Ang Tahas sa mga Propeta

Ang pagpangita og mga tubag sa atong mga pangutana mas makapaduol kanato ngadto ni Jesukristo kon atong gamiton ang matarong nga mga baroganan. Ang pagsabot kon unsaon pagdawat og pagpadayag kon mangita og mga tubag importante. Tan-awa ang hisgotanan “Ilha Nga Ang Pagpadayag Usa ka Proseso [Recognize That Revelation Is a Process]” sa pagsusi pa og dugang nga mga sugyot sa pagtubag og mga pangutana.

Kinatibuk-ang Pagpasabot

Sukad sa karaang mga panahon, ang Dios nagtawag og mga propeta sa pagpamatuod kabahin ni Jesukristo ug sa pagpahayag sa Iyang pulong. Ang Dios nag-andam, nagtawag, ug naggiya sa mga propeta sa pagtuman sa Iyang mahangturon nga mga katuyoan. Ang mga kasulatan naglangkob sa mga pagtulun-an sa daghang mga propeta, sama ni Moises, Isaias, Elijah, ug Nephi. Ang matag usa nakigsulti ngadto sa katawhan diha sa ilang pinulongan, panahon, ug dapit, naghatag og dinasig nga direksiyon ug untop sa panahon nga mga pasidaan.

Ang Dios nagpadayon sa pagtawag og mga propeta sa atong panahon. Si Propeta Joseph Smith midawat sa awtoridad gikan sa Dios sa pagdumala sa mga pakigsaad sa ebanghelyo ug mga ordinansa sa pagkapari ug sa pagpahiuli sa Simbahan ni Jesukristo. Nakadawat usab siya og pagpadayag nga nagtataw og importanting mga kamatuoran mahitungod sa Dios ug sa Iyang plano alang sa Iyang mga anak. Ang iyang mga sumusunod isip Presidente sa Simbahan adunay samang awtoridad sa pagdawat og pagpadayag nga idugang ngadto sa kaalam sa ebanghelyo ug sa paggiya sa Simbahan. Kini nga baroganan sa nagpadayong pagpadayag usa ka punoang bahin sa gipahiuli nga ebanghelyo.

Ang mga Santos sa Ulahing mga Adlaw nagpaluyo sa Presidente sa Simbahan, sa iyang mga magtatambag diha sa Unang Kapangulohan ug sa mga sakop sa Korum sa Napulog Duha ka Apostoles isip mga propeta, mga manalagna, ug mga tigpadayag. Ang mga pagtulun-an sa Simbahan gipahayag pinaagi sa nagkahiusang tingog niining buhi nga mga propeta. Ang doktrina gipadayag ug gihubad sa Presidente sa Simbahan ug gipaluyohan sa Unang Kapangulohan ug sa Korum sa Napulog Duha naglihok nga inuyonan sa tanan, nagsunod sa sundanan nga gihatag diha sa Doktrina ug mga Pakigsaad 107:27–31.

Ang Ginoo nagtawag og mortal nga mga lalaki nga mahimo nga Iyang mga propeta. Sama sa tanan nga mga anak sa Dios, sila nagsinati sa mga pagsulay sa mortalidad, apan ang Ginoo nagbuhat pinaagi kanila sa pagpahigayon sa Iyang bulohaton. Siya nagmando sa Simbahan sa pagpatalinghog sa iyang mga tambag “diha sa tanan nga pagpailob ug hugot nga pagtuo.” Kon atong buhaton, Siya nagsaad nga “mopatibulaag sa mga gahom sa kangitngit gikan sa [atong] atubangan, ug mohimo sa mga langit sa pagkurog alang sa [atong] kaayohan.”

Kalabot nga mga giya sa pagtuon sa ebanghelyo:

“Mga Propeta”
“Mga Yawe sa Pagkapari”

Pagsusi sa Inyong mga Pangutana

Nganong importante alang kanako ang pagpaminaw sa mga propeta?

Gipahiuli ni Jesukristo ang Iyang Simbahan diha sa kataposang mga adlaw sa pagtabang Kaniya sa pagtuman sa Iyang kahibulongang buhat: Siya nagtinguha sa pagtudlo og mga panalangin sa pakigsaad, pagpahigayon og kapasayloan sa sala, ug sa pagtanyag og tabang pinaagi sa mga pagsulay ngadto sa tanang anak sa Dios; paghiusa sa usa ka nabahin nga kalibotan diha sa Iyang mga pagtulun-an ug ehemplo; ug sa pagkonektar sa tanang henerasyon sa tawhanong pamilya pinaagi sa mga ordinansa sa kaluwasan ug kahimayaan.

Ang Ginoo nagtawag og mga propeta ug naghatag kanila og awtoridad sa paggiya niini nga trabaho. Naghatag Siya kanila og pagpadayag sa pagtabang kanila nga mahibalo kon unsa ang hatagan og gibug-aton ug unsaon sa pagpauswag sa buhat sa Dios. Bisan og ang mga propeta nagagikan sa lainlaing mga kaagi ug adunay lainlaing mga talento ug mga panan-awon, mapainubsanon silang naningkamot ug nagdawat sa kabubut-on sa Ginoo alang sa Iyang Simbahan.

Ang pagpaningkamot sa pagsabot ug pagpanghimatuod sa balaang mga tawag sa mga propeta pinaagi sa paggamit sa ilang mga pagtulun-an usa ka elemento sa pagkamanununod. Ang pagsunod sa mga propeta makahimong magkinahanglan og “pailob ug hugot nga pagtuo” tungod kay kita mahimong dili kanunay makasabot sa balaang katuyoan sa mga pagpadayag ug mga pagtulun-an nga gipadayag ngadto sa usa ka propeta. Bisan kon kita adunay mga pangutana, ang Ginoo naghangyo kanato sa pagsunod sa direksiyon sa Iyang mga sulugoon uban sa hugot nga pagtuo diha sa Iyang hingpit nga kaalam ug sa gahom sa Iyang Pag-ula.

Kon kita mopatalinghog sa mga pulong sa mga propeta, kita nagdapit sa Balaang Espiritu nganhi sa atong mga kinabuhi. Kita nakigtambayayong sa usa ka tibuok kalibotan nga komunidad sa mga manununod ni Jesukristo nga may pasalig sa pagtukod sa gingharian sa Dios dinhi sa yuta. Samtang kita nagsunod sa propetikanhong tambag, kita nag-angkon og agianan ngadto sa mga panalangin sa balaang gahom ug mahangtorong kalinaw nga gisaad ngadto niadtong kinsa mosulod ug mosunod sa mga pakigsaad sa ebanghelyo.

Sa unsang paagi ako makaangkon og pagsaksi nga ang Ginoo naggiya sa Iyang Simbahan pinaagi sa mga propeta?

Gusto sa Ginoo nga ang Iyang mga anak maminaw ug mosalig sa Iyang mga propeta. Samtang kita maningkamot uban sa tinuod nga katuyoan, kita makaangkon og usa ka personal nga pagpamatuod nga Siya naggiya sa Iyang Simbahan karon.

Kita makagamit sa tambag ni propeta Alma. “Pagsulay sa akong mga pulong,” siya nag-awhag sa mga Zoramite, “ug pagbansay sa usa ka tipik sa hugot nga pagtuo, oo, bisan kamo kutob ra sa pagtinguha sa pagtuo, tugoti kini nga tinguha nga molihok diha kaninyo, gani hangtud kamo motuo sa paagi nga kamo makahatag og luna alang sa usa ka bahin sa akong mga pulong.”

Mipadayon si Alma sa pagpasabot: “Kita motandi sa pulong ngadto sa usa ka liso. “Karon, kon kamo mohatag og luna, nga ang usa ka liso mahimo nga matanom diha sa inyong kasingkasing, tan-awa, kon kini usa ka tinuod nga liso, kon kamo dili molabay niini pinaagi sa inyong pagkawalay pagtuo, … kini mosugod sa pagtubo diha sulod sa inyong mga dughan” ug kon kamo makamatikod niining nagtubo nga mga tinguha, kamo magsugod pag-ingon diha sa inyong kaugalingon—Kini kinahanglan nga usa ka maayo nga liso, o nga ang pulong maayo, kay kini misugod pagpadako sa akong kalag; oo, kini misugod sa pagdan-ag sa akong salabutan, oo, kini misugod sa pagkaanindot ngari kanako.”

Samtang si Alma mitudlo, kita maka-eksperimento sa mga pulong sa mga propeta. Sama pananglit, kon mahimo, makalihok kita sumala sa tambag sa propeta sa paghimo og kanunay nga pakigsabot sa pagsimba diha sa balay sa Ginoo. Samtang kita naghimo, kita makabantay alang sa mga panalangin nga gisaad sa propeta. Ang pag-ila niini nga mga panalangin naglig-on sa atong hugot nga pagtuo diha sa mga pulong sa buhing mga propeta.

Ang pag-ugmad sa binhi pinaagi sa atong hugot nga pagtuo usa ka tibuok kinabuhi nga proseso, apan kita makasugod karong adlawa sa pag-angkon og espirituwal nga kasigurohan diha sa buhing mga propeta ug sa pagpatalinghog sa ilang tambag uban sa pailob ug hugot nga pagtuo.

Ang mga lider ba sa Simbahan dili masayop?

Si Jesukristo lamang ang mipuyo og hingpit nga kinabuhi. Ang mga lider sa Simbahan naningkamot sa pagpuyo og matarong nga kinabuhi ug sa pagdala og mga tawo ngadto ni Jesukristo pinaagi sa ilang mga pulong ug mga lihok, apan sila mga ulipon ngadto sa tawhanong kahuyang. Ang mga lider sa Ang Simbahan ni Jesukristo sa mga Santos sa Ulahing mga Adlaw dili mahimong dili masayop.

Apan kinahanglan nga dili nato kalimtan ang ilang importanting tahas. Ang Ginoo nagtawag og mga miyembro sa Unang Kapangulohan ug Korum sa Napulog Duha ka Apostoles sa Simbahan nga mahimong talagsaong mga saksi sa ngalan ni Kristo” ug sa paglihok isip mga propeta, mga manalagna, ug mga tigpadayag sa atong panahon. Sama sa karaang mga propeta, sila makigsulti sa Dios ug magpadayag sa Iyang kabubut-on. Sila adunay balaang awtoridad sa paggiya sa Simbahan pinaagi sa pagpadayag, pagdumala sa mga ordinansa sa ebanghelyo, ug sa paggiya sa buluhaton sa Ginoo dinhi sa yuta. Kini wala magpasabot nga sila nahibalo sa tanang mga butang. Sila nagtrabaho pinasubay sa kaalam nga gihatag sa Ginoo kanila, pagpangayo og dugang nga kaalam pinaagi sa nagpadayong pagpadayag, ug sa pagsalig diha sa makapalig-on nga gahom nga ilang madawat pinaagi ni Jesukristo ug sa Iyang Pag-ula.

Ang Ginoo kanunay nagtrabaho pinaagi sa mortal nga mga propeta bisan pa sa ilang kahuyang. Sama ni Jonas nga milayas sa iyang tawag ngadto sa Nineveh, ni Pedro nga nagputol sa dunggan sa sundalo, o ni Joseph Smith nga naghatag sa mga pahina gikan sa hubad sa Basahon ni Mormon ngadto ni Martin Harris, ang mga propeta usahay makahimo og mga sayop. Sa ingon nga mga sitwasyon, ang Ginoo nagkorihir sa Iyang mga sulugoon, ug human sila maghinulsol, siya nagpanalangin kanila sa pagtuman sa buluhaton nga Siya mitawag kanila sa pagbuhat.

Kini importante ang paghinumdom kon giunsa ang doktrina sa Simbahan pagtukod. Ang doktrina gipadayag ug gihubad sa Presidente sa Simbahan ug gipaluyohan sa Unang Kapangulohan ug sa Korum sa Napulog Duha naglihok nga inuyonan sa tanan, nagsunod sa sundahan nga gihatag diha sa Doktrina ug mga Pakigsaad 107:27–31. “Kini nga panginahanglan sa panag-uyon sa tanan naghatag og pagkorihir sa mga bakak ug personal nga dili maayong mga kinaiya. Nagsiguro kini nga ang Dios nagdumala pinaagi sa Espiritu, dili sigun sa gidaghanon sa mga tawo o gumikan sa kompromiso.” Ang usa ka pagtudlo sa indibidwal nga lider sa Simbahan mahimong magrepresentar og “personal, bisan og maayo ka paghunahuna, opinyon, wala mipasabot nga himoong opisyal o walay pagkausab alang sa tibuok Simbahan.”

Pinaagi sa Balaang Espiritu, ang matag usa kanato mahimong makadawat og personal nga kasigurohan nga ang mga propeta gitawag pinaagi sa Dios ug nga Siya nagdirekta sa Iyang trabaho pinaagi kanila.

Unsa ang gipasabot nga ang propeta dili gayod mopahisalaag sa Simbahan?

Si Presidente Wilford Woodruff miingon, “Ang Ginoo dili gayud motugot kanako o ni bisan kinsa nga tawo kinsa mibarug ingon nga Presidente niini nga Simbahan sa paggiya kaninyo nga mahisalaag.” Mga propeta ug apostoles nakapanghimatuod niini nga pagtulun-an sa tanang henerasyon. Ang doktrina gipadayag ug gihubad sa Presidente sa Simbahan ug gipaluyohan sa Unang Kapangulohan ug sa Korum sa Napulog Duha naglihok nga inuyonan sa tanan, nagsunod sa sundanan nga gihatag diha sa Doktrina ug mga Pakigsaad 107:27–31.

Nagtuo ang mga Santos sa Ulahing mga Adlaw sa kahingpitan sa gipahiuli nga ebanghelyo ug ang awtoridad sa pagkapari dili na gayod kuhaon pag-usab gikan sa yuta. Kini nagpasabot nga ang Dios kanunay nga naggiya sa mga propeta sa pagsiguro nga ang Simbahan nagtuman sa misyon niini sa pag-andam sa Iyang mga anak alang sa mga panalangin sa mahangtorong kinabuhi. Siya mopadayon sa pagpadayag sa Iyang kabubut-on ngadto sa mga propeta og pagtulun-an ngadto sa lain nga pagtulun-an, nagdugang sa atong pagsabot ug sa pagwagtang sa sayop isip kabahin sa pagpadayag sa Pagpahiuli sa ebanghelyo.

Nganong ang pipila ka butang diha sa Simbahan mausab dala sa panahon?

Sa Doktrina ug mga Pakigsaad 1:30, ang Ginoo nagpadayag nga ang Simbahan mao “lamang ang tinuod ug buhi nga simbahan diha ibabaw sa tibuok yuta.” Apan ang tanang buhi nga butang naglambo ug nag-usab. Ang mga praktis sa Simbahan lahi sa karon bisan og pila pa lamang gani ka tuig ang milabay. Kini usa ka mahinungdanong bahin sa Simbahan, diin gitukod diha sa baroganan sa nagpadayon nga pagpadayag. Ang mga Santos sa Ulahing mga Adlaw nagtuo nga ang Dios “mopadayag pa og daghan nga dagko ug mahinungdanon nga mga butang.”

Ang nagpadayon nga pagpadayag makapakaylap o makahashas sa atong pagsabot, maggiya kanato sa pag-usab og pipila sa atong mga tradisyon, ug magtabang kanato nga kanunay mas duol ngadto sa mga mithi sa Zion. Ang tibuok kalibotan nga Simbahan nagpahiangay aron ang mga palisiya niini makatabang sa mga panginahanglan sa pihong mga panahon ug mga lugar. Bisan pa, ang mga panginahanglan sa mga Santos diha sa kayutaan nga buyon sa utlanan sa Amerika sa ika-19 nga siglo sa daghang paagi hilabihan sa ka lahi gikan sa minilyon ka mga miyembro sa Simbahan nga nagkatag sa tibuok kalibotan karon.

Kasagaran sa mga kausaban nga atong nasinati diha sa Simbahan naglakip sa praktikal nga paggamit sa mga baroganan sa ebanghelyo, sama kon unsaon sa pagdumala ang pagsimba sa Adlaw nga Igpapahulay o sa pagpangalagad ngadto sa usag usa sa atong mga ward ug mga branch. Usahay ang pagpadayag naggiya ngadto sa mas daghan pa nga mahinungdanong mga kausaban diha sa mga pagtulun-an ug mga praktis sa Simbahan. Ang mga ehemplo naglakip sa opisyal nga pamahayag nga makaplagan diha sa Doktrina ug mga Pakigsaad, diin migiya ngadto sa kataposan nga pagpraktis sa dinaghang kaminyoon ug sa paghatag og pagkapari ug templo nga mga panalangin ngadto sa tanan walay pagsapayan sa kaliwatan.

Ang mga pagtulun-an ba sa buhing mga propeta mas importante kay sa niadtong sa mga kasulatan o sa nangaging mga lider sa Simbahan?

Ang buhing mga propeta, ang mga kasulatan, ug ang nangaging mga lider sa Simbahan tanan mga importante. Ang unang katuyoan niining tulo ka tinubdan sa kamatuoran mao ang pagsaksi sa makaluwas nga misyon ni Jesukristo. Kita kinahanglan nga maningkamot sa pagsabot sa importanting tahas ang matag tinubdan naghatag ug sa unsang paagi sila kalabot ngadto sa usag usa.

Ang mga kasulatan usa ka tinubdan sa importanting mga kamatuoran nga gipadayag kapin sa liboan ka tuig ug diha sa daghang dapit nga nahinaboan. Sila nagsunod og mahinungdanong mga kamatuoran sa ebanghelyo diha sa atong mga atubangan. Sila nagpamatuod ni Kristo ug naghatag og okasyon alang sa Espiritu sa pagsulti ngari kanato. Ang mga pagtulun-an sa nangaging mga propeta sa Pagpahiuli naghatag og susamang kapanguhaan. Kita kinahanglan nga maningkamot sa pagsabot sa mga kasulatan ug sa mga pagtulun-an sa nangaging mga propeta diha sa kinatibuk-ang kahulogan diha diin sila gihatag ug sa mapasalamatong paagi mosagop sa gipadayag nga mga kamatuoran nga ilang gipakigbahin.

Ang buhing mga propeta naghupot sa mga yawe sa pagkapari nga kinahanglanon sa paggiya sa Simbahan ug sa pagdumala sa mga ordinansa sa ebanghelyo karon. Nagdugang sila sa ilang pagpamatuod kabahin ni Kristo ngadto niadtong gipahayag sa nangaging mga propeta. Nagtabang sila kanato sa pagtan-aw kon giunsa sa mga kamatuoran sa ebanghelyo paggamit sa atong karon nga mga sitwasyon. Sila nagdawat og bag-ong pagpadayag alang sa Simbahan, nagpahiangay sa nangaging mga direksiyon ngadto sa karon nga mga sitwasyon ingon sa paggiya sa Ginoo. Usahay ang ilang mga pagtulun-an nagpuli niadtong sa nangaging mga propeta. Sa kasagaran ang ilang mga pagtulun-an naggamit niadtong sa nangaging mga propeta.

Pagkat-on pa og dugang

Russell M. Nelson, “Pagpadayag alang sa Simbahan, Pagpadayag alang sa Atong mga Kinabuhi,” Liahona, Mayo 2018, 93–96
Neil L. Andersen, “Ang Propeta sa Dios,” Liahona, Mayo 2018, 24–27