“Bunyag,” Mga Hilisgotan ug mga Pangutana (2023)
Giya sa Pagtuon sa Ebanghelyo
Bunyag
“Walay makasulod sa Gingharian sa Dios gawas kon matawo siya pinaagi sa tubig ug sa Espiritu” (Juan 3:5).
Kanus-a sa imong kinabuhi nga gibati nimo nga nagmahay human makahimo og seryoso nga sayop o sala? Ang mahinungdanong mensahe sa gipahiuli nga ebanghelyo mao nga pinaagi sa hugot nga pagtuo kang Jesukristo, kinasingkasing nga paghinulsol, ug bunyag pinaagi sa pagpaunlod nga himoon sa usa nga naghupot sa awtoridad, madawat nato ang kapasayloan ug pagkapapas sa atong mga sala. Ang bunyag nagsimbolo sa pagkatawo pag-usab—ang sinugdanan sa bag-ong kinabuhi. Kini ang unang lakang paingon sa dalan sa pagkahimong miyembro sa Iyang Simbahan ug pagpangandam sa pagdawat sa sagradong mga ordinansa ug mga pakigsaad nga anaa sa balay sa Ginoo. Dihang gibunyagan ka, ikaw nagsaksi sa Dios nga Amahan nga ikaw “andam sa pagdala diha kanimo sa ngalan ni Kristo” (2 Nephi 31:13). Kanang importante nga saad gibag-o sa matag higayon nga mopaambit ka sa sakramento (tan-awa sa Doktrina ug mga Pakigsaad 20:77).
Unsa Ang Bunyag?
Ang bunyag pinaagi sa pagpaunlod sa tubig nga himoon sa usa nga adunay awtoridad mao ang unang ordinansa sa pagkapari sa kaluwasan ug kahimayaan. Ang bunyag gikinahanglan sa usa ka tawo aron mahimong miyembro sa Simbahan ni Jesukristo ug sa pagsulod sa celestial nga gingharian (tan-awa sa Juan 3:5). Pinaagi sa bunyag maangkon nato ang akses sa mga panalangin nga anaa tungod sa Pag-ula ni Jesukristo.
Katibuk-ang pagpasabot sa hilisgotan: Bunyag
May kalabotan nga mga giya sa pagtuon sa ebanghelyo: Hugot nga Pagtuo kang Jesukristo, Paghinulsol, Kaluwasan, Kinabuhing Dayon, Mga Pakigsaad ug mga Ordinansa, Puli nga mga Ordinansa alang sa mga Patay
Seksiyon 1
Si Jesukristo Nagdapit sa Tanan nga Mosunod Kaniya ug Magpabunyag
Bisan og si Jesukristo balaan ug walay sala, miadto Siya kang Juan Bautista ug nagpabunyag aron “sa pagtuman sa tanan nga pagkamatarong” (tan-awa sa Mateo 3:13–17; Mga Hebreohanon 4:15; 2 Nephi 31:5–7). Gisugo sa Dios ang tanan Niyang mga anak sa pagsunod sa ehemplo ni Jesukristo ug magpabunyag aron sila makadawat og kapasayloan sa ilang mga sala ug makapanunod sa kinabuhing dayon (tan-awa sa 2 Nephi 31:13, 17–18). Nangandam kita alang sa bunyag kon kita magpakita og hugot nga pagtuo kang Jesukristo ug maghinulsol sa atong mga sala, diin makita ang paghinulsol pinaagi sa usa ka masulob-ong kasingkasing ug mahinulsolong espiritu (tan-awa sa Moroni 6:1–3; Doktrina ug mga Pakigsaad 20:37).
Ang Dios misugo nga ang bunyag ipahigayon sa usa nga naghupot sa awtoridad sa pagkapari (tan-awa sa 3 Nephi 11:21–28; Doktrina ug mga Pakigsaad 20:72–74; 22:1–4, lakip ang makasaysayanong pasiuna). Niadtong Mayo 1829, ang ordinansa sa bunyag ug ang awtoridad sa pagbunyag gipahiuli sa langitnong mensahero nga si Juan Bautista ngadto kang Propeta Joseph Smith (tan-awa sa Joseph Smith—Kasaysayan 1:68–73).
Sa tibuok kasaysayan, daghang mga anak sa Dios ang nabuhi ug namatay nga wala makahibalo sa ebanghelyo ni Jesukristo o makadawat sa bunyag nga ipahigayon ubos sa Iyang awtoridad sa pagkapari. Tungod kay ang matag kalag bililhon sa panan-aw sa Dios,ang Iyang plano naghatag niining namatay na nga mga indibidwal og oportunidad nga makakat-on sa ebanghelyo didto sa kalibotan sa mga espiritu (Doktrina ug mga Pakigsaad 138:30–37). Gipaningkamotan karon sa mga miyembro sa Simbahan nga pangitaon ang mga ngalan sa namatay nang mga katigulangan nga wala pa makadawat sa gikinahanglang mga ordinansa sa ebanghelyo niini nga kinabuhi ug mabunyagan pinaagi sa proxy alang nila diha sa mga templo sa Ang Simbahan ni Jesukristo sa mga Santos sa Ulahing mga Adlaw (tan-awa sa Doktrina ug mga Pakigsaad 128:16–18).
Mga butang nga angayang hunahunaon
-
Si propeta Nephi misulat kon nganong gibunyagan si Jesukristo. Tun-i ang 2 Nephi 31:4–13. Unsay gitudlo kanimo niini nga mga bersikulo bahin sa katuyoan sa bunyag sa Ginoo? Unsay buot ipasabot nga ang imong bunyag usa ka saksi “ngadto sa Amahan nga kamo andam sa pagdala diha [kanimo] sa ngalan ni Kristo”? (2 Nephi 31:13).
-
Basaha ang Doktrina ug mga Pakigsaad 20:37, nga mangita sa importanteng mga paagi aron maandam sa bunyag ang usa ka tawo. Sa unsang paagi kini nga tudling naghatag og direksiyon sa usa ka miyembro sa Simbahan nga nabunyagan sa linghod nga panuigon?
Kalihokan alang sa pagkat-on uban sa laing mga tawo
-
Ang gipahiuli nga doktrina sa bunyag alang sa mga patay usa ka dako nga panalangin ngadto ni Joseph Smith ug sa unang mga Santos sa Ulahing mga Adlaw sama kanato karon. Tan-awa ang bidyo nga “Glad Tidings: The History of Baptisms for the Dead” (6:55), ug ikonsiderar kon unsa kahay imong bation kon usa ka sa unang mga Santos nga nakakat-on bahin sa doktrina sa bunyag alang sa mga patay. Unsay gitudlo niini nga doktrina diha kanimo bahin sa plano sa kaluwasan sa Langitnong Amahan?
Pagkat-on pa og dugang
-
1 Mga Taga-Corinto 15:29; Alma 7:14–16; Doktrina ug mga Pakigsaad 18:41–42; Mga Artikulo sa Hugot nga Pagtuo 1:4
-
“Bunyag ug ang Gasa sa Espiritu Santo,” Mga Pagtulun-an sa mga Presidente sa Simbahan: Joseph Smith (2011), 105–18
-
David A. Bednar, “Kanunay nga Magbaton og Kapasayloan sa Inyong mga Sala,” Liahona, Mayo 2016, 59–62
-
“Jesus Christ Teaches Repentance and Baptism” (bidyo), Gospel Library
Seksiyon 2
Ang Bunyag Mag-andam Nimo alang sa Kinabuhing Dayon
Ang bunyag nagsimbolo sa kamatayon, paglubong, ug Pagkabanhaw ni Jesukristo. Kining importanteng imahe makatabang nato nga makita ang simbolismo sa kaugalingon natong espirituhanong pagkatawo pag-usab sa dihang kita gibunyagan. Sama nga nabanhaw si Jesukristo gikan sa mga patay ngadto sa bag-ong kinabuhi, kinahanglan usab kitang “magkinabuhi sa bag-ong kinabuhi” dihang mohaw-as kita sa tubig sa bunyag (Mga Taga-Roma 6:4; tan-awa usab sa mga bersikulo 3–11).
Gipakasama usab sa kasulatan ang bunyag, ug ang espirituhanong kausaban nga moabot sa mapainubsanong mga sumusunod ni Jesukristo, diha sa pagkatawo (tan-awa sa Juan 3:1–8). Sama nga ang usa ka masuso matawo pinaagi sa tubig, dugo, ug sa espiritu, ang tanang nabunyagan ug naningkamot sa pagsunod kang Jesukristo matawo pag-usab pinaagi sa tubig ug sa Espiritu ug “malimpyohan pinaagi sa dugo, gani sa dugo [ni Kristo]” (Moises 6:59). Busa, makatabang ang pagkonsiderar kon sa unsang paagi ang espirituhanon nga pagkatawo pag-usab, o “pagkatawo pag-usab,” naghatag nato og limpyo nga pagsugod sa kinabuhi (tan-awa sa Mosiah 5:7; 27:25–26).
Nagtudlo ang Ginoo nga ang bunyag sa tubig mag-una sa bunyag sa kalayo. Kini nagpasabot sa gasa sa Espiritu Santo, nga molimpyo ug moputli sama sa kalayo (tan-awa sa Mga Buhat 1:5; 2 Nephi 31:13). Ang bunyag sa kalayo magdala og kapasayloan sa mga sala (tan-awa sa 2 Nephi 31:17; 3 Nephi 9:19–20; Doktrina ug mga Pakigsaad 39:6).
Mga butang nga angayang hunahunaon
-
Si Elder David A. Bednar mitudlo:
“Kita dili hingpit nga mga binuhat nga nanglimbasog sa pagpakabuhi sa mortalidad sumala sa hingpit nga plano sa Langitnong Amahan para sa mahangtorong kalamboan. Ang mga rekisito sa Iyang plano mahimayaon, manggiluy-on, ug tukma. Usahay puno kita sa determinasyon ug sa ubang panahon mobati og hingpit nga kakulang. Mahimong maghunahuna kita kon sa espirituhanong paagi matuman ba nato ang sugo nga mobarog nga walay buling sa Iyang atubangan sa kataposang adlaw.
“Uban sa tabang sa Ginoo ug pinaagi sa gahom sa Iyang Espiritu nga ‘magatudlo [kanato] sa tanang butang’ [Juan 14:26], sa pagkatinuod mapanalanginan kita nga mahibalo sa espirituhanon natong mga posibilidad. Ang mga ordinansa magdapit og espirituhanong katuyoan ug gahom sa atong kinabuhi samtang maningkamot kita nga matawo pag-usab ug mamahimong mga tawo ni Kristo. Ang atong mga kahuyang mahimong lig-on, ug ang atong mga limitasyon malatasan.”
Unsay atong tahas sa “pagkatawo pag-usab”? Unsa nga mga panalangin ang moabot sa usa ka tawo nga naningkamot nga “magpakatawo pag-usab”?
Kalihokan alang sa pagkat-on uban sa laing mga tawo
-
Ikonsiderar ang pagtan-aw sa “Jesus Teaches of Being Born Again” (6:03), nga magdapit sa mga sakop sa grupo nga maminaw sa mga baroganan nga gitudlo ni Jesukristo kang Nicodemo. Giunsa paggamit ni Jesus ang simbolismo sa pisikal nga pagkatawo aron tabangan si Nicodemo nga mas masabtan kon unsaon pagpangandam para sa gingharian sa Dios?
Pagkat-on pa og dugang
-
David A. Bednar, “Kinahanglang Matawo Kamo Pag-usab,” Liahona, Mayo 2007, 19–22
-
D. Todd Christofferson, “Pagkatawo Pag-usab,” Liahona, Mayo 2008, 76–79
Seksiyon 3
Ang Gagmayng mga Bata Dili Kinahanlang Bunyagan
Si Jesukristo nagtudlo nga walay sala ang gagmayng mga bata sa atubangan sa Dios (tan-awa sa Mateo 18:3; Marcos 2:17; Moroni 8:8). Tungod sa Pag-ula ni Jesukristo, ang gagmayng mga bata wala manginahanglan og bunyag. Responsibilidad sa mga ginikanan ang pagtudlo sa ilang mga anak bahin sa kaimportante sa hugot nga pagtuo kang Jesukristo, paghinulsol, bunyag, ug sa gasa sa Espiritu Santo (tan-awa sa Doktrina ug mga Pakigsaad 68:25–28). Ang mga bata kinahanglang bunyagan sa edad nga otso anyos, nga gihulagway sa mga kasulatan isip edad sa pagkamay-tulubagon (tan-awa sa Doktrina ug mga Pakigsaad 20:71; 29:46–47; 68:27). “Ang tanan nga mga bata kinsa namatay sa wala pa sila moabot sa panuigon sa pagkamay-tulubagon maluwas diha sa celestial nga gingharian sa langit” (Doktrina ug mga Pakigsaad 137:10).
Ang ubang indibiduwal dunay mga problema sa panglawas nga makapugong nila nga mahimong may tulubagon. Dili sila kinahanglang maghinulsol o magpabunyag apan maluwas sa celestial nga gingharian (tan-awa sa Moroni 8:22; Doktrina ug mga Pakigsaad 29:49–50; 137:10). Giklaro sa mga lider sa Simbahan nga “ang mga ordinansa kinahanglan dili pugngan [gikan sa mga indibiduwal nga dunay problema sa panglawas] kon ang tawo takos, gustong makadawat niini, ug magpakita og igong responsibilidad ug pagkamay-tulubagon.”
Mga butang nga angayang hunahunaon
-
Basaha ang 3 Nephi 17:21–24 ug ang Doktrina ug mga Pakigsaad 29:46–48. Unsay imong nakita niini nga mga tudling nga nagpakita kon unsay gibati sa Langitnong Amahan ug Jesukristo bahin sa gagmayng mga bata?
Kalihokan alang sa pagkat-on uban sa laing mga tawo
-
Si Presidente Brigham Young mipahayag, “Ang mga bata putli, sila walay kasubo sa kasingkasing, ni mga sala nga hinulsolan ug talikdan, ug sa ingon dili angay nga bunyagan alang sa kapasayloan sa sala.” Uban sa imong grupo, basaha ang Moroni 8:4–15, 19–24. Sa unsang paagi kini nga tudling makatabang nimo sa pagpasabot ngadto sa uban sa pipila ka rason kon nganong ang mga masuso wala manginahanglan og bunyag?
Pagkat-on pa og dugang
-
Shane M. Bowen, “Tungod Kay Ako Buhi, Kamo usab Mabuhi,” Liahona, Nob. 2012, 15–17