Columbian Exposition niadtong 1893 [Pagsaulog sa Kasumaran sa Pag-abut ni Columbus sa Amerika]

“Columbian Exposition niadtong 1893 [Pagsaulog sa Kasumaran sa Pag-abut ni Columbus sa Amerika],” Mga Hisgutanan sa Kasaysayan sa Simbahan

Columbian Exposition niadtong 1893 [Pagsaulog sa Kasumaran sa Pag-abut ni Columbus sa Amerika]

Ang siyudad sa Chicago, Illinois, mipasiugda og usa ka kultural nga kasaulogan niadtong 1893 nga gihulagway sa mga tig-organisar ug inila nga pamantalaan isip usa sa nag-unang mga kalihokan sa tibuok kalibutan niana nga siglo. Sulod sa unom ka bulan, ang Columbian Exposition sa Kalibotan, nga nagsaulog sa ika-400 nga anibersaryo sa pag-abut ni Christopher Columbus didto sa Amerika, midani sa minilyon ka bisita gikan sa tanang kanasuran ngadto sa usa ka milyang gilapdon nga kampus nga adunay sobra sa 200 ka gambalay, gatusan ka exhibit, ug sunod-sunod nga mga komperensya ug mga salusalo.

Sobra sa pito ka libo nga mga Santos sa Ulahing mga Adlaw gikan sa Teritoryo sa Utah ang mitambong sa kasaulogan [fair] nga nanghinaut nga personal nga makarepresentar sa ilang pang-relihiyon ug pang-sibiko nga kultura, makatabang sa pagbuntog sa dugay na nga mga pagpihig [prejudice], ug nagtinguha og politikanhong impluwensya aron mahimong usa ka estado.¹ Ang ilang partisipasyon sa nagkalain-laing mga kalihokan nakaani og pagdayeg sa mga nanan-aw, mga premyo sa exhibition, ug mipabor nga pamantalaan atol sa panahon nga gidumtan ang mga Santos, kinsa mihunong na sa pagpahigayon og dinaghan nga kaminyoon tulo ka tuig na ang milabay.² Ang kamabination nga ilang nadawat nakapadasig sa mga lider ug sa mga miyembro sa Simbahan sa pagpalambo sa ilang mga paningkamot kalabut sa relasyon sa publiko ug sa pagpakigtambayayong sa katilingban nga dili mga miyembro sa Simbahan.³

Duha ka tuig sa wala pa ang kasaulogan, ang Lehislatura sa Teritoryo sa Utah [Utah Territorial Legislature] nakadaug og bidding gikan sa Exhibition nga motukod og “Gambalay sa Utah” didto sa yuta nga saulogan ug mopasiugda sa kaugalingong mga exhibit niini. Ang lehislatura mitudlo og usa ka komisyon nga midesinyo sa gambalay ug sa pipila ka exhibit nga nagpakita sa agrikultura, mga minahan, mga produkto, mga art, arkeyolohiya, edukasyon, ug mga hinimo sa kababayen-an sa Utah.⁴

mga tawo nga nag-alirong sa estatuwa ni Brigham Young — Ang mga nanambong nagpahulagway nga nag-alirong sa estatuwa ni Brigham Young sa atubangan sa Gambalay sa Utah sa 1893 nga Kasaulogan sa Kalibotan [World’s Fair].

Agi og dugang sa mga exhibit, ang mga Santos sa Ulahing mga Adlaw miapil sa mga kalihokan sa komperensya ug sa mga kompetisyon. Ang mga lider gikan sa Relief Society, sa Young Ladies’ Mutual Improvement Association, ug sa Primary Association miapil sa World’s Congress of Representative Women, diin nahimamat nila diha sa komperensya ang pipila ka inila nga mga organisasyon sa kababayen-an, lakip na ang National Council of Women sa Estados Unidos.⁵ Human sa usa ka sesyon, ang gibotaran nga mga lider mihimo og diha-diha nga pakigpulong nga midayeg sa mga buhat sa kababayen-an nga mga Santos sa Ulahing mga Adlaw ug pagkahuman mipili ni Emmeline B. Wells, ang kinatibuk-ang secretary sa Relief Society ug editor sa Woman’s Exponent, isip usa sa duha ka honorary session nga mga presidente.⁶ Si Wells ug ang ubang kababayen-an nga mga Santos sa Ulahing mga Adlaw nakaugmad og malungtaron nga relasyon sa ubang babaye nga mga lider.

Usa ka kompetisyon sa inila nga mga choir midapit sa Tabernacle Choir nga moapil, ug bisan og nagduha-duha sa sinugdanan, si direktor Evan Stephens mipili og 250 sa 400 ka boluntaryo nga mga mag-aawit aron mopasundayag didto sa Chicago.⁷ Ang choir mi-iskedyul og mga pagpasundayag samtang nagbiyahe sa tren aron makatigum og mga pundo alang sa biyahe ug mga kaistaran, nga gihimong sumbanan alang sa nagsunod nga mga biyahe sa konserto. Atubangan sa 10 ka libo nga mga nanan-aw, ang Choir mikanta og tulo ka kanta sa kompetisyon sa lain-laing mga tingog, diin gigantihan sila sa ikaduhang puwesto og medalya nga pilak. Ang mga kritiko sa pamantalaan midayeg sa pasundayag ilabi na sa kahanas sa pagdumala ni Stephens ug sa hanas na kaayo nga tingog sa grupo nga ang tanan boluntaryo. Wala madugay human sa kompetisyon, ang Choir mikanta atol sa seremonya sa pagpahinungod sa Liberty Bell didto sa Chicago. Ang pagkanta sa Choir sa nasudnong mga himno lig-ong miestablisar og sayong reputasyon niini isip usa ka kinamaayohang patriyotiko nga grupo sa musika.⁸

Ang Tabernacle Choir nga nagpasundayag didto sa Festival Hall, Chicago, niadtong 1893.

Usa sa kinadak-an sa ubang mga kalihokan mao ang World’s Parliament of Religions [Parliyamento sa mga Relihiyon sa Kalibotan], usa ka komperensya nga gipasiugdahan sa mga representante gikan sa 10 ka dagkong pang-relihiyon nga mga tradisyon: Confucianism, Taoism, Shintoism, Hinduism, Buddhism, Jainism, Zoroastrianism, Judaism, Kristyanismo, ug Islam. Samtang ang komperensya gihulagway mismo nga ang tanan mahimong moapil, daghang grupo, lakip na ang African American, Latin American, American Indian, ug ubang kanasuran sa mga lumad, naglisud og apil, ug ang mga Santos sa Ulahing mga Adlaw wala gipaapil. Human sa hilabihan nga paningkamot aron makaapil, si B. H. Roberts, usa ka sakop sa Seventy, nakadawat og imbitasyon nga mamulong apan gibalhin atol sa komperensya ngadto sa lugar nga gamay ra ang manambong.⁹ Human balibari sa mga tig-organisar ang hangyo ni Roberts nga mamulong sa kinatibuk-ang pundok, miatras si Roberts. Sa gihapon, siya ug ang mga sakop sa Unang Kapangulohan mitambong sa mga sesyon ug naminaw sa mga lider sa mga relihiyon sa tibuok kalibotan, ang uban kansang mga tradisyon ilang nasugatan sa unang higayon. Ang Presidente sa Simbahan nga si Wilford Woodruff, ang iyang magtatambag nga si George Q. Cannon, ug ang uban nga mitambong mibiya sa Parliyamento nga adunay mas dakong respeto sa mga relihiyon sa kalibotan ug midayeg sa pipila ka makadasig nga mga punto nga susama sa mga pagtulun-an ni Jesukristo.¹⁰

Sa tibuok nga Exhibition, ang Gambalay sa Utah miabi-abi sa mga bisita ug nakadawat og positibong pagtagad gikan sa mga komitiba sa mga ganti ug sa nag-una nga pamantalaan. Ang mga kalampusan sa mga exhibit sa Utah, mga kalihokan sa komperensya, ug mga pasundayag sa choir nagbilin og kadasig ug tinguha sa kadaghanan sa mga partisipante nga mga Santos sa Ulahing mga Adlaw nga palapdan ang ilang mga kalihokan kalabut sa relasyon sa publiko didto sa Siyudad sa Salt Lake. Ang mga lider ug mga miyembro sa Simbahan misugod sa paghisgot kalabut sa samang pagdayeg alang sa mga mithi sa pamilya ug sa sibiko sa ubang mga grupo nga pang-relihiyon. Ang Simbahan mipadayon pa sa pag-apil sa nagsunod nga mga Kasaulogan sa Kalibotan ug sa dagkong mga exhibition ngadto sa ika-21 nga siglo.¹¹

May Kalabutan nga mga Hisgutanan: Utah, Katungod sa Kababayen-an sa Pagboto, Tabernacle Choir, Emmeline B. Wells, B. H. Roberts