“Ang mga Paghusay ni Reed Smoot,” Mga Hisgotanan sa Kasaysayan sa Simbahan
“Ang mga Paghusay ni Reed Smoot”
Ang mga Paghusay ni Reed Smoot
Si Reed Smoot napili ngadto sa Senado sa Estados Unidos niadtong 1903 samtang nagserbisyo isip usa ka sakop sa Korum sa Napulog Duha ka Apostoles. Mga pagprotesta batok sa pagkapili ni Smoot pinaagi sa mga Amerikano kinsa natahap gihapon mahitungod sa pagbuhat og dinaghan nga kaminyoon diha sa Simbahan nakaaghat og sunod-sunod nga mga paghusay sulod sa upat ka tuig aron matino kon si Smoot angay ba nga magpabilin sa katungdanan. Ang mga paghusay nakamugna og halapad nga pagdebate mahitungod sa mga tinuohan, mga buhat, ug mga tulumanon sulod sa Simbahan samtang nikapin sa usa ka gatos ang mga saksi nga mipamatuod diha sa Senado mahitungod sa hapit “matag kalahian” sa relihiyosong kinabuhi ni Smoot.1
Niadtong 1895 ang Unang Kapangulohan miluwat og usa ka “Politikanhong Manipesto” nagkinahanglan sa ilang pagtugot sa dili pa ang mga Kinatibuk-ang Awtoridad makadagan alang sa politikanhong katungdanan.2 Si Smoot midawat og pagtugot sa Unang Kapangulohan niadtong 1902 sa pagdagan alang sa Senado sa Estados Unidos ug napili sa lehislatura sa estado sa Utah sa pagkasunod tuig.3 Ang Salt Lake Ministerial Association ug ang pipila ka mga simbahan sa Protestante ug mga pundok sa pagreporma sa moral mipetisyon sa presidente ug sa Kongreso sa Estados Unidos sa pagtangtang ni Smoot diha sa posisyon sa Senado. Ang mga protesta mipasangil nga bisan og ang Presidente sa Simbahan nga si Wilford Woodruff mipahibalo sa pagtapos sa pagsuporta sa dinaghan nga kaminyoon sa Simbahan, ang mga miyembro sa Korum sa Napulog Duha ug ang ubang mga lider sa Simbahan mipadayon sa buhat ug busa si Smoot sad-an sa paglapas sa mga balaod batok sa poligamiya.4
Sa sinugdanan, ang mga protesta mihingalan ni Smoot nga usa ka poligamista, diin dili siya poligamista. Apan dali kaayo sila nga miusab sa mga pag-akusar nga si Smoot dili igo ang pagkamaunungon sa nasud tungod sa iyang kahimtang isip usa ka Apostol diha sa Simbahan. Bisan og ang lehislatura sa Utah legal nga mipanghimatuod sa pagkapili ug mihatag kang Smoot sa iyang posisyon, ang Committee on Privileges and Elections sa Senado mihukom sa pagpahigayon og pangpubliko nga mga paghusay, nga gisugdan pagka-Pebrero 1904.5 Ang pipila sa mga senador, lakip ni Julius Caesar Burrows, ang chairman sa committee, namahayag sa ilang intensiyon sa paggamit niining politikanhong higayon nga dili aron paghusay ni Smoot apan sa pagkaso sa Simbahan.6
Atol sa mga paghusay, ang komite naminaw gikan sa daghang mga saksi, lakip sa pipila ka prominenting mga lider sa Simbahan. Apil dinhi ang pipila ka mga sakop sa Korum sa Napulog Duha ug ang Presidente sa Simbahan nga si Joseph F. Smith. Sulod sa tulo ka adlaw, ang mga sakop sa komite misukit-sukit ni Presidente Smith mahitungod sa isyu sa pagbulag tali sa simbahan ug sa estado. Sila mikwestiyon kaniya kon ang mga Santos sa Ulahing mga adlaw masaligan ba sa pagpatuman sa balaod nga dili igsapayan sa pagpadayag. Daghang mga pamantalaan ang nagpalabi gikan sa pagbinayloay. Sila mihulagway sa chairman sa komite nga si Julius Caesar Burrows isip usa ka istrikto nga imbestigador nga midapig sa pagsiguro nga ang mga lider sa Simbahan “motuman sa balaod” ug si Presidente Smith isip usa ka polygamista [daghan og asawa] naningkamot sa pagpukan sa gobyerno.7 Si Presidente Smith mipasalig sa komite nga siya migiya sa mga Santos sa Ulahing mga Adlaw sa pagtahod sa balaod ug misubli sa iyang gituohan diha sa personal nga katungod sa relihiyusong konsensiya. Misaad usab siya sa paghimo og usa ka pamahayag sa publiko sa pagklaro sa gibarogan sa Simbahan kabahin sa dinaghan nga kaminyoon. Sa pagkasunod bulan atol sa kinatibuk-ang komperensiya miluwat siya og “Ikaduhang Manipesto,” nga nagdeklarar nga ang bisan kinsang opisyal o sakop sa Simbahan kinsa magsolemne o mosulod ngadto sa dinaghan nga kaminyoon matangtang sa pagkamiyembro sa Simbahan [excommunicated].8
Bisan pa man nga nataliwad-an niining kasamok sa panagdebate sa publiko, si Smoot mipabilin sa iyang posisyon pinaagi sa usa ka hingpit nga pagboto sa Senado pagka-1907 ug miserbisyo sulod sa laing 26 ka tuig.9 Atol sa iyang politikanhong buhat, gihan-ay niya ang diplomatikong mga miting tali sa mga lider sa Simbahan ug sa mga opisyal sa gobyerno sa Estados Unidos ug sa Uropa. Ang iyang apostolikanhon ug politikanhong buhat mipalambo sa mga relasyon alang sa Simbahan sa internasyonal nga paagi, ilabi na diha sa pagkuha og mga bisa alang sa Amerikanong mga misyonaryo nga moserbisyo sa gawas sa nasod pagkahuman sa Unang Gubat sa Kalibotan. Samtang ang mga paghusay wala milampos sa paghikaw ni Smoot og buhat [career] diha sa Senado, sila mihulma sa relasyon tali sa Simbahan ug sa gobyerno sa Estados Unidos. Ang Simbahan misugod sa paghulma og usab sa politikal nga kalambigitan samtang ang gobyerno milikay na sa paggamit sa relihiyoso nga mga pagsulay ngadto sa mga politiko nga mga Santos sa Ulahing mga Adlaw.10
May Kalabotan nga mga Hisgotanan: Legal ug Politikanhong mga Institusyon sa Amerika, Antipolygamy Legislation, Manifesto, Political Neutrality