Pulong sa Kaalam(DP 89)

Niadtong 1833, si Joseph Smith nakadawat og usa ka pagpadayag nga gitawag og Pulong sa Kaalam, nga karon opisyal nga gitugutan isip Doktrina ug mga Pakigsaad 89. Ang pagpadayag nailhan og maayo karon tungod sa paglig-on sa nailhan kaayo nga buhat sa mga Santos sa Ulahing mga Adlaw nga paglikay sa ilimnong makahubog, tabako, ug sa paggamit og drugas, ingon man sa kape, ug tsaa.¹

Konteksto alang sa Pagpadayag

Ang Pulong sa Kaalam mitumaw sa usa ka grabing panagdebate diha sa publiko mahitungod sa kinatibuk-an nga kahimsog sa panglawas ug ilabi na sa pag-abuso sa ilimnong makahubog. Sa Estados Unidos, daghang mga hamtong niadtong mga tuig 1830 nga nagdako sa mga pamilya diin gikonsumo ang ilimnong makahubog sa pamahaw, paniudto, ug sa panihapon. Daghan ang nabalaka mahitungod sa mga sangputanan niini diha sa sosyal ug kalabut sa panglawas tungod sa nagkadako nga pagkonsumo sa ilimnong makahubog. Sa sinugdanan sa mga tuig 1810, ang mga reformer mipatawag alang sa pagbiya gikan sa isug nga ilimnong makahubog; daghan sa ilang mga tigpaminaw mipadayon pa, mihimog panaad batok sa tanang ilimnong makahubog, lakip ang beer. Sa samang higayon, ang ubang mga reformer namulong batok sa pag-usap og tabako ug mirekomendar sa kape isip puli sa ilimnong makahubog, sa rason nga ang limpyo nga tubig dili kanunayng anaa.²

Sulod sa konteksto niining panagdebate, si Emma Smith miduol sa iyang bana, nabalaka mahitungod sa palibut sa Tulunghaan sa mga Propeta. Ang samang luna nga gigamit ni Joseph sa pagrekord sa mga pagpadayag ug sa pagtrabaho sa iyang dinasig nga paghubad sa Biblia gigamit gihapon isip lawak-saringan [schoolroom], diin ang mga nanambong kanunayng nanabako, nanag-usap, ug nangluwa og tabako. Si Joseph nangutana sa Ginoo ug nakadawat sa Pulong sa Kaalam. Ang pagpadayag nakatabang sa mga Santos nga makamaniobra sa daghang mga isyu nga gidebatihan sa mga reformer ug usab nakasulbad sa piho nga mga kabalaka ni Emma. Ang “isug nga mga ilimnong makahubog” ug “mainit nga mga ilimnon,” giingon diha sa pagpadayag, nga “dili alang sa tiyan.” Ingon usab ang tabako, nga mas maayo nga gamiton isip hilba alang sa masakiton nga baka.³ Ang mga tinubdan miklaro nga daghan sa nahaunang mga Santos sa Ulahing mga Adlaw nakasabut nga ang “mga mainit nga ilimnon” nagpasabut sa kape ug tsaa.⁴ Ang uban nga mga grupo, sama sa mga Shaker, mitambag batok sa pagkaon og karne, samtang ang uban misuportar sa walay restriksyon. Ang Pulong sa Kaalam adunay kaugalingong posisyon, nag-ingon nga giorden sa Ginoo ang paggamit sa karne, sa kondisyon nga kini gamiton sa “pagdaginot.”⁵ Ang Pulong sa Kaalam misuportar usab sa paggamit og lugas ug prutas.

Pagsunod sa Pulong sa Kaalam

Sulod sa misunod nga henerasyon, ang mga lider sa Simbahan mitudlo sa Pulong sa Kaalam isip usa ka sugo gikan sa Dios, apan sila miuyon sa lain-laing mga panglantaw bahin kon unsa ka istrikto kini nga ipatuman. Daghang mga Santos ang mipadayon sa pag-inom og kape ug tsaa, ug ang pipila miusap og tabako. Sa teritoryo sa Utah, ang mga lider sa Simbahan misaway sa paghubog-hubog diha sa publiko ug pag-inom og whiskey apan kanunayng hilum ra bahin sa igo-igo nga paggamit og dili kaayo isug nga mga ilimnon. Kini nga pagpaundayon nakahatag sa mga Santos og panahon sa pagpalambo sa ilang kaugalingon nga tradisyon sa pagbiya gikan sa mga butang nga makapa-anad.

Bisan pa man, ang mga lider sa Simbahan naglantaw ngadto sa usa ka panahon nga ang usa ka mas taas nga sumbanan mapatuman. Niadtong mga tuig 1860 ug mga 1870, si Brigham Young mipatawag sa mga Santos nga isalikway ang tanang paggamit sa tsaa, kape, tabako, ug ilimnong makahubog.⁶ Ang mga bata regular nga gitudloan sa pagsunod sa Pulong sa Kaalam kay sa ilang ginikanan. Ang resulta niining pagtudlo sa mga batan-ong henerasyon sa mga Santos sa Ulahing mga Adlaw kinsa nagdako sa pagsunod sa Pulong sa Kaalam ug nakahimo sa pagtuman sa sumbanan sa hingpit nga pagbiya.

Inubanan sa pagkunhod sa poligamiya human sa 1890, ang pagsaka sa pagpasabut sa Pulong sa Kaalam nahimong bag-ong ilhanan sa Santos sa Ulahing mga Adlaw. Sa sayong bahin sa mga tuig 1900, ang mga Santos miilis sa bino ngadto sa tubig alang sa sakrament. Niadtong 1919, ang mga Santos sa Ulahing mga Adlaw mihangop sa pag-amendar sa Konstitusyon sa Estados Unidos nga nagdili sa paggama ug pagbaligya og ilimnong makahubog isip dakong kadaugan sa katawhan.⁷ Niadtong 1921, ang Ginoo midasig ni Presidente Heber J. Grant nga gikinahanglan ang mga Santos mobiya sa ilimnong makahubog, tabako, kape, ug tsaa aron makaangkon og rekomend sa templo.

Samtang ang paggamit sa ilimnong makahubog ug tabako sa hinay-hinay nahimong komon sa Estados Unidos, ang mga Santos sa Ulahing mga Adlaw naila sa ilang pagkamakanunayon sa pagdumili sa pag-inom ug pagpanabako samtang ang ubang mga Kristiyano moinom og manabako. Sa paghisgut niining kalainan, sa ika-20 nga siglo ang mga lider sa Simbahan kanunayng nahimuot sa estatistika nga nagpakita nga ang mga Santos molungtad og mas taas nga kinabuhi ug diyutay ra ang mga seryuso nga mga balatian sa panglawas, sa pagtuman sa saad sa Pulong sa Kaalam nga gituohan nga “modagan ug dili maluya, og molakaw ug dili makuyapan.”⁸

Ang Pulong sa Kaalam, sa nahatag nga konteksto sa Amerika, wala gipaabut o piho nga gihisgutan ang daghang mga butang nga nahimong komon. Paglabay sa panahon, ang mga lider sa Simbahan mipasabut og maayo sa sukaranang mga baruganan sa pagpadayag, sama sa pag-amuma sa kahimsug sa lawas ug paglikay sa makapaadik nga mga butang. Sa pipila ka mga kahimtang, nakahatag kini og piho nga giya. Pananglitan, ang mga droga para sa paglingaw-lingaw gidili sa Pulong sa Kaalam, samtang gitugutan ang paggamit isip preskripsyon nga mga droga. Ang paggamit sa pipila ka mga butang, sama sa caffeine, gihatag na ngadto sa paghukom sa indibidwal nga mga Santos ug wala gidili kon gikinahanglan sa pagdawat og rekomend sa templo.

Ang mga Santos sa Ulahing mga Adlaw misabut sa Pulong sa Kaalam isip mas labaw pa sa timaan sa maayong panglawas. Ang pagtuman sa lagda niini dili lang makapahimo nilang angayan alang sa pagsimba sa templo apan nakahatag og espirituhanong kaayohan, lakip sa mas dakong kahigayunan sa pagdawat og personal nga pagpadayag.