“Gasa sa Espiritu Santo,” Mga Hilisgotan ug Mga Pangutana (2023)
Giya sa Pagtuon sa Ebanghelyo
Gasa sa Espiritu Santo
Pagbaton og sakop sa Dios nga Kapangulohan isip kanunay nga kauban
Gikonsiderar na ba nimo ang tanang paagi nga ikaw napanalanginan pinaagi sa gasa sa Espiritu Santo? Ang tanang anak sa Dios makasinati sa impluwensiya sa Espiritu Santo nga naggiya kanila ngadto kang Jesukristo ug sa Iyang ebanghelyo. Apan ang gasa sa Espiritu Santo nakareserba alang niadtong kinsa, pinaagi sa hugot nga pagtuo ni Jesukristo ug paghinulsol, naghimo og mga pakigsaad ni Jesukristo pinaagi sa bunyag. Kini nga gasa mao ang saad nga makatagamtam ka sa kanunay nga pagpakig-uban sa Espiritu Santo—usa ka sakop sa Dios nga Kapangulohan. Dili kini ordinaryo nga gasa—dili kini makita—apan ang gahom niini dili ikalimod kon mopili ka nga dawaton kini pinaagi sa pagpuyo nga matarong. Kadtong modawat sa gasa sa Espiritu Santo malimpyohan gikan sa sala, makadawat og personal nga pagpadayag, ug makatagamtam sa mga panalangin nga nailhan og “ang [mga] gasa sa Espirtu.”
Unsa Ang Gasa sa Espiritu Santo?
Ang pagkompirma sa ordinansa sa pagkapari moabot human ang usa ka tawo mabunyagan pinaagi sa pagpatidlom diha sa tubig. Ang ordinansa ipahigayon pinaagi sa pagpandong sa mga kamot niadtong kinsa naghupot sa Melchizedek nga Pagkapari. Atol niini nga ordinansa nga ang gasa sa Espiritu Santo ihatag. Ang Espiritu Santo usa ka sakop sa Dios nga Kapangulohan ug mahimong kanunay nga makauban niadtong naningkamot sa pagsunod sa mga sugo ug nagdapit Kaniya ngadto sa ilang mga kinabuhi.
Kinatibuk-ang pagpasabot sa hilisgotan: Espiritu Santo
May kalabotan nga mga giya sa pagtuon sa ebanghelyo: Espiritu Santo, Mga Pakigsaad ug mga Ordinansa, Personal nga Pagpadayag, Mga Gasa sa Espiritu
Seksiyon 1
“Dawata ang Espiritu Santo”
Samtang ang usa ka tawo gikompirmahan nga miyembro sa Simbahan, siya gisultihan nga “dawata ang Espiritu Santo.” Ang gasa sa Espiritu Santo dili ipugos ngadto ni bisan kinsa. Responsibilidad kini sa mga miyembro sa pagdapit sa Espiritu Santo aron magauban kanila (tan-awa sa Doktrina ug mga Pakigsaad 88:33). Si Elder David A. Bednar miingon, “Sa atong pagdawat niini nga ordinansa, ang matag usa kanato midawat og usa ka sagrado ug padayong responsibilidad sa pagtinguha, sa pagtrabaho, ug sa pagkinabuhi nga kita sa pagkatinuod ‘nakadawat sa Espiritu Santo’ ug sa espirituhanong mga gasa nga anaa.”
Si Jesus mipasabot ngadto ni Nicodemo—lider sa mga Judio—nga “gawas kon ang tawo igaanak sa tubig ug sa Espiritu, dili siya makasulod sa gingharian sa Dios” (Juan 3:5). Busa, agig dugang sa pagpabunyag pinaagi sa tubig, ang Ginoo gusto nga ikaw “igaanak sa Espiritu” (bersikulo 6). Mahitabo kini kon ikaw makadawat sa gasa sa Espiritu Santo ug makasinati og “bunyag sa kalayo ug sa Espiritu Santo” (tan-awa sa 2 Nephi 31:13–14). Ang kalayo nagsimbolo sa paglimpyo. Kining makabalaan nga gahom nagdala og kapasayloan sa mga sala (tan-awa sa 2 Nephi 31:17; 3 Nephi 12:1–2). Human sa bunyag, ang mga miyembro sa Simbahan mahimong makasinati sa bunyag sa kalayo sa hinay-hinay nga paagi (tan-awa sa 3 Nephi 9:20) o sa mas direkta nga paagi (tan-awa sa Mosiah 4:2–3).
Mga butang nga angay hunahunaon
-
Sa dihang ang nabanhaw nga si Jesukristo nangalagad ngadto sa mga tawo sa Kasadpang bahin sa Kalibotan, Iyang gihatagan ang napulog duha ka mga disipulo sa gahom sa pagtugyan sa Espiritu Santo (tan-awa sa 3 Nephi 18:36–37). Ang mga tawo gitudloan bahin niini nga gasa, ug “sila nag-ampo alang niana diin sila labing nagtinguha; ug sila nagtinguha nga ang Espiritu Santo kinahanglang ihatag ngadto kanila” (3 Nephi 19:9). Unsaon nimo paghulagway ang imong gibati mahitungod sa gasa sa Espiritu Santo?
-
Gitudlo ni Propeta Joseph Smith nga, “Ang bunyag sa tubig, nga walay bunyag sa kalayo ug sa Espiritu Santo nga uban niini, walay kapuslanan; kini kinahanglan ug dili gayod mabulag.” Aron matabangan ka nga mas makasabot sa kahulogan sa “bunyag sa kalayo ug sa Espiritu Santo,” tan-awa ang “The Baptism of Fire” (1:41). Base sa mga komentaryo ni Elder David A. Bednar diha sa bidyo, unsaon man nimo pagpasabot ang kahulogan sa “bunyag sa kalayo”?
Pagkat-on pa og dugang
-
Boyd K. Packer, “Ang Gasa sa Espiritu Santo: Unsa ang Angay nga Mahibaloan sa Matag Miyembro,” Liahona, Ago. 2006, 46–52
-
Mga Pagtulun-an sa mga Presidente sa Simbahan: Joseph Smith (2007), 105–118
Seksiyon 2
Ang Espiritu Santo Mahimo Natong Makanunayon nga Kauban
Si Presidente Henry B. Eyring miingon: “Alang sa daghang rason, gikinahanglan nato ang kanunay nga pakig-uban sa Espiritu Santo. Kita nagtinguha niini, apan nasayod kita gikan sa kasinatian nga dili sayon ang pagmentinar niini. Matag usa nato makahunahuna, makasulti, ug makabuhat og mga butang sa atong inadlaw nga pagpakabuhi nga makapasilo sa Espiritu. Ang Ginoo mitudlo nato nga ang Espiritu Santo makauban nato sa kanunay kon ang atong mga kasingkasing puno sa gugma nga putli ug kon ang hiyas modayan-dayan sa atong hunahuna nga walay paghunong (tan-awa sa D&P 121:45).” Kon magtinguha ka sa pag-ugmad og pagpakig-uban sa Espiritu Santo, imong mabati kon unsa nga mga butang ang kinahanglang usbon sa imong kinabuhi.
Mga butang nga angay hunahunaon
-
Ang mga pag-ampo sa sakramento usa ka gamhanang pahinumdom nga ang Espiritu Santo kanunayng magauban kanato (tan-awa sa Doktrina ug mga Pakigsaad 20:77, 79). Kon takos ka nga mangandam ug moambit sa sakramento, imong gidapit ang pagpakig-uban sa Espiritu. Sa unsang paagi napanalanginan ang imong kinabuhi pinaagi sa pagpaningkamot nga mahimong takos sa Iyang kanunay nga presensya?
Kalihokan alang sa pagkat-on uban sa laing tawo
-
Ikonsiderar ang pagbasa ug paghisgot niini nga pamahayag ni Presidente Gordon B. Hinckley: “Sa akong hunahuna si Mormon nahibalo kaayo gikan sa iyang kaugalingong kasinatian sa kamatuoran sa iyang mga pulong nga ang ‘Maghuhupay mopuno uban sa paglaom ug hingpit nga gugma, ug kini nga gugma molahutay pinaagi sa kakugi ngadto sa pag-ampo, hangtod ang kataposan moabot, sa diha nga ang tanan nga mga santos mopuyo uban sa Dios’ (Moro. 8:26). Bisan og kita usahay mag-inusara samtang kauban niadtong iya sa kalibotan, dili kinahanglan nga kita mag-inusara, kay ang Ginoo mihatag kanato sa Espiritu Santo aron mamahimo natong kauban sa paglakaw uban kanato.” Mahimo nimong hisgotan kon nganong gikinahanglan ni propeta Mormon ang mga panalangin nga iyang gihulagway. Kanus-a ang Espiritu Santo mohatag og kalinaw ug tabang nganha kanimo?
Pagkat-on pa og dugang
-
3 Nephi 27:20; Doktrina ug mga Pakigsaad 14:8; 20:77, 79; 121:45–46
-
David A. Bednar, “Nga Kita Unta sa Kanunay Makabaton sa Iyang Espiritu Uban Kanato,” Liahona, Mayo 2006, 28–31
-
Dallin H. Oaks, “Always Have His Spirit,” Ensign, Oct. 1996, 59–61
-
Gordon B. Hinckley, “Ang Gasa sa Espiritu Santo,” Liahona, Ene. 2005, 5–7
Seksiyon 3
Unsaon Nako Pagkahibalo Kon Gibati Nako ang Espiritu Santo?
Nakasulay ka na ba sa pagpakig-istorya og usa ka tawo nga nagsulti sa usa ka pinulongan nga dili nimo masabtan? Mahimong makapahigawad ra kini kon ang usa ka tawo moingon nga gibati nila ang Espiritu apan ikaw mismo wala makahibalo kon unsa kina nga pagbati. Dili kini angay ikaulaw, bisan pa, tungod kay kitang tanan mobati sa Espiritu sa lainlaing mga paagi. Ang pagkat-on sa pag-ila ug pagsabot kon sa unsang paagi ang Espiritu Santo makig-istorya nganha kanimo mahimong magkinahanglan og panahon ug paningkamot. Si propeta Elijah nakakat-on nga ang Espiritu mahimong sama sa “hinay hinagawhaw nga tingog” (tan-awa sa 1 Mga Hari 19:11–12). Usahay ang Espiritu Santo mapadayag pinaagi sa mga pagbati sa paglaom ug hingpit nga kalipay (tan-awa sa Mga Taga-Roma 15:13). Ang Espiritu Santo mao ang importante nga paagi nga kita makakat-on sa kamatuoran (tan-awa sa Juan 14:26; Moroni 10:5).
Mga butang nga angay hunahunaon
-
Tan-awa ang bidyo nga “Feeling the Holy Ghost: Power of the Holy Spirit” (3:17) aron makita kon sa unsang paagi ang pipila sa miyembro sa Simbahan mobati sa Espiritu. Unsa ang ubang mga paagi nga ang Espiritu Santo makig-istorya nganha nimo?
Kalihokan alang sa pagkat-on uban sa laing tawo
-
Gihubad ni Joseph Smith ug Oliver Cowdery ang Basahon ni Mormon sa dihang ilang nakat-onan nga ang Espiritu Santo usahay mahimong maila pinaagi sa “[ma]initon” nga pagbati (tan-awa sa Doktrina ug mga Pakigsaad 9:8–9). Ikonsiderar ang pagbasa sa Doktrina ug mga Pakigsaad 6:22–23; 8:1–2; 11:11–14 ug sa paghisgot niining komon nga mga paagi nga ang Espiritu Santo makig-istorya kanato. Hisgoti nganong importante nga hinumdoman nga ang mainiton nga pagbati dili lang mao ang paagi nga mabati nimo ang Espiritu.
Pagkat-on pa og dugang
-
Mga Taga-Galacia 5:22–23; 2 Nephi 32:5, 8; Doktrina ug mga Pakigsaad 8:1–2; 9:8–9
-
Isangyaw ang Akong Ebanghelyo: Usa ka Giya sa Misyonaryo nga Pangalagad (2019), 105–120
-
Boyd K. Packer, “The Candle of the Lord,” Teaching Seminary: Preservice Readings, 32–34.
-
Ronald A. Rasband, “I ‘Hear Him’ by Responding to Promptings,” Inspiration (blog), Oct. 21, 2021, ChurchofJesusChrist.org.
-
“Hear Him” koleksiyon sa bidyo
Ubang mga Kapanguhaan mahitungod sa Gasa sa Espiritu Santo
-
Mga kapanguhaan alang sa mga bata