Giya sa Pagtuon sa Ebanghelyo
Kinabuhing Dayon
Aron mopuyo uban ang Dios ug mamahimong sama Kaniya
Kamo adunay balaan nga potensiyal ug padulngan isip mga anak nga babaye o anak nga lalaki sa langitnong mga ginikanan. Kon kamo makaila sa inyong mahangtoron nga pagkatawo, inyong makita nga ang Dios buot nga maandam kamo alang sa kinabuhi nga umaabot. Tungod kay gibuntog ni Jesukristo ang kamatayon, matag usa kanato mabanhaw ug makabaton og imortalidad sa sunod nga kinabuhi. Apan ang Langitnong Amahan adunay labaw pa nga gitagana alang niadtong magtinguha sa pagsunod ni Jesukristo, maghinulsol, ug mohimo ug motuman sa mga pakigsaad uban Kaniya. Ang Dios Amahan mihimo niining posible alang sa Iyang mga anak nga mahisama Kaniya ug makapuyo pag-usab diha sa Iyang presensya (tan-awa sa Mosiah 2:41). Mao kini ang gitawag diha sa mga kasulatan og “kahimayaan” ug “kinabuhing dayon.” Ang kinabuhing dayon mao ang labing talagsaon sa tanang gasa sa Dios ug mao ang katuyoan sa plano sa kaluwasan (tan-awa sa Doktrina ug mga Pakigsaad 14:7). Ang tanang butang nga gibuhat sa Dios mao ang pag-andam sa Iyang mga anak aron makabaton og kinabuhing dayon (tan-awa sa Moises 1:39).
Unsa ang Kinabuhing Dayon?
Ang pagbaton og kinabuhing dayon mao ang pagbaton og kaluwasan, ang mga panalangin sa mahangtorong pamilya, ug kahimayaan, diin mao “ang kinatas-an nga kahimtang sa kalipay ug himaya.” Pinaagi sa gugma sa Dios ug grasya, ang tanan Niyang mga anak mabanhaw human sila mamatay ug makatagamtam og imortalidad (tan-awa sa Moroni 7:41). Ang Kinabuhing dayon molapas pa sa imortalidad ug maglakip sa pagpanunod sa kinatas-an nga ang-ang sa celestial nga gingharian, magpadayon diha sa usa ka mahangtoron nga pamilya, ug isip sama sa Dios ug magpuyo diha sa Iyang presensya. Ang Kinabuhing dayon mao ang labing talagsaong gasa nga atong madawat gikan sa Dios (tan-awa sa Mga-Taga Roma 6:23; Doktrina ug mga Pakigsaad 14:7).
Kinatibuk-ang pagpasabot sa Hilisgotan: Kinabuhing Dayon
May kalabotan nga mga giya sa pagtuon sa ebanghelyo: Plano sa Kaluwasan, Kaluwasan, Mga Templo, Mga Pakigsaad ug Mga Ordinansa, Paghiusa sa Pamilya alang sa Kahangtoran
Seksiyon 1
Ang Plano sa Dios Motabang Kaninyo nga Makabaton og Kahimayaan ug Kinabuhing Dayon
Mibati ka ba sukad nga ikaw dili gayod mosarang alang sa kahimayaan? Kitang tanan layo ra gikan sa pagkahingpit sa atong mga paningkamot sa pagsunod ni Jesukristo. Apan ang Langitnong Amahan nakahibalo nga ang atong mortal nga kasinatian maglakip sa mga hagit ug pagkawala sa kadasig. Ang Bag-ong Tugon nagtudlo kanato nga, “Kay gihigugma pag-ayo sa Dios ang kalibotan ug tungod niini gihatag niya ang iyang bugtong Anak, aron ang tanan nga motuo kaniya dili malaglag kondili makabaton hinuon sa kinabuhing dayon” (Juan 3:16). Kita makasalig nga ang plano sa Langitnong Amahan alang sa atong kaluwasan ug kahimayaan magsilbi gayod tungod kay Siya mipadala ni Jesukristo aron mahimong atong Manluluwas ug Manunubos. Kita dili ug dili makaangkon sa gasa sa kinabuhing dayon sa atong kaugalingon. Nagkinahanglan kita ni Jesukristo, ug pinaagi sa atong hugot nga pagtuo diha Kaniya, paghinulsol, ug sa mga paningkamot sa paghimo ug pagtuman sa mga pakigsaad, kita makaandam sa atong kaugalingon sa pagdawat sa kahimayaan (tan-awa sa Doktrina ug mga Pakigsaad 59:23; Moises 6:59–60).
Isip mga anak sa Dios, kita adunay kapasidad ug oportunidad aron mouswag ug mahisama Kaniya (tan-awa sa Mateo 5:48; 2 Pedro 1:2–4; 1 Juan 3:1–2). Ang Langitnong Amahan nagsaad nga kita ugma damlag mahimong “madawat nato kini uban kang Kristo” (Mga Taga-Roma 8:17) ug makadawat sa tanan nga anaa sa Dios nga Amahan (tan-awa sa Doktrina ug mga Pakigsaad 84:36–38). Ang gasa sa kinabuhing dayon naglakip sa panalangin sa pagpuyo diha sa presensiya sa Dios ug sa pagpadayon isip mga pamilya (tan-awa sa Doktrina ug mga Pakigsaad 131:1–4).
Mga butang nga angay hunahunaon
-
Paminaw o basaha ang leriko sa “Padayon mga Santos.” Irekord ang inyong mga pagbati samtang kamo mobuhat sa ingon. Ang kinabuhing dayon ingon ba og mas makab-ot kaysa imong gihunahuna? Basaha ang 2 Nephi 31:20. Unsa ang gipasabot sa pagpadayon sa unahan uban ang “usa ka hingpit nga kahayag sa paglaom”?
Kalihokan alang sa pagkat-on uban sa laing tawo
-
Paghimo og usa ka listahan sa mga kahimtang diin ang paglangay o pag-unya-unya mosangpot sa dili maayong resulta. Magdungan sa pagbasa sa Alma 34:32–34, ug hisgotan ang mga kamatuoran nga makatabang kanato kon nganong dili nato angay nga langayon o unya-unyaon ang atong paghinulsol. Nganong kini nga kinabuhi mao ang panahon sa pag-andam alang sa sunod nga kinabuhi?
Pagkat-on pa og dugang
-
Russell M. Nelson, “Kaluwasan ug Kahimayaan,” Liahona, Mayo 2008, 7–10
-
Jeffrey R. Holland, “Ayaw Kabalaka: Salig Lamang!,” Liahona, Mayo 2022, 34–36
-
Mga Pagtulun-an sa mga Presidente sa Simbahan: Harold B. Lee (2011), 1–10
-
Randall K. Bennett, “Pilia ang Kinabuhing Dayon,” Liahona, Nob. 2011, 98–100
-
Gospel Topics Essays, “Pagkahimong Sama sa Dios,” Gospel Library
Seksiyon 2
Ang Dios Nag-andam og Lain-laing Gingharian sa Himaya alang sa Iyang mga Anak
Si Jesus mitudlo nga adunay lain-laing mga ganti sa sunod nga kinabuhi: “Sa balay sa akong Amahan adunay daghang puluy-anan” (tan-awa sa Juan 14:2–3). Si Propeta Joseph Smith nakakita og usa ka panan-awon sa tulo ka ang-ang o mga gingharian, sa himaya sa langit (tan-awa sa Doktrina ug mga Pakigsaad 76:50–98). Kini mao ang celestial, terrestrial, ug telestial nga mga gingharian. Matag usa niini gihimong posible ngari kanato pinaagi sa maulaon nga sakripisyo ni Jesukristo (tan-awa sa Doktrina ug mga Pakigsaad 76:40–43). Si Joseph nakakat-on nga ang gingharian nga atong mapanunod ugma damlag magdepende sa ang-ang diin kita mipili sa pagsunod ni Jesukristo. Ang celestial nga gingharian mao ang kinatas-ang himaya ug ang dapit diin ang Dios nagpuyo (tan-awa sa Doktrina ug mga Pakigsaad 76:62). Ang ebanghelyo ni Jesukristo naglatid sa usa ka dalan nga gituyo sa pagtabang kanato aron maandam ug madawat ang himaya sa celestial nga gingharian.
Mga butang nga angay hunahunaon
-
Niadtong 1832, si Propeta Joseph Smith ug Sidney Rigdon nakakita og panan-awon sa mga gingharian sa himaya (tan-awa sa Doktrina ug mga Pakigsaad 76:11–24): ang celestial nga gingharian (tan-awa sa mga bersikulo 50–70, 92–96), ang terrestrial nga gingharian (tan-awa sa mga bersikulo 71–80, 91, 97), ug ang telestial nga gingharian (tan-awa sa mga bersikulo 81–90, 98–106, 109–112). Unsa ang atong makat-onan mahitungod sa Langitnong Amahan ug ni Jesukristo gikan sa kamatuoran nga Sila miandam sa lain-laing gingharian sa himaya?
Kalihokan alang sa pagkat-on uban sa laing tawo
Dapita ang mga sakop sa inyong grupo sa pagrebyo sa mubo nga artikulo nga “Mga Gingharian sa Himaya” sa Mga Hilisgotan ug Mga Pangutana. Maghisgot mahitungod sa kalainan tali sa mga gingharian. Sa unsa nga paagi ang atong mga tinguha ug mga paningkamot sa pagsunod ni Jesukristo niining kinabuhi makaapekto sa atong mahangtoron nga ganti?
Pagkat-on pa og dugang
-
1 Mga Taga Corinto 15:40–42; 3 Nephi 15:9–10; Doktrina ug mga Pakigsaad 59:23; 88:15–28; 137
-
Russell M. Nelson, “Dali, Sunod Kanako,” Liahona, Mayo 2019, 88–91
-
Mga Pagtulun-an sa mga Presidente sa Simbahan: Joseph Smith (2011), 259–271
-
Mga Hilisgotan sa Kasaysayan sa Simbahan, “The Vision (D&C 76),” Gospel Library
Ubang mga Kapanguhaan mahitungod sa Kinabuhing Dayon
-
Mga kapanguhaan alang sa mga bata