Mga Yawe sa Pagkapari

Ang awtoridad sa pagdumala sa buhat sa Dios

Kada adlaw, moabli tingali ka og pultahan gamit ang usa ka yawe. Ang paghupot og mga yawe mahimong simbolo sa usa ka tawo nga dunay awtoridad ug akses. Ang mga yawe sa pagkapari nga gihuptan sa mga sulugoon sa Ginoo naghatag nila og awtoridad sa pagdumala kon sa unsang paagi ang awtoridad ug gahom sa pagkapari magamit diha sa buhat sa kaluwasan ug kahimayaan.

Gihuptan ni Jesukristo ang tanang mga yawe sa pagkapari nga may kalabotan sa Iyang Simbahan. Iyang gitugyan ngadto sa matag usa sa Iyang mga Apostol ang tanang mga yawe nga may kalabotan sa gingharian sa Dios dinhi sa yuta. Ang Presidente sa Simbahan mao lang ang bugtong tawo nga gihatagan sa awtoridad nga mogamit sa tanan niadtong mga yawe sa pagkapari.

Ang mga presidente sa templo, mga presidente sa misyon, mga presidente sa stake, mga bishop, ug mga presidente sa korum naghupot usab sa mga yawe sa pagkapari nga magtugot kanila sa pagpangulo ug pagdumala sa buluhaton nga gisangon kanila. Tungod sa mga yawe sa pagkapari, maakses nato ang mga ordinansa, mga pakigsaad, mga panalangin, ug mga gahom nga gikinahanglan aron makabalik sa pagpuyo uban sa atong Langitnong Amahan ug sa atong Manluluwas ug mahisama Kanila.

Unsa Ang Mga Yawe sa Pagkapari?

Ang mga yawe sa pagkapari mao ang mga katungod sa kapangulohan, o ang gahom nga gihatag sa Dios ngadto sa tawo aron sa pagdumala ug paggiya sa gingharian sa Dios dinhi sa yuta (tan-awa sa Mateo 16:15–19). Ang mga yawe sa pagkapari gikinahanglan alang sa pagdumala sa pagsangyaw sa ebanghelyo ug sa pagdumala sa mga ordinansa sa kaluwasan ug kahimayaan.

Katibuk-ang pagpasabot sa hilisgotan: Pagkapari

May kalabotan nga mga giya sa pagtuon sa ebanghelyo: Aaronic nga Pagkapari, Melchizedek nga Pagkapari, Pagpahiuli sa Pagkapari

Seksiyon 1

Gipahiuli sa Langitnong mga Mensahero ang mga Yawe sa Pagkapari sa Atong Panahon

Atol sa Iyang mortal nga pagpangalagad, gihatag ni Jesukristo ang “mga yawe sa gingharian sa langit” ngadto kang Pedro, Santiago, ug Juan (tan-awa sa Mateo 16:18–19; Doktrina ug mga Pakigsaad 7:5–7). Tungod sa kamatayon ni Jesukristo ug sa Iyang Apostoles, ang pagkapari ug ang mga yawe sa pagkapari nawala gikan sa yuta sulod sa mga siglo.

Niadtong 1829, mibalik si Juan Bautista sa yuta ug gipahiuli ang Aaronic nga Pagkapari ug ang mga yawe niini kang Propeta Joseph Smith (tan-awa sa Doktrina ug mga Pakigsaad 13; Joseph Smith—Kasaysayan 1:67–72). Wala madugay, gipahiuli ni Pedro, Santiago, ug Juan ang Melchizedek nga Pagkapari ug ang mga yawe niini (tan-awa ang Doktrina ug mga Pakigsaad 27:12–13).

Uban pang langitnong mga mensahero, naglakip nila ni Moises, Elias, ug Elijah, nga mipakita kang Joseph Smith sa Templo sa Kirtland ug mihatag og dugang awtoridad sa paghimo sa buhat sa kaluwasan ug kahimayaan (tan-awa sa Doktrina ug mga Pakigsaad 110:11–16).

Mga butang nga angayang hunahunaon

Itandi ang Doktrina ug mga Pakigsaad 110:1–16 sa Mateo 17:1–9. Sa unsang paagi ang kasinatian ni Joseph Smith ug Oliver Cowdery sa Templo sa Kirtland parehas sa kasinatian nila ni Pedro, Santiago, ug Juan sa Bungtod sa Transpigurasyon?
Basaha ang Doktrina ug mga Pakigsaad 65. Unsa ang pipila ka paagi nga giandam sa Dios ang kalibotan para sa Ikaduhang Pag-anhi ni Jesukristo pinaagi sa mga yawe sa pagkapari nga Iyang gihatag sa Iyang mga sulugoon? Sa unsang mga paagi ka makapangandam ug ang uban alang sa Ikaduhang Pag-anhi ni Jesukristo?

Kalihokan alang sa pagkat-on uban sa laing mga tawo

Si Presidente Russell M. Nelson mipasabot kon unsa nga awtoridad ang gihatag ni Moises, Elias, ug Elijah kang Propeta Joseph Smith sa Templo sa Kirtland. Basaha ang mosunod nga pahayag ngadto sa imong mga kagrupo:
- “Si Moises mitugyan sa mga yawe sa pagpundok sa Israel … ;
- “Si Elias, ang mga yawe sa pakigsaad ni Abraham;
- “Ug si Elijah, ang mga yawe sa awtoridad sa pagselyo.
- “Si Joseph Smith mitugyan niadtong gipahiuli nga mga yawe sa pagkapari ngadto sa tanang Apostoles nga gitawag sa iyang panahon. Sa samang paagi, kini nga mga yawe gitugyan ngadto sa mga henerasyon hangtod sa karon nga mga lider sa Simbahan. Karon, ang Presidente sa Simbahan aktibong naghupot sa matag yawe nga gihuptan sa ‘tanan niadto kinsa nakadawat og dispensasyon [kapaigoan] sa bisan unsa nga higayon sukad sa sinugdanan sa paglalang’ [Doktrina ug mga Pakigsaad 112:31].”
Nganong gikinahanglan sa Presidente sa Simbahan ang paghupot sa samang mga yawe sa pagkapari karon nga gihatag ngadto ni Joseph Smith?

Pagkat-on pa og dugang

Doktrina ug mga Pakigsaad 2:1–2; 112:30–32; 128:21
Russell M. Nelson, “Keys of the Priesthood,” Ensign, Oct. 2005, 40–44
Gary E. Stevenson, “Asa ang mga Yawe ug Awtoridad sa Pagkapari?,” Liahona, Mayo 2016, 29–32

Seksiyon 2

Atong Gipaluyohan Kadtong Naghupot sa mga Yawe sa Pagkapari

Gitudlo ni Propeta Joseph Smith nga “ang sukaranan nga mga baroganan, pagdumala, ug doktrina sa Simbahan gitugyan diha sa mga yawe sa gingharian.” Nagpasabot kini nga ang mga yawe sa pagkapari nga gihuptan sa Presidente sa Simbahan ni Jesukristo nagtugot niya sa pagpangalagad sa tanang panalangin, mga ordinansa, mga pakigsaad, ug mga organisasyon sa Simbahan (tan-awa sa Doktrina ug mga Pakigsaad 107:65–67).

Ang mga miyembro sa Simbahan kanunayng adunay oportunidad diha sa mga komperensiya ug sa mga miting sa sakramento nga paluyohan ang katibuk-an ug lokal nga mga lider sa Simbahan, lakip kadtong naghupot sa mga yawe sa pagkapari. Ang pagpaluyo nagpakita sa atong pagsalig kanila ug sa atong kaandam nga mosuporta, motabang, ug moampo para nila (tan-awa sa Doktrina ug mga Pakigsaad 26:2). Makadawat usab kita og espirituhanon nga proteksyon kon kita mosunod ug mopaluyo niadtong naghupot sa mga yawe sa pagkapari (tan-awa sa Doktrina ug mga Pakigsaad 43:1–7).

Mga butang nga angayang hunahunaon

Basaha ang Doktrina ug mga Pakigsaad 90:2–6 aron makat-onan ang importanteng mga kamatuoran bahin sa mga yawe nga gihuptan sa mga sakop sa Unang Kapangulohan. Sa unsang paagi ang mga yawe sa gingharian may kalabotan sa mga pagpadayag nga gihatag sa Dios sa Simbahan? Unsay mahitabo kon balewalaon nato ang mga pagpadayag nga gihatag sa Dios kanato pinaagi niadtong naghupot sa mga yawe sa gingharian?

Kalihokan alang sa pagkat-on uban sa laing mga tawo

Uban sa mga sakop sa grupo, hisgoti ang kamatuoran nga ang tanang nagserbisyo sa Simbahan—mga lalaki ug mga babaye—gitawag ubos sa direksyon niadtong naghupot sa mga yawe sa pagkapari (tan-awa sa Doktrina ug mga Pakigsaad 42:11). Si Presidente Dallin H. Oaks mitudlo, “Bisan kinsa nga naglihok diha sa katungdanan o calling nga nadawat gikan sa tawo nga naghupot sa mga yawe sa pagkapari naggamit sa awtoridad sa pagkapari sa paghimo sa iyang gisangon nga mga katungdanan.” Kanus-a nimo nabati ang mga panalangin sa Dios nga nagtabang nimo human ka ma-set apart aron moserbisyo og calling sa Simbahan?

Pagkat-on pa og dugang

Doktrina ug mga Pakigsaad 21:4–6; 35:25; 43:2–6, 12; 107:18–19, 21–22; 124:127–28, 143; Mga Artikulo sa Hugot nga Pagtuo 1:5
Dallin H. Oaks, “Ang Melchizedek nga Pagkapari ug ang mga Yawe,” Liahona, Mayo 2020, 69–72
Henry B. Eyring, “Faith and Keys,” Liahona, Nov. 2004, 26–29