Masonry

Ang Freemasonry usa ka sosyal nga organisasyon alang sa kalalakin-an nga mitubo gikan sa gatusan na ka tuig nga mga kahugpongan sa panarbaho sa Europe. Ang mga Freemason (o mga Mason) mag-abut sa mga lodge, diin sundugon nila sa ritwal nga paagi ang usa ka sugilanon nga gibase sa mubo nga istorya diha sa biblia sa usa ka tawo nga ginganlan og Hiram, kinsa gisugo ni Solomon nga motrabaho sa templo sa Jerusalem.¹ Panahon sa pagsundog, ang mga Mason mouswag diha sa lain-laing ritwal ug ranggo, mogamit og espesyal nga mga paggunitay sa kamot, importanting mga pulong, ug espesyal nga mga saput. Sa Masonic nga mga ritwal, ang mga Mason mopasalig nga mahimong takus sa pagsalig ug magmaunungon sa ilang Masonic nga kaigsoonan. Agig dugang sa pag-apil niini nga mga ritwal, ang mga Mason magkita sa sosyal nga mga sitwasyon, moapil og mga kalihokan sa paglig-on sa komunidad, ug mohatag og mga amot sa kalooy sa nagkadaiyang mga kawsa.

Mga Mason ang pipila sa mga nahaunang mga Santos sa Ulahing mga Adlaw. Si Heber C. Kimball, Hyrum Smith, ug ang uban nahisakop sa Masonic nga mga lodge niadtong mga 1820, ug si Joseph Smith miapil sa hugpong sa panag-igsoonay niadtong Marso 1842 sa Nauvoo, Illinois.² Wala madugay human nga nahimo siyang usa ka Mason, gipaila ni Joseph ang pagtuga [endowment] sa templo. Adunay pipila ka pagkasusama tali sa mga seremonya sa Mason ug sa pagtuga, apan adunay dagkong mga kalainan usab diha sa ilang sulod ug sa ilang intensyon.

Kasaysayan sa Masonry

Walay nahibaloan nga mga dokumento sa Mason sa wala pa ang mga 1400. Ang labing unang mga rekord nagsaysay og istorya sa Masonry nga nagsugod sa kapanahunan sa Daang Tugon. Ang labing karaang nahabilin nga mga rekord sa miting sa Masonic nga mga lodge gibana-bana nga gikan sa mga 1600 ug nagpakita nga ang organisasyon sa kinatibuk-an nakatutok sa pagdumala sa trabaho sa pagkakantero [stonemasonry]. Ang ulahi nga mga rekord nagpakita nga ang mga lodge hinay-hinay nga nakontrolar sa mga tawo nga dili kantero. Kini nga mga miyembro miusab sa organisasyon gikan sa usa ka kahugpongan sa panarbaho ngadto sa usa ka hugpong sa panag-igsoonay [fraternity].

Ang mga Mason misaysay og istorya kon sa unsang paagi ang ilang karaan nga mga miyembro nakat-on sa pagkakantero, migamit niini sa pagtukod sa templo ni Solomon, mipanalipod sa dapit sa templo, ug mitipig sa kahibalo sa ilang propesyon isip binantayan nga sekreto.³ Pag-abut sa panahon ni Joseph Smith, dugay na nga nahanap ang kalainan tali sa nahaunang kasaysayan sa Masonry sa Europe ug ang katukurang mga istorya ug mga tradisyon niini. Ang mga ritwal sa Freemasonry morag naggikan sa sayo nga bahin sa modernong Europe.⁴ Ang mga aspeto niini nga mga seremonya adunay pagkasusama sa relihiyuso nga mga tulumanon diha sa daghan nga mga kultura, karaan ug moderno.⁵

Ang pagkainila sa Freemasonry kusog kaayo sa Estados Unidos sa mga tuig 1790 hangtud 1826. Ang inila nga mga Amerikanong tagtukod nga sila George Washington ug Benjamin Franklin mga Mason, ug ang inila nga mga politiko sama ni Andrew Jackson ug Henry Clay wala madugay miapil sa hugpong sa panag-igsoonay.⁶ Bisan pa niana, ang pipila ka mga Amerikano sa panahon ni Joseph Smith nabalaka sa pagkasekreto ug pagkahimili nga kinaiya sa Masonry.⁷ Kining “mga kontra-Mason” miporma og mga katilingban, mimantala og mga pamantalaan ug, sulod sa usa ka panahon, miorganisar isip usa ka nasyonal nga politikanhong grupo.⁸ Bisan pa niini nga mga kalihokan, ang sekreto nga mga katilingban sama sa mga Mason nanaghan sa Estados Unidos, ug ang Masonic nga mga lodge giestablisar diha sa kadaghanan sa mga dagkong komunidad.⁹

Masonry sa Nauvoo

Niadtong Disyembre 1841, 18 ka Mormon nga mga Mason miorganisar og usa ka lodge diha sa Nauvoo. Si Joseph Smith ug 40 pa ka tawo mi-aplay sa pagkamiyembro pagkasunod nga adlaw. Niadtong Marso 15, 1842, si Illinois Grand Master Mason Abraham Jonas opisyal nga mitugot sa pag-organisar sa Nauvoo Lodge, mitudlo sa mga opisyal niini, ug midawat ni Joseph ug Sidney Rigdon ngadto sa ranggo nga “Entered Apprentice” sa ikaduhang andana nga luna ibabaw sa Red Brick Store ni Joseph. Pagkasunod adlaw, gipauswag ni Jonas si Joseph ug Sidney isip “Fellow Craft” ug gipasaka ang ranggo isip mga “Master Mason.”¹⁰ Ang mga tinubdan sa kasaysayan wala mopasabut sa motibo ni Joseph Smith sa pag-apil sa mga Freemason. Sa daghang lokalidad sa nahaunang Amerika, ang labing importante nga pinili nga mga opisyal mga Mason usab. Sa iyang pag-apil, si Joseph tingali nagtuo nga makaangkon siya og grupo sa mga kaalyado nga makahatag kaniya og koneksyon sa politikanhong impluwensya ug proteksyon batok sa pagpanglutos. Human gibudhian sa pipila sa iyang labing suod nga mga kauban sa Missouri, ang paghatag og gibug-aton sa Masonry sa pagkakompidensyal ug pagkamaunungon tingali nakadani ni Joseph. Ang mga Mormon nga Mason malagmit miawhag ni Joseph nga mo-aplay sa pagkamiyembro. Bisan unsa pa man, si Joseph, sama sa tanang Mason, tingali misulti nga ang iyang tuyo sa pag-apil mao lamang ang pag-angkon og kahibalo ug sa pagserbisyo sa uban.¹¹

Ang Masonic Hall sa Nauvoo.

Daghang mga Santos sa Ulahing mga Adlaw ang miapil sa Nauvoo Lodge, nga sa wala madugay nahimong labing dako diha sa estado. Kining paspas nga pagtubo nakapaduda sa daghang mga Mason nga ang mga Mormon modominar sa organisasyon sa Illinois. Sa sinugdanan, ang Grand Lodge sa estado mipadayon sa pagtugot sa Nauvoo Lodge, mihatag niini og panahon nga makorihian ang mga iregularidad sa pagpanawat niini og bag-o nga mga miyembro, apan pagka-Oktubre 1843, gibakwi niini ang pagtugot.¹² Dayon, sa dihang si Joseph ug Hyrum Smith gipatay sa Carthage niadtong Hunyo 1844, ang mga Mormon nga Mason mibati og kasuko ug gibudhian sa dihang miingon ang mga saksi nga adunay mga Mason sa pundok sa manggugubot. Pagkadungog sa istorya sa iyang kamatayon, ang ubang mga miyembro sa Simbahan nagtuo nga si Joseph tingali migamit og Masonic nga tawag sa panabang sa katapusan niya nga mga gutlo, nga nakadugang sa gibati sa mga Santos nga gibudhian.¹³ Ang dili maayong relasyon tali sa mga Santos sa Ulahing mga Adlaw ug mga Mason sa Illinois ug sa palibut nga dapit misamot ka grabe, ug niadtong Oktubre 1844, ang Grand Lodge miputol sa tanang koneksyon niini ngadto sa Nauvoo Lodge ug mga miyembro niini. Ang mga Mason sa Nauvoo, hinoon, mipadayon sa kinaugalingon nga pagpadagan sa ilang lodge hangtud sa 1846, sa dihang ang mga Santos sa kinatibuk-an mibiya sa Illinois.¹⁴ Human miabut sa Utah, ang mga Santos sa Ulahing mga Adlaw wala moestablisar og bag-ong Masonic nga mga lodge.

Ang Masonry ug ang Pagtuga

Niadtong Mayo 3, 1842, gisugo ni Joseph Smith ang pipila ka mga tawo sa pag-andam sa luna sulod sa iyang Red Brick Store nga abutanan sa mga Mason sa Nauvoo, “agig pagpangandam sa paghatag sa pagtuga ngadto sa pipila ka mga Elder.”¹⁵ Pagkasunod adlaw, gipaila ni Joseph ang pagtuga sa templo sa unang higayon ngadto sa siyam ka mga lalaki, diin ang tanan pulos usab mga Mason.¹⁶ Usa niini nga mga lalaki, si Heber C. Kimball, misulat kalabut niini nga kasinatian ngadto sa kaubang Apostol nga si Parley P. Pratt, kinsa nagmisyon sa England. “Nakadawat kami og pipila ka bililhong mga butang pinaagi sa Propeta mahitungod sa priesthood,” misulat si Kimball mahitungod sa pagtuga, mitimaan nga “adunay pagkasusama sa priesthood diha sa masonry.” Gisultihan niya si Pratt nga nagtuo si Joseph nga ang Masonry “gikuha gikan sa priesthood apan nahimo na nga masalaypon.”¹⁷ Si Joseph Fielding, ang laing natugahan [endowed] nga Santos sa Ulahing mga Adlaw ug usa ka Mason, mitimaan sa samang paagi diha sa iyang journal nga ang Masonry “mora og usa ka tikanganan o pagpangandam alang sa laing butang,” nga nagpasabut sa pagtuga.¹⁸

Ang mga Mormon sa Nauvoo kinsa nakasinati sa Masonic nga mga tulumanon ug sa pagtuga miila sa pagkasusama tali sa pipila ka mga parte sa duha ka seremonya, apan mipamatuod usab sila nga ang pagtuga resulta sa pagpadayag. Si Willard Richards, nagsulat sa kasaysayan ni Joseph Smith, mitudlo nga ang pagpaila sa pagtuga didto sa Nauvoo “gidumala pinaagi sa baruganan sa Pagpadayag.”¹⁹ Si Joseph ug ang iyang mga kaubanan misabut sa Masonry nga usa ka institusyon nga mipatunhay og mga bahin sa karaan nga kamatuoran.²⁰ Sila miila og mga pagkaparehas tali sa mga ritwal sa Mason ug sa pagtuga apan nakahukom, base sa ilang kasinatian sa duha, nga ang ordinansa balaanong gipahiuli.²¹

Ang paghatag og gibug-aton sa pagkasusama tali sa mga estilo sa pagtudlo ug sa dayag nga mga pamaagi sa Masonry ug sa pagtuga diha sa templo misalipud sa dagkong kalainan sa ilang katuyoan. Ang mga seremonya sa Mason nag-awhag sa pagpalambo sa kaugalingon, pag-inigsoonay, gugmang putli, ug kamaunungon ngadto sa kamatuoran sa katuyoan nga mohimo og mas maayo nga mga tawo, kinsa sa ilang bahin mohimo og mas maayo nga katilingban.²² Panahon sa mga ordinansa sa templo, ang mga lalaki ug mga babaye makigsaad sa Dios nga motuman sa Iyang mga balaod sa katuyoan nga makaangkon og kahimayaan pinaagi sa Pag-ula ni Jesukristo.²³ Ang mga ritwal sa Mason mohatag og instruksyon sa matag lakang gamit ang pagdrama ug simbolikanhong mga lihok ug sinina, diin ang sulod gibase sa mga sugilanon [legend] sa Mason. Ang pagtuga mogamit og susama nga mga paagi sa pagtudlo, apan kasagaran kining gibase sa mga pinadayag ug dinasig nga mga hubad nga gihatag kang Joseph Smith alang sa sulod niini.

Laing mahinungdanong kalainan tali sa mga ritwal sa Mason ug sa pagtuga mao ang gitugutan sa pag-apil. Samtang ang mga Mason adunay higpit nga mga giya kon si kinsa ang makaapil sa hugpong sa panag-igsoonay, si Joseph Smith naglaum nga mahatag ang pagtuga “bisan ngadto sa pinakahuyang sa mga Santos” sa “labing madali kon sila andam na sa pagdawat niini, ug usa ka tukma nga dapit ang giandam aron paghatag niini.”²⁴ Sigun niini, si Brigham Young ug ubang mga lalaki ug mga babaye kinsa gitugahan ni Joseph sa wala pa siya mamatay mipahigayon sa ordinansa ngadto sa liboan ka mga Santos sa Ulahing mga Adlaw sa Nauvoo. Dugang pa, kadaghanan sa mga grupo nga Mason dili modawat og mga babaye.²⁵ Si Joseph, sa laing bahin, mitudlo nga importante nga ang mga babaye nga Santos sa Ulahing mga Adlaw makadawat sa pagtuga. Daghang mga babaye sa Nauvoo naandam alang niini nga ordinansa pinaagi sa ilang pag-apil sa Relief Society.²⁶

Adunay lain-laing mga paagi sa pagsabut sa relasyon tali sa Masonry ug sa templo. Ang ubang Santos sa Ulahing mga Adlaw milantaw sa pagkasusama tali sa pamaagi ug simbolo sa pagtuga ug sa mga ritwal sa Mason ug sa daghang karaan nga relihiyusong mga seremonya isip ebidensya nga ang pagtuga usa ka pagpahiuli sa usa ka karaan nga ordinansa.²⁷ Ang uban mitimaan nga ang mga ideya ug mga institusyon sa kultura nga naglibut kang Joseph Smith kanunay nga nakatampo sa proseso diin nakaangkon siya og pagpadayag.²⁸ Bisan unsa pa man, ang pagtuga wala lamang mosundog sa mga ritwal sa Freemasonry. Hinoon, ang pagkahibalag ni Joseph sa Masonry daw nagsilbi nga sinugdanan alang sa pagpadayag. Gipahiuli sa Ginoo ang mga ordinansa sa templo pinaagi ni Joseph Smith aron sa pagtudlo og mahinungdanon nga mga kamatuoran mahitungod sa plano sa kaluwasan ug sa pagpaila sa mga pakigsaad nga makatugot sa mga anak sa Dios sa pagsulod sa Iyang presensya.

Bibliograpiya

Ang mosunod nga publikasyon naghatag og dugang nga impormasyon kabahin niini nga hisgutanan. Pinaagi sa pag-refer o pag-link kanimo ngadto niini nga mga kapanguhaan, wala kami mag-endorso o mogarantiya sa sulod o sa mga panglantaw sa tagsulat.

Steven C. Harper, “Freemasonry and the Latter-day Saint Temple Endowment Ceremony,” sa Laura Harris Hales, ed., A Reason for Faith: Navigating LDS Doctrine and Church History (Provo, UT: Religious Studies Center, Brigham Young University, 2016).

May Kalabutan nga mga Hisgutanan: Pagtuga sa Templo, Kamatayon ni Joseph ug Hyrum Smith

1. Sumala sa 1 Mga Hari 7:13–45, “ug ang hari nga si Solomon nagpaadto ug gipakuha si Hiram gikan sa Tiro. Siya maoy anak nga lalaki sa usa ka balo nga babaye sa banay ni Nephtali” ug batid sa pagtrabaho og tumbaga. Sa sulugilanon sa Mason, nailhan siya isip Hiram Abiff ug dili angay nga masaypan nga si Hiram nga hari sa Tiro, kinsa tataw usab nga mitabang sa pagsuporta sa pagtukod sa templo ni Solomon (tan-awa sa 2 Samuel 5:11).

2. Joseph Smith journal, Mar. 15, 1842, sa Journal, December 1841–December 1842, 91, josephsmithpapers.org.

3. The Constitutions of the Free-Masons, Containing the History, Charges, Regulations, &c. of That Most Ancient and Right Worshipful Fraternity (Philadelphia: n.p., 1734).

4. Margaret C. Jacob, The Origins of Freemasonry: Facts and Fictions (Philadelphia: University of Pennsylvania Press, 2006); David Stevenson, The Origins of Freemasonry: Scotland’s Century, 1590–1710 (Cambridge: Cambridge University Press, 1988); Arturo de Hoyos, ed., Albert Pike’s Esoterika: The Symbolism of the Blue Degrees of Freemasonry (Washington, DC: Scottish Rite Research Society, 2005).

5. Tan-awa sa Hugh Nibley, Temple and Cosmos: Beyond This Ignorant Present, gi-edit ni Don E. Norton (Provo, UT: Foundation for Ancient Research and Mormon Studies, 1992), 419–23; William H. Stemper Jr. ug Guy L. Beck, “Freemasons,” sa Lindsay Jones, ed., Encyclopedia of Religion, 2nd ed. (New York: Thomson Gale, 2005), 3193–99.

6. Steven C. Bullock, Revolutionary Brotherhood: Freemasonry and the Transformation of the American Social Order, 1730–1840 (Chapel Hill: University of North Carolina Press, 1996).

7. Ang suod nga mga higala ni Joseph Smith nga sila Martin Harris ug William W. Phelps mga kontra-Mason. Si Harris gikataho nga naghunahuna nga ang Basahon ni Mormon kontra sa Mason sa kinaiya, nga mao usab ang hunahuna sa nahaunang mga kritiko sa basahon. Tan-awa sa “Antimasonic Religion,” Geauga Gazette (Painesville, OH), Mar. 15, 1831; Alexander Campbell, Delusions: An Analysis of the Book of Mormon with an Examination of Its Internal and External Evidences, and a Refutation of Its Pretenses to Divine Authority (Boston: Benjamin H. Greene, 1832), 9–10. Kining sayop nga pagsabut malagmit gibase sa paghisgot sa Basahon ni Mormon sa kasagarang gigamit nga hugpong sa mga pulong nga “tinago nga mga kalihokan.” Tan-awa sa Paul Mouritsen, “Secret Combinations and Flaxen Cords: Anti-Masonic Rhetoric and the Book of Mormon,” Journal of Book of Mormon Studies, vol. 12, nu. 1 (2003), 64–77, 116–18.

8. David G. Hackett, That Religion in Which All Men Agree: Freemasonry in American Culture (Berkley: University of California Press, 2014), 111–24.

9. Mark C. Carnes, Secret Ritual and Manhood in Victorian America (New Haven, CT: Yale University Press, 1989); Mary Ann Clawson, Constructing Brotherhood: Class, Gender, and Fraternalism (Princeton, NJ: Princeton University Press, 1989).

10. Tan-awa sa Glen M. Leonard, Nauvoo: A Place of Peace, a People of Promise (Siyudad sa Salt Lake: Deseret Book, 2002), 313–21.

11. David Bernard, Light on Masonry: A Collection of All the Most Important Documents on the Subject of Speculative Free Masonry … (Utica, NY: William Williams, 1829), 16.

12. Tan-awa sa Brady G. Winslow, “Irregularities in the Work of Nauvoo Lodge: Mormonism, Freemasonry, and Conflicting Interests on the Illinois Frontier,” John Whitmer Historical Association Journal, vol. 34, nu. 2 (Tinglarag/Tingtugnaw 2014), 58–79.

13. “The Murder,” Times and Seasons, vol. 5, nu. 13 (Hulyo 15, 1844), 585. Tan-awa usab sa Orson F. Whitney, Life of Heber C. Kimball, an Apostle: The Father and Founder of the British Mission (Siyudad sa Salt Lake: Juvenile Instructor Office, 1888), 26–27.

14. Kenneth W. Godfrey, “Freemasonry in Nauvoo,” sa Daniel H. Ludlow, ed., Encyclopedia of Mormonism, 4 vols. (New York: MacMillan, 1992), 2:527–28.

15. Lucius N. Scovil, “The Higher Ordinances,” Deseret Evening News, Peb. 11, 1884, 2.

16. Joseph Smith, “History, 1838–1856, volume C-1 [2 November 1838–31 July 1842],” 1328, josephsmithpapers.org. Ang mga lalaki mao sila si Hyrum Smith, Brigham Young, Willard Richards, Heber C. Kimball, William Law, William Marks, James Adams, George Miller, ug Newell K. Whitney (Joseph Smith journal, May 4, 1842, sa Journal, December 1841–December 1842, 94, josephsmithpapers.org). Siyam usab ang labing ubos nga gidaghanon sa mga miyembro nga gikinahanglan aron sa pag-establisar og sanga sa mga Royal Arch Mason. Ang Royal Arch Masonry naglakip og nagsunod nga mas taas nga mga ang-ang sa Mason nga gibuhat sa ubang mga Mason. Kadtong makadawat og mga ang-ang sa Royal Arch moagi og tabil padulong ngadto sa usa ka Balaan sa mga Balaan ug mosulod sa “Balaang Kapunongan sa Halangdon nga Pagkapari.” Wala hisayri kon unsay nahibaloan ni Joseph Smith kalabut sa Royal Arch Masonry. Adunay usa ka sanga sa Royal Arch sa Springfield niadtong 1841 ug ang suod nga kauban ni Joseph nga si Newel K. Whitney usa ka Royal Arch Mason. Tan-awa sa Michael W. Homer, Joseph’s Temples: The Dynamic Relationship between Freemasonry and Mormonism (Siyudad sa Salt Lake: University of Utah Press, 2014), 245–49.

17. Sulat ni Heber C. Kimball ngadto ni Parley P. ug Mary Ann Frost Pratt, Hunyo 17, 1842, Church History Library, Siyudad sa Salt Lake. Si Kimball usa ka Mason sulod sa dul-an duha ka dekada. Tan-awa sa Steven C. Harper, “Freemasonry and the Latter-day Saint Temple Endowment Ceremony,” sa Laura Harris Hales, ed., A Reason for Faith: Navigating LDS Doctrine and Church History (Provo, UT: Religious Studies Center, Brigham Young University, 2016), 143–57.

18. Andrew F. Ehat, ed., “‘They Might Have Known That He Was Not a Fallen Prophet’—The Nauvoo Journal of Joseph Fielding,” BYU Studies, vol. 19, nu. 2 (Tingtugnaw 1979), 145.

19. Joseph Smith “History, 1838–1856, volume C-1 [2 November 1838–31 July 1842],” 1328–29; tan-awa usab sa Andrew F. Ehat, “‘Who Shall Ascend into the Hill of the Lord?’ Sesquicentennial Reflections of a Sacred Day: 4 May 1842,” sa Donald W. Parry, ed., Temples of the Ancient World: Ritual and Symbolism (Siyudad sa Salt Lake: Deseret Book, 1994), 51. Usa ka pinadayag ngadto ni Joseph Smith niadtong Enero 19, 1841, miawhag sa mga Santos sa pagtukod og templo, aron “Ako mopadayag sa akong mga ordinansa diha niini ngadto sa akong mga katawhan” (“Revelation, 19 January 1841 [D&C 124],” sa Book of the Law of the Lord, 6, josephsmithpapers.org).

20. Tan-awa sa Benjamin F. Johnson, My Life’s Review (Independence, MO: Zion’s Printing and Publishing Co., 1947), 93.

21. Sulat ni Heber C. Kimball ngadto ni Parley P. ug Mary Ann Frost Pratt, Hunyo 17, 1842. Ang panabut sa nahaunang mga Santos sa Ulahing mga Adlaw kalabut sa relasyon tali sa Masonry ug pagsimba sa templo makita diha sa mga simbolo nga kasagarang konektado sa Masonry diha sa mga desinyo ni architect William Weeks alang sa Templo sa Nauvoo ug sa pipila ka mga building sa mga Santos sa Ulahing mga Adlaw sa sayong bahin sa Utah.

22. Tan-awa sa William Hutchinson, The Spirit of Masonry: In Moral and Elucidatory Lectures (New York: Isaac Collins, 1800), 125–34; tan-awa usab sa Steven C. Bullock, Revolutionary Brotherhood: Freemasonry and the Transformation of the American Social Order, 1730–1840 (Chapel Hill: University of North Carolina Press, 1996).

23. Tan-awa sa James E. Talmage, The House of the Lord: A Study of Holy Sanctuaries Ancient and Modern (Siyudad sa Salt Lake: Deseret News, 1912), 99–100; Russell M. Nelson, “Personal Preparation for Temple Blessings,” Ensign, Mayo 2001, 32.

24. Joseph Smith, “History, 1838–1856, volume C-1 [2 November 1838–31 July 1842],” 1328; tan-awa usab sa Joseph Smith journal, May 4–5, 1842, sa Journal, December 1841–December 1842, 94; tan-awa usab sa 94, note 198. Samtang hapit tanan sa mga Masonic lodge kahugpongan sa mga lalaki, adunay pipila ka pangbabaye nga mga lodge sa Europe sa ika-18 nga siglo. Tan-awa sa Jan A. M. Snoek, Initiating Women in Freemasonry: The Adoptive Rite (Leiden, Netherlands: Brill, 2012).

25. Margaret C. Jacob, The Origins of Freemasonry: Facts and Fictions, 92–129.

26. Duha ka adlaw human nahimong usa ka Mason si Joseph Smith, giorganisar niya ang Female Relief Society sa Nauvoo sa samang kwarto sa iyang tindahan diin nag-abut ang Nauvoo Lodge. Si Joseph migamit usahay og mga termino sa Mason kon mamulong sa Relief Society. Sama pananglit, miawhag siya kanila sa “pagsusi og maayo sa matag kandidato,” mipasabut nga “ang Society kinahanglan motubo sa hinay-hinay,” ug mipahimangno kanila nga tipigan nga kompidensyal ang sulod sa usa sa iyang mga sulat sama sa “maayo nga mga mason.” Siya ug ang uban kanunay usab nga maghisgut sa gisaad nga pagtuga sa templo. Nauvoo Relief Society Minute Book, Mar. 17, 1842; Mar. 31, 1842; ug “Copied Documents, March 31 and April 2, 1842,” churchhistorianspress.org; tan-awa usab ang pasiuna sa “1.2 Nauvoo Relief Society Minute Book,” sa Jill Mulvay Derr, Carol Cornwall Madsen, Kate Holbrook, Matthew J. Grow, eds., The First Fifty Years of Relief Society: Key Documents in Latter-day Saint Women’s History (Siyudad sa Salt Lake: Church Historian’s Press, 2016), 24–25.

27. Sama pananglit, ang mga tigsiksik nga mga Santos sa Ulahing mga Adlaw nakabantay sa pagkasusama tali sa pangritwal nga sinina nga gigamit sa mga parte sa karaang Ehipto ug sa sagrado nga mga sinina nga gigamit sa mga Santos sa Ulahing mga Adlaw nga konektado sa pagtuga. Tan-awa sa C. Wilfred Griggs ug uban pa, “Evidences of a Christian Population in the Egyptian Fayum and Genetic and Textile Studies of the Akhmim Noble Mummies,” BYU Studies, vol. 33, nu. 2 (1993), 214–43. Aron maribyu ang ubang karaan nga relihiyusong mga seremonya sa pagsugod, tan-awa ang Hugh Nibley, The Message of the Joseph Smith Papyri: An Egyptian Endowment, 2nd ed. (Siyudad sa Salt Lake: Deseret Book, 2005).

28. Tan-awa sa Samuel Morris Brown, In Heaven as It Is on Earth: Joseph Smith and the Early Mormon Conquest of Death (New York: Oxford University Press, 2012), 185; Harper, “Freemasonry and the Latter-day Saint Temple Endowment Ceremony,” 149–53.