Ang Pamilya ni Joseph ug Emma Hale Smith

“Ang Pamilya ni Joseph ug Emma Hale Smith,” Mga Hisgutanan sa Kasaysayan sa Simbahan

“Ang Pamilya ni Joseph ug Emma Hale Smith”

Ang Pamilya ni Joseph ug Emma Hale Smith

Ang pamilya ni Joseph ug Emma Smith misagubang og grabeng oposisyon ug trahedya, lakip sa politikanhon ug relihiyuso nga mga pagpanggukod, napugos sa pagbiya sa pinuy-anan, ang wala sa hustong panahon nga pagkamatay sa pito ka anak, ug ang kaugalingong pagka-martir ni Joseph.¹ Sa mga panahon sa kalisdanan, ang mga sakop sa pamilya mipalig-on sa usag usa. Atol sa iyang pagkabilanggo sa Liberty Jail, pananglitan, si Joseph misulat ngadto kang Emma ug mihalad kaniya og pag-awhag gani samtang nagbangutan sa ilang panaglagyo. Siya mitudlo usab kaniya kalabut sa ilang mga anak: “Sultihi sila nga ang ilang Amahan nahigugma kanila sa usa ka hingpit nga gugma, ug nga iyang gibuhat ang tanan aron makabuhi gikan sa mga manggugubot aron makapauli nganha kanila.”² Sa ilang ulahing mga katuigan, ang mga buhi nga anak sa mga Smith nagpabilin nga suod ug misuporta sa usag usa sa ilang pagserbisyo sa simbahan. Gipanalipdan nila ang reputasyon sa ilang inahan ug miatiman kaniya hangtud sa iyang kamatayon niadtong 1879.

Human nagminyo si Joseph ug Emma niadtong 1827, ang pamilya nagpuyo og kadiyot sa Manchester uban sa pamilya ni Joseph, dayon mibalhin sa Harmony, Pennsylvania. Ang ilang unang tulo ka mga anak wala mabuhi og kapin sa usa ka adlaw, ug diha na sa pagbalhin nila sa Ohio nga si Joseph ug Emma nagsagup og kaluha ug misugod pag-atiman sa ilang kaugalingong mga anak. Didto sa Ohio, gibalanse ni Joseph ang iyang kinabuhi sa pamilya uban sa dagko nga mga buhat nga administratiba samtang nangulo sa simbahan nga dali kaayong midako nga dunay gagmay nga mga branch sa tibuok Estados Unidos ug sa mauswagon nga komunidad sa mga Santos sa Ulahing mga Adlaw didto sa Missouri. Usa ka ekonomikanhong krisis sa tibuok nasud, ang kapakyas sa Kirtland Safety Society Banking Company, ug ang nagkadako nga mga pagpanghulga sa kaluwasan ni Joseph ang miabug sa pamilya gikan sa Ohio ngadto sa Missouri niadtong sayong bahin sa 1838, apan ang dakong kasilag ngadto sa mga Santos sa Missouri migrabe lamang sa misunod nga tuig hangtud nga ang kapintas sa manggugubot nga panon mipahimulag sa pamilya. Si Emma nakakita og kapasilongan sa ubang mga Santos didto sa Illinois samtang si Joseph gipriso sa Missouri. Sa sayo nga bahin sa1839, si Joseph nahiusa sa pamilya human nga gitugutan sa pag-ikyas sa pagkapriso.

Sa Illinois, ang pamilya miapil sa pagpalambo sa siyudad sa Nauvoo, ug sila si Joseph ug Emma nangulo sa sibiko ug relihiyusong mga grupo sulod sa pipila ka tuig. Samtang didto sa Nauvoo, si Joseph nagpraktis og dinaghan nga kaminyoon ingon nga siya gisugo pinaagi sa pagpadayag. Naminyo siya og daghang mga babaye, bisan og walay masaligan nga ebidensya nga si Joseph adunay mga anak sa iyang dinaghan nga mga asawa.³ Ang dinaghan nga kaminyoon sa Nauvoo kompidensyal nga gihimo, ug wala angkona ni Joseph o nagpakita sa kadaghanan nga mipuyo siya sa bisan usa sa iyang daghang mga asawa. Mao nga, ang mga anak sa mga Smith, wala makasaksi sa bisan unsang buhat sa dinaghan nga kaminyoon. Ilabi na, si Joseph III, Alexander, ug si David mituo nga ang doktrina wala naggikan sa ilang amahan.⁴

Sa pagkamatay ni Joseph niadtong 1844, si Emma midumala sa personal nga kabilin ni Joseph, nga naglakip sa pipila ka bililhong mga butang. Ang orihinal nga mga dokumento nga nahimo pinaagi sa paghubad ni Joseph Smith sa Biblia (naglakip sa basahon ni Moises diha sa Perlas nga Labing Bililhon) ug ang Ehiptohanon nga papyri nga may kalabutan sa basahon ni Abraham nagpabilin nga gipanag-iya ni Emma. Si Emma nagpabilin sa Nauvoo uban sa mga bata sa dihang ang kadaghanan sa mga miyembro sa Simbahan milalin ngadto sa Walog sa Salt Lake. Ang iyang ikaduha nga bana, si Lewis Bidamon, miluwas sa orihinal nga manuskrito sa Basahon ni Mormon nga nabutang sa bato sa pamag-ang sa Mansyon sa Nauvoo. Samtang ang mga sakop sa pamilyang Smith mihulip sa pagkapangulo sa Reorganized nga Simbahan ni Jesukristo sa mga Santos sa Ulahing Mga Adlaw, ang Reorganized nga Simbahan (sa kaulahian gitawag og Community of Christ) nakapreserbar niining daghang mga bililhong butang hangtud sa kasamtangan. Ang pamilyang Smith mipanalipod sa buhat ug panglantaw ni Joseph ug wala lamang nagbilin og permanenting kabilin alang sa ilang mga kaliwatan apan sa bililhon usab nga pagsaksi nga nasinati sa nahaunang mga Santos sa Ulahing mga Adlaw.

Joseph Smith Jr. (1805–1844)

(Tan-awa sa “Joseph Smith and His Papers: An Introduction,” josephsmithpapers.org.)

Emma Hale Smith Bidamon (1804–1879)

(Tan-awa sa “Emma Hale Smith,” Mga Hisgutanan sa Kasaysayan sa Simbahan.)

Walay ngalan nga anak nga lalaki (mga 1828)

Gipanganak ni Emma ang usa ka batang lalaki pagka Hunyo 15, 1828, apan ang bata namatay sa samang adlaw. Usa ka lapida nga kabtangan sa pamilyang Hale sa Harmony, Pennsylvania, nga mabasa “Agi og Paghandom sa Usa ka bag-ong Natawo nga anak nga Lalaki ni Joseph Ug Emma Smith ika-15 sa Hunyo 1828.” Sa usa ka Biblia sa pamilya, gisulatan sa usa ka paryente og ngalan nga “Alvin” sa pag-ila niining bata, apan sa kaulahian gikumpirmar ni Emma nga ang bata wala mahatagi og ngalan.⁵

Wala manganli nga Kaluha (1831)

Niadtong 1831, gihimugso ni Emma ang kaluha, usa ka babaye ug usa ka lalaki, apan ang duha ka masuso namatay sa pagkatawo. Pagkasunod adlaw, ang higala sa pamilya nga si Julia Clapp Murdock nanganak usab og kaluha, apan namatay siya unom ka oras human sa pagpanganak. Ang bana ni Julia, si John Murdock, nabyudo nga dunay lima ka mga anak nga atimanon, mihatag sa kaluha ngadto ni Emma ug Joseph aron ipasagop. Si Emma ingon og wala gayud nakahatag og ngalan sa iyang namatay nga mga kaluha. Sa dihang ang iyang ugangan nga babaye, si Lucy Mack Smith, nangayo og impormasyon sa family history, wala giapil ni Emma ang iyang unang gipanganak ug ang kaluha. Sa usa ka interbyu uban sa iyang hamtong nga anak nga lalaki nga si Joseph Smith III, si Emma mipasabut nga kining tulo ka mga igsoon wala mabuhi sa igong gidugayon para mahatagan og pangalan. Bisan og ang Biblia sa pamilya miila sa kaluha isip “Louisa” ug “Thadeus”, kini nga mga ngalan narekord sa usa ka paryente nga wala hibaloi kon unsay ilang tinubdan.⁶

Joseph Murdock Smith (1831–1832)

Si Joseph ug Emma misagop ni Joseph Murdock Smith ug sa iyang kaluha nga babaye, si Julia, gikan sa ilang higala nga si John Murdock sa wala madugay human ang inahan sa mga masuso namatay. Ang bata nga si Joseph nataptan og tipdas sa sayo nga bahin sa 1832, ug samtang siya giatiman diha sa mahipos-hipos nga higdaanan, ang manggugubot nga panon miatake, giguyod ang iyang nagsagop nga amahan nga si Joseph gikan sa kwarto paingon ngadto sa bugnaw nga gabii ug gikulata hangtud nawad-an siya sa panimuot. Wala makaabut sa usa ka tuig nga pangedaron, ang gamayng bata nga si Joseph Murdock Smith namatay paglabay sa pipila ka adlaw. Si Joseph Smith nagtuo nga ang hinungdan sa pagkamatay sa iyang sinagop nga anak mao ang tun-og sa bugnaw nga kagabhion, nga kasagaran maoy medikal nga pagsabut sa mga tawo nianang panahona.⁷

Si Julia Murdock Smith Dixon Middleton (1831–1880)

Sa dihang ang amahan ni Julia, si John Murdock, mihatag kaniya ug sa iyang kaluha aron ipasagop, mihangyo si Emma Smith ni Murdock nga dili sultihan ang mga bata sa ilang pagkasinagop aron sila makabaton og hingpit nga pagbati nga nahisakop sa pamilyang Smith. Nahibaloan ni Julia ang kamatuoran sa dihang singko anyos na, hinoon, naggikan sa “malisyuso [nga]” silingan. Naminyo siya ni Elisha Dixon sa wala pa ang 1850, ug diha sa iyang kamatayon niadtong 1853 mibalhin siya ngadto sa Nauvoo. Paglabay sa tulo ka tuig nakabig si Julia ngadto sa Katolisismo human naminyo og usa ka Katoliko, nga si John Middleton. Wala gayud siya makaanak ug nagpuyo duol sa Nauvoo sa dihang siya namatay niadtong 1880.⁸

gilitratuhan nga hulagway ni Julia Murdock Smith — Litrato ni Julia Murdock Smith Dixon Middleton.

Joseph Smith III (1832–1914)

Si Joseph Smith III natawo niadtong Nobyembre 6, 1832, sa wala madugay human nga ang iyang amahan, si Joseph Smith Jr., mibalik sa Kirtland gikan sa pagbisita sa Siyudad sa New York ug Boston. Unom ka tuig human niadto, ang “Batan-ong Joseph” nakasaksi sa pagdakop sa iyang amahan didto sa Missouri, diin niana nga panahon ang gwardya mipwersa niya palayo gikan sa iyang amahan, nga naghulga nga “duslakon [siya]” sa espada.⁹ Sa bata pa, mibisita siya sa Liberty Jail uban sa iyang inahan ug migahin og usa ka gabii didto kuyog sa iyang amahan ug sa ubang mga binilanggo. Nagbata siya didto sa Nauvoo ug nabunyagan sa iyang amahan niadtong Nobyembre 1843.

gilitratuhan nga hulagway ni Joseph Smith III — Unang hulagway ni Joseph Smith III.

Sa dekada human sa kamatayon sa iyang amahan sa 1844, si Joseph III nagpabiling layo sa pipila ka mga simbahan nga nangangkon nga nahatagan sa awtoridad gikan ni Propeta Joseph Smith. Atol sa kinabuhi ni Joseph Smith Jr., nahatagan niya si Joseph III og pipila ka mga panalangin, ang usa niini giangkon sa kaulahian nga naglakip sa saad sa pagdumala sa Simbahan.¹⁰ Niadtong 1856, duha ka mga lalaki nga nagrepresentar sa Reorganize nga kalihokan miduol kaniya nga mipakita og usa ka sinulat nga pagpadayag. Ang dokumento mihingalan ni Joseph Smith III isip ang sumusunod sa iyang amahan pinaagi sa kaliwatan, apan gibalibaran ni Joseph ang imbitasyon sa pagpangulo sa reorganized nga simbahan. Ang mga panalangin sa iyang amahan ug usa ka espirituhanong kasinatian sa katapusan nakaagni niya sa pagpasakop sa Reorganize nga kalihokan ug midumala sa Reorganized nga Simbahan ni Jesukristo sa mga Santos sa Ulahing mga Adlaw (karon nailhan isip Komunidad ni Kristo).¹¹

Sa misunod nga 54 ka tuig, si Joseph III midumala sa Reorganized nga Simbahan isip propeta-presidente ug naghimo og mga kongregasyon sa nag-unang mga Santos kinsa wala milalin ngadto sa Kasadpan. Naila sa iyang kaligdong ug politikanhong kaigmat, nagtinguha siya sa pagtuman sa relihiyuso nga panan-awon sa iyang amahan ug nakapalambo og malungtarong organisasyon nga simbahan, ang ikaduhang pinakadako niadtong nag-angkon nga si Joseph Smith ang magtutukod (founder). Samtang iyang gipabilin ang mahigalaon nga relasyon sa iyang ig-agaw ug Presidente sa Simbahan didto sa Utah, si Joseph F. Smith, si Joseph III milimud nga ang iyang amahan nagpraktis og dinaghan nga kaminyoon ug wala miuyon sa misyonaryo nga mga kalihokan sa Simbahan ug sa mga pag-angkon sa makasaysayanong mga dapit.¹² Gidala niya ang iyang mga igsoon nga sila si Alexander ug David ngadto sa senior nga pagkapangulo ug misiguro sa padulngan sa iyang anak nga lalaki sa pagpuli isip presidente sa simbahan.¹³ Naminyo siya sa katulo ka higayon ug kaduha nabyudo, ang una ngadto ni Emmeline Griswold niadtong 1856, dayon ngadto ni Bertha Madison niadtong 1869, ug ang katapusan ngadto ni Ada Rachel Clark niadtong 1898. Si Joseph III amahan sa 17 ka mga anak. Namatay siya gumikan sa heart seizure niadtong 1914.¹⁴

Si Frederick Granger Williams Smith (1836–1862)

Gamay ra ang dokumentasyon nga nahibilin sa ikalima nga anak ni Joseph ug Emma, si Frederick Granger Williams Smith, natawo niadtong Hunyo 20, 1836, sa Kirtland ug ginganlan sa ngalan ni Frederick G. Williams, usa sa magtatambag ni Joseph Smith. Si Frederick nagdako hapit sa tibuok niyang kinabuhi didto sa Nauvoo isip usa ka mag-uuma ug negosyante, naminyo ni Anna Marie Jones niadtong 1857, ug namatay (posible tungod sa tuberculosis) niadtong 1862.¹⁵

gilitratuhan nga hulagway ni Frederick Granger Williams Smith — Litrato ni Frederick Granger Williams Smith.

Alexander Hale Smith (1838–1909)

Ginganlan sa ngalan gikan sa manlalaban ug sinaligan nga abogado nga si Alexan Doniphan, si Alexander Hale Smith natawo atol sa nagkagrabe nga pagpanggukod sa Missouri. Gikugos ni Emma ang walo ka bulan nga si Alexander tabok sa bugnaw kaayo nga Suba sa Mississippi niadtong 1839 aron makaikyas gikan sa salawayon nga “mando sa pagpamatay” ni gobernador sa Missouri nga si Lilburn W. Boggs. Ang batang lalaki nagtubo nga mahalaron sa pagtuo sa Basahon ni Mormon ug sa propetikanhon nga pagpangalagad sa iyang amahan. Sa dihang nahamtong na, si Alexander misunod sa iyang magulang nga igsoon nga si Joseph III ngadto sa Reorganize nga kalihokan ug nagserbisyo diha sa prominenting mga posisyon sa Reorganized nga Simbahan.¹⁶

gilitratuhan nga hulagway ni Alexander Hale Smith — Litrato ni Alexander Hale Smith.

Si Alexander naminyo ni Elizabeth Agnes Kendall niadtong 1861, kinsa aduna siyay siyam ka mga anak. Wala madugay human sa pagkatawo sa ilang unang anak, si Frederick Alexander, ang magulang nga lalaki ni Alexander nga si Frederick Granger Williams Smith namatay, nga nakahatag og kabalaka ni Alexander sa mahangturong kapalaran sa iyang igsoon nga lalaki. Sumala pa sa taho, ang iyang unang espirituhanong kasinatian misunod, ang paghunghong sa Balaang Espiritu nga mipakalma sa iyang kalag. Mibati siya og kasigurohan nga “ang kahimtang ni Frederick maayo ra.”¹⁷

Si Alexander miserbisyo sa nagkalain-laing mga misyon alang sa Reorganized nga Simbahan, nakabisita sa Utah og pipila ka mga okasyon ug nakighimamat sa mga paryente sa Ang Simbahan ni Jesukristo sa mga Santos sa Ulahing mga Adlaw. Bisan pa sa pipila ka init nga panagdebate sa relihiyuso nga mga kalainan usahay, nagpabilin gihapon siya nga kalma ngadto sa iyang mga ig-agaw nga naa sa gawas sa Reorganize nga kalihokan. Nagserbisyo siya isip magtatambag sa iyang igsoon, si Joseph III, diha sa Unang Kapangulohan sa RLDS ug gi-orden nga presidente sa Korum sa Napulog Duha niadtong 1890. Namatay siya niadtong 1909 sa Nauvoo samtang nagserbisyo isip patriyarka.¹⁸

Don Carlos Smith (1840–1841)

Si Don Carlos Smith natawo niadtong Hunyo 13, 1840, sa Nauvoo ug nabuhi lang sulod sa 14 ka bulan, namatay tungod sa malaria sulod sa mga adlaw sa iyang uyoan ug kapareho og pangalan, si Don Carlos Smith, ang mas manghud nga igsoon ni Joseph Smith. Si Alexander Smith, ang laing usa sa anak nga mga lalaki nilang Joseph ug Emma Smith, mitaho nga sa hapit na mamatay ang ilang inahan nga si Emma niadtong 1879, si Emma nakakita og panan-awon nga giubanan siya ni Joseph Smith ngadto sa usa ka mansyon sa langit ngadto sa usa ka nursery diin iyang giduyan ang batan-on nga si Don Carlos. Sa dihang nangutana siya ni Joseph mahitungod sa tanan nilang namatay nga mga anak, si Joseph misaad nga siya, human sa iyang mortal nga kinabuhi, mopadako sa tanan niyang mga anak nga wala modangat sa pagkahamtong.¹⁹

Anak nga Lalaki nga Walay Ngalan (1842)

Si Emma gikataho nga nanganak og usa ka batang lalaki pagka Pebrero 6, 1842, didto sa Nauvoo, ug gilubong ang bata sa sama nga adlaw.²⁰

David Hyrum Smith (1844–1904)

Si Emma nagmabdos ni David Hyrum Smith sa dihang namatay si Joseph Smith niadtong 1844. Nailhan sa iyang balak, pagkanta, ug art, si David sa kaulahian miserbisyo sa nagkalain-laing mga misyon alang sa Reorganized nga Simbahan, ang uban niini midala kaniya ngadto sa Utah, diin mibisita siya sa mga paryente ug sa uban nga mga Santos sa Ulahing mga Adlaw. Nabalaka mahitungod sa istorya bahin sa dinaghan nga kaminyoon sa iyang amahan, si David nakigdebate sa iyang ig-agaw nga si Joseph F. Smith ug nakighinabi sa mga babaye kinsa miangkon nga na-sealed ngadto ni Joseph Smith. Kini nga mga misyon mipasiugda sa pagkolekta og mga tinubdan sa mahinungdanon nga materyal bahin sa pagpangasawa og daghan sa Nauvoo.²¹

gilitratuhan nga hulagway ni David Hyrum Smith — Litrato ni David Hyrum Smith.

Wala madugay human siya mipauli gikan sa misyon ngadto sa Utah, ang mental nga kahimsug ni David migrabe, ug ang iyang igsoon nga si Joseph III mipasulod niya ngadto sa usa ka institusyon [asylum] sa Elgin, Illinois, niadtong 1877. Si Joseph III misulat sa suod nga higala ni David, “Human sa taas nga pagpamalandong, mga pag-ampo ug sa kasubo, akong gidala si David sa Ospital sa Elgin aron patambalan. . . . Naguol kaayo ko bahin niini, apan gibuhat ang labing maayo sumala sa akong nahunahunaan karon.”²² Ang kawani sa institusyon [asylum] sa Elgin misulat sa depresyon ni David, may kalagmitan nga mopalayo sa uban, sensitibo sa saba, panagsa nga pagkawala sa panumduman, ug pagtuo nga ang uban adunay kahibulongan nga gahum batok kaniya. Mahimong nag-antus siya sa mga kondisyon nga sa karon may kalabutan sa mania ug dementia. Ang mga higala ug pamilya milaum nga molambo ang panglawas ni David, apan ang mga kawani sa institusyon mireport nga walay dakong kausaban sa iyang mga sintoma sulod sa 27 ka tuig nga mipuyo siya didto. Nag-antus si David og diabetes sa katapusang mga bulan sa iyang kinabuhi, ug tulo ka bulan sa wala pa ang iyang ika-60 nga adlawng natawhan, namatay siya tungod sa kidney failure.

May Kalabutan nga mga Hisgutanan: Joseph Smith Jr., Emma Hale Smith