Winter Quarters

Sa 1846, mga bulan human mibiya sa Nauvoo, Illinois, sa usa ka hinay kaayo nga 300-ka milya nga panaw tabok sa Teritoryo sa Iowa, si Brigham Young ug ang Korum sa Napulog Duha ka mga Apostoles mihunong sa paglalin sa mga Santos sa Ulahing mga Adlaw padulong sa kasadpan aron sa pagpangandam alang sa tingtugnaw. Naglaum si Young nga molampos ang pag-adto sa Great Basin nianang ting-init, apan ang lapok ug sakit nakahimog kapildihan sa mga mikagiw [refugee].¹ Tungod sa pagpatay ni Joseph Smith ug ang sunod nga pagpapahawa sa mga Santos gikan sa Nauvoo, daghan sa mga Santos ang nagtuo nga dili na sila makasalig sa balaod sa Amerika alang sa pagpanalipod.

Ang mga Pangulo sa Simbahan mipili og dapit sa Teritoryo sa Indian diha sa Council Bluffs sa rehiyon daplin sa Suba sa Missouri ug naghimo og panagsabut sa mga Omaha (Umonhon) ug Potawatomi (Bodéwadmik) nga mga tribo ug sa Estados Unidos Indian nga mga sinaligan aron sa pagtukod og temporaryong pamuy-anan.² Ang kasadpang daplin sa suba, usa ka nindot nga dapit alang sa pagtabok sa sakayan nga anaa usab sa Teritoryo sa Indian. Mga 7,000 ka mga Santos ang miabut sa 1846, samtang hapit sa 3,000 ang mipabilin sa mga kampo subay sa dalan-dalan sa Iowa.³ Samtang ang mga Santos misugod sa pagtukod og mga kinubkob nga salipdanan ug mga payag nga troso, giatubang nila ang kakulang sa mga pagkaon ug mga tagana sa umaabut nga tingtugnaw. Ang kagutom, kakulang og pagkaon, ug nagdasok nga mga kahimtang nakapadali sa pagkaylap sa sakit.⁴

Samtang ang mga Santos nagplano alang sa umaabut nga panaw, usa ka oportunidad sa pagpalambo sa ilang mga kapanguhaan miabut pinaagi sa kampanya sa Kasundalohan sa Estados Unidos sa pagpanawag og bag-ong mga sundalo. Bisan tuod og ang mga Santos mibati og walay pagsalig sa gobyerno sa Estados Unidos ug nagdumili sa pagpalista sa gubat batok sa Mehiko, 500 ka mga lalaki miuban sa Mormon Batalyon aron makadawat og mga sweldo nga makatabang sa Simbahan.⁵ Kadaghanan sa bayad sa pagserbisyo gihatud ngadto ni Bishop Newel K. Whitney isip mga donasyon. Dayon namalit siya og mga pagkaon ug mga tagana didto sa St. Louis, Missouri, alang sa balay tipiganan sa Winter Quarters.⁶

Nangayo si Brigham Young og paggiya gikan sa Ginoo ug nakadawat og pagpadayag nga nagtudlo sa mga Santos kon unsaon sa pag-organisar ang ilang pagpangbiya.⁷ Daghang mga damgo ang midasig usab ni Young uban ang panan-awon kon sa unsa nga paagi ipahimutang ang balay ni Israel diha sa dalan sa pakigsaad niini. Nahayahay ang iyang hunahuna sa dihang sila mibiya sa Winter Quarters sa Abril 7, 1847, aron sa pakigkuyog sa ubang mga sakop sa nag-unang panon sa mga pioneer samtang misugod sila sa ilang panaw.⁸

Ang nagpabilin nga mga Santos sa Winter Quarters mipunting sa ilang mga paningkamot diha sa pag-andam alang sa dinagko nga paglalin. Sa tibuok ting-init ug sa tinglarag sa 1847, daghan pang mga mikagiw ang miabut gikan sa dalan sa Iowa. Dugang nga mga bishop ang gitawag sa pagtabang og amuma alang sa mga kabus ug timawa—usa sa matag hut-ong sa kabalayan sa siyudad.⁹ Mga kababayen-an, kinsa mas daghan kay sa mga lalaki sa siyudad, nag-ampo ug nagpanalangin sa usag usa.¹⁰ Samtang nagkanindot ang panahon, ang mga Santos mitukod og mas lig-ong mga panimalay ug mitanom og mga talamnon nga mapagamit ngadto sa umaabut nga mga lalin.

Sa pagbalik ni Brigham Young sa Winter Quarters sa tinglarag sa 1847 gikan sa iyang panaw ngadto sa Great Basin, nakita niya ang mauswagong pamuy-anan. Nagpaabut usab siya nga mabiyaan kini, ingon nga ang pag-abang sa tribong yuta sa Omaha matapos sulod sa pipila ka mga bulan. Ang mga Santos misugod sa paglakaw sa kasadpan tabok sa suba ug balik ngadto sa Iowa ug sa kadugayan ginganlan ang ilang bag-ong punoang buhatan sa paglangyaw og Kanesville agi og pasidungog ni Thomas L. Kane, kinsa mitabang kanila human hinginli sa Nauvoo.¹¹

Sa Kanesville sa Disyembre 1847, nagpundok ang mga Santos sa Ulahing mga Adlaw diha sa ilang troso nga tabernakulo aron sa pagpaluyo sa bag-ong Unang Kapangulohan uban kang Brigham Young isip ang presidente. Nahimo si Orson Hyde nga bag-ong Presidente sa Korum sa Napulog Duha ka mga Apostoles.¹² Gigiyahan ni Young ug sa iyang mga magtatambag ang mga panon ngadto sa kasadpan sa tingpamulak; mipabilin si Hyde sa Kanesville aron sa pagdumala sa mga moabut, mga pagpangandam, ug mga pagbiya sa mga Santos nga gikan sa silangang Estados Unidos ug Uropa.

Sa Winter Quarters ang mga Santos nakigbisog sa pagsangkap sa ilang mga kaugalingon alang sa panaw padulong sa kasadpan, apan didto sa Kanesville, ang 1849 nga pagkadiskubre sa bulawan mipasantop og kwarta.¹³ Ang mga langyaw padulong sa California nga nag-agi sa Kanesville andam sa pagbayad og mahal alang sa pagkaon ug mga tagana. Giawhag og balik ni Brigham Young ug sa ubang mga pangulo ang mga Santos sa pagpundok ngadto sa Zion, ug sa 1852, 21 ka tren nga mga karomata sa mga 10,000 ka mga Santos mibiya padulong sa Utah. Wala madugay ang Kanesville giilisan og ngalan nga Council Bluffs, ug ang Winter Quarters nahimong Florence, Nebraska.¹⁴