Detalye gikan sa Siya Misangpit sa Akong Ngalan, ni Michael Malm

Enero 20–26: “Ang mga Kasingkasing sa mga Anak Mobati ngadto sa iIang mga Amahan”

Doktrina ug mga Pakigsaad 2; Joseph Smith—Kasaysayan 1:27–65

Tulo na ka tuig sukad nga ang Dios nga Amahan ug ang Iyang Anak, si Jesukristo, mipakita ngadto kang Joseph Smith diha sa kakahoyan, ug si Joseph wala na nakadawat og bisan unsang dugang nga mga pagpadayag sukad niadto. Nagsugod siya sa paghunahuna kon ang Ginoo ba wala mahimuot kaniya. Sama kanatong tanan, nakahimo siya og mga kasaypanan, ug mibati nga gipanghimaraot tungod niini. Apan ang Dios aduna pay ipabuhat kaniya. Ug ang buhat nga si Joseph gitawag sa pagbuhat adunay koneksyon sa unsay gihangyo sa Dios kanato. Si Joseph mopagawas sa Basahon ni Mormon; kita gidapit sa pagpakigbahin niini nga mensahe. Si Joseph modawat sa mga yawe sa pagkapari aron mopabati sa mga kasingkasing sa mga anak ngadto sa ilang mga amahan; makadawat na kita karon sa mga ordinansa alang sa atong mga katigulangan diha sa mga templo. Gisultihan si Joseph kabahin sa mga panagna nga sa dili madugay matuman; kita gitawag sa pagtabang sa pagpatuman niini nga mga panagna. Samtang kita moapil sa buhat sa Dios, makapaabot kita nga mag-atubang og oposisyon ug gani pagpanggukod, sama sa nahitabo sa Propeta. Apan mahimo kita nga makabaton og hugot nga pagtuo nga ang Ginoo mohimo kanato nga mga instrumento diha sa Iyang mga kamot, sama sa iyang gibuhat alang kang Joseph.

Tan-awa usab sa Mga Santos, 1:22–53.

Mga Ideya alang sa Pagkat-on diha sa Panimalay ug sa Simbahan

Joseph Smith—Kasaysayan 1:27–33

Ang Dios adunay ipabuhat kanako.

Lahi ra nga motuo nga ang Dios adunay buhat alang ni Joseph Smith ug motuo nga Siya adunay buhat alang kanato—kita makahinumdom sa iyang kinabuhi ug klarong makakita unsay iyang nabuhat. Apan gikonsiderar ba ninyo nga ang Dios adunay buhat usab alang kaninyo? Samtang basahon nimo ang Joseph Smith—Kasaysayan 1:27–33, hunahunaa kon unsa kaha kana nga buhat. Sa unsa nga paagi kini nakasalmot sa nagpadayon nga Pagpahiuli sa ebanghelyo sa Manluluwas?

Si Elder Gary E. Stevenson mitudlo: “Samtang moduol kita ngadto kang Kristo ug motabang sa uban sa pagbuhat sa ingon, kita miapil sa buhat sa Dios bahin sa kaluwasan ug kahimayaan, nga nagputing ngadto sa balaang gitudlo nga mga responsibilidad. … Kini nga mga responsibilidad yano, makapadasig, makapaawhag, ug mahimo ra. Ania kini:

• Pagsunod sa ebanghelyo ni Jesukristo

• Pag-atiman niadtong nanginahanglan

• Pagdapit sa tanan nga modawat sa ebanghelyo

• Paghiusa sa mga pamilya ngadto sa kahangtoran” (“Yano ang Katahom—Matahom ang Kayano,” Liahona, Nob. 2021, 47).

Pamalandongi ang mga kasinatian nga imong nasinati nga nag-apil sa matag usa niining balaanong gitudlo nga mga responsibilidad. Unsa kaha ang sunod nga ipabuhat sa Manluluwas kanimo? Adunay pahina sa Topics and Questions [Mga Hilisgotan ug mga Pangutana] alang sa matag usa niini nga mga responsibilidad (tan-awa sa “Our Role in God’s Work of Salvation and Exaltation,” [Ang Atong Tahas sa Buhat sa Dios sa Kaluwasan] Gospel Library). Mahimo nimong suhiron kini nga mga pahina aron sa pagtabang nimo nga matubag kini nga pangutana.

Usahay ikaw mobati nga ang Ginoo dili makagamit nimo tungod sa mga sayop nga imong nabuhat. Unsa ang imong nakat-onan gikan sa kasinatian ni Joseph Smith sa Joseph Smith—Kasaysayan 1:28–29? Unsaon nimo sa pagkahibalo sa imong kahimtang sa atubangan sa [Dios]”?

Pangutana og mga pangutana nga makaawhag og makahuloganong diskusyon. Ang mga pangutana nga adunay sobra sa usa ka saktong tubag makadapit sa mga tigkat-on sa pagtubag base sa ilang personal nga mga hunahuna, mga pagbati, ug mga kasinatian. Ang mga pangutana niini nga latid mao ang mga ehemplo niini.

Tan-awa usab sa “Youth Responsibility in the Work of Salvation [Responsibilidad sa Kabatan-onan sa Buhat sa Kaluwasan]” (bidyo), ChurchofJesusChrist.org; “Ang Buhat sa Kaluwasan ug Kahimayaan,” Kinatibuk-ang Tamdanan nga Basahon, 1.2.

Youth Responsibility in the Work of Salvation

Elder Bednar wants the youth to recognize that recent adjustments to Young Women classes and Aaronic Priesthood quorums give them operational and executional responsibility in the work of salvation. When the youth are focused, miracles will come.

Joseph Smith—Kasaysayan 1:34–47

Pinaagi sa pagpahiuli sa Iyang ebanghelyo, ang Manluluwas mituman sa karaang mga panagna.

Sa dihang si Moroni mipakita ngadto ni Joseph Smith, siya mikutlo og pipila ka mga panagna sa Daang Tugon ug sa Bag-ong Tugon, sama sa Isaias 11; Mga Buhat 3:22–23; ug Joel 2:28–32. Samtang magbasa ka sa Joseph Smith—Kasaysayan 1:34–47, hunahunaa ngano kaha nga kini nga mga panagna importante nga mahibaloan ni Joseph. Nganong importante kini nga imong mahibaloan?

Mahimo usab nga imong basahon unsa ang gitudlo ni Elder David A. Bednar mahitungod sa unang pagbisita ni Moroni ngadto ni Joseph Smith sa “Uban sa Gahom sa Dios sa Dako nga Himaya” (Liahona, Nob. 2021, 28).

Uban sa Gahom sa Dios sa Dako nga Himaya

Si Elder Bednar nagtudlo nga ang pagtahod sa atong mga pakigsaad makatabang kanato nga makadawat sa gahom sa pagkadiosnon diha sa atong kinabuhi.

Tan-awa usab sa “Ang Anghel nga Gikan sa Kalangitan,” Mga Himno, nu. 11.

Joseph Smith—Kasaysayan 1:48–60

Ang Dios moandam nako sa pagtrabaho diha sa Iyang gingharian.

Si Joseph nag-edad lamang og 17 anyos sa dihang una niyang nakita ang bulawan nga mga palid. Wala kini gisalig ngadto kaniya, hinuon, hangtod paglabay sa upat ka tuig. Basaha ang Joseph Smith—Kasaysayan 1:48–60, mangita sa unsay nahitabo sa kinabuhi ni Joseph atol nianang higayona. Sa unsa nga paagi sa imong hunahuna nga kini nga mga hitabo nakapaandam kaniya alang sa buhat nga gitawag sa Dios nga iyang buhaton? Unsa nga mga kasinatian nga imong nasinati kaniadto nga nakapaandam nimo sa pagserbisyo sa Dios ug sa uban? Unsa ang imong kasamtangan nga nasinati nga makatabang nimo alang sa umaabot nga pagserbisyo?

Bungtod Cumorah, ni Al Rounds

Doktrina ug mga Pakigsaad 2

Ang Ginoo mipadala ni Elijah sa pagpabalik sa akong kasingkasing ngadto sa akong mga katigulangan.

Unsa ang gikatudlo sa mga pulong sama sa “tanom,” “kasingkasing,” ug “mobati” dinhi niining seksyon diha nimo mahitungod sa misyon ni Elijah ug sa mga panalangin sa mga yawe sa pagkapari nga iyang gipahiuli? Unsa ang pagbati sa imong kasingkasing ngadto sa imong mga katigulangan? Paghunahuna og mga paagi nga imong masinati ang maong mga pagbati nga mas kanunay. Ang pagpangita sa imong mga katigulangan ug pagpahigayon sa mga ordinansa alang kanila diha sa templo mao ang usa ka paagi (tan-awa sa FamilySearch.org). Unsa pa ang imong mahunahunaan?

Tan-awa usab sa Doktrina ug mga Pakigsaad 110:13–16; Gerrit W. Gong, “Malipayon ug Hangtod sa Hangtod,” Liahona, Nob. 2022, 83–86.

Alang sa dugang nga mga ideya, tan-awa ang mga isyu karong bulana sa Liahona ug sa Alang sa Kalig-on sa mga Kabatan-onan nga mga magasin.

Mga Tawo, Mga Dapit, Mga Panghitabo

• Joseph Smith Sr.

• Emma Hale Smith

• Hill Cumorah

Iklik dinhi aron makakita pa og dugang

Mga Ideya sa Pagtudlo sa mga Bata

Joseph Smith—Kasaysayan 1:28–29

Makahinulsol ako ug mapasaylo.

• Kitang tanan usahay mobati og “panghimaraot tungod sa [atong] kahuyang ug mga kasaypanan,” sama sa gibati ni Joseph Smith. Ikaw ug ang imong mga anak mahimong magtuon pagdungan sa Joseph Smith—Kasaysayan 1:29 mangita kon unsay gibuhat ni Joseph kon mobati siya niana nga paagi. Unsay atong makat-onan gikan sa iyang ehemplo nga makatabang kanato kon mohimo kita og mga kasaypanan? Ngano nga importante nga mahibaloan nga si Joseph gitawag sa Dios bisan og siya dili hingpit?

Joseph Smith—Kasaysayan 1:27–54

Gitawag sa Langitnong Amahan si Joseph Smith aron sa pagtabang Kaniya sa pagbuhat sa Iyang buluhaton.

• Tingali ang imong mga anak malingaw nga magpakaaron-ingnon nga si Joseph Smith samtang imong i-istorya ang mga pagbisita ni Moroni diha sa Joseph Smith—Kasaysayan 1:27–54 o sa “Kapitulo 3: Ang Anghel nga si Moroni ug ang Bulawan nga mga Palid” (sa Mga Istorya sa Doktrina ug mga Pakigsaad, 13–17, o sa tukma nga bidyo sa Gospel Library). Pananglitan, mahimong ikyugpos nila ang ilang mga bukton ingon og sila nag-ampo o nagpakaaron-ingnon nga mokatkat sa Bungtod Cumorah, ug uban pa. Dayon mahimong pangutan-on nimo sila mahitungod kon unsa ang gitawag sa Dios nga buhaton ni Joseph Smith ug sa unsa nga paagi kita napanalanginan isip usa ka resulta. Pananglitan, sa unsa nga paagi kita napanalanginan tungod kay gihubad ni Joseph Smith ang Basahon ni Mormon? Sa unsang paagi nga ang iyang buhat nakatabang nato nga mas mahiduol ngadto sa Langitnong Amahan ug ni Jesukristo?

Doktrina ug mga Pakigsaad 2

Gusto sa Langitnong Amahan nga ang mga pamilya mabugkos diha sa templo.

• Tingali ikaw ug ang imong mga anak malingaw nga magtan-aw sa pipila ka litrato sa inyong pamilya, tingali maglakip sa litrato sa inyong pamilya nga diha sa templo (o tan-awa sa Pakete sa mga Hulagway sa Ebanghelyo, nu. 120). Dayon mahimong basahon nimo ang Doktrina ug mga Pakigsaad 2 ug mopakigbahin sa usag usa sa inyong mga hunahuna mahitungod kon ngano nga kita adunay mga templo ug ngano nga ang Langitnong Amahan gusto nga ang mga pamilya magkahiusa sa kahangtoran. Ikonsiderar ang pagdungan sa pagpanganta sa “Mga Pamilya Mahimong Manag-uban sa Kahangtoran” (Mga Himno,, 188). Unsa ang gisulti niini nga kanta nga atong mabuhat aron makauban sa atong mga pamilya sa kahangtoran?

Palmyra New York Temple

Doktrina ug mga Pakigsaad 2

Ang pagkat-on mahitungod sa akong mga katigulangan makahatag kanako og hingpit nga kalipay.

• Bisan ang mga bata maghinam-hinam ug mobati og hingpit nga kalipay sa family history. Aron sa pagtabang nila, mahimong mopakigbahin ka og mga istorya o mga litrato sa imong mga katigulangan. Hisgoti uban sa imong mga anak ang mahitungod unsa ang matang sa kinabuhi sa ilang mga katigulangan sa dihang sila mga bata pa. Ang imong mga anak mahimong malingaw usab sa pipila sa mga kalihokan sa family history sa FamilySearch.org/discovery.

Alang sa dugang nga mga ideya, tan-awa ang isyu karong bulana sa Higala nga magasin.

Joseph Nagdawat sa mga Palid, ni Gary E. Smith