“Mga Anak sa Dios,” Mga Hilisgotan ug Mga Pangutana (2023)
Giya sa Pagtuon sa Ebanghelyo
Mga Anak sa Dios
Ang nagpaila nga kinaiya sa matag tawo sa yuta
Handurawa nga ikaw nakighimamat sa usa ka tawo sa unang higayon ug siya miingon, “Sultihi ko kabahin sa imong kaugalingon.” Unsay imong isulti? Kini magdepende sa sitwasyon, siyempre, apan ang mga kamatuoran nga imong pilion nga ipakigbahin makasulti og daghan mahitungod kon unsa ang imong paglantaw sa imong kaugalingon—ug unsa ang gusto nimo nga paglantaw sa uban kanimo.
Adunay usa ka kamatuoran kabahin nimo nga mas importante kaysa tanan. Ug samtang wala na nimo masulti sa dihang gipaila ang imong kaugalingon, kini ang mas importante sa imong pagkatawo kaysa imong ngalan, sa imong lungsod nga natawhan, o sa imong personal nga mga interes. Kini ang kamatuoran nga ikaw anak sa Dios. Siya ang imong Amahan. Sama nga ikaw adunay mga ginikanan sa yuta diin imong napanunod ang pisikal nga kinaiya, ikaw usab “usa ka hinigugmang espiritu nga anak nga lalaki o babaye sa langitnong mga ginikanan, ug, sa ingon, [ikaw adunay] mga kinaiya sa pagkadios ug kalagmitan nga mahimong usa ka dios.” Sa unsang paagi makaapekto kini nga kamatuoran sa imong pagtan-aw sa imong kaugalingon? Sa unsang paagi kini mousab sa imong pakigharong sa mga hagit ug mga oportunidad sa kinabuhi?
Unsa Man ang Gipasabot nga Mahimong usa ka Anak sa Dios?
Ang tanang katawhan anak nga mga lalaki ug anak nga mga babaye sa usa ka mahigugmaon nga Amahan sa Langit. Isip literal nga anak sa Dios, espirituhanong natawo diha sa kinabuhi sa wala pa dinhi sa yuta, matag tawo adunay balaanon, ug mahangtorong potensiyal (tan-awa sa Mga Taga-Roma 8:16–17).
Kinatibuk-ang pagpasabot sa hilisgotan: Espiritu nga mga Anak sa Langitnong mga Ginikanan
May kalabotan nga mga giya sa pagtuon sa ebanghelyo: Dios nga Amahan, Plano sa Kaluwasan, Kinabuhi sa Wala pa Dinhi sa Yuta
Seksiyon 1
Ang Dios Dili Lang Imong Tiglalang, Siya Ang Imong Amahan
Tanan adunay yutan-ong amahan, ug walay perpekto nila nga mga amahan. Bisan pa, dili igsapayan kon unsa ang atong mga kasinatian uban sa mga amahan ug mahimong yutan-ong amahan, kita usab adunay usa ka Langitnong Amahan kinsa mao ang amahan nga kinahanglang mamahimo—mahigugmaon, matinabangon, maalamon, dili hakog, motabang sa imong kalamposan. Ang labing gamhanan ug mahimayaon nga Tawo diha sa uniberso nahigugma kanimo isip Iyang bililhong anak. Hingpit Siya nga nakasabot kanimo ug nasayod sa hingpit unsa ang imong gikinahanglan aron motubo, molambo, ug makaplagan ang mahangtorong hingpit nga kalipay. Ang mga titulo sama sa “Labing Gamhanan nga Binuhat,” “Tiglalang,” ug “Makagagahom sa Tanan nga Hari” ang tanan alang gayod Kaniya. Apan, labaw sa tanan, Siya gusto nga ikaw makaila Kaniya isip “Amahan.”
Mga butang nga angay hunahunaon
-
Si Moises nakat-on sa usa ka langitnong panan-awon nga siya anak sa Dios. Basaha ang mahitungod sa iyang kasinatian sa Moises 1:1–11. Usab hinumdomi diha sa mga bersikulo 12–18 sa unsang paagi nakatabang kini nga kahibalo ni Moises sa dihang si Satanas misulay sa pagtintal kaniya. Pamalandongi sa unsang paagi nakatabang nimo ang paghinumdom nga ikaw usa ka anak sa Dios atol sa mga panahon sa tintasyon.
-
Si Elder Brian K. Taylor mihisgot og usa ka istorya mahitungod sa usa ka batan-ong babaye kinsa miingon, “Ang kahibalo nga ako anak sa Dios maoy pinakagamhanang kahibalo nga akong nabatunan!” Basaha ang mahitungod kaniya sa “Ako Ba Anak sa Dios?” aron masayran nganong misulti siya niana. Ngano nga ang pagkasayod nga ang Dios mao ang iyang Amahan nakahimo og ingon niana ka dakong kalainan sa iyang kinabuhi? Unsa nga kalainan ang mahimo niini diha sa imong kinabuhi?
-
Nakahimo naba ka og ingon niana nga matang sa craft o buhat sa art? O seguro nakahimo ka og butang sama sa eskedyul, badyet, o pagkaon. Ikonsiderar unsa ang kalainan sa relasyon uban sa butang nga imong gihimo gikan sa relasyon tali sa ginikanan ug anak. Hunahunaa kini samtang mamalandong ka niini nga mga kasulatan: Mga Taga-Galacia 4:6–7; 1 Juan 3:2. Ngano nga importante alang nimo nga masayod nga ikaw anak nga babaye o anak nga lalaki—sa Dios—dili lang linalang?
Kalihokan alang sa pagkat-on uban sa laing tawo
-
Sa pagtudlo mahitungod sa atong potensiyal isip mga anak sa Dios, ikonsiderar unsaon nimo pagpakita nga ang mga ginikanan ug ilang mga anak managsama og pisikal nga mga kinaiya. Seguro mahimo nimong ipakita ang mga litrato sa mga ginikanan ug sa ilang mga anak ug mangita sa mga pagka-anggid. Dayon ikaw mahimong mobasa og pipila ka kasulatan mahitungod sa mga kinaiya sa Langitnong Amahan, sama niini:
Unsa ang ebidensiya niini nga mga kinaiya ang atong makita sa usag usa? Unsaon nato niini nga mapalambo pa ug mahimong mas sama sa atong Amahan sa Langit?
Pagkat-on pa og dugang
-
Russell M. Nelson, “Mga Pagpili alang sa Kahangtoran” (tibuok kalibotan nga debosyonal alang sa mga young adult, Mayo 15, 2022), Librarya sa Ebanghelyo
-
Donald L. Hallstrom, “Ako Anak sa Dios,” Liahona, Mayo 2016, 26–28
-
Rosemary M. Wixom, “Pagdiskubre sa Pagkadiosnon nga Anaa Kanato,” Liahona, Nob. 2015, 6–8
Seksiyon 2
Tagda ang Tanan isip usa ka Anak sa Dios
Komon ra nga makadungog sa mga miyembro sa Ang Simbahan ni Jesukristo sa mga Santos sa Ulahing mga Adlaw nga motawag sa usag usa og “igsoon.” Sama sa gipasabot ni Presidente Henry B. Eyring, kini nga mga pulong “dili lang mahigalaong pagtimbaya o mabinationg termino sa usag usa. Mga ekspresyon kini sa mahangtorong kamatuoran: Ang Dios sa tinuoray ang Amahan sa tanang binuhat; tanan kita kabahin sa Iyang mahangtorong pamilya.” Kining yano nga kamatuoran adunay gahom sa pag-usab sa paagi nga kita motagad sa matag usa. Mahimong dili magkapareho ang atong mga gihunahuna, mga binuhatan, ug pisikal nga panagway, apan kana nga mga kalahian mas sayon dayegon ug respetohon kon mahinumdom nga, sa espirituhanong pagkasulti, kita tanan pamilya.
Mga butang nga angay hunahunaon
-
Ang Basahon ni Mormon nagsulti kanato sa duha ka grupo sa katawhan—ang mga Nephita ug ang mga Lamanita—kinsa bangis nga mga magkaaway sa daghang henerasyon. Apan adunay mga panahon nga kini nga mga grupo nakabuntog sa ilang pagdumot ug mitagad sa usag usa nga sama sa mga igsoon. Basaha ang mahitungod niana nga mga kasinatian sa Mosiah 28:1–3; Alma 26:23–31; 27:20–24; 4 Nephi 1:1–3, 14–18. Samtang kamo magbasa, pamalandongi unsay inyong mahimo aron makatabang sa Manluluwas sa pagdala og kalinaw ngadto sa pamilya sa Ginoo.
-
Tingali ang mga tawo nga imong mahimamat dili mopaila sa ilang kaugalingon nga anak sa Dios, apan ikaw makahunahuna nila niana nga paagi kon mahimamat nimo sila. Sulayi kini! Ug kon ikaw tintalon sa paghunahuna og dili maayo sa uban, pulihi kana nga hunahuna og “Kini nga tawo usa ka anak sa Dios.” Bantayi unsa ang epekto niini sa pamaagi nga ikaw mobati kabahin sa mga tawo—ug sa paagi nga motagad ka kanila.
Kalihokan alang sa pagkat-on uban sa laing tawo
-
Ikonsiderar ang pagpakita og mga litrato sa mga tawo gikan sa lahilahi nga mga kaliwat, mga kultura, ug mga kagikan. Hisgoti mahitungod sa daghang mga paagi nga ang matag usa sa katawhan managsama. Hisgoti ngano ang Dios gusto nga kita kanunay morespeto ug maayo nga motagad sa uban.
Pagkat-on pa og dugang
-
Malaquias 2:10; Mga Buhat 17:24–29; Doktrina ug mga Pakigsaad 18:10; 76:24
-
Dallin H. Oaks, “Higugmaa ang Inyong mga Kaaway,” Liahona, Nob. 2020, 26–29