David O. McKay

Si David O. McKay miserbisyo isip ang ikasiyam nga Presidente sa Simbahan tali sa 1951 ug 1970. Si McKay natawo sa Huntsville, Utah, niadtong 1873 ug midako nga aktibo sa Simbahan. Human sa hayskol, mieskwela siya sa University of Utah, diin nahimamat niya ang iyang umaabot nga asawa, si Emma Ray Riggs, ug nakaugmad og gugma alang sa edukasyon. Bisan og dunay gamay nga pagduhaduha sa sinugdanan mahitungod sa pagdawat og tawag sa misyon niadtong 1897, mibiya siya paingon ngadto sa British nga mga Pulo ug sa wala madugay nadestino ngadto sa Scotland. Sa pagbalik gikan sa iyang misyon, midawat siya og trabaho isip usa ka magtutudlo sa Weber Stake Academy niadtong 1899, diin mitrabaho siya hangtod sa 1906. Niadtong Enero 1901, si David ug si Emma Ray naminyo didto sa Salt Lake Temple.

Niadtong Abril 1906, gitawag si McKay isip usa ka Apostol. Sa panahon sa iyang pagserbisyo, mitabang siya sa paghapsay [streamline] sa Sunday School, nga nagserbisyo diha sa mga superintendente sa Kinatibuk-ang Sunday School tali sa 1909 ug 1934. Niadtong 1920 misugod siya og tibuok kalibotan nga panaw nga milungtad og kapin sa usa ka tuig, diin iyang gibisita ang mga misyon sa Simbahan sa tibuok kalibotan, mibiyahe og dul-an sa 62,000 ka milya (sobra sa 99,000 ka kilometro) ug miabot sa Japan, China, habagatang silangang Asya, sa mga Isla sa Pasipiko, India, Egypt, ug Uropa. Sa wala madugay human sa iyang pagbalik sa Utah, gitawag siya isip presidente sa European Mission. Isip presidente sa misyon, mitabang siya sa pagpakunhod sa negatibo nga media ug sa pagpalambo sa pagtan-aw sa kadaghan sa Simbahan diha sa Great Britain ug kasadpang Uropa. Niadtong tinglarag sa 1934, gitawag ug gipaluyohan siya isip Ikaduhang Magtatambag sa Unang Kapangulohan. Atol sa iyang panahon, iyang gidumala ang pag-ugmad sa Programa sa Welfare sa Simbahan.

Sa wala madugay human sa kamatayon ni Presidente George Albert Smith niadtong Abril 1951, si Presidente McKay gipaluyohan isip Presidente sa Simbahan. Iyang gihatagan og solusyon dihadiha dayon ang nagkakusog nga pagtubo sa Simbahan sa tibuok kalibotan pinaagi sa pagpalapad ug pagmoderno sa programa sa misyonaryo. Isip ang unang Presidente sa Simbahan nga mibiyahe pinaagi sa eroplano, nakita niya ang abilidad sa pagbiyahe sa eroplano nga daling makadala og mga misyonaryo ngadto sa tanang parte sa kalibotan. Gipangulohan usab niya ang mga paningkamot sa paghiusa latas sa mga departamento sa Simbahan ug sa mga sentro sa pagbansay sa misyonaryo, nga mi-standardize sa kurikulum ug sa mga sundanan sa organisasyon atol sa panahon sa makahuluganon nga institusyonal nga paglambo.

Si Presidente McKay malukpanong mibiyahe aron sa pagbisita sa mga Santos sa Ulahing mga Adlaw sa tibuok kalibotan ug sa pagpahinungod sa bag-ong mga templo sa Bern, Switzerland; London, England; ug sa Hamilton, New Zealand. Mipasiugda siya og mga paningkamot sa pagtakdo sa mga organisasyon, departamento, ug publikasyon sa Simbahan, nga mitabang sa pagpakunhod sa nagkadoble nga trabaho ug sa pagpausbaw sa pagkaepektibo. Ang iyang mga pagtulon-an gimahal sa kadaghanan, ang pipila natala diha sa inila nga mga panultihon sama sa “Matag miyembro usa ka misyonaryo” ug “Walay laing kalamp[o]san ang makahulip sa kapakyasan diha sa panimalay.” Daghan ang mihinumdom kaniya nga adunay mahigalaon nga personalidad ug manggihatagon nga batasan. Ang sakit mipugong kaniya nga makit-an sa publiko sa kataposang mga bulan sa iyang kinabuhi, ug niadtong Enero 18, 1970, mipanaw siya diha sa iyang panimalay.

Alang sa dugang nga impormasyon mahitungod sa kinabuhi ni David O. McKay, tan-awa ang Prophets of the Restoration nga mga video sa history.ChurchofJesusChrist.org o diha sa Gospel Library app.

May Kalabotan nga mga Hilisgotan: Correlation [Pagtakdo], Public Relations [Mga Relasyon nga Pang-publiko], Pagtukod og Templo