Librarya
Plano sa Kaluwasan

“Plano sa Kaluwasan,” Mga Hilisgotan ug mga Pangutana (2023)

tawo nga naglakaw sa mga balod sa baybayon

Giya sa Pagtuon sa Ebanghelyo

Plano sa Kaluwasan

Plano sa Langitnong Amahan alang sa atong luwas ug malipayong pagbalik ngadto Kaniya

Nahunahunaan na ba nimo kon nganong naa ka sa yuta o kon unsay imong katuyoan sa kinabuhi? Makahunahuna ba ka usahay kon nganong lisod kaayo ang kinabuhi? Mabalaka ba ka kon unsay mahitabo kon ikaw o ang imong minahal mamatay? Kon ikaw mag-atubang og mahagiton nga mga pangutana nga sama niini—ug makaatubang gayod kita niini—makatabang ang pagkahibalo nga ang Langitnong Amahan dunay plano para nimo , para natong tanan. Ang pagsabot niana nga plano makatabang nimo sa pagpangita og mga tubag niini nga mga pangutana ug pagkakaplag og tinuod nga kalipay, bisan og unsa pay mahitabo sa imong kinabuhi.

Unsa Ang Plano sa Kaluwasan?

Ang plano sa kaluwasan, o plano sa kalipay, mao ang plano sa Langitnong Amahan nga tabangan kita nga mahisama Kaniya ug makabalik ngadto Kaniya. Ang Paglalang sa yuta, ang Pagkapukan ni Adan ug Eva, atong pagkatawo ug pagkamatay, ang Pag-ula ni Jesukristo, atong pagkabanhaw ug Kataposang Paghukom, ug tanang balaod, mga sugo, ug mga gasa sa Dios kabahin sa Iyang plano. Si Jesukristo adunay mahinungdanong tahas sa pagpahinabo sa kaluwasan sa mga anak sa Langitnong Amahan. Pinaagi sa Iyang Pag-ula, Iyang gihimong posible ang plano, nga nakapahimo nato sa pagtuman sa katuyoan sa plano—ang pagdawat sa kinabuhing dayon uban sa Dios.

Katibuk-ang pagpasabot sa hilisgotan: Plano sa Kaluwasan

May kalabotan nga mga giya sa pagtuon sa ebanghelyo: Kinabuhi sa Wala pa dinhi sa Yuta, Mortal nga Kinabuhi, Kinabuhing Dayon

Seksiyon 1

Giandam sa Langitnong Amahan ang Iyang Plano Aron Mahisama Ka Kaniya

Kitang tanan—ang tanan nga nabuhi o mabuhi sa yuta—nagpuyo uban sa atong langitnong mga ginikanan sa wala pa matawo. Kita ang Ilang espiritu nga anak nga mga lalaki ug mga babaye, apan daghan pa ang atong gikinahanglan nga masinati aron mahimong sama Kanila. Ang Langitnong Amahan nahigugma kanato ug gusto nga kitang tanan mopuyo sama sa Iyang nahimutangan: sa walay kataposan nga himaya uban sa atong mga minahal sa kinabuhi. Mao nga giandam Niya ang plano sa kaluwasan.

babaye nga nag-ampo

Ang buhat ug himaya sa Dios mao ang “pagpahinabo sa pagka-imortal ug sa kinabuhi nga dayon sa tawo” (Moises 1:39). Sa laing pagkasulti, ang tibuok katuyoan sa plano mao nga kita mahisama sa Dios ug magpuyo sa kahangtoran uban Kaniya. Ang pagkahibalo sa maong plano makatabang nimo nga masabtan ang imong balaanong pagkatawo ug mahangtorong potensyal.

Mga butang nga angayang hunahunaon

  • Basaha o tan-awa ang pakigpulong ni Presidente Dieter F. Uchtdorf “Kamo Importante ngadto Kaniya.” Unsay ipasabot nganha kanimo ang masayod nga ang Dios “nagtan-aw kaninyo isip ang nilalang nga kamo makahimo ug giplanohan nga mahimo”? Sa unsang paagi kana nga kahibalo makapausab sa imong paghunahuna ug pagtagad sa imong kaugalingon ug sa uban?

Kalihokan alang sa pagkat-on uban sa laing mga tawo

  • Pinaagi sa Iyang ehemplo, si Jesukristo mipakita kanato kon unsaon nato nga mamahimong sama sa Dios. Paghimo og lista sa pipila ka mga hiyas nga mosantop sa imong hunahuna kon maghunahuna ka Kaniya. (Pwede nimong tan-awon sa kapitulo 6 sa Isangyaw ang Akong Ebanghelyo alang sa pipila ka ideya.) Ipakigbahin kon sa unsang paagi nakita nimo ang pipila niini nga mga hiyas sa usag usa. Dapita ang matag tawo sa pagpili og usa niadtong mga hiyas nga gusto niyang mapalambo ug sa paghimo og plano nga mapalig-on kana nga hiyas. Ipakigbahin ang imong mga plano sa usag usa, ug awhaga ang usag usa samtang maningkamot ka sa pagtuman sa imong mga tumong.

Pagkat-on pa og dugang

Seksiyon 2

Ang Pagsabot sa Plano Motabang Nimo sa Lisod nga mga Sitwasyon

Kon nasabtan nimo nga kini nga kinabuhi gamay lamang nga bahin sa imong kinabuhi, mahimong magpadayon sa paglaom kon makasinati ka og mga pagsulay. Kana wala magpasabot nga kanunay nimong matubag ang mga pangutana sama sa “Nganong nahitabo kini?” Apan bisan kon limitado ang imong panabot, makaseguro ka nga ang Dios nahigugma kanimo (tan-awa sa 1 Nephi 11:17) ug kanang imong mga hagit dili molungtad sa hangtod. Makahibalo usab ka nga tungod kang Jesukristo, ang kamatayon dili mao ang kataposan; usa lamang kini ka lakang sa dalan nga mahimong sama sa Dios.

babaye nagluhod duol sa pantiyon

Mga butang nga angayang hunahunaon

  • Tan-awa ang “Plan of Salvation—We’re Still a Family” (4:47). Ang batan-ong lalaki sa bidyo nangutana, “Unsay gipasabot sa pagbaton og mahangtoron nga panglantaw?” Pamalandongi kon unsaon nimo pagtubag kini nga pangutana. Tingali ganahan ka nga mopakigbahin sa imong hunahuna ngadto sa sakop sa pamilya o higala o irekord kini diha sa journal.

  • Basaha ang mosunod nga mga kasulatan: nga mangita sa lainlaing mga ngalan sa plano sa kaluwasan: 2 Nephi 9:6, 13; 11:5; Alma 34:16; 41:2; 42:8, 31. Unsa ang gitudlo niini nga mga ngalan kanimo mahitungod sa plano sa Dios?

Kalihokan alang sa pagkat-on uban sa laing mga tawo

  • Unsaon nimo pagpunting ngadto sa plano sa Langitnong Amahan samtang magpadayon ka sa unahan sa tibuok kinabuhi? Si Presidente Russell M. Nelson mitudlo, “Kon ang sentro sa atong kinabuhi anaa sa plano sa Dios sa kaluwasan … ug ni Jesukristo ug sa Iyang ebanghelyo, mobati kita og kalipay bisan unsa pay mahitabo—o wala mahitabo—sa atong kinabuhi.” Hisgoti og dungan kon sa unsang paagi nga mahimo nimong sentro si Kristo ug ang Iyang ebanghelyo sa imong kinabuhi. Mahimong magpuli-puli mo sa pagkuha og mga litrato sa usa ka lawak. Dayon papilia ang matag tawo kon asa nga bahin sa kwarto ang iyang tutokan. Dungan ninyong tan-awon ang mga litrato, ug hisgoti kon sa unsang paagi lahi ang hitsura sa kwarto gikan sa lainlaing panglantaw. Hisgoti kon sa unsang paagi ang pagpunting ngadto kang Kristo makatabang nato nga makita ang atong kinabuhi gikan sa usa ka mahangtorong panglantaw.

Pagkat-on pa og dugang

Seksiyon 3

Si Jesukristo Mihimo sa Plano nga Posible alang sa Tanan

Tingali gibati nimo nga daghan kaayo ka og nabuhat nga mga sayop o dili gayod ka igo ka maayo aron makadawat sa tanan nga gisaad sa Dios nga mga panalangin. Kon ang kalamposan sa plano sa Dios nagdepende lamang sa imong personal nga mga paningkamot, kana tinuod. Apan si Jesukristo mihimo sa mahangtorong plano sa Dios nga posible alang sa tanan. Tungod sa Iyang maulaong sakripisyo, dili na nato kinahanglang buhaton ang tanan sa atong kaugalingon. Gidapit Niya ang tanan sa pagkat-on sa plano, paghinulsol, paghimo ug pagtuman sa mga pakigsaad uban Kaniya, ug pagtagamtam sa gisaad nga mga panalangin sa plano. Kon buhaton nato ang tanan nga atong mahimo sa pagpakita og hugot nga pagtuo diha Kaniya, maghinulsol, ug motuman sa atong mga pakigsaad, Siya modugang kon unsay kulang ug molig-on kanato diha sa dalan. Makakaplag kita og kalipay diha sa plano, nasayod nga ang Iyang mga saad segurado.

Mga butang nga angayang hunahunaon

  • Basaha o tan-awa ang pakigpulong ni Elder Adrián Ochoa sa Abril 2022 nga kinatibuk-ang komperensya, “Misalir ba ang Plano?” Gihulagway ni Elder Ochoa ang tulo ka baroganan nga makatabang kon mibati ka nga ang plano sa kaluwasan wala mosalir sa imong kinabuhi. Matikdi kon sa unsang paagi si Jesukristo importante sa matag usa niadtong mga baroganan. Paghimo og tumong aron mas makapunting ngadto Kaniya. Samtang nagtrabaho ka sa imong tumong, irekord ang imong mga pagbati kon sa unsang paagi nimo nakita nga ang plano sa kaluwasan misalir sa imong kinabuhi.

Pagkat-on pa og dugang

Uban pang mga Kapanguhaan bahin sa Plano sa Kaluwasan