“Correlation,” Mga Hisgotanan sa Kasaysayan sa Simbahan (2022)
“Correlation,” Mga Hisgotanan sa Kasaysayan sa Simbahan
Correlation
Sulod sa Ang Simbahan ni Jesukristo sa mga Santos sa Ulahing mga Adlaw, ang Correlation Department mao ang responsable alang sa pagsiguro nga ang tanang buluhaton mahauyon sa doktrina ni Jesukristo ug sa dinasig nga mga palisiya sa Simbahan. Kini nga departamento mitubo gikan sa ika-20 nga siglo nga kalihokan sa pag-usab [reform movement] sa Simbahan, gipangulohan ni Presidente Joseph F. Smith, nga nagtutok sa pagpasayon ug pag-centralize sa buhat sa tanan nga organisasyon sa Simbahan.
Daghang organisasyon sa Simbahan niadtong ika-19 nga siglo, lakip sa mga Sunday School, mga grupo sa kabatan-onan, ug organisasyon sa mga bata, gisugdan sa lokal nga paagi. Sa pagsabot sa panginahanglan sa ilang mga komunidad, daghan sa mga miyembro sa Simbahan ang mipalambo sa mga pakig-asosasyon ug mga serbisyo nga nagsapaw sa mga korum, mga ward, ug mga stake apan kana medyo wala magsalig niana. Sa hinapos sa siglo, daghang organisasyon sa Simbahan, mga korum, ug mga misyon nakapagawas sa ilang kaugalingong pang-instruksiyon nga mga materyal, nga miresulta sa daghang nagkadaiya nga literatura.1 Si Presidente Joseph F. Smith miila sa panginahanglan sa pag-“correlate” sa nagkadaiyang mga programa sa auxiliary ngadto sa hiniusang kurikula, gibulag ang mga espikulasyon gikan sa opisyal nga mga pagtudlo ug pagtukod og pagkaparehas [consistency] sa mga mensahe sa tibuok Simbahan.
Kini nga correlation nagsugod isip usa ka serye sa ad hoc nga mga komite. Niadtong 1908, si Presidente Smith mipili ni kanhi Elder David O. McKay sa Korum sa Napulog Duha ka Apostoles isip tsirman sa bag-ong Kinatibuk-ang Komite sa Pagkapari sa mga Latid [General Priesthood Committee on Outlines] nga ang mga tahas mao ang pagsulat og usa ka kurikulum alang sa mga korum sa pagkapari.2 Sa misunod nga upat ka tuig, kini nga komite mimantala og pang-instruksiyon nga mga libro alang sa matag korum sa Aaronic ug Melchizedek nga Pagkapari. Lakip sa hiniusang mga paningkamot sa pagbansay, kini nga mga libro nakatabang sa pagpasayon sa mga pamaagi sa mga ordinasyon ug sa attendance sa korum. Niadtong 1912, laing Komite sa Correlation naporma aron sa pagpundok sa mga lider sa auxiliary ug i-coordinate ang ilang mga buhat. Hapit diha-diha dayon, ang attendance misaka ug ang lokal nga mga lider sa korum nakatagamtam og mas dakong katin-awan ug suporta diha sa ilang mga calling. Niadtong 1918, si Presidente Smith miorganisar og usa ka bag-ong permanente nga Komite sa Correlation, nga si Elder McKay na sab ang tsirman.
Sa mga tuig 1940, ang pagtubo sa Simbahan sa Utah ug latas sa kalibotan padayon nga miaghat sa mga lider sa paghiusa sa mga materyal ug mga kalihokan, ug ang Unang Kapangulohan mihimo og pipila ka mga organisasyon aron matubag kini nga mga panginahanglan. Niadtong 1940, ang Unang Kapangulohan mihimo sa Union Board of Auxiliaries, gilangkoban sa kinatibuk-ang lider sa matag organisasyon sa Simbahan, ug misugo kanila sa pagpagawas og sumbanan sa kurikulum nga mga materyal. Niadtong 1944, ang Unang Kapangulohan mipundok sa mga komite aron sa pagdumala ug pagtimbang-timbang sa mga literatura nga hinimo sa Simbahan.
Niadtong 1947, ang Unang Kapangulohan ug ang Korum sa Napulog Duha misugo og usa ka apostolikanhong pagrebyo sa tanang mga korum sa Melchizedek ug mga organisasyon, nga gipangulohan ni Elder Harold B. Lee. Sila gisugo sa pagpaminus sa wala na gikinahanglan [redundancy] ug sa pagsiguro nga ang tanang organisasyon sa Simbahan gipangulohan sa direksiyon sa pagkapari.3 Kini nga komite nakamugna og daghang mga sugyot nga narebyo sa Unang Kapangulohan apan wala mapatuman nianang panahona.4 Sulod sa katuigan si Elder Lee mipadayon sa pag-adbokasiya alang sa mas dakong correlation ug pagpalig-on sa pamilya pinaagi sa pagkapari, ug niadtong 1961 ang Unang Kapangulohan mipaila sa Priesthood Correlation Program.5
Ubos niini nga programa, ang responsibilidad sa pagkapari nahimo na nga upat ka kategoriya: misyonaryo nga buhat, genealogy, welfare, ug home teaching. Ang kinatibuk-ang mga komite giorganisar alang sa matag kategoriya niini, ug ang lokal nga mga komite sa pagkapari giestablisar diha sa mga ward. Ang Priesthood Bulletin, usa ka periodiko alang sa mga lider sa pagkapari, nga gilunsad niadtong 1965, uban sa instruksiyon nga gipalambo pinaagi sa nagkadaiyang komite sa correlation, sa Korum sa Napulog Duha, ug sa Unang Kapangulohan. Sa gihapon, ang pagpatunhay sa kamapuslanon sa nagtubo nga mga organisasyon sa Simbahan nagpakita og mga hagit alang sa mga tigdumala sa programa.6
Ang senior nga mga lider sa Simbahan, niining tungora, miabaga sa bug-at nga mga tahas nga administratiba mao nga ilang gisugdan ang pagdelegar ug pag-apod-apod niini nga gipaagi sa correlation. Ang mga consultant nga ikatulong partido niadtong 1971 mihatag og mga rebyo sa operasyon nga mitapos sa daghang administratiba nga proseso ang nagpabug-at sa mga General Authority ug mitambag kon asa nga mga kalihokan ang mahimong ihatag ngadto sa full-time nga mga propesyonal nga mga manager. Ang paghimo og bag-ong mga departamento sa Simbahan nagmapuslanon apan nagpadayon usab ang panginahanglan sa sentro nga dapit alang sa pinal nga pagrebyo [clearinghouse] alang sa kaugalingong mga komunikasyon. Sa sayong bahin sa mga 1970, ang orihinal nga konsepto sa pag-correlate sa mga pagmantala sa mga organisasyon nahimong dakong buhat sa Internal Communications Department, nga sa wala madugay gitipon ngadto sa uban nga mga grupo sa kawani [staff groups] ngadto sa Correlation Department. Sa mga tuig 1980, kini nga departamento mirebyo sa tanang komunikasyon sa Simbahan.7
Sugod sa mga tuig 1970 ug 1980, ang Correlation Department gipangulohan sa usa ka ehekutibo nga komite sa mga General Authority ug sa Kinatibuk-ang Opisyales ug giabagan sa pipila ka propesyonal nga kawani. Ang Correlation Komite sa Simbahan, nga gilangkoban sa Unang Kapangulohan ug sa Korum sa Napulog Duha ka Apostoles, ang midumala ug miaprobar niining mga paningkamot sa departamento. Niining panahona, ang Simbahan nakasinati og hilabihan ka dako nga pagtubo sa gidaghanon sa mga miyembro, nga miresulta sa usa ka daling pagdaghan sa mga stake sa tibuok kalibotan. Lakip sa uban pang mga butang, ang ehekutibong komite naningkamot nga mapakunhod ang pagkalainlain [variation] sa nagkalapad nga Simbahan. Ang mga programa ug mga kalihokan sa Simbahan mihatag og gibug-aton sa kamahinungdanon sa panimalay ug pamilya ug nagkadako ang pagdirekta niini pinaagi sa mga lider sa pagkapari.8
Samtang ang Simbahan padayon nga mitubo sa ika-21 nga siglo ug samtang ang teknolohiya nakahatag og bag-ong mga oportunidad alang sa misyonaryo nga buhat, sa family history, sa edukasyon, ug sa komunikasyon, ang Correlation Department milugway sa paglakip sa nagkadaiyang mga dibisyon. Kini nga mga dibisyon nakatuman sa buhat sa pagtimbang-timbang sa tanang materyal sa Simbahan ug sa intellectual property, nagpalambo sa pagplano, ug mga proseso, ug pagpahigayon og internal nga pagsiksik. Ang buhat sa correlation mipalapad usab sa mga punoang buhatan sa Simbahan sa paglakip sa mga Kapangulohan sa Area sa tibuok kalibotan. Ang maong mga paglugway [expansion] gidesinyo sa pagtabang sa tibuok kalibotan nga Simbahan nga maningkamot alang sa panaghiusa taliwala sa nagkadakong pagkadaiya sa pinulongan ug kultura.
May Kalabotan nga Hisgotanan: Mga Punoang Buhatan sa Simbahan [Church Headquarters]