Ang Pagpundok sa Israel

Ang mga panagna sa Daang Tugon mipasalig sa mga anak sa Israel nga, bisan kon sila pagatibulaagon taliwala sa mga nasud, nga sila usab usa ka adlaw pagapundukon pag-usab.¹ Ang bag-ong nahubad nga mga Basahon ni Mormon ug ang mga pagpadayag sa Ginoo ngadto ni Joseph Smith nagtudlo sa mga unang mga Santos nga sila nagpuyo sa panahon diin ang gisaad nga panagpundok pagasugdan. Kining panagpundok mahitabo samtang sila magsangyaw sa tibuok kalibutan, magdala sa ebanghelyo sa nagkatibulaag nga mga kaliwat sa Israel ug sa tanan kinsa nagtinguha aron masagop ngadto sa pamilya sa pakigsaad. Sa samang higayon, ang mga Santos gilauman sa pagtukod og usa ka “siyudad sa Zion” diin ang mga kinabig magkapundok agig pagpangandam alang sa Ikaduhang Pag-anhi ni Jesukristo.²

Sulod sa mga bulan sa pag-organisar sa Simbahan niadtong 1830, usa ka pagpadayag ngadto ni Joseph Smith nagsugo sa mga bag-ong nabunyagan nga mga miyembro sa pagbiya sa ilang mga panimalay ug sa pagpundok “ngadto sa usa ka dapit sa ibabaw niini nga yuta.”³ Dugang nga pagpadayag ang mitakda sa Ohio isip ang unang dapit sa panagpundok.⁴ Samtang ang mga tumutuo nagpanon ngadto sa Kirtland, Ohio, usa ka pagpadayag ngadto ni Joseph Smith ang mitino sa usa ka dapit nga duol sa balangay sa Independence sa Distrito sa Jackson, Missouri, isip ang dapit diin sugdan ang pagtukod sa siyudad sa Zion.⁵ Ang mga Santos gipapahawa gikan sa distrito niadtong 1833, nagpugong nila sa pagtukod sa gisaad nga siyudad, apan mipadayon sila sa pagpahimutang og mga panimuyo diha sa naglibut nga mga distrito diin ang mga kinabig magkapundok.

Ang panagpundok nakaangkon og dugang nga kapaspason niadtong Abril 1836 sa dihang ang propeta sa Daang Tugon nga si propeta Moises mipakita kang Joseph Smith ug Oliver Cowdery didto sa Templo sa Kirtland ug mihatag kanila sa “mga yawe sa pagpundok sa Israel gikan sa upat ka bahin sa yuta, ug sa paggiya sa napulo ka mga tribo gikan sa Yuta sa Amihanan.”⁶ Si Apostol Heber C. Kimball ug si Orson Hyde sa wala madugay gitawag ngadto sa England, nag-establisar sa unang langyaw nga misyon sa Simbahan.⁷ Liboan ka mga kinabig misugod sa pagpundok ngadto sa mga stake sa mga Santos sa Ulahing mga Adlaw didto sa Ohio, Missouri, ug sa kadugayan, sa Illinois. Sa Nauvoo, Illinois, ang mga Santos mitukod og dako nga stake ug misugod sa pagtukod sa bag-ong templo. Si Joseph Smith mitudlo nga sa usa ka pagsabut, “ang tibuok Amerika mao ang Zion”, ug ang mga Santos mahimong magpundok bisan asa basta nga adunay usa ka templo diha.⁸ Mipasabut siya nga ang “nag-unang katuyoan” sa panagpundok mao ang “pagtukod og usa ka balay sa Ginoo diin Iyang mapadayag sa Iyang katawhan ang mga ordinansa sa Iyang balay ug ang mga himaya sa Iyang Gingharian ug magtudlo sa katawhan sa paagi sa kaluwasan.”⁹

Human sa kamatayon ni Joseph Smith, ang mga Santos milangyaw ngadto sa Kasadpang Amerika, diin mipadayon sila sa pag-establisar sa stake sa Zion ug pagtukod sa mga templo. Niadtong 1848 ang mga lider sa Simbahan miawhag sa mga kinabig sa Uropa nga “molangyaw gayud dayon kutob sa mahimo” ngadto sa Great Basin.¹⁰ Ang mga bag-ong mga miyembro sa gawas sa nasud—ilabi na kadtong anaa sa Great Britain ug Scandinavia—matinguhaong misunod sa mga sugo sa mga lider sa Simbahan, daghan kaayo mao nga ang bag-ong mga kumonidad (pinuy-anan) sa mga Santos sa Ulahing mga Adlaw nakasinati og mga hagit sa ekonomikanhong paagi sa pagsuporta ug paghugpong ngadto sa katilingban tungod sa kadaghanon sa mga imigrante.¹¹ Sa mga misyon, ang makanunayong pagbiya sa mga kinabig gikan sa lokal nga mga branch paingon ngadto sa mga stake sa Utah nakapalisud sa mga paningkamot sa pag-proselyte. Sa katapusan, niadtong 1887, ang balaudnon nga kontra-poligamiya sa Estados Unidos miputol sa Makanunayong Pundo sa Paglalin [Perpetual Emigrating Fund], sa Simbahan nga mipakunhod sa abilidad sa Simbahan sa paghatag og tabang sa paglalin sa paagi nga nahimo niini sukad pa niadtong 1849.¹²

Ang mga lider sa Simbahan niadtong mga tuig sa 1890 misugod sa pag-awhag sa bag-ong mga miyembro nga magpabilin sa ilang yutang pinuy-anan. Niadtong 1894, pananglitan, ang Unang Kapangulohan ug Korum sa Napulog Duha ka mga Apostoles mihukom nga ang mga miyembro nga layo sa Utah “kinahanglan dili awhagon sa paglalin hangtud nga sila lig-ong nakagamot sa relihiyon pinaagi sa trabaho ug kasinatian” ug nga kadtong mga maayo na og kinitaan sa panarbaho kinahanglang “dili awhagon sa paglalin dinhing dapita, diin gamay ra ang katrabahuan.”¹³ Apan ang nag-una nga direktiba sa pagpapundok ngadto sa Zion nagpadayon nga nakapadani sa pipila ka mga miyembro, ug ang mga lider mibati nga makonsensya kon ilang wad-on ang kadasig sa mga miyembro sa paglalin kon sila nagtinguha ug adunay ikasarang sa pagbuhat sa ingon. Ang opisina sa misyon sa Liverpool mipadayon sa pagserbisyo isip usa ka ahensya sa paglalin hangtud nga ang mga punoang buhatan sa British Mission nabalhin ngadto sa London niadtong 1933, bisan og ang pagpanglalin mipadayon sa pagkunhod.¹⁴

Niadtong 1952 si Presidente David O. McKay mibiyahe ngadto sa Uropa aron sa pagpili og mga dapit alang sa mga templo sa Inglatera [England] ug sa Switzerland. Samtang naa didto, gisultihan niya ang usa ka reporter nga, “Among tumong nga ang among mga sakop magpabilin dinhi imbis nga dasigon sila sa paglalin ngadto sa Utah ug sa ubang mga dapit sa Estados Unidos.”¹⁵ Mipasabut siya nga ang presensya sa mga templo makahatag sa mga panalangin sa Zion ngadto sa mga Santos sa Uropa. Ang misunod nga mga Presidente sa Simbahan mipadayon sa pagkab-ot sa tumong sa pagtukod sa mga templo bisan asang dapit nga dunay daghang mga Santos. Niadtong 1977 si Elder Bruce R. McConkie misubli nga ang Zion anaa bisan asang dapit diin ang indibidwal magpundok ngadto sa tinuod nga panon sa Dios pinaagi sa bunyag ug pakigsaad. Kalabut sa mga katawhan ni Enoch, si Elder McConkie mitudlo, “Ang paghimo og usa ka stake sama ra sa pagtukod og usa ka Dakbayan sa Pagkabalaan. Ang kada stake sa yuta mao ang pundokanan nga dapit alang sa nawalang karnero sa Israel kinsa nagpuyo nianang dapita.”¹⁶ Ang pagpadaghan sa mga templo ug mga stake sa tibuok kalibutan nakahatag sa mga Santos sa Ulahing mga Adlaw og mga bintaha ug mga panalangin sa pagpundok samtang nag-abag usab sa gipadayon nga pagpundok sa mga anak sa Dios diha sa ilang kaugalingong yuta.

May kalabutan nga Hilisgutan: Zion/New Jerusalem, Early Missionaries, Dedication of the Holy Land, Wards and Stakes