“Mga Pakigsaad ug mga Ordinansa,” Mga Hilisgotan ug mga Pangutana (2023)
Giya sa Pagtuon sa Ebanghelyo
Mga Pakigsaad ug mga Ordinansa
Ang importanteng mga pakigsaad ug mga ordinansa makatabang nato sa dalan paingon sa kahimayaan ug kinabuhing dayon
Gamit ang teknolohiya karon, dali ra natong makita ang detalyadong mga instruksiyon ug mga mapa aron makaabot bisan asa nga gusto nato. Ang gipahiuli nga ebanghelyo ni Jesukristo mao ang atong mapa ug detalyadong instruksiyon sa pagpangita sa kahulogan niini nga kinabuhi ingon man ang kinabuhing dayon sa umaabot nga kalibotan. Kon mosunod kita kang Jesukristo ug magkinabuhi uyon sa ebanghelyo, gitanyagan ta sa Dios og sagrado nga mga pakigsaad ug mga ordinansa sa kaluwasan ug kahimayaan, nga magkonektar nato ngadto Kaniya ug mogiya nato sa dalan paingon sa kinabuhing dayon.
Unsa Ang mga Pakigsaad ug mga Ordinansa?
Ang mga ordinansa sagrado, pormal nga mga buhat o mga seremonya nga himoon pinaagi sa awtoridad sa pagkapari. Kasagaran ang mga ordinansa may kalabotan sa piho nga mga pakigsaad, o sagrado nga mga saad tali sa Dios ug sa Iyang mga anak. Kon mohimo kita og mga pakigsaad ug modawat og mga ordinansa, mouswag kita sa atong espirituhanon nga panaw pabalik sa Dios. Ang mga ordinansa nga mahinungdanon para sa kaluwasan ug kahimayaan naglakip sa bunyag, kompirmasyon ug pagdawat sa gasa sa Espiritu Santo, pag-orden sa Melchizedek nga Pagkapari para sa mga lalaki, pagtuga sa templo, ug pagselyo diha sa templo sa usa ka kapikas. Ang mga bata nga mamatay nga wala pay otso anyos wala magkinahanglan og mga ordinansa aron maluwas sa celestial nga gingharian (tan-awa sa Doktrina ug mga Pakigsaad 137:10).
Katibuk-ang pagpasabot sa hilisgotan: Pakigsaad ug Mga Ordinansa
May kalabotan nga mga giya sa pagtuon sa ebanghelyo: Bunyag, Gasa sa Espiritu Santo, Melchizedek nga Pagkapari, Pagtuga, Pagselyo, Pagkahimong sama ni Jesukristo, Mga Ordinansa sa Pagpuli alang sa mga Patay
Seksiyon 1
Ang Dalan sa Pakigsaad Mogiya Kanimo ngadto sa Kinabuhing Dayon
Kon imong hunahunaon ang imong kinabuhi isip nagpanaw pabalik sa Dios, ang paghimo og mga pakigsaad ug pagdawat og mga ordinansa sama sa pagsunod sa mga karatula nga naggiya sa dalan paingon sa kinabuhing dayon (tan-awa sa Doktrina ug mga Pakigsaad 14:7). Mao kini ang mga mahinungdanong lakang sa imong paningkamot nga moduol kang Jesukristo, kansang tabang imong gikinahanglan aron mouswag diha sa dalan (tan-awa sa 2 Nephi 9:41). Sa Simbahan, usahay gitawag nato kini og “dalan sa pakigsaad,” nga usa ka pasumbingay sa pagsunod sa ebanghelyo ni Jesukristo. Ang paglantaw sa ebanghelyo isip usa ka dalan nagpasiugda sa kaimportante sa paghimo ug pagtuman sa mga pakigsaad ug pagdawat og mga ordinansa samtang mouswag kita paingon sa kinabuhing dayon uban sa Langitnong Amahan ug ni Jesukristo.
Ang pagpabilin sa dalan sa pakigsaad mohatag kanimo og kahilwasan, kalinaw, ug malungtarong kalipay. Makahatag usab kini kanimo og kusog panahon sa kalisdanan. Si Presidente Russell M. Nelson misaad, “Karon, ngadto sa matag miyembro sa Simbahan moingon ko, pabilin diha sa dalan sa pakigsaad. Ang inyong pasalig nga mosunod sa Manluluwas pinaagi sa paghimo og mga pakigsaad uban Kaniya ug dayon sa pagtuman niadto nga mga pakigsaad moabli sa pultahan ngadto sa tanang espirituhanong mga panalangin ug pribilehiyo nga mahimong maanaa sa mga lalaki, babaye, ug mga bata bisan asa.”
Mga butang nga angayang hunahunaon
-
Ang nabanhaw nga Manluluwas midapit sa mga tawo nga nagtigom sa templo sa Bountiful nga moduol Kaniya (tan-awa sa 3 Nephi 11:14–17). Tan-awa ang bidyo nga “Covenants and Ordinances” (1:37), nga maminaw sa unsay gitudlo ni Elder David A. Bednar bahin sa kon sa unsang paagi ang mga pakigsaad ug mga ordinansa nakatabang nato nga makaduol kang Jesukristo. Unsang mga panalangin ang moabot niadtong takos nga mohimo og mga pakigsaad uban sa Dios ug modawat sa Iyang mga ordinansa?
-
Girekord ni propeta Lehi ang usa ka damgo diin nakita niya ang usa ka dalan paingon sa kahoy sa kinabuhi. Basaha ang 1 Nephi 8:19–24, 30. Unsay atong makat-onan gikan niini nga tudling bahin sa kaimportante sa pagpabilin diha sa dalan sa pakigsaad? Unsang mga paningkamot ang imong gihimo sa imong kinabuhi aron magpabilin diha sa dalan sa pakigsaad? Sa unsang paagi ang paghinulsol motabang nimo nga magpabilin nga nakasentro sa dalan sa Dios?
Kalihokan alang sa pagkat-on kauban ang laing mga tawo
-
Pinaagi sa gasa sa Espiritu Santo, makadawat og balaanong tabang ang mga naghimo og pakigsaad aron mahimong mga tigtuman sa pakigsaad. Tan-awa ang “The Covenant Path” (2:30). Hisgoti ang mga paagi sa pagtuman sa mga pakigsaad base sa gihatagan og gibug-aton ni Elder D. Todd Christofferson niini nga bidyo. Unsa ang pipila sa mga panalangin sa pagsubay sa dalan sa pakigsaad?
-
Ikonsiderar ang pagtuon sa artikulo nga “Why Ordinances and Covenants Matter” uban sa mga sakop sa imong grupo. Dapita ang mga sakop sa grupo nga ilhon ang importanteng tahas sa balay sa Ginoo diha sa atong mga paningkamot sa pagsubay ug pagpabilin sa dalan sa pakigsaad.
Pagkat-on pa og dugang
-
2 Nephi 31:17–20; 33:9; Helaman 3:27–30; Doktrina ug mga Pakigsaad 84:20–21; Mga Artikulo sa Hugot nga Pagtuo 1:3
-
Kinatibuk-ang Tamdanan nga Basahon: Pagserbisyo diha sa Ang Simbahan ni Jesukristo sa mga Santos sa Ulahing mga Adlaw, 1.3.2, 3.5.1, 3.5.2, Librarya sa Ebanghelyo
-
D. Todd Christofferson, “Nganong Mahinungdanon ang Dalan sa Pakigsaad,” Liahona, Mayo 2021, 116–19
-
Randy D. Funk, “Mga Pakigsaad, mga Ordinansa, ug mga Panalangin,” Liahona, Sep. 2021, 30–35
-
“Why Ordinances and Covenants Matter,” ChurchofJesusChrist.org.
Seksiyon 2
Gidapit Ka sa Dios nga Ibugkos ang Imong Kaugalingon kang Jesukristo pinaagi sa mga Pakigsaad
Ang paghimo ug pagtuman sa sagrado nga mga pakigsaad nagbugkos nimo ngadto ni Ginoong Jesukristo (tan-awa sa Doktrina ug mga Pakigsaad 35:24). Si Presidente Russell M. Nelson mipasabot: “Ang pagsulod ngadto sa relasyon sa pakigsaad uban sa Dios nagbugkos nato ngadto Kaniya sa paagi nga makapahimo sa tanan mahitungod sa kinabuhi nga mas sayon. Palihog ayaw ako saypa sa pagsabot: Ako wala moingon nga ang paghimo og mga pakigsaad makapahimo sa kinabuhi nga sayon. … Apan ang pagpakigtambayayong sa Manluluwas nagpasabot nga kamo makagamit sa Iyang kusog ug matubsanon nga gahom.”
Gidisenyo ang tanan diha sa ebanghelyo ni Jesukristo aron maandam ka sa pagsunod Kaniya ug mas mahisama Kaniya. Si Elder David A. Bednar mipahayag, “Ang mga pakigsaad ug ang mga ordinansa mao ang mga sukaranan nga atong gamiton sa pagtukod sa atong kinabuhi diha sa ‘tukoranan sa atong Manunubos’ [Helaman 5:12] ug sa Iyang Pag-ula.” Kon magtinguha ka nga molahutay hangtod sa kataposan pinaagi sa pagtuman sa imong mga pakigsaad, matagamtam nimo ang kalipay sa kaluwasan ug katubsanan nga gitanyag ni Jesukristo (tan-awa sa Omni 1:26).
Mga butang nga angayang hunahunaon
-
Bisan og lainlain ang mga ordinansa nga atong madawat, kining tanan dunay usa ka butang nga parehas—tabangan kita niini nga mapaduol kang Jesukristo ug maghatag og akses sa Iyang gahom. Ang ubang ordinansa sa pagkapari diha sa Simbahan motabang nato nga mapaduol kang Jesukristo apan wala giisip nga importante para sa kaluwasan ug kinabuhing dayon (sama sa pagngalan ug pagpanalangin sa mga bata, pagdihog og lana, o pagpahinungod sa mga lubnganan).
Gikinahanglan ang ubang ordinansa para sa atong kaluwasan ug kahimayaan (bunyag, kompirmasyon ug pagdawat sa gasa sa Espiritu Santo, pag-orden sa Melchizedek nga Pagkapari para sa mga lalaki, pagtuga diha sa templo, ug pagselyo diha sa templo ngadto sa usa ka kapikas). Sa unsang paagi nga ang pagkat-on bahin niining importanteng mga ordinansa ug sa kauban nga mga pakigsaad motabang nimo nga masukod ang imong pag-uswag diha sa dalan sa pakigsaad?
Kalihokan alang sa pagkat-on uban sa laing mga tawo
-
Ang propeta sa Daang Tugon nga si Abraham maoy ehemplo niadtong matinud-anon sa paghimo ug pagtuman sa mga pakigsaad uban sa Dios. Tan-awa ang bidyo nga “Elder Nelson Talks about Covenants” (4:45), nga maminaw sa mga panalangin nga gisaad sa Dios kang Abraham. Hain niining gisaad nga mga panalangin ang mahimong mabatonan sa mga miyembro sa Simbahan karon? Sa unsang paagi kini nga mga panalangin sa pakigsaad makatabang nato nga mas masabtan ang mahigugmaong plano sa Langitnong Amahan para sa Iyang mga anak?
Pagkat-on pa og dugang
-
1 Nephi 17:40; Alma 13:16; 3 Nephi 20:24–26; Doktrina ug mga Pakigsaad 43:9; 82:15
-
Russell M. Nelson, “Buntoga ang Kalibotan ug Pangita og Kapahulayan,” Liahona, Nob. 2022, 95–98
-
David A. Bednar, “Apan Kami Wala Maminaw Kanila,” Liahona, May 2022, 14–16
-
David A. Bednar, “Nabugkos ngadto sa Manluluwas pinaagi sa mga Pakigsaad,” Alang sa Kalig-onan sa Kabatan-onan, Peb. 2022, 3–5
-
Dale G. Renlund, “Pagkab-ot sa Gahom sa Dios pinaagi sa mga Pakigsaad,” Liahona, Mayo 2023, 35–37