Librarya
Ang Mao Lamang nga Tinuod ug Buhi nga Simbahan

“Ang Mao Lamang nga Tinuod ug Buhi nga Simbahan,” Mga Hisgotanan ug mga Pangutana (2023)

kongregasyon nanag-awit og himno

Mga Pangutana sa Simbahan ug sa Ebanghelyo

Ang Mao Lamang nga Tinuod ug Buhi nga Simbahan

Ang pagpangita og mga tubag sa atong mga pangutana mas makapaduol kanato ngadto ni Jesukristo kon atong gamiton ang matarong nga mga baroganan. Ang pagsabot kon unsaon pagdawat og pagpadayag kon mangita og mga tubag importante. Tan-awa ang hisgotanan “Ilha Nga Ang Pagpadayag Usa ka Proseso [Recognize That Revelation Is a Process]” sa pagsusi pa og dugang nga mga sugyot sa pagtubag og mga pangutana.

Kinatibuk-ang Pagpasabot

Gikan sa sinugdanan sa Pagpahiuli sa ebanghelyo hangtod karon, ang mga lider nakapanghimatuod nga ang tanang katawhan mga anak sa Dios. Ang atong Langitnong Amahan nahigugma ug gusto nga mopanalangin sa tanan Niyang mga anak.

Ang Simbahan ni Jesukristo sa mga Santos sa Ulahing mga Adlaw wala mangangkon og bugtong nga pagkamaayo ug pagkatinuod. Adunay dili maihap nga mga tawo sa tibuok kalibotan kinsa mga ehemplo sa integridad ug maayong buot. Ug tinuod ug makatabang nga mga baroganan makaplagan sa lainlaing mga relihiyon ug sistema sa maayong pamatasan sa tibuok kalibotan. Ang matag usa kanato adunay katungod sa pagtuo ug pagsimba ingon nga ang atong indibidwal nga konsyensya naggiya kanato (tan-awa sa Mga Artikulo sa Hugot nga Pagtuo 1:11).

Sa samang higayon, Ang Simbahan ni Jesukristo sa mga Santos sa Ulahing mga Adlaw adunay talagsaong buluhaton gikan sa Dios sa paghalad sa kahingpitan sa ebanghelyo ni Jesukristo ngadto sa kalibotan. Ang Ginoo Mismo mipahayag niini nga “mao lamang ang tinuod ug buhi nga simbahan diha sa ibabaw sa tibuok yuta” (Doktrina ug mga Pakigsaad 1:30). Ang mensahe sa ebanghelyo nga kita nakigbahin naglakip og bililhong gipahiuli nga mga kamatuoran nga dili makaplagan bisan asa pa mahitungod sa Dios ug sa atong relasyon ngadto Kaniya. Ang Simbahan usab adunay awtoridad sa pagkapari gikan sa Dios sa pagpangalagad sa mga ordinansa pinaagi diin kita mosulod ngadto sa usa ka pakigsaad nga relasyon uban Kaniya.

Nagtuo ug nagpamatuod ang mga Santos sa Ulahing mga Adlaw nga ang pagpuyo sa gipahiuli nga ebanghelyo nagdala og malungtarong hingpit nga kalipay, nag-ayo sa mga sangpotanan sa sala, ug nag-andam sa mga anak sa Dios sa pagpuyo og balik diha sa Iyang presensya.

Kalabot nga mga giya sa pagtuon sa ebanghelyo:

Pagsusi sa Inyong mga Pangutana

Giunsa sa Ang Simbahan ni Jesukristo sa mga Santos sa Ulahing mga Adlaw pagtan-aw ang uban nga relihiyosong mga tradisyon?

Kita nagtuo nga ang Dios nagdasig og maayong mga tawo sa tanang mga pagtuo ug mga tinuohan. Sa 1978, ang Unang Kapangulohan sa Simbahan mipahayag: “Ang bantugan nga relihiyosong mga lider sa kalibotan sama ni Mohammed, Confucius, ug sa mga Tigreporma, ingon man usab sa mga batid sa katarongan lakip nila nii Socrates, Plato, ug uban pa, nakadawat og bahin sa kahayag sa Dios. Ang moral nga mga kamatuoran gihatag ngadto kanila sa Dios aron sa paglamdag sa tibuok kanasoran ug sa pagdala og mas taas nga lebel nga pagsabot sa mga indibidwal.” Kita nakigtambayayong uban sa mga katawhan sa hugot nga pagtuo ug kamaayo sa buot sa tibuok kalibotan sa paglig-on sa mga komunidad, pag-amuma alang niadtong anaa sa panginahanglan, ug sa pagbuhat sa buluhaton sa Dios dinhi sa kalibotan.

Ang Santos sa Ulahing mga Adlaw naghatag og bili “sa bisan unsa nga mahiyason, matahom, o maayo og dungog o dalaygon” sa ubang mga simbahan ug relihiyosong mga tradisyon sa kalibotan. Si Presidente Gordon B. Hinckley mitudlo, “Kami moingon diha sa espiritu sa gugma, dad-a uban kaninyo ang tanan nga kamo aduna sa maayo ug kamatuoran diin inyong nadawat gikan sa bisan unsa nga tinubdan, ug ngari ug atong tan-awon kon unsay atong mahimong idugang ngadto niini.”

Unsa ang buot ipasabot nga Ang Simbahan ni Jesukristo sa mga Santos sa Ulahing mga Adlaw “mao lamang ang tinuod ug buhi nga simbahan”?

Ang Simbahan gigiyahan ni Jesukristo, kinsa nagpadayag sa Iyang kabubut-on sa atong panahon ngadto sa buhing mga propeta ug sa ubang dinasig nga mga lider. Nagpadayon nga pagpadayag gikan sa Manluluwas nagtugot sa Simbahan nga malinya sa langit ug usab sa pagtubo ug pag-uswag––nga mahimong tinuod ug usa ka buhing simbahan. Ang tanang buhi nga mga butang magtubo ug mausab. Ingon sa gisulti ni Presidente Russell M. Nelson: “Kita mga saksi ngadto sa usa ka proseso sa pagpahiuli. Kon naghunahuna kamo nga ang Simbahan hingpit na nga napahiuli, nakita lamang ninyo ang sinugdanan. Adunay daghan pa kaayo nga moabot.”

Ang gipahiuli nga ebanghelyo nga nakaplagan diha sa Simbahan sa Ginoo naghatag og kaalam ug kamatuoran nga dili makit-an bisan asa pa. Kini nagtanyag og indibidwal nga agianan ngadto sa sagradong gahom sa Dios pinaagi sa Espiritu Santo ug sa kaluwasan ug kahimayaan sa pamilya sa Dios pinaagi sa mga ordinansa sa pagkapari. Sa Doktrina ug mga Pakigsaad 1:30, ang Ginoo mipadayag nga ang Simbahan ni Jesukristo sa mga Santos sa Ulahing mga Adlaw mao “lamang ang tinuod ug buhi nga simbahan diha ibabaw sa tibuok yuta, nga Ako, ang Ginoo, nahimuot, namulong ngadto sa tanan sa simbahan ug dili sa tagsa-tagsa.”

Kinahanglan ba nga ikaw usa ka miyembro sa Ang Simbahan ni Jesukristo sa mga Santos sa Ulahing mga Adlaw aron maluwas?

Isip mga miyembro sa Ang Simbahan ni Jesukristo sa mga Santos sa Ulahing mga Adlaw, kita nagtuo nga ang Dios nakaandam og usa ka agianan alang sa Iyang tanan nga mga anak sa pagbaton og kaluwasan pinaagi sa Pag-ula sa Iyang Anak, si Jesukristo. Ang tanan maluwas gikan sa kamatayon pinaagi sa Pagkabanhaw ni Jesukristo. Usa ka mahimayaong panan-awon nga gipakita ngadto ni Propeta Joseph Smith nagdugang pa sa pagtudlo nga sa pagkatinuod ang tanan nga mga anak sa Dios manunod og usa ka gingharian sa himaya human sa Pagkabanhaw.

Kini nga mga pagtulun-an nanghimatuod sa dakong gahom sa atong mahigugmaong Dios sa pagluwas ug ang Iyang lawom nga tinguha sa pagbuhat sa mao. Ang Dios nagtanyag kanato sa tanan nga Siya aduna. Apan kinahanglan gayod nga kita mopili sa pagdawat niini nga mga panalangin. Sa pagdawat og kahimayaan, ang kahingpitan sa himaya nga ang Dios nagtanyag, kita kinahanglan gayod maghimo og mga pakigsaad uban Kaniya, modawat ni Jesukristo ug sa Iyang ebanghelyo, maningkamot sa pagpuyo sumala sa mga pagtulun-an ug ehemplo ni Jesus, ug mapainubsanong maghinulsol sa atong mga sala kon kita nagkulang. Ang Simbahan ni Jesukristo sa mga Santos sa Ulahing mga Adlaw adunay awtoridad gikan sa Dios sa pagtanyag sa mga pakigsaad ug mga ordinansa sa ebanghelyo ni Jesukristo nga nag-andam kanato alang sa labing taas nga ang-ang sa himaya sa celestial nga gingharian sa Dios.

Sa pagkatinuod, kasagaran sa mga anak sa Dios sa tibuok kasaysayan sa kalibotan dili sukad mga miyembro sa Simbahan ni Jesukristo. Sa pagkatinuod, kasagaran sa mga tawo kinsa nakapuyo sa yuta wala makadungog kabahin ni Jesukristo. Apan adunay dili maihap nga maayong mga tawo––sa matag edad, relihiyon, ug kultura sa kalibotan––kinsa naghulagway sa pagkadiosnon diha sa ilang mga kinabuhi. Ang matag tawo adunay oportunidad, niini nga kinabuhi o sa sunod, pagatudloan sa kahingpitan sa ebanghelyo ug sa pagdawat o pagdumili sa mga ordinansa ug mga pakigsaad niini (tan-awa sa Doktrina ug mga Pakigsaad 138:30–35, 57–59).

Ngano nga ang Simbahan dili modawat sa mga bunyag sa ubang mga Kristiyanos?

Wala madugay human ang Simbahan ni Jesukristo natukod sa 1830, umaabot nga mga miyembro kinsa kaniadto nabunyagan naghunahuna kon sila gikinahanglan bang bunyagan pag-usab diha sa bag-ong gipahiuli nga Simbahan. Agi og tubag, ang Dios mipadayag pinaagi ni Joseph Smith nga kini kinahanglan nga pagabunyagan sa awtoridad sa pagkapari nga Iyang gipahiuli. Samtang ang Simbahan nagpasidungod sa matarong nga katuyoan sa ubang mga Kristiyanos sa ilang milabay nga mga bunyag, kita nagsunod niini nga pagtulun-an karong panahona.

Ang Dios ba adunay usa ka “pinili nga katawhan”?

Ang matag usa kanato pinalangga nga anak sa Dios. Ang mga kasulatan nagtudlo nga ang Dios naghimo og mga pakigsaad uban sa Iyang mga anak sa pagdapit kanila ngadto sa mahangtorong nabugkos nga relasyon uban Kaniya. Gikan sa Biblia, atong nakat-onan nga gitukod sa Dios ang Iyang pakigsaad uban ni Abraham, nagpadayag nga pinaagi sa pamilya ni Abraham ang tanang kalibotan mapanalanginan (tan-awa sa Genesis 17:1–7; 22:17–18). Kini nga pakigsaad gibag-o uban sa mga anak ni Israel, mga kaliwat ni Abraham (tan-awa sa Genesis 28:10–15). Bisan og ang mga tawo sa nagkalainlaing mga panahon sa tibuok kasaysayan nakasabot niini nga pakigsaad nga limitado ngadto sa piho nga kaliwatan, gipadayag sa Ginoo ngadto sa Iyang Apostoles nga “ang Dios walay pagtamod sa mga tawo: apan diha sa matag nasod siya nga nahadlok kaniya, ug nagbuhat sa pagkamatarong, madawat ngadto kaniya.”

Ang Pagpahiuli sa ebanghelyo pinaagi ni Joseph Smith usa ka pagbag-o sa walay kataposang pakigsaad diha sa kataposang mga adlaw. Bisan kinsa ang nagpili sa pagsulod ngadto sa usa ka pakigsaad uban sa Ginoo pinaagi sa tukma nga awtoridad kabahin sa Iyang mga tawo sa pakigsaad. Ingon nga ang Dios misulti ngadto ni Abraham, “Kutob sa modawat niini nga Ebanghelyo … pagaiphon nga imong binhi.” Isip usa ka resulta sa pagpili sa pagsunod ni Jesukristo, sila mahimong “usa ka kaliwatan nga pinili, ang kahugpongan sa mga harianong sacerdote, ang nasod nga balaan, ang katawhan nga iyang kaugalingon sa Dios.”

Unsa ang mga pagtan-aw sa Simbahan kabahin sa relihiyosong kagawasan?

Ang plano sa kaluwasan sa atong Langitnong Amahan nag-agad sa atong abilidad sa pagpili alang sa atong mga kaugalingon, paghimo sa relihiyosong kagawasan nga kinauyokang baroganan sa ebanghelyo ni Jesukristo.

Ang mga Santos sa Ulahing mga Adlaw adunay pagmahal sa relihiyosong kagawasan sukad sa unang mga adlaw sa Simbahan. Ang kasinatian ni Joseph Smith isip ang biktima sa pagpanggukod ug kapintas mitudlo kaniya sa pagbarog alang sa relihiyosong kagawasan, dili lamang alang sa mga Santos sa Ulahing mga Adlaw apan alang sa tanang katawhan. Iyang giawhag ang mga Santos sa “[pagsalikway] gikan kanato sa matag pig-ot nga panghunahuna ug pagkadili mauyunon ngadto sa relihiyosong mga pagbati sa usa ka tawo.” Gitudlo niya nga ang “personal, (dili makuha sa balaod), nga katungod sa tawo ingon sa paghunahuna kutob sa iyang gusto [ug] sa pag-ampo kutob sa iyang gana” mao “ang unang balaod sa tanan nga sagrado.”

Ang mga lider karon sa Simbahan nanghimatuod sa importansiya sa pagtugot sa tanang mga tawo sa “pag-ampo sa bisan unsang paagi, asa, o unsa man kini sila.” Namulong ngadto sa tanang mga tawo sa pagtuo, si Presidente Dallin H. Oaks miawhag: “Uban sa gugma ug isig pagtinahoray nga gitudlo sa balaang mga sugo, nagkinahanglan kita sa pagpangita og mga paagi sa pagkat-on gikan sa usag usa ug sa pagdugang og kalig-on sa sagad nga mga pasalig nga naghupot kanato nga maghiusa ug sa pagpalambo og dili matarog nga lainlain og kagikan nga mga katilingban. Kinahanglan kitang maglakaw nga maghiusa subay sa dalan sa relihiyosong kagawasan alang sa tanan, samtang nagbansay niana nga kagawasan nagtinguha sa atong tinagsa nga mga pagtuo.”

Pagkat-on pa og dugang