“Kalibotan sa Espiritu,” Mga Hilisgotan ug mga Pangutana (2023)
Giya sa Pagtuon sa Ebanghelyo
Kalibotan sa Espiritu
Kon diin nagpuyo ang mga espiritu tali sa atong kamatayon ug pagkabanhaw
Nakahunahuna na ba ka kon unsay mahitabo human kita mamatay? Klarong gitudlo sa ebanghelyo ni Jesukristo nga ang kinabuhi dili lang tanan anaa sa yuta. Ang atong espiritu nga mga lawas anaa na sa wala pa kita matawo ug magpadayong buhi human kita mamatay. Human sa kamatayon, moadto kita sa kalibotan sa espiritu aron magpaabot sa pagkabanhaw. Gitudlo usab sa ebanghelyo ni Jesukristo ang kalibotan sa espiritu. Tungod kay ang matag kalag bililhon sa Dios, si Jesukristo mihatag og paagi aron maluwas kadtong mga namatay nga walay oportunidad nga makadawat sa ebanghelyo.
Unsa Ang Kalibotan sa Espiritu?
Ang kalibotan sa espiritu mao ang temporaryo nga pagpuyo sa mga espiritu nga namatay na samtang magpaabot sa pagkabanhaw. Ang kalibotan sa espiritu naglangkob sa paraiso ug bilanggoan sa espiritu. Ang ebanghelyo ni Jesukristo gisangyaw niadtong mga indibidwal nga wala makabaton og oportunidad sa mortal nga kinabuhi nga dawaton ang ebanghelyo ug ang mga ordinansa sa kaluwasan ug kahimayaan.
Katibuk-ang pagpasabot sa hilisgotan: Kalibotan sa Espiritu
May kalabotan nga mga giya sa pagtuon sa ebanghelyo: Plano sa Kaluwasan, Pagkabanhaw, Puli nga mga Ordinansa alang sa mga Patay, Pag-apil sa Buhat sa Templo ug Family History
Seksiyon 1
Adunay Kinabuhi Human sa Kamatayon
Ang kamatayon sa usa ka higala o minahal moabot uban ang kasakit ug kasubo. Samtang nagbangotan sa pagkamatay sa uban maoy kabahin sa atong mortal nga kasinatian, gipahibalo sa mga kasulatan nga walaon ni Jesukristo ang “kahapdos sa kamatayon” pinaagi sa Iyang Pagkabanhaw gikan sa mga patay (Mosiah 16:8; Alma 22:14; Mormon 7:5). Tungod kay gihubad ni Jesukristo ang mga higot sa kamatayon, kitang tanan mabuhi pag-usab (tan-awa ang Alma 11:42–43). Kon kita mamatay, magbulag ang atong pisikal nga lawas ug espiritu nga lawas. Ang atong espiritu nga lawas “ibutang sa usa ka dapit sumala sa [atong] mga binuhatan uban sa mga matarong ug dili matarong, diin didto maghulat sa pagkabanhaw.” (Tan-awa sa Alma 40:11–13.)
Mga butang nga angayang hunahunaon
-
Si Elder Weatherford T. Clayton nakaingon: “Ang kalibotan nagtan-aw sa pagkatawo ug pagkamatay isip ang sinugdanan ug ang katapusan. Apan tungod sa balaang plano sa Dios, nasayod kita nga ang pagkatawo ug ang pagkamatay sa pangkatinuod mga dagkong panghitabo lang sa atong panaw ngadto sa kinabuhing dayon uban sa atong Langitnong Amahan.” Sa unsang paagi kini nga panglantaw mag-andam nimo sa panahon kon ang usa ka minahal mamatay?
-
Basaha ang 1 Mga Taga-Corinto 15:51–55, 57. Hinumdomi ang panahon dihang namatay ang imong minahal. Sa unsang paagi nga nakatabang nimo ang pagkahibalo nga nabuntog ni Jesukristo ang kamatayon? Unsaon nimo paggamit kana nga kahibalo aron palig-onon ang uban nga adunay mga pangutana bahin sa pagkawala ug kamatayon?
Kalihokan alang sa pagkat-on uban sa laing mga tawo
-
Aron tabangan kadtong dili pamilyar sa konsepto sa espiritu nga mga lawas, pwede nimong gamiton ang guwantes nga morepresentar sa pisikal nga lawas ug ang imong kamot nga morepresentar sa espiritu. Isul-ob sa imong kamot ang guwantes ug ipasabot nga ang guwantes “buhi” lang kon gisul-ob ni sa kamot. Dayon huboa ang guwantes ug ipasabot nga padayong magpakabuhi ang kamot bisan og unsa pay mahitabo sa guwantes. Dayon, pwede nimong isul-ob og balik ang guwantes ug ipasabot nga human ta mabanhaw, dili na gyod magbulag ang atong espiritu ug sa atong lawas. (Tan-awa sa Alma 11:45.)
Pagkat-on pa og dugang
-
Paul V. Johnson, “Ug Wala Nay Kamatayon,” Liahona, Mayo 2016, 121–23
Seksiyon 2
Unsay Atong Nahibaloan mahitungod sa Kalibotan sa Espiritu?
Human mamatay, ang atong espiritu nga lawas moadto sa kalibotan sa espiritu. Didto, ang mga espiritu sa matarong “pagadawaton ngadto sa kahimtang sa kalipay, diin gitawag og paraiso, usa ka kahimtang sa kapahulayan, usa ka kahimtang sa kalinaw, diin sila mopahulay gikan sa tanan nila nga mga kasamok ug tanan nga kabalaka, ug kasubo” (Alma 40:12). “Kadtong … namatay diha sa ilang mga sala, nga walay kahibalo sa kamatuoran, o sa kalapasan, nagsalikway sa mga propeta,” mga espiritu nga naa sa bilanggoan. (Doktrina ug mga Pakigsaad 138:32; tan-awa usab sa 1 Pedro 3:18–20).
Mga butang nga angayang hunahunaon
-
Ang mga espiritu nga naa sa bilanggoan makadawat sa mga pagtulun-an sa ebanghelyo ni Jesukristo. Apan ang kahimtang sa ubang espiritu nga naa sa bilanggoan usahay hisgotan sa mga kasulatan isip “impyerno,” o ang temporaryong dapit diin mag-antos kadtong mga dili matinud-anon ug dili gustong modawat sa ebanghelyo hangtod sa ilang pagkabanhaw (tan-awa sa Doktrina ug mga Pakigsaad 76:81–85). Ang mga indibidwal nga mopili nga dili maghinulsol sa ilang mga sala o dili modawat sa ebanghelyo ni Jesukristo mag-antos sa kaugalingon nilang mga sala sa dili pa maluwas ngadto sa usa ka gingharian sa kahimayaan sa walay kataposan (tan-awa ang Doktrina ug mga Pakigsaad 19:16–18). Sa unsang paagi kini nga tudling makatabang nimo nga mas masabtan ang kasinatian niadtong anaa sa bilanggoan sa espiritu?
-
Ang mga espiritu nga naa sa paraiso mao ang mga espiritu sa mga matarong nga “pagadawaton ngadto sa kahimtang sa kalipay, … usa ka kahimtang sa kapahulayan, usa ka kahimtang sa kalinaw, diin sila mopahulay gikan sa tanan nila nga mga kasamok ug tanan nga kabalaka, ug kasubo” (Alma 40:12). Sa unsang paagi kini nga kamatuoran makapadako sa imong tinguha nga tumanon ang mga sugo sa Dios ug magkinabuhi sa matarong nga paagi?
Kalihokan alang sa pagkat-on uban sa laing mga tawo
-
Aron makat-onan kon unsay gitudlo sa mga kasulatan bahin sa kalibotan sa espiritu, paghimo og duha ka kolum sa usa ka papel ug butangi og “Matarong” ang usa ka kolum ug ang lain “Daotan.” Dayon tun-i ang Alma 40:6–14 ug Doktrina ug mga Pakigsaad 138:12–14, 20–22. Hisgoti kon unsay inyong nadiskobrehan niini nga mga tudling sa kasulatan.
Pagkat-on pa og dugang
-
“Ang Kalibotan sa Espiritu,” Mga Pagtulun-an sa mga Presidente sa Simbahan: Brigham Young (1997), 323–29
Seksiyon 3
Gisangyaw ang Ebanghelyo diha sa Kalibotan sa mga Espiritu
Nahunahunaan na ba nimo kon unsay mahitabo sa mga tawo nga namatay nga wala gyod makadungog sa ebanghelyo ni Jesukristo o walay oportunidad nga makadawat sa mga ordinansa sa kaluwasan ug kahimayaan? Giandam sa maalamon ug mahigugmaong Langitnong Amahan ang dalan para sa tanan Niyang mga anak aron makabalik ug makapuyo uban Kaniya kon gusto nila. Si Propeta Joseph Smith mipahayag ngadto sa mga miyembro sa Simbahan, “Himoa ang mga patay nga mopahayag og mga awit sa walay kataposan nga pagdayeg ngadto ni Hari Immanuel, kinsa na-orden, sa wala pa ang kalibotan, niana nga nakahimo kanato sa pagtubos kanila gikan sa ilang bilanggoan; kay ang binilanggo mahimo nga gawasnon” (Doktrina ug mga Pakigsaad 128:22).
Sa 1918, nakita ni Presidente Joseph F. Smith sa usa ka langitnong panan-awon sa kalibotan sa espiritu. Giklaro sa mga detalye sa maong panan-awon, nga narekord sa Doktrina ug mga Pakigsaad 138, ang atong pagsabot kon sa unsang paagi nahimong posible ni Jesukristo para niadtong naulipon sa bilanggoan sa espiritu nga makakat-on sa ebanghelyo, maghinulsol, ug makadawat sa mahinungdanong mga ordinansa sa pagkapari.
Mga butang nga angayang hunahunaon
-
Basaha ang Doktrina ug mga Pakigsaad 138:16–19, 50–52. Sumala niining mga bersikulo, sa unsang paagi ang tibuok kalibotan sa espiritu parehas sa usa ka bilanggoan bisan para niadtong matarong nga mga espiritu? (tan-awa usab sa 1 Pedro 3:18–20; 4:6). Unsa nga mga pagbati ang nasinati niadtong mga indibiduwal nga anaa sa paraiso sa kamatayon ni Jesukristo ug sa Iyang pagpakita sa kalibotan sa espiritu?
-
Basaha ang Doktrina ug mga Pakigsaad 138:29–37, 57–59, nga mangita kon sa unsang paagi ang mga panalangin sa ebanghelyo mabatonan sa mga indibidwal nga namatay nga wala makadawat sa ebanghelyo niining kinabuhia. Unsay gipasabot niini kanimo nga ang imong mga katigulangan maluwas tungod sa unsay gibuhat ni Jesukristo?
Kalihokan alang sa pagkat-on uban sa laing mga tawo
-
Si Presidente Russell M. Nelson miingon, “Bisan kanus-a nga mobuhat kamo og bisan unsa sa pagtabang ni bisan kinsa—sa matag habig sa tabil—nga mopadulong sa paghimo og mga pakigsaad sa Dios ug sa pagdawat sa ilang mahinungdanong mga ordinansa sa bunyag ug templo, kamo nagtabang sa pagpundok sa Israel.” Hisgoti ang mga paagi nga matabangan nimo ang mga namatay nga matubos ug makadawat sa mahinungdanong mga ordinansa. Dapita ang mga sakop sa grupo nga miapil niana nga buhat nga ipakigbahin ang ilang kaugalingong mga kasinatian.
Pagkat-on pa og dugang
-
Juan 5:25–29; 1 Pedro 3:18–22; 4:6; Doktrina ug mga Pakigsaad 138:53–56
-
Dale G. Renlund, “Buhat sa Family History ug sa Templo: Pagselyo ug Pagkaayo,” Liahona, Mayo 2018, 46–49
-
“Pagtubos sa Atong mga Patay pinaagi sa Pagserbisyo sa Templo,” Mga Pagtulun-an sa mga Presidente sa Simbahan: Joseph F. Smith (2011), 493–02