Hubad sa Basahon ni Abraham

Ang Simbahan ni Jesukristo sa mga Santos sa Ulahing mga Adlaw miila sa basahon ni Abraham isip kasulatan. Kini nga basahon, usa ka talaan ni propeta ug patriarch Abraham, kasagarang nagsunod sa asoy sa kasulatan apan midugang og importante nga impormasyon mahitungod sa kinabuhi ug mga pagtulun-an ni Abraham.

litrato sa piraso sa papyrus — Ang piraso sa papyrus, kaniadto anaa sa mga kamot ni Joseph Smith, nga naglakip sa unsay gitawag karon nga Basahon ni Abraham, Kinopya [Facsimile] 1.

Ang basahon ni Abraham mibutho gikan sa talagsaon nga makasaysayanon nga mga panghitabo. Sa ting-init niadtong 1835, ang negosyante nga ginganlan og Michael Chandler miabut sa ulohang mga buhatan sa Simbahan sa Kirtland, Ohio, uban sa upat ka mga Ehiptohanong mga mummy ug daghang linukot nga mga papyrus.¹ Usa ka grupo sa mga Santos sa Ulahing mga Adlaw sa Kirtland mipalit sa karaang mga butang alang sa Simbahan. Human masusi ni Joseph Smith ang mga papyrus ug misugod “sa paghubad sa ubang mga karakter o mga hieroglyphics,” ang iyang kasaysayan miasoy, “dako kaayo ang among kalipay nga usa sa mga linukot naglangkub sa mga sinulat ni Abraham.”²

Si Joseph Smith nagtrabaho sa paghubad sa basahon ni Abraham atol sa ting-init ug tinglarag sa 1835, nianang higayuna iyang nahuman ang una nga kapitulo ug kabahin sa ikaduha nga kapitulo.³ Ang iyang journal sunod nga naghisgut sa paghubad sa mga papyrus sa tingpamulak sa 1842, human ang mga Santos namalhin ngadto sa Nauvoo, Illinois. Ang tanang lima ka mga kapitulo sa basahon ni Abraham, uban sa tulo ka mga paghulagway (nga karon nailhan nga mga kinopya [facsimiles 1, 2, ug 3), gimantala sa Times and Seasons, ang pamantalaan sa Simbahan sa Nauvoo, taliwala sa Marso ug Mayo 1842.⁴

Ang ubang ebidensya nagsugyot nga gitun-an ni Joseph ang mga karakter sa mga papyrus ug misulay sa pagkat-on sa Ehiptohanon nga pinulongan. Ang iyang kasaysayan nagsulti nga niadtong Hulyo 1835 siya “padayong nagbuhat sa paghubad sa alpabeto sa Basahon ni Abraham, ug mipahiluna sa grammar sa Ehiptohanong lenggwahe sama sa gibuhat sa mga karaan.”⁵ Kini nga “grammar,” isip maoy tawag niini, naglangkob og mga kolum sa hieroglyphic nga mga karakter gisundan sa Iningles nga mga hubad nga gisulat sa usa ka dako nga notebook pinaagi sa tigsulat ni Joseph nga si William W. Phelps. Laing manuskrito, gisulat ni Joseph Smith ug Oliver Cowdery, adunay Ehiptohanong mga karakter gisundan og mga pagpasabut.⁶ Ang relasyon niini nga mga dokumento ngadto sa basahon ni Abraham wala hingpit masabti.

Human mibiya ang mga Santos sa Ulahing mga Adlaw sa Nauvoo, ang karaang mga butang nga Ehiptohanon gipabilin. Ang pamilya ni Joseph Smith mibaligya sa mga papyrus ug mga mummy niadtong 1856. Ang mga historian nagtuo nga kadaghanan sa mga papyrus nangadaut atol sa Great Chicago Fire niadtong 1871. Napulo ka mga tinipak nga kaniadto anaa sa mga kamot ni Joseph Smith ang napunta sa Metropolitan Museum of Arts sa New York City.⁷ Niadtong 1967, ang museyo mibalhin niini nga mga tinipak ngadto sa Simbahan.⁸ Ang Mormon ug dili Mormon nga mga Egyptologist nagkasinabut nga ang mga karakter diha sa mga tinipak wala magtugma sa hubad nga gihatag diha sa basahon ni Abraham, bisan paman og wala magkauyon ang tanan, gani bisan tali sa mga dili Mormon nga mga eskolar, mahitungod sa tukma nga interpretasyon sa grupo sa mga litrato [vignettes] nga anaa niining mga tinipak.⁹

Ni ang Ginoo o si Joseph Smith mipasabut sa pamaagi sa paghubad sa basahon ni Abraham. Ang mga rekord nagpakita nga si Joseph ug ang uban pa nagtuon sa mga papyrus ug nga ang mga suod nga tigpaniid nagtuo nga ang hubad miabut pinaagi sa pagpadayag. Sama sa naobserbaran ni John Whitmer, “si Joseph ang Manalagna nakakita niining [mga] Talaan ug pinaagi sa pagpadayag ni Jesukristo makahubad niini nga mga talaan.”¹⁰

Malagmit nga walay pulos ang pagtimbang-timbang sa abilidad ni Joseph sa paghubad sa mga papyrus kon ang anaa kanato karon usa lamang ka porsyon sa mga papyrus nga anaa kaniya kaniadto. Ang mga saksi naghisgot og “usa ka taas nga linukot” o daghan nga mga “linukot” nga papyrus.¹¹ Tungod kay mga tinipak nalang ang nahabilin, kadaghanan tingali sa mga papyrus nga anaa ni Joseph sa dihang naghubad siya sa basahon ni Abraham wala niini nga mga tinipak.

Ang pagtuon ni Joseph sa mga papyrus mao tingali nakaingon sa pagpadayag mahitungod sa importanting mga panghitabo ug mga pagtulun-an sa kinabuhi ni Abraham, sama nga sa sayo pa nakadawat siya og pagpadayag mahitungod sa kinabuhi ni Moises samtang nagtuon sa Biblia. Kini nga panglantaw moabaga og mas lapad nga kahulugan sa mga pulong nga tighubad ug hubad.¹² Sumala niini nga panglantaw, ang hubad ni Joseph dili literal nga paghubad sa mga papyrus, sama sa naandan nga paghubad. Hinoon, ang pisikal nga karaang mga butang [artifacts] naghatag og higayon alang sa pagpamalandong, paghinuklog, ug pagpadayag. Sila nakahimong posible sa proseso diin ang Dios mihatag ngadto kang Joseph Smith og usa ka pagpadayag mahitungod sa kinabuhi ni Abraham, bisan kon kadto nga pagpadayag dili direkta nga haum sa mga karakter nga anaa sa mga papyrus.¹³

Ang katinuod ug bili sa basahon ni Abraham dili mahusay sa makinaadmanon nga pagdebate mahitungod sa hubad sa basahon. Ang estado sa basahon isip kasulatan anaa sa mahangturong mga kamatuoran nga gitudlo ug sa gamhanan nga espiritu nga ipadangat niini. Ang kamatuoran sa basahon ni Abraham sa katapusan makita pinaagi sa mabinantayon nga pagtuon sa mga pagtulun-an niini inubanan sa sinsero nga pag-ampo ug sa panghimatuod sa Espiritu.

May Kalabutan nga mga Hisgutanan: Hubad ni Joseph Smith sa Biblia, Hubad sa Basahon ni Mormon