“Mga Tingog sa Pagpahiuli: Hubad sa Basahon ni Mormon,” Dali, Sunod Kanako—Alang sa Panimalay ug sa Simbahan: Doktrina ug mga Pakigsaad 2025 (2025)
“Hubad sa Basahon ni Mormon,” Dali, Sunod Kanako—Alang sa Panimalay ug sa Simbahan: 2025
Mga Tingog sa Pagpahiuli
Hubad sa Basahon ni Mormon
Niadtong Abril 1829, sa buwan sa dihang ang mga seksyon 6–9 sa Doktrina ug mga Pakigsaad nadawat, ang nag-unang buhat ni Joseph Smith mao ang paghubad sa Basahon ni Mormon. Wala kitay nahibaloan nga daghang detalye mahitungod sa milagroso nga proseso sa paghubad, apan nasayod kita nga si Joseph Smith usa ka manalagna, gitabangan sa mga instrumento nga giandam sa Dios: duha ka sihag nga bato nga gitawag og Urim ug Thummim ug laing bato nga gitawag og bato sa manalagna.
Sa dihang gihangyo sa pagsaysay kon giunsa sa paghubad kini nga rekord, miingon si Joseph “nga dili tumong niini ang pagsulti sa kalibotan sa tanang partikular.” Kanunay niyang ipahayag nga kini gihubad “pinaagi sa gasa, ug gahom sa Dios.”
Ang mosunod nga mga pamahayag, gikan sa mga saksi sa proseso sa paghubad, nagsuporta sa pagsaksi ni Joseph.
Gituohan nga kini nga kahon, nga gipanag-iya ni Hyrum Smith, maoy temporaryo nga gigamit sa pagtago sa bulawan nga mga palid.
Emma Smith
“Sa dihang naghubad ang akong bana sa Basahon ni Mormon, nakasulat ko og usa ka tipik niini, samtang siya midiktar sa matag kapahayag [sentence], pulong ngadto sa laing pulong, ug sa dihang naabot siya sa mga ngalan sa tawo dili siya makalitok niini, o sa tag-as nga mga pulong, iya kining isulti ang panitik, ug samtang nagsulat ko niini, kon masayop ko sa bisan unsa nga titik, iya akong pahunungon ug iyang korehian ang akong panitik bisan og imposible nga makita niya kon giunsa nako sa pagsulat kini nianang higayona. Bisan ang pulong nga Sarah dili siya makalitok sa sinugdanan, apan kinahanglan pa nga litukon ang titik niini, ug mosulti ko niini alang kaniya.”
“Ang mga palid kanunayng nahimutang diha sa lamesa nga walay bisan unsa nga salipod nga makatago niini, giputos sa gamayng hapin sa lamesa, nga akong gihatag niya aron pustan niini. Kausa akong nahikap ang mga palid, samtang anaa kini sa lamesa, gisubay ang luta ug porma niini. Morag mabawog kini sama sa baga nga papel, ug dunay tingog nga sama sa metal kon ang mga tumoy paklion gamit ang kumagko, sama sa buhaton usahay sa usa ka tawo nga mopakli sa mga palid sa libro gamit ang kumagko. …
“Ako nagtuo nga ang Basahon ni Mormon balaanon ang pagkatinuod—ako wala gayod magduda bisan gamay sa katinuod niini. Natagbaw ko nga walay tawo nga makadiktar sa mga sinulat diha sa mga manuskrito gawas kon siya dinasig; tungod kay, sa diha nga nagsilbing iyang tigsulat, si [Joseph] modiktar ngari kanako matag karon ug unya; ug inig balik human og kaon, o human sa mga pagkabalda, mobalik siya kon diin siya mohunong, nga dili magtan-aw sa manuskrito o ipabasa ang bisan asa nga bahin niini ngadto kaniya. Usa kini ka naandang butang nga iyang himoon. Dili kini posible nga ang usa ka makinaadmanon nga tawo makahimo niini; ug, alang sa usa ka tawo nga ignorante kaayo ug dili makinaadmanon sama niya, imposible gayod ni kaayo.”
Oliver Cowdery
“Ako misulat gamit ang akong kaugalingong pangsulat sa tibuok Basahon ni Mormon (gawas lang sa pipila ka mga pahina) ingon nga kini gihubad gikan sa mga ngabil sa propeta, samtang siya mihubad niini pinaagi sa gasa ug gahom sa Dios, pinasikad sa Urim ug Thummim, o, sumala sa tawag niini sa basahon, balaan nga mga tighubad. Akong nakita sa kaugalingon nakong mga mata, ug nagunitan sa akong mga kamot, ang bulawan nga mga palid diin kini nahubad. Nakita usab nako ang mga tighubad [interpreter].”