Ezra Taft Benson
Si Ezra Taft Benson miserbisyo isip ang ikanapulog tulo nga Presidente sa Simbahan tali sa 1985 ug 1994. Natawo siya niadtong Agosto 4, 1899, sa Whitney, Idaho, ang kinamagulangan sa 11 ka anak nila ni Sarah ug George Taft Benson. Sukad sa pagkabata, si Ezra nagtrabaho sa umahan sa pamilya, ug isip usa ka batan-ong lalaki, mipalambo og halawom nga interes sa teyoriya ug ekonomiks sa agrikultura. Migradwar siya gikan sa Oneida Stake Academy ug mipadayon sa iyang mga pag-eskwela sa agronomy sa Utah Agricultural College (sa wala madugay Utah State University), diin nahimamat niya si Flora Amussen, usa ka higala sa usa sa iyang mga ig-agaw.
Atol sa ilang pagpangulitawo, si Ezra ug Flora determinado nga magminyo apan moserbisyo una og mga misyon. Mibiya si Ezra alang sa British Mission niadtong 1921, ug si Flora mibiya sa pagserbisyo ngadto sa Hawaiian Islands pagka-1924. Migradwar si Ezra sa Brigham Young University sa dili pa dugay nga nabalik si Flora, ug ang duha nagminyo niadtong 1926. Human si Ezra migradwar og master’s degree sa agricultural economics sa Iowa State University niadtong 1927, siya ug si Flora mibalik sa Idaho, diin nakakita sila og usa ka umahan ug misugod sa pagpadako sa ilang kaugalingong mga anak.
Samtang ang Grabeng Pagkahagsa sa Ekonomiya niadtong mga 1930 mipahugno sa industriya sa panguma sa tibuok Estados Unidos, si Ezra mitimbang-timbang sa tibuok sistema sa panguma ug mitapos nga ang grabe nga mga problema sa sayop nga pagdumala, dili maayo nga pamaligya, ug dili maayo nga teknolohiya sa agrikultura nakapabangkaruta sa mga umahan sa pamilya. Mitrabaho siya alang sa lokal nga mga ahensiya sa gobyerno sa Idaho sa pagbansay sa mga tag-iya ug mga tigpalihok sa gagmay nga mga umahan sa mga kampanya sa pagdumala ug kooperatiba sa pagpamaligya. Ang mga opisyales sa Estado sa wala madugay miduol ni Ezra aron sa pagtan-aw sa mga organisasyon sa kooperatiba sa tibuok Idaho. Ang mga Benson mibalhin ngadto sa California, diin si Ezra mituon og agricultural economics sa University of California sa Berkeley tali sa 1936 ug 1937. Pagbalik gyod dayon sa Idaho, si Ezra miserbisyo isip presidente sa stake sa makadiyot hangtod ang National Council of Farmer Cooperatives (NCFC) mitanyag kaniya og posisyon sa ilang mga punoang mga opisina sa Washington, D.C. Sa wala madugay human mibalhin ang mga Benson, si Ezra gitawag na usab sa pagserbisyo isip presidente sa stake sa bag-ohay nga giorganisar nga Washington Stake.
Samtang naglibot si Ezra sa mga kooperatiba sa panguma niadtong 1943, si Heber J. Grant nakigkita kaniya ug mihatag sa calling sa pagserbisyo diha sa Korum sa Napulog Duha ka Apostoles. Ang mga Benson mihimo og mga pag-areglo sa pagbalhin ngadto sa Utah, mibiya si Ezra sa NCFC, ug pagka-Oktubre, gipaluyohan siya ug gi-orden human kang Spencer W. Kimball isip ang labing bag-o nga Apostoles. Lakip sa unang mga buluhaton ni Elder Benson mao ang pagdumala sa European Mission ug ang pagdumala sa mga paningkamot sa kaayohan sa Simbahan didto sa nangaguba pagkahuman sa Ikaduhang Gubat sa Kalibotan. Ang kakabos nga nakita ni Elder Benson nakapakurat kaniya. Sa 11 ka bulan, mibiyahe siya og labaw sa 61,000 ka milya (98,000 ka kilometro) sa mga dapit nga nadaot sa gubat sa Uropa ug nakigkoordinar og kahupayan sa kabos sa sobra sa 4,000,000 ka libra (1,800,000 ka kilo) sa mga suplay.
Si Max Zimmer ug si Elder Ezra Taft Benson miinspeksiyon sa mga suplay alang sa mga Santos sa Ulahing mga Adlaw sa Uropa, 1946.
Ang mga kondisyon sa Uropa milig-on sa mga kombiksiyon ni Elder Benson nga ang Estados Unidos sa Amerika ug ang Konstitusyon niini mirepresentar sa “gigikanan sa kagawasan” ug ehemplo sa paghatag ug pagpanalipod sa kagawasan alang sa kalibotan. Sa daghang pakigpulong iyang gihisgotan ang politikanhong pagsanga-sanga sa kalibotanong mga kalihokan niadtong panahona, komon nga nahibaloan isip ang Politikanhon ug Diplomatikong Tensiyon [Cold War]. Kanunay siyang nagpahimangno batok sa pagkatap sa komunismo ug sa “pinugos nga mga sistema nga hinimo sa tawo” diha sa panggobyerno ug miawhag sa mga Santos sa Ulahing mga Adlaw, sa mga lider sa sibiko, ug sa regular nga mga tagilungsod sa pagtuon sa mga leksiyon diha sa Basahon ni Mormon nga nanagna sa makadaot nga mga hulga sa gawasnon nga mga katilingban.
Niadtong 1953, si Dwight D. Eisenhower, isip ang bag-ong gipili nga presidente sa Estados Unidos, mihingalan ni Elder Benson nga moalagad isip ang sekretarya sa agrikultura, ang labing taas nga posisyon nga administratiba sa agrikultura diha sa pederal nga panggobyerno. Sa mga bulan padulong ngadto sa iyang pormal nga pagtugot sa Senado sa Estados Unidos, si Elder Benson nangayo sa tambag sa Presidente sa Simbahan nga si David O. McKay, kinsa miawhag kaniya sa pagdawat sa posisyon. Ang init nga kahimtang sa politika mipadangat sa mga Benson sa hilabihang pag-usisa ug kritisismo, apan si Elder Benson mihangop sa kahigayonan sa pagserbisyo sa katawhan sa Estados Unidos ug sa pagdumala sa Departamento sa Agrikultura sa kahanas ug pagtagad. Ang iyang mga katungdanan naglakip sa pagpanalipod ug pagdumala sa nasyonal nga kalasangan ug kasagbotan, pagdumala sa mga pag-inspeksiyon sa pagkaon, pagtan-aw sa mga programa sa welfare, ug pagdumala sa mga proyekto sa rural nga imprastraktura. Sa tibuok niyang walo ka tuig nga pagserbisyo, kanunay niyang gigamit ang oportunidad sa pagpakigbahin sa iyang apostolikanhong pagpamatuod. Niadtong 1954, ang inilang reporter sa telebisyon nga si Edward R. Murrow miinterbyo sa pamilyang Benson sa iyang programa nga Tawo ngadto sa Tawo, diin ang mga Benson nagpahigayon sa ilang senemana nga family home evening aron ang nasod makakita. Sa dihang mitapos siya sa iyang termino sa pagserbisyo sa 1961, si Elder Benson mahinamon sa pagbalik ngadto “sa bugtong nga butang nga akong ganahan nga mas maayo kay sa agrikultura”: ang iyang pangalagad.
Si Elder Ezra Taft Benson isip sekretarya sa agrikultura anaa sa usa ka miting uban sa mga opisyal sa gobyerno sa Washington, D.C.
Human si Presidente Spencer W. Kimball namatay niadtong Nobiyembre 1985, si Presidente Benson gi-set apart isip Presidente sa Simbahan. Atol sa iyang kapangulohan, iyang gihatagan og bili ang Basahon ni Mormon, nag-aghat sa mga miyembro sa Simbahan sa pagtuon ug paghangop sa mga pagtulun-an niini. Sa iyang pambukas nga pakigpulong niadtong Abril 1986 nga kinatibuk-ang komperensiya, mihatag siya og tawag sa pagbuhat—dili lamang “sa pagsulti og dugang mahitungod sa Basahon ni Mormon, apan kinahanglan kita nga mobuhat og dugang pa uban niini.” Sa misunod nga tuig, mihatag siya og propetikanhong panalangin ngadto sa mga Santos sa Ulahing mga Adlaw sa “dakong tinguha sa pagpuno sa yuta sa Basahon ni Mormon.” Sa iyang nahabiling mga tuig, si Presidente Benson mipahimulos sa matag oportunidad sa pagpamatuod sa kabalaan ni Jesukristo ug sa pagsaksi sa Basahon ni Mormon. Iyang gihatagan og gibug-aton ang pagsugakod sa garbo pinaagi sa pag-amuma sa mga kinabuhi nga nakasentro kang Kristo. Ang iyang nagkakunhod nga panglawas nasusama sa iyang asawa, si Flora, kinsa mitaliwan niadtong 1992. Si Presidente Benson namatay walay duha ka tuig sa wala madugay, nagbilin og kabilin nga dili mapapas ngadto sa Basahon ni Mormon. “Aduna bay henerasyon … nga molingi sa administrasyon ni Presidente Ezra Taft Benson ug dili dayon maghunahuna sa iyang gugma alang sa Basahon ni Mormon?” nangutana ang iyang sumusunod, si Presidente Howard W. Hunter. “Tingali walay Presidente sa Simbahan sukad ni Propeta Joseph Smith mismo nga nakahimo og sobra sa pagtudlo sa mga kamatuoran sa Basahon ni Mormon, sa paghimo niini nga matag adlaw nga pagtuon alang sa tibuok pagkamiyembro sa Simbahan, ug sa ‘pagpuno sa yuta’ sa pag-apod-apod niini.”
Alang sa dugang nga impormasyon mahitungod sa kinabuhi ni Ezra Taft Benson, tan-awa sa Prophets of the Restoration nga mga bidyo diha sa history.ChurchofJesusChrist.org o diha sa Librarya sa Ebanghelyo nga app.
May Kalabotan nga mga Hisgotanan: Grabeng Pagkahagsa sa Ekonomiya [Great Depression], Mga Programa sa Kaayohan, Family Home Evening, Pagbiya sa dapit nga gipuy-an aron mobalhin sa lain nga dapit [Outmigration], Walay Gidapigan sa Politika [Political Neutrality]