“Enero 27–Pebrero 2: “Ang Akong Buhat Magpadayon”

Doktrina ug mga Pakigsaad 3–5

Atol sa iyang unang mga katuigan isip propeta sa Ginoo, si Joseph Smith wala pa masayod sa tanan mahitungod sa “katingalahan nga buhat” nga gitawag siya sa pagbuhat. Apan usa ka butang sa iyang mga nag-unang kasinatian mitudlo kaniya nga ang paghimo sa buhat sa Dios, ang iyang mga mata kinahanglan gayod nga “bug-os nga tinguha ngadto sa himaya sa Dios” (Doktrina ug mga Pakigsaad 4:1, 5). Pananglitan, kon ang Ginoo motambag kaniya sa paghimo og butang nga dili siya segurado nga gusto niyang buhaton, kinahanglan siya nga mosunod sa tambag sa Ginoo. Ug bisan kon siya adunay “daghan nga mga pagpadayag, ug … gahom sa pagbuhat og daghan nga gamhanan nga mga buhat,” kon siya mobati nga unsay iyang gusto mas importante kay sa kabubut-on sa Dios, siya “kinahanglan mapukan” (Doktrina ug mga Pakigsaad 3:4). Apan si Joseph nakat-on og lain pang butang nga ingon ka importante sa pagbuhat sa buluhaton sa Dios: “ang Dios maluluy-on,” ug kon si Joseph sinsero nga maghinulsol, siya “sa gihapon gipili” (bersikulo 10). Ang buhat sa Dios, human sa tanan, usa ka buhat sa katubsanan. Ug kana nga buhat “dili gayod makawang” (bersikulo 1).

Mga Ideya alang sa Pagkat-on diha sa Panimalay ug sa Simbahan

Doktrina ug mga Pakigsaad 3:1–16

Makasalig ako sa Dios.

Sa nag-unang pagpangalagad ni Joseph Smith, ang maayong mga higala lisod pangitaon—ilabi na sa higala sama ni Martin Harris, usa ka respetado nga tawo, mauswagon nga tawo kinsa mihimo og dakong mga sakripisyo aron sa pagsuporta sa buhat ni Joseph. Mao nga sa dihang si Martin nangayo og pagtugot nga ipakita ang unang 116 ka manuskrito nga mga pahina sa hubad sa Basahon ni Mormon ngadto sa iyang asawa, si Joseph natural nga mosugot sa iyang hangyo, bisan og ang Ginoo mipasidaan batok niini. Subo kaayo, ang mga pahina nawala samtang kini anaa sa posisyon ni Martin, ug si Joseph ug Martin gipanton og maayo sa Ginoo (tan-awa sa Mga Santos, 1:57–59).

Samtang magbasa ka sa Doktrina ug mga Pakigsaaad 3:1–15, pamalandongi unsa ang gusto sa Ginoo nga imong makat-onan gikan sa ilang kasinatian. Pananglitan, unsay imong nakat-onan mahitungod sa:

• Buhat sa Dios? (tan-awa sa mga bersikulo 1–3, 16).

• Ang mga sangpotanan sa pagkahadlok sa tawo kay sa pagsalig sa Dios? (tan-awa sa mga bersikulo 4–8).

• Ang mga panalangin nga moabot tungod sa pagpabilin nga matinud-anon? (tan-awa sa bersikulo 8).

• Ang paagi sa Ginoo nakahatag og koreksiyon ug awhag ni Joseph? (tan-awa sa mga bersikulo 9–16).

Sa iyang mensahe “Hain Ka Nag-atubang?,” si Elder Lynn G. Robbins mihatag og daghang mga ehemplo sa kasulatan sa mga tawo nga nahadlok sa Dios ug sa mga tawo nga nadala sa pamugos gikan sa uban (Liahona, Nob. 2014, 9–11). Ikonsiderar ang pagbasa niini nga mga ehemplo diha sa mga kasulatan nga iyang giingon. Unsay imong nakat-onan gikan niini nga mga istorya? Unsa ang mga kasinatian nga imong nasinati diin ikaw misalig sa Ginoo sa dihang nag-atubang og pagpamugos sa pagbuhat og butang nga lahi? Unsa ang mga resulta sa imong mga aksiyon?

Tan-awa usab sa Dale G. Renlund, “Usa ka Sistema sa mga Lagda alang sa Personal nga Pagpadayag,” Liahona, Nov. 2022, 16–19; “The Contributions of Martin Harris,” sa Konteksto sa mga Pagpadayag [Revelations in Context] (2016), 1–9; Topics and Questions [Mga Hilisgotan ug mga Pangutana], “Seeking Truth and Avoiding Deception,” Gospel Library; “Unsa Kalumo ang Sugo sa Dios,” Mga Himno, nu. 71.

Doktrina ug mga Pakigsaad 4

Makaserbisyo ko sa Dios sa tibuok nakong kasingkasing, gahom, hunahuna ug kusog.

Ang Seksyon 4 sa kanunay mao ang gigamit sa full-time nga mga misyonaryo. Hinuon, makapa-ikag hunahunaon nga kining pagpadayag unang gihatag ngadto ni Joseph Smith Sr., kinsa wala matawag og misyon apan sa gihapon “nagtinguha sa pag-alagad sa Dios” (bersikulo 3).

Usa ka paagi sa pagbasa niini nga seksiyon mao ang paghunahuna niini isip usa ka deskripsyon sa trabaho alang sa usa ka tawo kinsa gustong mohimo sa buhat sa Ginoo. Unsa ang gipangita sa Ginoo? Unsa nga mga kaayohan ang Iyang gitanyag?

Unsay imong nakat-onan mahitungod sa pag-alagad sa Ginoo gikan niini nga pagpadayag?

Si Presidente Russell M. Nelson nanawagan sa pagpundok sa Israel “ang kinadak-ang hagit, ang kinadak-ang kawsa, ug ang kinadak-ang buhat sa kalibotan” (“Paglaom sa Israel” [tibuok kalibotan nga debosyonal sa kabatan-onan, Hunyo 3, 2018], Gospel Library). Unsay imong nakaplagan niini nga pakigpulong nga nakapadasig nimo sa pag-apil niini nga buhat?

Ang tanan kinsa adunay tinguha sa pag-alagad sa Dios gitawag sa buhat.

Doktrina ug mga Pakigsaad 5

Pinaagi sa Espiritu Santo, ako makaangkon og saksi sa Basahon ni Mormon.

Niadtong Marso 1829, ang asawa ni Martin Harris, si Lucy, mireklamo sa korte nga si Joseph Smith nangilad sa mga tawo pinaagi sa pagpakaaron-ingnon nga naghubad og bulawang mga palid (tan-awa sa Mga Santos, 1:62–65). Mao nga si Martin mihangyo kang Joseph og dugang pa nga ebidensya nga tinuod ang bulawang mga palid. Doktrina ug mga Pakigsaad 5 mao ang usa ka pagpadayag agig tubag sa hangyo ni Martin. Unsay imong nakat-onan gikan niini nga seksiyon mahitungod sa mosunod:

• Unsa ang gisulti sa Ginoo nga mahitabo kon ang bulawang mga palid ipasundayag aron makita sa kalibotan (tan-awa sa Doktrina ug mga Pakigsaad 5:7). Ngano sa inyong hunahuna nga kana ang sitwasyon?

• Ang papel sa mga saksi diha sa buhat sa Ginoo (tan-awa sa mga bersikulo 11–15; tan-awa usab sa 2 Mga Taga-Corinto 13:1).

• Unsaon sa pagbaton og pagpamatuod sa Basahon ni Mormon alang sa imong kaugalingon (tan-awa sa bersikulo 16, 24; tan-awa usab sa Moroni 10:3–5).

Doktrina ug mga Pakigsaad 5:1–10

Si Jesukristo mihatag sa Iyang pulong pinaagi ni Joseph Smith.

Unsa ang gitudlo sa Doktrina ug mga Pakigsaad 5:1–10 diha nimo mahitungod sa papel ni Joseph Smith sa atong panahon—ug sa imong kinabuhi? (Tan-awa usab sa 2 Nephi 3:6–24.)

Alang sa dugang nga mga ideya, tan-awa ang mga isyu karong bulana sa Liahona ug sa Alang sa Kalig-on sa mga Kabatan-onan nga mga magasin.

Mga Tawo, Mga Dapit, Mga Panghitabo

• Mga Kapanguhaan sa Kasaysayan sa Doktrina ug mga Pakigsaad: Martin Harris

• Ang Mga Pagkonsulta ni Martin Harris sa mga Eskolar

• Nawala nga Manuskrito sa Basahon ni Mormon

Iklik dinhi aron makakita pa og dugang

Mga Ideya sa Pagtudlo sa mga Bata

Doktrina ug mga Pakigsaad 3:5–10; 5:21–22

Makapili ako sa matarong bisan ang uban maninguha sa pagpabuhat kanako og sayop.

• Sa pagsugod og panaghisgotan mahitungod sa pagkat-on sa pagsalig sa Langitnong Amahan, mahimo nimong rebyohon ang istorya sa nawala nga mga pahina sa manuskristo (tan-awa sa Mga Istorya sa Doktrina ug mga Pakigsaad, 18–21). Mahimo dayon nga imong ipadrama sa imong mga anak ang mga sitwasyon nga sila mahimong tintalon sa pagbuhat og usa ka butang nga nakahibalo sila nga dili matarong. Unsa nga mga pulong o hugpong sa mga pulong diha sa Doktrina ug mga Pakigsaad 3:5–8; 5:21–22 nga makatabang nila atol niini nga mga sitwasyon?

  Chapter 4: Martin Harris and the Lost Pages: 1827–1828

Doktrina ug mga Pakigsaad 4

Ang Ginoo nagdapit kanako sa pagtabang sa Iyang buhat.

• Ang matag bersikulo sa Doktrina ug mga Pakigsaad 4 adunay bililhon nga mga kamatuoran nga makatabang sa imong mga bata nga makat-on mahitungod sa pag-alagad sa Dios. Ania ang pipila ka ideya sa pagtabang nila nga makadiskobre niini nga mga kamatuoran:

  • Mahimo magdungan kamo sa pagbasa sa Doktrina ug mga Pakigsaad 4:1 ug magpakita og mga litrato nga naghulagway sa “katingalahang buhat” sa Dios sa ulahing mga adlaw (sama sa mga misyonaryo, mga templo, ug sa Basahon ni Mormon).

  • Ang imong mga anak mahimong maghunahuna sa mga aksiyon o magdrowing og mga litrato nga naghulagway sa hugpong sa mga pulong nga “moalagad kaniya sa tibuok ninyo nga kasingkasing, gahom, hunahuna ug kusog” (Doktrina ug mga Pakigsaad 4:2).

  • Mahimo kamong magdungan sa pagtan-aw sa mga himan nga gigamit sa pagtrabaho diha sa umahan. Sa unsang paagi kini nga mga himan nagtabang kanato? Tabangi ang imong mga anak sa pagpangita og mga butang diha sa Doktrina ug mga Pakigsaad 4:5–6 nga mahimong sama sa mga himan sa pagbuhat sa buluhaton sa Dios.

  • Dapita ang dagko nga mga bata sa pagsiksik sa Doktrina ug mga Pakigsaad 4 sa ilang kaugalingon ug paghimo og lista sa mga butang nga ilang makat-onan mahitungod unsa ang kahulogan sa pag-alagad sa Dios.

  • Mahimo kamong magdungan sa pagkanta sa usa ka kanta mahitungod misyonaryo nga buhat, sama sa “Gusto Ko Karon nga Mamisyonaryo” (Songbook sa mga Bata, 65).

Makatabang ko sa buhat sa Dios pinaagi sa pag-alagad sa uban.

Ipahiangay ang mga kalihokan aron sa pagpaapil sa mga tawo nga adunay mga kakulangan. Ang gamay nga pagpahiangay sa mga kalihokan makapaseguro nga ang tanan adunay oportunidad sa pagkat-on. Pananglitan, kon ang usa ka kalihokan nagsugyot sa pagpakita og usa ka litrato, mahimo kamong manganta hinuon aron sa pagpaapil sa mga tawo nga adunay mga kadaot sa panan-aw.

Doktrina ug mga Pakigsaad 5:1–7, 11, 16, 23–24

Makasaksi ako nga ang Basahon ni Mormon tinuod.

• Sa pagtudlo sa imong mga anak mahitungod sa mga saksi, mahimong hangyoon nimo sila sa paghunahuna nga ang usa ka higala misulti kanila nga sila nakakita og usa ka iring nga naglakaw gamit ang iyang atubangan nga mga tiil. Motuo ba sila niini? Unsa kon laing higala ang misulti sa samang butang? Hisgoti ang mahitungod kon unsa ang usa ka “saksi” ug ngano nga ang mga saksi importante. Dayon mahimo kang motabang sa imong mga anak sa pagpangita sa Doktrina ug mga Pakigsaad 5:1–3, 7, 11 sa mga tubag sa mga pangutana sama niini:

  • Unsa ang gusto ni Martin Harris nga mahibaloan?

  • Kinsa ang mahimong pakit-on ni Joseph Smith sa bulawan nga mga palid?

  • Ngano nga ang pagkakita sa mga palid tingali dili makakombinser sa usa ka tawo nga ang Basahon ni Mormon tinuod?

  • Unsa ang atong mabuhat nga mahimong mga saksi sa Basahon ni Mormon? (tan-awa sa Doktrina ug mga Pakigsaad 5:16; Moroni 10:3–5).

Alang sa dugang nga mga ideya, tan-awa ang isyu karong bulana sa Higala nga magasin.

Makatingala nga Gibug-aton sa 116 ka Pahina,, ni Kwani Povi Winder