Lorenzo Snow

Si Lorenzo Snow mao ang ikalimang Presidente sa Ang Simbahan ni Jesukristo sa mga Santos sa Ulahing mga Adlaw. Kaniadtong 1836 gidawat niya ang pagdapit gikan sa iyang igsoong babaye, si Eliza R. Snow, sa pag-adto sa Kirtland aron sa pagtuon og Hebreohanon uban sa mga Santos sa Ulahing mga Adlaw, ug sa wala madugay mipasakop siya sa Simbahan. Gi-orden siya nga usa ka Apostol kaniadtong 1849. Si Snow usa ka mabungahong misyonaryo, nagsangyaw ug nagdumala sa misyonaryong buhat sa Estados Unidos, Britanya, Italya, Malta, Palestina, ug Hawaii. Gidawat niya ang dinaghang kaminyoon sa Nauvoo, ug sa Utah nabilanggo siya sulod sa 11 ka mga bulan tungod sa pagsukol sa mga balaod nga supak sa daghan og asawa nga gihimong balaod sa Kongreso sa Estados Unidos. Giminyoan ni Snow ang siyam ka mga babaye ug nahimong amahan sa 42 ka mga anak.

Gipaluyohan si Lorenzo Snow isip Presidente sa Simbahan kaniadtong 1898. Sulod sa iyang tulo ka mga tuig isip Presidente, nagpadayon ang Simbahan sa pakigbisog og pinansyal nga mga problema, nga miresulta, sa usa ka bahin, gikan sa pagkampanya sa gobyerno sa Estados Unidos nga supak sa daghan og asawa kaniadtong mga 1880. Gidasig sa Ginoo si Presidente Snow nga pasaligon pag-usab ang mga miyembro sa Simbahan sa pagsunod sa balaod sa ikapulo aron sa paglig-on sa Simbahan sa pinansyal nga paagi ug makabayad sa mga utang niini. Namatay si Snow kaniadtong Oktubre 1901, mga adlaw lamang human ang iyang katapusang pakigpulong sa kinatibuk-ang komperensya.

Pagpuli human sa Kamatayon ni Wilford Woodruff

Ang kamatayon ni Presidente Wilford Woodruff kaniadtong 1898 mipasaka sa pangutana kon unsa ka gidugayon ang Korum sa Napulog Duha kinahanglan nga maghulat sa dili pa ang pag-organisar pag-usab sa Unang Kapangulohan. Ang miaging mga pangulo mihulat tali sa 18 ka mga bulan ug tulo ka mga tuig. Mipahayag si Woodruff sa iyang paglaum nga ang Korum sa Napulog Duha mo-organisar dayon pag-usab sa Kapangulohan sa iyang pagkamatay aron sa paglikay og mga panaglalis sa mga pangulo sa Simbahan nga nakaingon sa mga kalangan kaniadto.¹ Sa Septyembre 13, 1898, pipila lamang ka mga adlaw human sa lubong ni Woodruff, ang 14 ka buhing mga Apostoles nagtigum didto sa Templo sa Salt Lake. Ang katuyoan sa panagtigum mao ang pagpangita og paagi sa pagbayad sa mga utang sa Simbahan, ug nahibalo ang mga Apostoles nga ang pagbuhat sa mao gikinahanglan nila ang paghingalan og bag-ong sinaligan [trustee] nga mopuli ni Woodruff. Gihinumduman ni Elder Francis Lyman ang tambag ni Presidente Woodruff ug misugyot nga ang Konseho dili lamang maghingalan og sinaligan apan sa pagpaluyo ni Snow isip ang Presidente sa Simbahan. Gibutang ni Joseph F. Smith ang problema diha sa usa ka pagboto, ug gikauyunan sa tanang mga Apostoles nga paluyohan si Snow.

Human sa pagboto, mipakigbahin si Presidente Snow og usa ka sagrado nga kasinatian niya diha sa Templo sa Salt Lake. Mga pila ka adlaw lamang ang milabay, miadto siya sa templo, gibati ang kabug-at sa umaabut nga pagpangulo sa Simbahan. Nag-ampo siya diha sa altar aron mahibaloan ang kabubut-on sa Ginoo kalabut sa problema sa pag-organisar sa Kapangulohan ug sa paghingalan sa mga magtatambag. Mipamatuod siya ngadto sa mga kaigsoonan nga ang “iyang pag-ampo natubag, ang Ginoo tataw nga mipakita kaniya kon unsay iyang kinahanglan nga buhaton.” Gisultihan niya ang nagpundok nga mga Apostoles nga iyang gitago ang iyang kasinatian sa iyang kaugalingon sa una aron sa pagpaniid kon “ang samang espiritu nga gipakita sa Ginoo kanako anaa ba kaninyo.” Nalipay siya nga ang mga miyembro sa Korum sa Napulog Duha nagkahiusa. “Pinasubay sa kahayag nga gihatag kanako,” midugang siya, “karon ako mopahayag nganha kaninyo sa mga ngalan ni George Q. Cannon isip akong unang magtatambag, ug ni Joseph F. Smith isip akong ikaduhang magtatambag.”²

Treynta’y singko ka mga tuig ang milabay, gimantala sa anak nga lalaki ni Snow nga si LeRoi ang usa ka artikulo mahitungod niini nga mga panghitabo diha sa Improvement Era.³ Ang pagsulti ni LeRoi gipasikad diha sa usa ka istorya sa apo nga babaye ni Presidente Snow nga si Allie Pond. Gihinumduman ni Pond nga ang iyang apuhan nga lalaki misulti kaniya nga si Jesukristo mipakita kaniya didto sa templo nianang gabii human sa iyang pag-ampo. Walay gibilin si Presidente Snow nga nahibaloang kaugalingong istorya kabahin niining talagsaong panan-awon.

Alang sa dugang pang impormasyon mahitungod sa mga panghitabo ug mga tema sa kinabuhi ni Lorenzo Snow, tan-awa sa Prophets of the Restoration mga video sa history.Churchof JesusChrist.org.

Kalabut nga mga Hisgutanan: Eliza R. Snow, Italy, Ang Pagpuli sa Liderato sa Simbahan