Librarya
Kabubut-on

“Kabubut-on,” Mga Hilisgotan ug mga Pangutana (2023)

babaye nga nagbarog atubangan sa nagsanga nga dalan

Giya sa Pagtuon sa Ebanghelyo

Kabubut-on

Ang gasa sa pagpili ug sa paglihok alang sa atong kaugalingon

Sa wala pa ka matawo, nagpuyo ka isip espiritu nga anak nga lalaki o babaye sa Dios. Imong nahibaloan ang plano sa Langitnong Amahan alang kanimo nga mouswag ug mamahimong sama Kaniya. Siya mihatag kanimo sa gasa sa moral nga kabubut-on, nga nagpasabot nga ikaw adunay kagawasan sa pagsunod sa Dios ug sa Iyang plano o dili (tan-awa sa Doktrina ug mga Pakigsaad 101:78). Ang baroganan sa kabubut-on naghatag kanimo sa gahom sa paglihok alang sa imong kaugalingon (2 Nephi 2:16). Kini nagpasabot usab nga ikaw modawat sa responsibilidad alang sa imong mga pagpili (tan-awa sa Helaman 14:29–31).

Didto sa kalibotan sa wala pa dinhi sa yuta, si Satanas “nagtinguha sa paglaglag sa kabubut-on sa tawo” (Moises 4:3), ug daghan ang misunod kaniya (tan-awa sa Doktrina ug mga Pakigsaad 29:35–36). Sa pagkatinuod ang pagkaanaa nimo sa yuta nagpasabot nga imong gigamit ang imong kabubut-on sa pagdawat sa plano sa Dios ug sa pagsunod Kaniya (tan-awa sa Abraham 3:24–26, 28). Pinaagi sa giya sa Espiritu Santo, ang Dios mopalig-on kanimo sa imong mga paningkamot sa paggamit sa mortal nga kabubut-on sa pagsunod Kaniya. Kon mopili ka sa pagkahimong matarong, imong madiskobrehan ang mas dakong kalinaw ug hingpit nga kalipay ug sa kataposan mosarang sa pagdawat sa kinabuhing dayon.

Unsa ang Kabubut-on?

Ang Dios naghatag sa Iyang mga anak sa abilidad ug pribilihiyo sa “pagbuhat alang sa ilang mga kaugalingon ug nga dili pagaaghaton” (2 Nephi 2:26). Nagpasabot kini nga kita makapili kon mosunod ba o dili sa mga sugo sa Dios. Atong masinati ang mga sangpotanan sa—maayo o daotan—alang sa atong mga pagpili. Ang Dios mihulagway niini nga gasa isip “moral nga kabubut-on” (Doktrina ug mga Pakigsaad 101:78).

Kinatibuk-ang pagpasabot sa hilisgotan: Kabubut-on ug Pagkamay-tulubagon

May kalabotan nga mga giya sa pagtuon sa ebanghelyo: Plano sa Kaluwasan, Kinabuhi sa Wala pa Dinhi sa Yuta, Mortal nga Kinabuhi, Pagkamasulundon 

Seksiyon 1

Ikaw Ang May Tulubagon sa mga Pagpili nga Imong Gihimo Niini nga Kinabuhi

babaye nga naglakaw sa kadalanan

Ikaw naghimo og gatosan ka pagpili sa matag adlaw sa mga butang nga imong hunahunaon, isulti, ug buhaton. Si Presidente Thomas S. Monson miingon nga ang pipila sa atong mga desisyon “dili makahimo og kalainan sa mahangtorong kahimtang sa mga butang, ug ang uban makahimo sa tanang kalainan.” Uban sa tabang sa Dios, makahibalo ka kon hain sa mga pagpili ang labing importante.

Usa sa mga rason ang Dios mipadala sa Iyang mga anak sa yuta mao ang, “mosulay kanila … kon sila mobuhat ba sa tanan nga mga butang bisan unsa ang isugo sa Ginoo nga ilang Dios ngadto kanila” (Abraham 3:25). Niini nga kalibotan, mag-atubang ka og “katugbang sa tanan nga mga butang” (2 Nephi 2:11), dili maihap nga mga oportunidad sa paggamit sa imong kabubut-on. Ugma damlag, manubag ka sa imong mga gihunahuna, mga pulong, ug mga binuhatan (tan-awa sa Mosiah 4:30). Kon giunsa nimo paggamit ang imong moral nga kabubut-on mao ang mohulma sa imong kasinatian niini nga kinabuhi ug sa kalibotan nga moabot.

Mga butang nga angay hunahunaon

  • Si Elder David A. Bednar mipasabot: “Sa mahinungdanong pagbahin sa tanang mga nilalang sa Dios, adunay mga butang nga palihokon ug mga butang nga aghaton sa pagpalihok (tan-awa sa 2 Nephi 2:13–14). … Gitugahan uban sa kabubut-on, ikaw ug ako mga tinugyanan, ug kita gayod ang molihok ug dili aghaton sa paglihok.” Sa unsang paagi kini nga pamahayag mopatin-aw sa kalainan tali sa mga anak sa Dios ug sa Iyang uban nga mga gilalang? Sa imong hunahuna ngano kaha ang baroganan sa moral nga kabubut-on usa man ka mahinungdanon nga bahin sa plano sa Dios alang sa kaluwasan sa Iyang mga anak?

  • Ikonsiderar ang pagbasa kon unsa ang gitudlo ni Lehi sa iyang anak nga lalaki si Jacob mahitungod sa kaimportante sa kabubut-on diha sa 2 Nephi 2:26–29. Unsaon nimo paghulagway ang mga kasinatian sa kagawasan ug pagka-ulipon nga nahisgotan niini nga tudling? Unsa ang gitudlo niini nga tudling kanimo mahitungod kon unsaon sa “pagpili sa kinabuhing dayon”?

Kalihokan alang sa pagkat-on uban sa laing tawo

  • Tan-awa ang bidyo nga “The Ten Virgins” (1:40) o magbasa og dungan sa sambingay sa napulo ka mga dalagang birhin sa Mateo 25:1–13. Hisgoti kon unsa ang gitudlo niining sambingay mahitungod sa kabubut-on. Hisgoti ang mahitungod sa mga paagi nga ikaw makapili sa pag-andam sa pagsugat sa Manluluwas.

Pagkat-on pa og dugang

Seksiyon 2

Si Jesukristo Mipili sa Pagbuhat sa Kabubut-on sa Amahan sa Tanang Butang

ang batan-on nga si Jesukristo nagtudlo sa kalalakin-an

Sa dihang si Jesus 12 anyos pa, nadiskobrihan nilang Maria ug Jose nga wala Siya mauban sa ilang pamilya samtang sila mibiyahe pauli gikan sa Jerusalem. Ila Siyang nakit-an didto sa templo nga nagtubag sa mga pangutana gikan niadtong nagtuon sa balaod sa Dios. Nangutana si Maria kang Jesus kon nasayod ba Siya nga sila nangita Kaniya. Mitubag si Jesus, “Wala ba kamo masayod nga kinahanglang anhi gayod ako sa balay sa akong Amahan?” (Lucas 2:49). Si Jesus kanunayng mohimo sa mga desisyon base sa kabubut-on sa Iyang Amahan (tan-awa sa Luke 22:42; 3 Nephi 11:11; 27:13). Si Jesukristo mao ang hingpit nga ehemplo sa paggamit sa moral nga kabubut-on sa pagpili sa matarong batok sa kaugalingong kaayohan ug sala.

Mga butang nga angay hunahunaon

  • Si Jesukristo miatubang og mga tintasyon atol sa Iyang mortal nga kinabuhi, sama kanato (tan-awa sa Mga Hebreohanon 4:15; Mosiah 3:7; Alma 7:11). Basaha ang Mateo 4:1–11. Unsa ang imong makat-onan gikan sa tubag ni Jesus sa dihang si Satanas misulay sa pagpapili Kaniya sa dili matarong?

  • Diha sa pakigpulong nga “Buntoga ang Kalibotan ug Pangita og Kapahulayan,” miingon si Presidente Russell M. Nelson: “Unsa ang gipasabot sa pagbuntog sa kalibotan? Kini nagpasabot sa pagbuntog sa tentasyon sa pagpakabana sa mga butang niini nga kalibotan kaysa mga butang sa Dios. Kini nagpasabot sa pagsalig sa doktrina ni Kristo kaysa mga pilosopiya sa mga tawo. Kini nagpasabot nga mahimuot diha sa kamatuoran, mosalikway sa panglimbong, ug mahimong ‘mapainubsanon nga mga sumusunod ni Kristo’ [2 Nephi 28:14]. Kini nagpasabot sa pagpili sa paglikay gikan sa bisan unsa nga makapabugaw sa Espiritu. Kini nagpasabot sa kaandam nga ‘mobiya’ bisan sa atong paborito nga mga sala [Alma 22:18].” Sa unsang paagi ang pagsunod sa ehemplo ni Jesukristo mogiya sa inyong mga paningkamot sa pagbuntog sa kalibotan?

  • Unsa ang pipila ka butang nga makapugong kanimo gikan sa pagtugyan ngadto sa kabubut-on sa Amahan? Unsa ang imong mabuhat aron mas hingpit nga motugyan ngadto Kaniya?

Kalihokan alang sa pagkat-on uban sa laing tawo

  • Kasagaran ang atong mga pagpili dili tali sa husto ug sayop o sa maayo ug daotan. Basaha og dungan ang mosunod nga pamahayag ni Presidente Dallin H. Oaks “Samtang atong hunahunaon ang daghang mga kapilian, kinahanglan atong hinumdoman nga kini dili igo nga ang usa ka butang maayo. Ang ubang kapilian mas maayo, ug ang uban pa gayod labing maayo. Bisan tuod ang usa ka piho nga pagpili mas mahal, ang labaw nga bili niini mahimong maghimo niini nga labing maayo nga pagpili sa tanan.” Paghisgot og pipila ka baroganan nga makatabang sa paggiya kanimo kon magpili tali sa mga kapilian nga maayo, mas maayo, o labing maayo. Unsa ang imong makat-onan gikan sa ehemplo ni Jesukristo samtang maghimo ka niadto nga mga kapilian?

Pagkat-on pa og dugang

Seksiyon 3

Ipatigbabaw ang Dios diha sa Imong Kinabuhi

Si Presidente Russell M. Nelson nagtudlo: “Kitang tanan adunay atong kabubut-on. … Makapili kita nga ipatigbabaw ang Dios labaw sa tanan diha sa atong mga kinabuhi, o dili. Makapili kita nga tugotan ang Dios nga maoy labing gamhanang impluwensiya sa atong mga kinabuhi, o dili.” Kon ikaw andam nga modesisyon sa pagsunod sa Dios diha sa mga pagpili nga imong himoon, imong gipakita nga ang Iyang plano ang nag-una sa imong kinabuhi.

Ang pagpili nga motuo mao ang usa sa unang mga lakang sa hustong paggamit sa imong kabubut-on. Ang pagtuo ni Jesukristo modugang sa imong hugot nga pagtuo ug pagsalig diha Kaniya. Si Kristo gusto usab nga ikaw motuo sa Iyang mga pulong nga gipadayag pinaagi sa Iyang mga propeta samtang ang Pagpahiuli sa kahingpitan sa Iyang ebanghelyo nagpadayon. Samtang mopili ka sa pagbaton og hugot nga pagtuo ug motuo, ikaw makadawat og mas dakong espirituhanong panabot ug makakaplag og katin-awan kon maghimo og mga desisyon. Ang imong tinguha nga mahimong masulundon motubo, ug ikaw may kalagmitan nga mas mopili sa usa ka dalan nga mopadulong ngadto sa kinabuhing dayon.

Mga butang nga angay hunahunaon

  • Si Presidente Russell M. Nelson miingon: “Pabilin diha sa dalan sa pakigsaad. Ang inyong pasalig nga mosunod sa Manluluwas pinaagi sa paghimo og mga pakigsaad uban Kaniya ug dayon sa pagtuman niadto nga mga pakigsaad moabli sa pultahan ngadto sa tanang espirituhanong mga panalangin ug pribilihiyo nga mahimong maanaa sa mga lalaki, mga babaye, ug mga bata bisan asa.” Unsa nga mga pagpili ang nakatabang nimo nga mouswag diha sa dalan sa pakigsaad sa Ginoo? Unsa nga mga pagpili ang imong himoon nga makatabang kanimo nga magpabilin diha sa dalan?

Kalihokan alang sa pagkat-on uban sa laing tawo

  • Dapita ang uban sa paghisgot mahitungod sa mga kasinatian sa dihang ang kinabuhi wala mahitabo sa unsay ilang gilaoman. Hisgoti ang mahitungod sa mga hunahuna ug mga pagbati nga mahitabo niana nga mga kasinatian. Ikonsiderar ang pagbasa og dungan sa Isaias 55:8–9 ug hisgoti kon nganong ang baroganan nga ipatigbabaw ang Dios magdala og kalinaw ug pagsalig.

Pagkat-on pa og dugang

Ubang mga Kapanguhaan mahitungod sa Kabubut-on