“Mga Sugo,” Mga Hilisgotan ug Mga Pangutana (2023)
Giya sa Pagtuon sa Ebanghelyo
Mga Sugo
Balaang mga kamatuoran nga maggiya kanato diha sa dalan sa pagkigsaad sa Dios
Nakabantay ba mo pila ka mga karatula ang gibutang sa mga kalsada ug sa mga highway? Ang uban nga mga karatula naghatag og mga direksiyon aron sa pagtabang sa mga drayber nga makabiyahe kon asa sila paingon. Ang ubang mga karatula nagpasiugda sa kahilwasan pinaagi sa pagpakita sa mga paglimita sa gikusgon o pasidaan nga mga mensahe kabahin sa mga kahimtang sa kalsada. Kon ang mga drayber mopili nga ibaliwala ang mga karatula sa kalsada, mahimong mamiligro sila ug ang uban. Ang mga sugo sa Langitnong Amahan may pagkasusama sa mga karatula sa kalsada. Kon sundon, ang mga sugo modala kanimo ngadto sa dalan padulong ngadto sa presensya sa Dios. Sila magtudlo kanimo kon unsaon pagpangita sa kalinaw ug hingpit nga kalipay niini nga kinabuhi. Ang mga sugo sa Dios makatabang usab nimo nga makalikay sa daghang espirituhanon ug temporal nga mga peligro niini nga kalibotan.
Ang mga sugo mao ang ebidensiya sa gugma sa Dios kanimo. Ang pagpili nga sundon ang mga sugo magdala og mga panalangin ug hingpit nga kalipay sa imong kinabuhi. Ang pagsunod sa mga sugo mag-andam usab kanimo nga makabalik pagpuyo uban sa Dios sa kahangtoran (tan-awa sa Doktrina ug mga Pakigsaad 82:8–10). Sama sa gitudlo ni Presidente Dallin H. Oaks, “Ang malukpanon ug hingpit nga gugma sa Dios gipakita diha sa tanang mga panalangin sa Iyang plano sa ebanghelyo, lakip na sa kamatuoran nga ang Iyang labing bililhon nga mga panalangin gitipigan alang niadtong kinsa motuman sa Iyang mga sugo.”
Unsa Man ang mga Sugo?
Ang mga sugo mao ang balaanong mga balaod ug mga kinahanglanon nga gihatag sa Dios alang sa atong kaayohan. Ang pagsunod sa mga sugo sa Dios gikinahanglan sa atong kahimayaan. Pinaagi sa pagsunod sa mga sugo, atong gipakita ang atong gugma alang sa Dios ug modawat sa espirituhanon ug temporal nga mga panalangin.
May kalabotan nga mga giya sa pagtuon sa ebanghelyo: Pagkamasulondon, Kabubut-on, Hugot nga Pagtuo diha ni Jesukristo, Paghinulsol
Seksiyon 1
Ang mga Sugo usa ka Importante Kaayo nga Bahin sa Pagsunod sa Ebanghelyo
Si Jesukristo nagtudlo nga ang labing dako sa mga sugo mao ang paghigugma sa Dios ug ang paghigugma sa uban. Ang tanang ubang sugo naghatag og giya kon unsaon sa pagbuhat niadtong duha ka butang. (Tan-awa sa Mateo 22:37–40.)
Ang mga kasulatan nagpakita nga gitudlo sa Dios ang mga sugo pinaagi sa mga propeta sugod sa mga adlaw ni Adan ug Eva (tan-awa sa Moises 5:4–5). Daghang katawhan sa tibuok kalibotan ang sinati na sa Napulo ka Sugo nga gipadayag ni Jehova ngadto ni Moises (tan-awa sa Exodo 20:3–17). Kini nga balaanong mga balaod gipanghimug-atan pag-usab sa atong panahon uban sa laing importante nga mga kamatuoran (tan-awa sa Doktrina ug mga Pakigsaad 42:19–29; 59:5–13). Ang mga sugo sa Dios nagdili sa imoral nga mga buhat, sama sa pagkadili matinuoron, pagpanapaw, ug pagpatay. Ang Dios naghatag usab og mga sugo sa pagbuhat og matarong, sama sa pag-ampo, sa pagpasaylo, ug sa pag-atiman niadtong nanginahanglan.
Ang atong pagsunod ngadto sa mga sugo kinahanglang nadasig pinaagi sa atong gugma alang sa Langitnong Amahan ug sa Iyang Anak, si Jesukristo. Kon kita nakigbisog sa pagsunod sa mga sugo sa Dios, Siya nagdapit kanato sa paghinulsol ug mobalik ngadto Kaniya.
Mga butang nga angay hunahunaon
-
Basaha ang Mateo 22:37–40. Ngano kaha nga si Jesus miingon nga ang labing dako sa mga sugo mao ang paghigugma sa Dios ug sa paghigugma sa uban? Sa unsang mga paagi ang ubang mga sugo nagpakita sa kahulogan niining duha sa kasugoan?
-
Handurawa nga usa ka tawo misugyot nga ang pagsunod sa matag mga sugo sa Dios dili importante. Unsaon nimo pagtubag? Unsa nga mga kasinatian nga imong nasinati nga makapalambo sa imong pagpasalamat sa mga sugo sa Dios?
-
Basaha ang Marcos 10:17–22, nga mangita kon unsa ang gibati sa dato nga batan-on kabahin sa mga sugo. Unsa ang imong makat-unan kabahin sa pagkamasulondon sa mga sugo gikan sa iyang pakighinabi ni Jesukristo? Kon imong ibutang ang imong kaugalingon sa posisyon niini nga tawo, unsa nga kausaban ang imong gibati nga ipahimo ni Jesus kanimo?
Kalihokan alang sa pagkat-on uban sa laing tawo
-
”Tan-awa ang “Why Does God Give Us Commandments?” (0:39). Human sa pagtan-aw sa bidyo, pwede kang mohimo og lista sa mga kasugoan nga imong gisunod ug ang mga panalangin nga imong nadawat sa imong pagsunod. Puwede usab ka nga maghisgot kabahin kon nganong importante ang pagtan-aw sa mga sugo gikan sa panglantaw sa Dios.
Pagkat-on pa og dugang
-
Ecclesiastes 12:13; Mosiah 2:41; 12:33–37; 13:11–26; Doktrina ug mga Pakigsaad 130:20–21
-
L. Whitney Clayton, “Unsa gani Iyang Isugo Kaninyo, Buhata Ninyo” Liahona, Mayo 2017, 97–99
-
“The Greatest Commandment” (bidyo), Gospel Library
Seksiyon 2
Mga Sugo Mas Mopaduol Kanato ngadto ni Jesukristo
Si Jesus mitudlo sa Iyang mga disipulo, “Kon nahigugma kamo kanako, inyong pagatumanon ang akong mga sugo” (Juan 14:15; tan-awa usab sa bersikulo 21). Matag lakang sa pagkamasulondon usa kini ka pagpakita sa imong gugma sa Dios ug modala kanimo paduol ni Jesukristo. Sa dihang gibunyagan ka, ikaw mihimo og pakigsaad o saad, sa pagsunod sa mga sugo sa Dios. Apan usahay nakigbisog ka sa pagbuhat niana. Tungod kay nahigugma ang Dios kanimo, Siya nagdapit kanimo nga maghinulsol kanunay ug mobalik ngadto Kaniya. Mahimong adunay mga panahon usab nga dili klaro ngano ang Dios mihatag sa usa ka piho nga kasugoan. Niini nga sitwasyon, ang Dios gusto nga imong gamiton ang hugot nga pagtuo Kaniya. Ang tanan mamaayo ra alang sa imong kaayohan kon ikaw mosalig sa Dios ug maningkamot nga mahimong masulondon sa Iyang mga sugo (tan-awa sa Doktrina ug mga Pakigsaad 100:15).
Mga butang nga angay hunahunaon
-
Si Presidente Harold B. Lee namahayag, “Ang labing importante sa tanang mga sugo sa Dios mao ang sugo diin kamo naglisod sa pagsunod karon.” Unsa kaha ang imong maayong himoon aron makatutok sa pagsunod niana nga sugo?
-
Usahay ang pagsunod sa mga sugo mahimong bation nga susama sa pagsulay sa atong hugot nga pagtuo. Basaha ang 1 Nephi 3:7. Sa unsang paagi kini nga tudling makatabang kon ikaw nanglimbasog sa pagsunod sa usa sa mga sugo sa Dios, sama sa pagbayad sa ikapulo o pagsunod sa Pulong sa Kaalam?
Kalihokan alang sa pagkat-on uban sa laing tawo
-
Mahimo nimong gamiton ang bidyo nga “Following God” (1:25) aron sa paghisgot sa unsang paagi ang kanunay nga paghinulsol usa ka importante nga parte sa pagpaningkamot nga mahimong masulondon sa mga sugo sa Dios.
Pagkat-on pa og dugang
-
D. Todd Christofferson, “Ang Hingpit nga Kalipay sa mga Santos,” Liahona, Nob. 2019, 15–18
-
Carole M. Stephens, “Kon Nahigugma Kamo Kanako, Inyong Pagatumanon ang Akong mga Sugo,” Liahona, Nob. 2015, 118-20
Uban nga mga Kapanguhaan kabahin sa Kaimportante sa mga Sugo sa Dios