Dinaghan nga Kaminyoon sa Utah

Pinasubay sa pagpadayag ngadto ni Joseph Smith, ang dinaghan nga kaminyoon––ang pagminyo sa usa ka lalaki ngadto sa duha o sobra pa nga mga babaye—gitugot sa mga miyembro sa Ang Simbahan ni Jesukristo sa mga Santos sa Ulahing mga Adlaw sayo sa mga 1840 sa Nauvoo, Illinois. Kini unang gipaila sa pribado nga paagi ngadto sa usa ka gamay nga grupo sa mga miyembro sa Simbahan, ug ang miapil gihangyo sa paghimo sa ilang mga lihok nga sekreto. Human ang mga Santos mibalhin ngadto sa Utah, ang mga pangulo sa Simbahan sa dayag miangkon sa paghimo, ug tali sa 1852 ug 1890, ang mga Santos sa Ulahing mga Adlaw sa dayag mihimo sa dinaghan nga kaminyoon.

Sulod sa mga tuig nga ang dinaghan nga kaminyoon sa dayag gitudlo, ang tanan nga mga Santos sa Ulahing mga Adlaw gipaabut nga modawat sa baruganan isip usa ka pagpadayag gikan sa Dios. Dili tanan, hinoon, gipaabut sa pagsunod niini. Sa tinuod, kini nga sistema sa kaminyoon dili mahimong sa tanan tungod sa proporsyon sa mga lalaki ngadto sa mga babaye. Gitan-aw sa mga pangulo sa Simbahan ang dinaghan nga kaminyoon isip usa ka sugo ngadto sa Simbahan sa kinatibuk-an, samtang nag-ila nga ang mga indibidwal kinsa wala mohimo sa buhat sa gihapon nagbarug nga gikahimut-an sa Dios. Tingali mga katunga niadtong nagpuyo sa Teritoryo sa Utah sa 1857 misinati og kinabuhi diha sa usa ka daghan og pamilya isip usa ka bana, asawa, o anak sa pipila ka panahon sa ilang mga kinabuhi. Sa 1870, 25 ngadto sa 30 ka porsyento sa mga lumulupyo nagpuyo sa mga panimalay nga daghan og asawa, ug kini ingon og ang porsyento mipadayon sa pagkunhod sulod sa sunod nga 20 ka mga tuig.

Alang sa daghan kinsa mihimo niini, ang dinaghan nga kaminyoon usa ka makahuluganon nga sakripisyo. Bisan pa sa mga kalisud nga gisinati sa pipila, ang pagkamatinud-anon niadtong kinsa naghimo sa dinaghang kaminyoon nagpadayon sa paghatag og kaayohan sa Simbahan sa dili maihap nga mga paagi. Pinaagi sa kaliwatan niining mga Santos sa ika-19 nga siglo miabut ang daghang maunungong mga miyembro, mga pangulo, ug mga misyonaryo, sa Simbahan. Bisan og ang mga miyembro sa kapanahonang Simbahan gidili sa pagtuman sa dinaghan nga kaminyoon, ang modernong mga Santos sa Ulahing mga Adlaw nagpasidungog ug nagtahud niini nga mga pioneer kinsa mihatag og daghan alang sa ilang hugot nga pagtuo, mga pamilya, ug komunidad.

Alang sa dugang nga impormasyon kabahin sa paghimo sa dinaghan nga kaminyoon sa Utah, tan-awa sa “Plural Marriage and Families in Early Utah,” Gospel Topics Essays, topics.ChurchofJesusChrist.org.

Kalabut nga mga Hisgutanan: Joseph Smith and Plural Marriage, Anti-polygamy Legislation, Manifesto