangulo sa Koro sa mga biyahe aron sa pagpasundayag. Si Stephens mipadaghan sa mga pasundayag ngadto sa kapin sa 120 ka tulumanon sa Simbahan ug mga asembliya atol sa iyang unang tuig isip direktor ug midala sa Koro ngadto sa labing sikat nga pasundayag niini niadto nga panahon, ikaduhang dapit sa usa ka panagsangka sa mga koro sa 1893 didto sa Chicago World’s Fair [Tibuok Kalibotan nga Perya sa Chicago].3 Si Joseph F. Smith sa Unang Kapangulohan midayeg sa Koro tungod sa pagkab-ot og lukop sa nasod nga positibong mga pasidungog ug sa pagtabang “sa pagtangtang sa diskriminasyon” nga mitumaw batok sa Simbahan.4 Niadtong 1895 ang Unang Kapangulohan mipagawas og opisyal nga mga calling ngadto sa mga mag-aawit sa pagserbisyo diha sa Koro, nagkonsiderar kanila nga mga misyonaryo ug misaad sa suporta aron sa pagpadayon sa reputasyon sa Koro isip usa ka malamposon ug hanas nga grupo sa mga musikero.5
“Ang Tabernacle Choir nga mipasundayag didto sa Chicago World‘s Fair niadtong 1893 ngadto sa 10 ka libo nga nanambong.”
Ang sumusunod ni Evan Stephens, si Anthony Lund, mihangop sa bag-ohay nga mitumaw nga teknolohiya sa pagsibya sa radyo ug nangulo sa Koro sa lokal nga buhi nga mga sibya sugod niadtong 1924. Lima ka tuig ang milabay, ang Koro ug ang tigdumala sa estasyon sa radyo sa Siyudad sa Salt Lake nga si Earl J. Glade milusad sa nasodnong sinemana nga sibya sa matag Dominggo nga nagpasundayag sa sagrado nga musika ug sa ulahi nga mga yugto, usa ka mubo nga wali ug solo sa organ.6 Tulo ka bulan human sa unang nasodnong sibya, ang stock market nahagsa, nakaingon sa pagkahugno sa ekonomiya atol sa Dakong Pagkahagsa sa Ekonomiya [Greart Depression]. Latas sa Estados Unidos, daghang mga tigpaminaw nga nag-antos sa kadugay nga walay trabaho ug kakulang sa pagkaon ang nadasig pinaagi sa musika sa Koro.7
Niadtong 1930 usa ka batan-ong empleyado sa radyo ug sa kaulahian usa ka Apostol nga si Richard L. Evans miapil sa sibya sa Musika ug ang Gipamulong nga Pulong isip ang tig-anunsyo sa programa. Si Evans mihimo sa naandan nga pangbukas nga, “Gikan sa Kinasang-an sa Kasadpan, gihangop namo kamo sa Temple Square sa Siyudad sa Salt Lake alang sa Musika ug ang Gipamulong nga Pulong uban sa Mormon Tabernacle Choir,” ug ang usa ka nailhan nga pangtapos, “Hinaot nga ang kalinaw magauban kaninyo karon ug sa kanunay.” Atol sa iyang 41 ka tuig sa pagsibya, ang mugbo nga mga wali ni Evans ug ang mga pasundayag sa Koro miestablisar sa sinemana nga sibya isip usa ka premyado ug inila sa nasod nga programa.8
Ang pagkainila sa sibya nakadani og bantogan nga mga musikero ug mga konduktor aron sa pagpakigtambayayong uban sa Choir. Sa mga 1950, ang mga pagbiyahe aron sa pagpasundayag midala sa Koro ngadto sa nabantog nga mga hawanan alang sa konsiyerto sa Estados Unidos ug sa Uropa ug sa telebisyon sa tibuok nasod. Samtang ang sunod-sunod nga pagsibya sa radyo nagkadaghan ug ang mga rekording misamot kadaghan, ang Koro nailhan nga may kalabotan sa nasodnong kultura sa Estados Unidos ug sa kasagaran gitawag nga “Koro sa Amerika.” Niadtong 1964 ang Presidente sa Estados Unidos nga si Lyndon Johnson midapit sa Koro sa pagkanta atol sa seremonya sa iyang paglingkod sa katungdanan, usa ka pasundayag nga giisip sa Presidente sa Simbahan nga si David O. McKay nga “ang labing dakong dungog nga miabot sa Tabernacle Choir.”9 Sa mga dekada human niadto, ang pipila sa labing inila nga mga pasundayag sa Koro naglakip sa lima ka seremonya sa paglingkod sa katungdanan sa presidente, ang Bicentennial nga Kasaulogan sa Amerika niadtong 1976 ug ang 2002 nga Winter Olympics.
Ang buhat sa pagrekord ug ang kanunay nga internasyonal nga pagbiyahe aron sa pagpasundayag sa Koro midugang pa sa iyang reputasyon isip usa ka nag-unang grupo sa musikero ug mipalambo og mga magdadayeg sa tibuok kalibotan. Human sa usa ka pito ka semana, unom ka nasod sa Uropa nga pagbiyahe aron sa pagpasundayag niadtong 1955, ang Koro milunsad og pipila ka dagkong mga biyahe aron sa pagpasundayag latas sa Estados Unidos ug sa Uropa, ug sa mga 1990 mipasundayag usab sa pipila ka bahin sa Asya, Habagatang Amerika, Oceania, ug Israel. Sa ubang sitwasyon, ang pagbiyahe aron sa pagpasundayag nakahimo og mga oportunidad sa mga nasod nga kanhi sirado alang sa misyonaryo nga buhat.10
Ang mga rekording sa Koro nakadawat usab og daghan nga pagdayeg sa publiko. Ang 1958 nga rekording sa Koro sa George Frideric Handel nga Messiah nga komposisyon mihalin og sobra sa usa ka milyon ka kopya ug naapil ngadto sa National Recording Registry of the United States Library of Congress alang sa kultural ug makasaysayanon nga kaimportante niini.11 Ang ubang mga rekording ug mga pasundayag sa radyo gikan sa listahan sa sobra sa 200 ka album ug sobra sa 4,700 ka sibya nakadawat og ubang mga pasidungog sama sa Peabody Award, National Radio Hall of Fame, National Medal of Arts, upat ka Emmy Award, ug usa ka Grammy Award.12
Samtang ang mga pagbiyahe aron sa pagpasundayag, mga rekording, ug mga sibya nagkadaghan, ang mga lider sa Simbahan ug mga presidente sa Tabernacle Choir mipalapad sa pagpadagan sa patigayon ug iskedyul sa pasundayag sa Koro aron maabot ang bag-o nga mga tigpaminaw. Ang mga konduktor nga sila si J. Spencer Cornwall, Richard P. Condie, Jay E. Welch, Jerold Ottley, Craig Jessop ug Mack Wilberg mipalapad sa koleksyon sa Koro ug mimentinar sa madungganong kahanas samtang nagtuman sa katuyoan sa Koro sa paghatag og makapabayaw nga debosyonal nga musika sa mga miyembro sa Simbahan ug morepresentar sa Simbahan isip “mga representante sa pakigdait.”13
Sa 2018 ang Koro miusab sa opisyal nga ngalan niini gikan sa Mormon Tabernacle Choir ngadto sa The Tabernacle Choir at Temple Square agig tubag sa hangyo sa Presidente sa Simbahan nga si Russell M. Nelson sa pagtangtang sa pulong nga “Mormon” gikan sa mga ngalan sa organisasyon nga gipasiugdahan sa Simbahan diha sa dinasig nga paningkamot sa paggamit sa eksaktong ngalan sa Simbahan sa Ginoo.14
May Kalabotan nga mga Hisgotanan: Columbian Exposition of 1893, Hymns