“Melchizedek nga Pagkapari,” Mga Hilisgotan ug mga Pangutana (2023)
Giya sa Pagtuon sa Ebanghelyo
Melchizedek nga Pagkapari
Ang gahom ug awtoridad sa Dios sa pagpanalangin sa Iyang mga anak
Andam ang Langitnong Amahan nga tabangan ka nga makaangkon og espirituhanon nga gahom ug giya sa imong dalan paingon sa kinabuhing dayon. Ang awtoridad sa pagkapari sa Dios makatabang nga makahimong posible niini nga mga panalangin para sa tanang anak sa Dios nga mopili sa pagduol Kaniya. Si Propeta Joseph Smith mitudlo: “Ang Melchizedek nga Pagkapari … mao ang paagi diin ang tanang kahibalo, doktrina, ang plano sa kaluwasan, ug ang tanang importante nga butang ipadayag gikan sa langit.” Pinaagi sa gahom sa Melchizedek nga Pagkapari, ang tanang anak nga mga lalaki ug anak nga mga babaye sa Dios makahimo og mga pakigsaad ug makadawat og mga ordinansa nga makatabang nila nga mahisama sa Langitnong Amahan ug kang Jesukristo (tan-awa sa Doktrina ug mga Pakigsaad 76:52–60; 84:19–22).
Unsa Ang Melchizedek nga Pagkapari?
Ang pagkapari mao ang mahangtorong gahom ug awtoridad diin gilalang ug gidumala sa Dios ang mga langit ug ang yuta. Adunay duha ka pagkapari sa Simbahan ni Jesukristo: ang Aaronic ug ang Melchizedek. Ang Melchizedek nga Pagkapari mas taas o mas labaw nga pagkapari ug kanunayng ihatag ngadto sa mga sulugoon sa Dios dihang ang kahingpitan sa ebanghelyo anaa na sa yuta. Pinaagi sa mga yawe sa pagkapari ug sa gitugyan nga awtoridad sa pagkapari, ang mga sulugoon sa Dios gitugotan sa pagsangyaw sa ebanghelyo, pagpangalagad sa mga ordinansa sa kaluwasan ug kahimayaan, ug pagdumala sa gingharian sa Dios dinhi sa yuta.
Katibuk-ang pagpasabot sa hilisgotan: Melchizedek nga Pagkapari
May kalabotan nga mga giya sa pagtuon sa ebanghelyo: Aaronic nga Pagkapari, Mga Yawe sa Pagkapari, Pagpahiuli sa Pagkapari
Seksiyon 1
Gitugyan sa Dios ang Awtoridad ug Gahom sa Pagkapari ngadto sa Iyang mga Sulugoon
Sa tibuok kasaysayan, gitugyan sa Dios ang awtoridad sa pagkapari ngadto sa Iyang mga sulugoon aron molihok diha sa Iyang ngalan ug motabang sa kaluwasan ug kahimayaan sa Iyang mga anak. Si Joseph Smith mitudlo, “Ang tanang propeta adunay Melchizedek nga Pagkapari.”
Kaniadto, ang pagkapari gitawag og “Balaan nga Pagkapari, sunod sa Kapunongan sa Anak sa Dios. Apan tungod sa pagtahod o balaan nga pagtahod sa ngalan sa Labing Gamhanan nga Binuhat, sa paglikay usab sa kanunayng pagbalik-balik sa ngalan [sa Ginoo],” ang pagkapari gitawag og “Melchizedek nga Pagkapari” (Doktrina ug mga Pakigsaad 107:3–4). Si Melchizedek usa ka matarong nga high priest ug propeta sa panahon sa Daang Tugon. Sa Hebreo, ang ngalan nga Melchizedek nagpasabot og “hari sa pagkamatarong” (Giya sa mga Kasulatan, “Melchizedek,” Librarya sa Ebanghelyo).
Sa Bag-ong Tugon, atong nakat-onan nga gi-orden ni Jesus ang Iyang mga disipulo ug gihatagan sila og awtoridad sa pagkapari (tan-awa sa Lucas 9:1–2; Juan 15:16; Mga Hebreohanon 5:1–10). Didto sa Bungtod sa Transpigurasyon, nadawat ni Pedro, Santiago, ug Juan ang mga yawe sa pagkapari. Gamit ang maong mga yawe, ang mga Apostol adunay awtoridad nga ipadayon ang buluhaton sa Simbahan ni Kristo human sa Iyang Pagsaka sa Langit (tan-awa sa Giya sa mga Kasulatan, “Transfiguration,” Gospel Library; tan-awa usab sa Mateo 16:15–19; 17:1–9; Mga Buhat 1:21–26; Mga Taga-Efeso 4:11–13).
Sa mga siglo human sa pagkamatay sa mga Apostol sa Ginoo, nawala sa yuta ang awtoridad sa pagkapari. Sa atong panahon, napahiuli ang Melchizedek nga Pagkapari pinaagi kang Pedro, Santiago, ug Juan ngadto nila ni Propeta Joseph Smith ug Oliver Cowdery (tan-awa sa Doktrina ug mga Pakigsaad 27:12–13; Joseph Smith—Kasaysayan 1:72). Sa wala madugay, ang ubang langitnong mga mensahero mitugyan sa mga yawe sa pagkapari ngadto nila didto sa Templo sa Kirtland sa Ohio, USA (tan-awa sa Doktrina ug mga Pakigsaad 110:11–16).
Mga butang nga angayang hunahunaon
-
Si Presidente Dallin H. Oaks mipahayag, “Ang pagkapari mao ang balaanong gahom ug awtoridad nga temporaryong gitugyan nga gamiton diha sa buhat sa Dios alang sa kaayohan sa tanan Niyang mga anak. Ang pagkapari dili mao kadtong gi-orden ngadto sa usa ka katungdanan sa pagkapari o kadtong mogamit sa awtoridad niini. Ang mga lalaki kinsa naghupot sa pagkapari dili mao ang pagkapari. Samtang dili nato tawagon ang na-orden nga mga lalaki isip ang pagkapari, haom lang nga tawgon sila isip mga naghupot sa pagkapari. Nganong importante ang pag-ila tali sa pagkapari ug mga naghupot sa pagkapari?
Kalihokan alang sa pagkat-on uban sa laing mga tawo
-
Si Presidente Gordon B. Hinckley miingon, “Ang pagkapari ania dinhi. … Nahibalo kita, kay atong nakita, ang gahom niini nga pagkapari. Nakita nato nga naayo ang masakiton, nakalakaw ang bakol, ug ang pag-abot sa kahayag ug kahibalo ug pagsabot niadtong anaa sa kangitngit.” Unsa nga mga ebidensya ang imong nakita nga naglihok ang gahom ug awtoridad sa pagkapari sa Dios diha sa Simbahan ni Jesukristo sa atong panahon?
Pagkat-on pa og dugang
-
Alma 13:14–19; Doktrina ug mga Pakigsaad 84:23–26; 107:2–8, 18, 42–52
-
“Kapitulo 8: Ang Mahangtorong Pagkapari,” Mga Pagtulun-an sa mga Presidente sa Simbahan: Joseph Smith (2011), 119–34
Seksiyon 2
Pinaagi sa mga Pakigsaad ug mga Ordinansa sa Melchizedek nga Pagkapari, Makapangandam Ka nga Mobalik sa Presensiya sa Dios
Si President Brigham Young mitudlo, “Ang Ebanghelyo ug ang Pagkapari mao ang paagi nga gigamit sa [Dios] aron sa pagluwas ug sa paghimaya sa iyang masulundon nga mga anak ngadto sa pagpanag-iya uban kaniya sa samang himaya ug gahom nga pagakoronahan sa mga korona sa himaya, pagka-imortal ug kinabuhing dayon.” Ubos sa direksyon niadtong naghupot sa mga yawe sa Melchizedek nga Pagkapari, makahimo kita og mga pakigsaad uban sa Dios ug makadawat og sagradong mga ordinansa nga gikinahanglan aron makadawat og kinabuhing dayon.
Mga butang nga angayang hunahunaon
-
Dihang ang usa ka lalaki makadawat og Melchizedek nga Pagkapari ug ordinahan sa katungdanan sa pagkapari, mosulod siya sa “panumpa ug pakigsaad sa pagkapari.” Basaha ang Doktrina ug mga Pakigsaad 84:33–44. Unsa ang mga butang nga gisaad nga buhaton niadtong naghupot sa pagkapari? Unsa nga balaanong saad ang gihimo sa Dios niadtong makadawat ug mopalambo sa ilang calling?
Kalihokan alang sa pagkat-on uban sa laing mga tawo
-
Dapita ang mga sakop sa imong grupo nga basahon ang Doktrina ug mga Pakigsaad 84:17–22 ug hisgoti kon unsay gipadayag sa Ginoo bahin sa pagkapari. Aron maklaro ang kahulogan sa tudling, ikonsiderar ang pagpakigbahin nga ang “mga misteryo sa gingharian” maoy “espirituhanon nga mga kamatuoran nga mahibaloan lamang pinaagi sa pagpadayag” (Giya ngadto sa mga Kasulatan, “Mga Misteryo sa Dios,” Librarya sa Ebanghelyo). Mahimo usab nga makatabang ang pagpasabot nga ang gahom sa pagkadiosnon maoy gahom sa pagkamatarong, diin atong mailhan ang Dios ug mahisama Kaniya (tan-awa sa Bruce R. McConkie, The Promised Messiah [1978], 589). Sa unsang paagi ang sagradong mga ordinansa mogiya nato nga masabtan ang Dios ug moandam nato nga mas mahisama Niya?
Pagkat-on pa og dugang
-
Henry B. Eyring, “Mga Pamilya ubos sa Pakigsaad,” Liahona, Mayo 2012, 62–65
-
Kent F. Richards, “Ang Gahom sa Pagkadiosnon,” Liahona, Mayo 2016, 118–20
-
Julie B. Beck, “Gibu-bo nga mga Panalangin,” Liahona, Mayo 2006, 11–13
-
“Ang Balaan nga Pagkapari—aron sa Pagpanalangin sa mga Anak sa Dios,” Pagtulun-an sa mga Presidente sa Simbahan: George Albert Smith (2011), 53–66
Seksiyon 3
Ang mga Babaye ug mga Lalaki Nagserbisyo sa Simbahan ni Kristo nga dunay Awtoridad ug Gahom sa Pagkapari
Ang Dios nagtawag sa mga babaye ug mga lalaki sa Iyang Simbahan aron motabang sa importanteng buhat sa kaluwasan ug kahimayaan. Samtang ang mga lalaki lang ang gi-orden sa mga katungdanan sa pagkapari, ang pag-akses sa awtoridad ug gahom sa pagkapari anaa sa mga babaye ug mga lalaki aron tabangan sila nga matuman ang buhat sa Dios. Ang gahom sa pagkapari madawat sa tagsa-tagsa kon ang miyembro sa Simbahan matarong nga tumanon ang ilang mga pakigsaad uban sa Ginoo. Ubos sa direksyon niadtong naghupot sa mga yawe sa pagkapari, ang mga indibidwal i-set apart aron molihok sa mga calling sa Simbahan. Pinaagi sa pagpandong sa mga kamot, madawat niya ang awtoridad sa pagkapari aron sa pagpahigayon sa gisangon nga mga buluhaton. (Tan-awa sa Dallin H. Oaks, “Ang mga Yawe ug Awtoridad sa Priesthood [Pagkapari],” Liahona, Mayo 2014, 50–51).
Mga butang nga angayang hunahunaon
-
Si Presidente M. Russell Ballard mitudlo: “Ang atong Amahan sa Langit manggihatagon sa Iyang gahom. Ang tanang lalaki ug babaye makagamit niini nga gahom alang sa tabang diha sa ilang kinabuhi. Ang tanan nga mihimo og sagradong mga pakigsaad ngadto sa Ginoo ug kadtong mitahod niadtong mga pakigsaad mahimong makadawat og personal nga pagpadayag, nga mapanalanginan pinaagi sa pagpangalagad sa mga anghel, nga makigsulti sa Dios, nga makadawat sa kahingpitan sa ebanghelyo, ug, sa kataposan, mahimong mga manununod kauban ni Jesukristo sa tanan nga anaa sa atong Amahan.” Nganong importante ang pag-ila nga ang sagradong mga panalangin wala magdepende sa usa ka tawo nga gi-orden sa usa kakatungdanan sa pagkapari?
Kalihokan alang sa pagkat-on kauban ang laing mga tawo
-
Uban sa mga sakop sa imong grupo, basaha ang mosunod nga pahayag ni Presidente Russell M. Nelson:
“Ang matag babaye ug matag lalaki kinsa mohimo og mga pakigsaad uban sa Dios ug motuman niadto nga mga pakigsaad, ug kinsa takos nga moapil sa mga ordinansa sa pagkapari, direktang makaangkon sa gahom sa Dios. Kadtong natugahan sa balay sa Ginoo nakadawat og gasa sa gahom sa pagkapari sa Dios pinaagi sa hiyas sa ilang pakigsaad, uban sa gasa sa kahibalo nga masayod unsaon sa paggamit niana nga gahom.
“Ang kalangitan abli ngadto sa mga babaye kinsa natugahan sa gahom sa Dios nga gikan sa ilang mga pakigsaad sa pagkapari sama ngadto sa mga lalaki kinsa naghupot sa pagkapari.”
Hisgoti kon sa unsang paagi ang bisan kinsang takos nga miyembro sa Simbahan makagamit sa gahom sa Dios.
Pagkat-on pa og dugang
-
Russell M. Nelson, “Espirituhanon nga mga Bahandi,” Liahona, Nob. 2019, 76–79
-
Dallin H. Oaks, “Ang mga Yawe ug Awtoridad sa Pagkapari,” Liahona, Mayo 2014, 49–52
-
Jean B. Bingham, “Nagkahiusa sa Pagtuman sa Buhat sa Dios,” Liahona, Mayo 2020, 60–63