Modelo nga kopya sa orihinal nga manuskrito sa Basahon ni Mormon

Pebrero 10–16: “Aron Ikaw Mahimo nga Magmadaogon”

Doktrina ug mga Pakigsaad 10–11

Samtang nagpadayon ang paghubad sa Basahon ni Mormon, mitumaw ang usa ka pangutana: Unsay angay buhaton ni Joseph Smith ug ni Oliver Cowdery niadtong mga nahubad nga pahina nga nawala? Tingali makataronganon nga usbon sa paghubad kadto nga bahin, apan ang Ginoo adunay nakita nga wala nila makita: ang ilang mga kaaway nagplano sa pag-usab sa mga pulong niadto nga mga pahina aron sa pagmugna og katahap diha sa dinasig nga buhat ni Joseph. Ang Dios adunay plano aron malikayan kana nga problema ug mapadayon ang buhat. Liboan ka tuig ang milabay, ang Dios midasig kang Nephi sa pagsulat og ikaduhang talaan nga nahitabo sa samang higayon sa panahon “alang sa usa ka maalamon nga katuyoan diha Kaniya” (1 Nephi 9:5).

“Ang akong kaalam,” ang Ginoo misulti kang Joseph, “labaw pa ka gamhanan kay sa kaigmat sa yawa” (Doktrina ug mga Pakigsaad 10:43). Mao kana ang masaligon nga mensahe diha sa usa ka panahon nga sama sa atoa karon, nga ang kaaway naningkamot og maayo sa pagpaluya sa atong hugot nga pagtuo. Sama ni Joseph, mahimo kitang “magmatinud-anon ug mopadayon” diha sa buhat nga gipabuhat sa Dios kanato (bersikulo 3). Dayon atong masuta nga Siya mihatag na og paagi aron nga “ang mga ganghaan sa impyerno dili makabuntog batok kanato” (bersikulo 69).

Tan-awa sa Mga Santos, 1:57–67.

Mga Ideya alang sa Pagkat-on diha sa Panimalay ug sa Simbahan

Doktrina ug mga Pakigsaad 10:1–33

Ang Dios “dili makatugot nga si Satanas makatuman sa iyang daotan nga laraw.”

Mas gusto ni Satanas nga atong kalimtan nga siya anaa—o nga kita dili kaayo makamatngon sa iyang mga pagpaningkamot sa pag-impluwensya kanato (tan-awa sa 2 Nephi 28:22–23). Apan ang pulong sa Ginoo diha sa Doktrina ug mga Pakigsaad 10 nagmatuod nga si Satanas tinuod—ug siya aktibong nagsupak sa buhat sa Ginoo. Diha sa mga bersikulo 1–33, ilha kon unsay nahibaloan sa Dios mahitungod sa mga paningkamot ni Satanas (tan-awa usab sa mga bersikulo 62–63). Ikaw makahangyo usab sa Ginoo nga tabangan ka nga makita kon sa unsang paagi nga si Satanas nagtintal nimo. Samtang magbasa ka sa seksiyon 10, pamalandongi kon sa unsang paagi nga ang Manluluwas makatabang nimo sa pagpakigbatok sa mga paningkamot ni Satanas.

Doktrina ug mga Pakigsaad 10:34–52

Ang “kaalam [sa Ginoo] labaw pa ka gamhanan kay sa kaigmat sa yawa.”

Si Nephi wala masayod kon nganong gidasig siya sa paghimo og duha ka hugpong sa mga talaan sa iyang katawhan. Ug si Mormon wala masayod kon nganong gidasig siya sa paglakip sa ikaduhang hugpong ngadto sa bulawan nga mga palid. Apan ang duha ka propeta misalig nga ang Dios adunay “usa ka maalamon nga katuyoan” (1 Nephi 9:5; Mga Pulong ni Mormon 1:7). Sa pagkakaron kita nasayod bisan man lang sa tinipik niana nga katuyoan: aron mapulihan ang 116 nga nawala nga mga pahina sa Basahon ni Mormon. Sa imong hunahuna unsa man ang gusto sa Ginoo nga imong makat-onan gikan sa tanan niini? Pamalandongi kini nga mga pangutana samtang magbasa ka sa Doktrina ug mga Pakigsaad 10:34–52. Mahimo usab nga maghimo ka og lista sa mga kamatuoran nga imong nakat-onan mahitungod sa Ginoo gikan niini nga mga bersikulo. Sa unsa nga paagi nga kini nga mga kamatuoran makaapekto sa imong relasyon ngadto Kaniya? Unsa ang nakapadayeg kanimo mahitungod sa kaalam ug panglantaw sa Ginoo sa pagpangandam alang sa nawala nga 116 ka pahina?

Tingali bation usab nimo nga madasig sa pagpangita og ebidensiya sa Iyang kaalam ug panglantaw diha sa imong kinabuhi. Basaha ang istorya diha sa mensahe ni Elder Ronald A. Rasband “Pinaagi sa Balaan nga Plano”—basin makahatag kini og mga ehemplo nganha sa imong mga hunahuna (Liahona, Nob. 2017, 55–57). Ikonsiderar ang pagsulat niini kon moabot kini kanimo. Sa unsang paagi nga ang Ginoo nakatabang sa imong kinabuhi? Pananglitan, unsa nga “mga sulagma” ang Iyang giandam? Unsa nga mga pundasyon ang Iyang gitakda alang sa imong mga panalangin? Kanus-a Siya migiya nimo aron mangalagad ngadto sa usa ka tawo nga nanginahanglan?

Tan-awa usab sa Mga Taga-Roma 8:28; Doktrina ug mga Pakigsaad 90:24; Topics and Questions [Mga Hilisgotan ug mga Pangutana], “Plan of Salvation [Plano sa Kaluwasan],” Gospel Library.

Detalye gikan sa Mormon Abridging the Plates [Si Mormon Nagpamubo sa mga Palid], ni Tom Lovell

Doktrina ug mga Pakigsaad 11

“Itugyan ang imong pagsalig diha niana nga Espiritu [sa Ginoo].”

Ang magulang nga igsoon ni Joseph nga si Hyrum matinguhaon gayod nga masayod sa kabubut-on sa Ginoo alang niya, mao nga nangutana siya ni Joseph sa pagtinguha og pagpadayag alang niya. Ang propeta malipayon nga mibuhat niini, apan usa sa mensahe niana nga pagpadayag sa (Doktrina ug mga Pakigsaad 11) mao nga si Hyrum makatinguha og pagpadayag alang sa iyang kaugalingon. Ug makahimo usab ang “tanan kinsa adunay maayo nga mga tinguha, ug naggalab sa ilang sanggot sa pag-ani” (bersikulo 27). Samtang magbasa ka sa seksiyon 11, sa imong pamati unsa ang gitudlo sa Ginoo nimo mahitungod sa personal nga pagpadayag? Unsay kalabotan niini ngadto sa unsay gitudlo ni Oliver Cowdery diha sa mga seksiyon 6–9? Unsa pay laing mga mensahe ang anaa Kaniya alang nimo?

Tan-awa usab sa “Paggiyaha ang Espiritu,” Mga Himno, nu. 85.

Dapita ang mga tigkat-on sa pagpangutana. Ang mga pangutana sa kasagaran mosangpot ngadto sa pagpadayag. Kon ikaw nagtudlo sa imong pamilya o sa usa ka klase sa Simbahan, awhaga sila sa pagpangutana, ug tabangi sila sa pagpangita sa mga tubag diha sa mga kasulatan. Pananglitan, kon sila adunay mga pangutana mahitungod sa personal nga pagpadayag, magdungan sa pagpangita alang sa tubag diha sa Doktrina ug mga Pakigsaad 11:12–14.

Doktrina ug mga Pakigsaad 11:15–26

Samtang magtinguha ko sa “pagbaton sa pulong [sa Dios],” akong madawat ang Iyang Espiritu ug gahom.

Bisan sa wala pa mahubad ang Basahon ni Mormon, si Hyrum Smith matinguhaon nga motabang sa buhat sa Pagpahiuli. Samtang nagbasa ka sa tubag sa Ginoo ngadto sa iyang mga gitinguha, ikonsiderar unsa ang kahulogan niini diha nimo sa “pagbaton sa pulong sa [Dios]” (bersikulo 21). Sa unsang paagi nga ang pagbaton sa mga pulong sa Dios makatabang nimo sa pagserbisyo Kaniya nga adunay gahom?

Alang sa dugang nga mga ideya, tan-awa ang mga isyu karong bulana sa Liahona ug sa Alang sa Kalig-on sa mga Kabatan-onan nga mga magasin.

Mga Tawo, Mga Dapit, Mga Panghitabo

• Joseph Smith Jr.

• Hyrum Smith

• Nawala nga Manuskrito sa Basahon ni Mormon

Iklik dinhi aron makakita pa og dugang

Mga Ideya sa Pagtudlo sa mga Bata

Doktrina ug mga Pakigsaad 10:5

Kon ako mag-ampo sa kanunay, ako makadawat og kalig-on gikan sa Dios.

• Sa pagpailaila niini nga bersikulo nganha sa mga bata, mahimo ka nga mangutana nila mahitungod sa mga butang nga gibuhat nila “kanunay”. Unsa ang gisulti sa Ginoo nga kinahanglan natong buhaton kanunay diha sa Doktrina ug mga Pakigsaad 10:5? Nganong gusto man Siya nga buhaton nato kini?

• Unsaon nimo sa pagtabang ang imong mga anak nga mahinumdom sa pag-ampo kanunay? Tingali mahimo sila nga mangolekta og pipila ka gagmay, hamis nga mga bato ug pintalan kini “Doktrina ug mga Pakigsaad 10:5” o “Mag-ampo Kanunay.” Mahimo nilang ibutang ang ilang mga bato sa lainlaing mga dapit diin gusto nila nga mapahinumdoman sa pag-ampo, sama sa duol sa higdaanan, dapit sa ilang mga libro sa eskwelahan, o dapit sa ilang kan-anan. Sumala diha sa Doktrina ug mga Pakigsaad 10:5, sa unsang paagi nga ang Dios mopanalangin nato kon kita mag-ampo? Ang imong mga bata mahimong mangita og dugang nga mga tubag diha sa usa ka awit sama sa “Ampo sa Usa ka Bata” (Songbook sa mga Bata, 6).

Doktrina ug mga Pakigsaad 11:12–13

Ang Espiritu Santo naggiya kanako sa pagbuhat og maayo.

• Ang mga bata makakat-on sa pag-ila kon ang Espiritu mamulong ngadto kanila. Aron matabangan sila, mahimo ka nga magtago og bombilya o ispat ug usa ka hulagway sa malipayon nga nawong bisan asa sa kwarto; dayon hangyoa ang imong mga anak sa pagpangita niini nga mga aytem. Basaha ang Doktrina ug mga Pakigsaad 11:13, ug tabangi ang imong mga anak sa pag-ila sa mga pulong nga may kalabotan ngadto sa mga butang nga ilang nakit-an. Unsa ang gitudlo niini nga mga pulong mahitungod kon sa unsa nga paagi ang Espiritu Santo nagtabang kanato?

• Ang pagpakigbahin sa imong kaugalingong mga kasinatian makatabang sa imong mga bata sa pag-ila sa impluwensya sa Espiritu Santo diha sa ilang kinabuhi. Samtang mopakigbahin ka, hangyoa sila nga mopakigbahin usab sa ilang mga kasinatian. Mahimo usab ninyong basahon og dungan ang Doktrina ug mga Pakigsaad 11:12–13, mangita kon unsaon nato nga makaila kon ang Espiritu naggiya nato. Ipamatuod nga ang Langitnong Amahan gusto nga mogiya kanato pinaagi sa Espiritu Santo.

Doktrina ug mga Pakigsaad 11:21, 26

Kinahanglan nga mahibalo ako sa ebanghelyo aron makatabang ako sa uban sa pagpangita sa kamatuoran.

• Sama ni Hyrum Smith, ang imong mga anak tingali adunay daghang oportunidad sa pagpakigbahin sa ebanghelyo ngadto sa uban. Mahimo ninyong basahon og dungan ang Doktrina ug mga Pakigsaad 11:21, 26 ug hangyoa ang imong mga anak sa pagpangita sa unsay gisulti sa Ginoo ngadto ni Hyrum nga kinahanglan niyang buhaton aron makatudlo siya sa ebanghelyo. Unsa ang ipasabot sa “pagbaton sa pulong sa Dios? Unsaon nato paghimo niini? Unsaon nato sa “pagmahal” sa pulong sa Dios diha sa atong mga kasingkasing? Tingali ang imong mga anak mahimong idrama-drama ang pagpakigbahin og usa ka butang mahitungod ni Jesukristo o sa Basahon ni Mormon ngadto sa uban.

Alang sa dugang nga mga ideya, tan-awa ang isyu karon nga bulan sa Higala.

Joseph and Hyrum Smith [Si Joseph ug si Hyrum Smith], ni Ken Corbett