Grupo nga Genesis

Daghang pamilya nga African American ang apil sa labing una nga mga miyembro sa Simbahan ug aktibo sa daghang kalihokan sa kasaysayan sa mga Santos sa Ulahing mga Adlaw. Bisan pa man, sa daghang dekada, ang bag-ong Itom nga mga miyembro kasagaran nakakaplag sa ilang mga kaugalingon nga mao ra ang Itom nga tawo o pamilya sa ilang lokal nga mga ward ug mga stake. Nangita sa pagporma og mas dako nga komunidad, ang Itom nga mga miyembro sa dapit sa Siyudad sa Salt Lake niadtong 1971 nakigtinabangay sa mga lider sa Simbahan aron sa pagporma sa Grupo nga Genesis, usa ka binulan nga panagpundok ug kalihokan sa Salt Lake Liberty Stake nga naghatag sa mga miyembro sa grupo og dugang nga suporta.

Sa wala pa gitukod ang Grupo nga Genesis, pipila sa mga miyembro nga Itom sa dapit sa Siyudad sa Salt Lake nagtagbo ug nagplano og mga kalihokan, bisan og mitambong sila sa nagkalain-laing ward. Sa mga 1960, si Eugene ug Leitha Orr miabi-abi og tinuig nga panagtigom sa ilang panimalay. Atol sa usa ka panagpundok, nangutana si Eugene ni Darius Gray ug Ruffin Bridgeforth Jr. mahitungod kon unsaon kaha nila sa pagbatok sa ubang ka walay kadasig nga gipadayag sa daghang Itom nga mga higala ug mga sakop sa pamilya samtang nagtambong sa simbahan. Ang tulo ka lalaki mipuasa ug miampo og dungan alang sa langitnong paggiya. Alang ni Gray, kini mao ang unang higayon nga siya miluhod sa pag-ampo uban sa duha ka Itom nga mga Santos sa Ulahing mga Adlaw sukad nahimong miyembro sa Simbahan. Niadtong 1971, miduol sila sa mga lider sa Simbahan nga may pangutana mahitungod sa pagdili sa pagkapari ug sa templo nga nianang higayona gipahamtang sa mga miyembro nga Itom nga African ang kagikan ug unsaon nila pagtabang sa Simbahan sa paghatag og suporta alang sa komunidad sa mga Itom. Si Presidente Joseph Fielding Smith mitudlo nila ni Elder Gordon B. Hinckley, Thomas S. Monson, ug Boyd K. Packer aron motrabaho uban ni Bridgeforth, Gray, ug Orr aron sa paghimo og solusyon.

Pagka-Oktubre 19, 1971, ang Grupo nga Genesis—ginganlan tungod kay ang ilang organisasyon mirepresentar og “bag-ong pagsugod” alang sa mga miyembro nga mga Itom—mipahigayon og pasiuna nga miting. Gi-set apart nila ni Elder Hinckley, Monson, ug Packer si Bridgeforth isip ang presidente sa grupo uban ni Gray isip ang unang magtatambag ug ni Orr isip ang ikaduhang magtatambag. Si Lucille Bankhead, usa ka kaliwat sa pioneer nga mga Santos sa Ulahing mga Adlaw nga sila si Jane Manning James ug Green Flake, gitawag isip ang Presidente sa Relief Society sa grupo. Ang bag-ong kapangulohan mianunsyo sa ilang plano alang sa mga miyembro nga Itom sa pagpundok ka usa sa usa ka bulan aron sa paghatag sa mga pagpamatuod, pagtukod og komunidad sa pagsuporta, ug sa pagpakigbahin og mga kasinatian sa kultura. Ang mga miyembro sa Grupo nga Genesis mopadayon gihapon sa pagtambong didto sa ilang mga ward.

Si Ruffin Bridgeforth mialagad isip ang presidente sa Grupo nga Genesis gikan sa pagporma sa Genesis niadtong 1971 hangtod sa iyang kamatayon niadtong 1997. Nakigpulong sa haya ni Bridgeforth, si Presidente Gordon B. Hinckley miingon nga siya “usa ka tawo sa hugot nga pagtuo, usa ka tawo kinsa suod ngadto sa iyang mga tawo ug nahigugma kanila ug mitambag kanila ug mipanalangin kanila ug mitabang kanila sa ilang mga panlimbasog, sa ilang mga problema, sa ilang mga pangutana, sa ilang pagtabang samtang nangalagad sila sa Simbahan. Nagpabilin siya nga usa ka halangdong pioneer sa karong panahon nga nagpasidungog kita sa mga pioneer.” Ang misunod nga mga presidente naglakip nila ni Darius Gray, Donald Harwell, ug Davis Stovall.

Ang mga panagpundok sa Grupo nga Genesis mihatag og gibug-aton sa musika, ilabi na sa musika sa ebanghelyo, sa lig-on niini nga pagkasakop ngadto sa kabilin sa mga miyembro sa grupo sa pagsimba ug pagdayeg sa Dios pinaagi sa pagkanta sa mga kongregasyon sa Protestante nga African American sa wala pa sila mipasakop sa Simbahan. Ang grupo mitukod sa Genesis Choir niadtong 1979 ug sa kadugayan miusab sa ngalan niini sa Debra Bonner Unity Gospel Choir, kansang mga pasundayag nahimong usa ka regular nga feature sa mga miting sa grupo sa Dominggo sa pagpuasa. Sobra sa 50 ka tuig nga kasaysayan niini, ang Grupo nga Genesis misaulog sa mga kalihokan sama sa Hunyo 8, 1978, pagpadayag nga mitapos sa mga pagdili sa pagkapari ug sa templo ingon man usab sa ika-25 ug ika-50 nga mga anibersaryo sa grupo niadtong 1996 ug 2021. Sukad sa organisasyon niini, ang Grupo nga Genesis nakapabilin sa pormal nga pagtugot gikan sa Simbahan isip usa ka kalihokang multistake nga grupo ug nagpabilin nga masaligon sa katuyoan niini sa pagpakigdait sa Itom nga mga Santos sa Ulahing mga Adlaw.

May Kalabotan nga mga Hilisgotan: Civil Rights Movement [Kalihokan sa Sibil nga mga Katungod], Priesthood and Temple Restriction [Pagdili sa Pagkapari ug sa Templo], Racial Segregation [Paglain sa Kaliwat]