Librarya
Pagpahiuli sa Ebanghelyo

“Pagpahiuli sa Ebanghelyo,” Mga Hilisgotan ug Mga Pangutana (2023)

Imahe
Si Kristo nag-orden sa Napulog Duha ka Apostoles

Giya sa Pagtuon sa Ebanghelyo

Pagpahiuli sa Ebanghelyo

Ang kahingpitan sa ebanghelyo ni Jesukristo sa atong panahon

Sa wala madugay human sa Iyang bunyag, gisugdan ni Jesukristo ang Iyang pagpangalagad nagtudlo sa mga tawo kon unsaon sa pagpakabuhi sumala sa plano sa Langitnong Amahan. Gitudlo ni Jesus nga adunay duha ka dagkong sugo: una, ang paghigugma sa uban sama sa atong paghigugma sa atong kaugalingon (tan-awa sa Mateo 22:36–40). Ang Iyang mensahe mao ang pagdapit sa kalalakin-an ug kababayen-an sa pagduol ngadto Kaniya, motuo ug mosunod sa mga kamatuoran sa Iyang ebanghelyo, ug maluwas.

Si Jesus mitawag og Apostoles ug mihatag kanila og awtoridad aron morepresentar Kaniya ug motabang diha sa Iyang buhat. Siya miorganisar sa Iyang Simbahan ug mipasabot sa kaimportante sa unang mga baroganan ug mga ordinansa sa ebanghelyo: ang hugot nga pagtuo diha ni Jesukristo, paghinulsol, bunyag, ug pagdawat sa Espiritu Santo (tan-awa sa Mateo 9:13; 16:15–19; 17:19–20; Juan 3:5).

Paglabay sa panahon misunod ang mga pagkamatay sa Apostoles sa Ginoo, daghang importanteng mga kamatuoran sa ebanghelyo giusab o nawala, ingon man ang orihinal nga organisasyon ug awtoridad sa Simbahan ni Kristo (tan-awa sa Mga Buhat 20:29–30). Apan agig katumanan sa panagna, ang Langitnong Amahan ug ang Iyang anak si Jesukristo mipahiuli, o mitukod pag-usab, sa Simbahan ug sa kahingpitan sa ebanghelyo. Kini nga Pagpahiuli nagsugod niadtong 1820 pinaagi ni Propeta Joseph Smith. Nagpadayon kini karon pinaagi sa balaan nga pagpadayag nga gihatag sa mga propeta sa modernong panahon.

Unsa ang Pagpahiuli sa Ebanghelyo?

Ang “Pagpahiuli sa ebanghelyo” nagpasabot ngadto ni Jesukristo nga nagpahiuli sa kahingpitan sa Iyang ebanghelyo, sa awtoridad sa pagkapari, ug sa organisasyon sa Iyang Simbahan ngadto sa yuta pinaagi ni Propeta Joseph Smith ug sa ulahing mga propeta. Ang Pagpahiuli gihulagway pinaagi sa sunodsunod nga balaanong mga pagpadayag, sugod sa Unang Panan-awon ni Joseph Smith ug nagpadayon pinaagi sa mga propeta sa modernong panahon hangtod karon.

Kinatibuk-ang pagsabot sa hilisgotan: Pagpahiuli sa Simbahan

May kalabotan nga mga giya sa pagtuon sa ebanghelyo: Joseph Smith, Mga Propeta, Unang Panan-awon, Pagpahiuli sa Pagkapari, Basahon ni Mormon, Ang Simbahan ni Jesukristo sa mga Santos sa Ulahing mga Adlaw

Seksiyon 1

Ang Kalibotan Giandam alang sa Pagpahiuli sa Ebanghelyo

Imahe
Unang Panan-awon

Human namatay ang Apostoles ni Kristo, daghang importanteng aspeto sa ebanghelyo ni Jesukristo gisayop sa pagsabot, nag-anam og kawala, o giusab. Ang pagkawala sa buhi nga mga propeta ug sa orihinal nga awtoridad nga gihatag ni Jesukristo, ang tinuod nga Simbahan ni Jesukristo nawala na. Atol niining panahona, nga usahay gitawag og ang Dakong Apostasiya, daghang tawo ang nangita og usa ka tinuod nga pagsabot sa ebanghelyo ni Jesukristo.

Daghang panghitabo ang nakatabang sa pag-andam sa kalibotan alang sa Pagpahiuli sa ebanghelyo sa Ginoo ug sa Iyang Simbahan. Pananglitan, importanteng mga indibidwal misakripisyo og dako kaayo, lakip ang ilang mga kinabuhi, sa paghubad sa Biblia ngadto sa Iningles ug gisugdan ang pag-apod-apod niini ngadto sa uban. Ang pagkaanaa sa mga kasulatan ang nakapahimo niining mas sayon alang sa mga tawo aron makat-on og dugang pa mahitungod ni Jesukristo. Ang mga Reformer namulong batok sa kalahian nga ilang nakita diha sa simbahan uban sa unsay gitudlo sa mga kasulatan. Daghang European ang nangita og relihiyosong kagawasan pinaagi sa pagpamuyo didto sa Amihanang Amerika. Dili maihap ang katawhan nga nagtinguha og mas tin-aw nga pagsabot bahin ni Jesukristo ug unsaon sa pagpangita og kalinaw niining kinabuhi.

Mga butang nga angay hunahunaon

  • Daghang importanteng mga aspeto sa ebanghelyo ni Jesukristo ang nangawala human namatay ang Iyang Apostoles. Kini nga panahon sa pagkahisalaag gikan sa tinuod nga ebanghelyo usahay gitawag og ang Dakong Apostasiya. Basaha sa Isaias 24:4–5; Mateo 24:9–12; Juan 16:1–3; 2 Mga Taga-Tesalonica 2:1–4; ug 1 Nephi 13:26–29. Unsa ang gisulti niining mga tudling nga nahitabo human si Kristo ug ang iyang Apostoles nawala na? Sa unsang paagi ang Pagpahiuli sa ebanghelyo ni Jesukristo miimpluwensiya sa inyong kinabuhi?

  • Basaha pag-usab ang asoy ni Joseph Smith bahin sa Unang Panan-awon diha sa Joseph Smith—Kasaysayan 1:14–20. Unsa ang nakat-onan ni Joseph Smith mahitungod sa kondisyon sa relihiyosong kalibotan nga naglibot kaniya? Nganong importante ang pagbaton og usa ka pagpamatuod sa kamatuoran sa Pagpahiuli sa ebanghelyo?

Mga kalihokan alang sa pagkat-on kauban sa uban

  • Dapita ang mga sakop sa grupo sa paghulagway kon unsa ang bation nga gutomon. Sa unsang paagi ang kagutom makaapekto sa atong kinaiya? sa atong mga prayoridad? sa atong mga tinguha? Human niini nga panaghisgotan, mag-uban sa pagbasa sa Amos 8:11–12. Sa inyong hunahuna ngano kaha nga si propeta Amos mipili niining imahe sa paghulagway sa kalibotan atol sa Dakong Apostasiya? Sa unsang paagi ang pagkawala sa kamatuoran sa ebanghelyo susama ngadto sa “gutom sa nasod”? Sa unsa nga paagi ang atong mga kinabuhi maapektohan kon kita gutom alang sa espirituhanong mga kamatuoran sa samang paagi nga kita gigutom alang sa pagkaon?

  • Sa iyang pakigpulong “Mga Pagpangandam alang sa Pagpahiuli ug sa Ikaduhang Pag-anhi: “Ang Akong Kamot Anaa Ibabaw Kanimo’,” gilatid ni Elder Robert D. Hales og pipila ka piho nga panghitabo diha sa kasaysayan sa kalibotan nga nakatabang og andam sa kalibotan alang sa Pagpahiuli. Magdungan sa pagpaminaw o pagbasa niini nga pakigpulong, ug dayon dapita ang mga sakop sa grupo sa pagpakigbahin kon unsa ang ilang nakat-onan. Sa unsang paagi ang kamot sa Ginoo maklaro diha sa mga panghitabo nga misangpot ngadto sa Pagpahiuli?

Pagkat-on pa og dugang

Seksiyon 2

Ang Pagpahiuli sa Ebanghelyo Mibukas sa Dispensasyon sa Kahingpitan sa Panahon

Imahe
Pagpahiuli sa Melchezedek nga Pagkapari

Ang Pagpahiuli sa ebanghelyo ni Jesukristo nagdala og bag-ong kahayag sa kalibotan. Gisugdan kini sa tingpamulak niadtong 1820, sa dihang ang bata pang si Joseph Smith nag-ampo sa kakahoyan duol sa iyang panimalay sa Palmyra, New York. Nabalaka siya mahitungod sa iyang espirituhanong kahimtang atubangan sa Dios ug gustong makahibalo kon hain nga simbahan ang husto. Agig tubag sa iyang pag-ampo, ang Dios Amahan ug si Jesukristo, mipakita kaniya.

Paglabay sa panahon, ang Dios misugod sa pagpahiuli sa kamatuoran sa ebanghelyo ngadto ni Joseph Smith. Kining pagbubo sa kamatuoran naglakip sa mga kasulatan, awtoridad sa pagkapari, organisasyon sa Simbahan, doktrina, ug mahinungdanon nga mga ordinansa sa kaluwasan ug kahimayaan. Kini nga proseso sa pagpagawas sa ebanghelyo sa makausa pa ngadto sa yuta nagpahinabo sa gitawag sa kasulatan nga ang “dispensasyon sa kahingpitan sa mga panahon” (Mga Taga-Efeso 1:10; Doktrina ug mga Pakigsaad 112:30). Ang usa ka dispensasyon mao ang usa ka panahon diin ang Ginoo adunay usa ka propeta ug sa Iyang ebanghelyo diha sa yuta. Niining kataposang dispensasyon sa ebanghelyo, ang kalibotan giandam alang sa Ikaduhang Pag-anhi ni Jesukristo.

Mga butang nga angay hunahunaon

  • Kita nabuhi sa dispensasyon sa kahingpitan sa mga panahon—usa ka panahon nga walay sama. Kita nakahibalo niining dispensasyon nga dili motapos diha sa apostasiya, apan kana wala magpasabot nga kita dili na mag-atubang og dagkong mga hagit. Tun-i ang mensahe ni Elder Jeffrey R. Holland “Kini, ang Labing Dako sa Tanang Dispensasyon .” Unsa nga mga hagit ang gitumbok ni Elder Holland diha sa iyang mensahe? Unsa ang imong nakat-onan gikan sa iyang mensahe mahitungod sa kinaiya nga inyong pilion nga maangkon samtang kamo mag-atubang niining mga hagit?

  • Usa ka makapahinam nga bahin sa pagpuyo dinha sa dispensasyon sa kahingpitan sa mga panahon mao ang mahimong kabahin sa nagpadayon nga Pagpahiuli sa ebanghelyo. Basaha sa Mga Buhat 3:19–21; Mga Taga-Efeso 1:3, 10; Doktrina ug mga Pakigsaad 27:13; 112:30; 128:18. Unsay inyong nakat-onan gikan niini nga mga bersikulo mahitungod sa unsay mahitabo atol niining dispesasyon? Sa unsang paagi kamo makatampo ngadto niining talagsaong buhat?

Mga kalihokan alang sa pagkat-on kauban sa uban

  • Ang pagtinguha ug pagtuo diha sa nagpadayon nga pagpadayag mahimong adunay makahuloganong epekto diha sa inyong kinabuhi. Sa “Ang Pagpahiuli sa Kahingpitan sa Ebanghelyo ni Jesukristo: Usa ka Pamahayag ngadto sa Kalibotan sa Ikaduhang Siglo nga Kasaulogan,” Ang Unang Kapangulohan ug ang Korum sa Napulog Duha ka Apostoles namahayag: “Duha ka gatosan ka tuig na karon ang milabay sukad kining Pagpahiuli nasugdan sa Dios nga Amahan ug sa Iyang hinigugmang anak, si Jesukristo. … Malipayon kaming modeklarar nga ang gisaad nga Pagpahiuli padayon nga mahitabo pinaagi sa nagpadayon nga pagpadayag.” Hangyoa ang mga sakop sa grupo sa pagpakigbahin og mga modernong pagpadayag o dinasig nga pagtulun-an nga adunay dakong epekto diha kanila. Unsa ang inyong makat-onan gikan sa mga kasinatian sa mga sakop sa grupo sa modernong pagpadayag?

  • Ang mga Konsepto sa mga dispensasyon mahimong kini lisod sabton. Mag-uban sa pagtan-aw sa bidyo nga “Dispensations: The Pattern of Apostasy and Restoration” (6:52), mohunong kon gikinahanglan aron mangutana sa usag usa ug magkaplag sa mga tubag. Sa unsang paagi ang pagsabot sa sundanan sa mga dispensasyon makapalig-on sa inyong pagpamatuod sa Gipahiuli sa atong panahon? Unsa ang inyong gibati mahitungod sa pagpuyo sa dispensasyon sa kahingpitan sa panahon?

Pagkat-on pa og dugang

Seksiyon 3

Ang Pagpahiuli Nagpadayon pinaagi sa mga Propeta sa Modernong Panahon ug mga Apostoles

Karon, kapin na sa 200 ka tuig human ang Langitnong Amahan ug si Jesukristo mipakita ngadto ni Joseph Smith, ang Pagpahiuli nagpadayon. Ang buhi nga mga propeta ug apostoles nagtinguha ug nagdawat og pagpadayag sa pagdirekta sa Ang Simbahan ni Jesukristo sa mga Santos sa Ulahing mga Adlaw. Ang Ginoo nag-andam sa Iyang Simbahan ug sa Iyang katawhan alang sa Ikaduhang Pag-anhi ni Jesukristo. Ang buhat sa Dios nagpadayon sa pag-abante sa unahan pinaagi sa nagpadayon nga Pagpahiuli ug sa dinasig nga pagpangulo sa mga sulugoon sa Ginoo (tan-awa sa Mga Artikulo sa Hugot nga Pagtuo 1:9).

Niadtong 2018, si Presidente Russell M. Nelson miingon: “Kita mga saksi sa proseso sa pagpahiuli. Kon maghunahuna kamo nga hingpit na nga napahiuli ang Simbahan, ang sinugdanan pa lamang ang inyong nakita. Daghan pa kaayo ang moabot. … Hulata ang mosunod tuig. Ug dayon ang sunod pa nga tuig. Tumara ang inyong bitamina. Pahulay. Makahinam kaayo kini.”

Mga butang nga angay hunahunaon

  • Sa iyang pakigpulong niadtong 2014 “Wala Ba Kamo Nalambigit sa Buhat sa Pagpahiuli?” Si Presidente Dieter F. Uchtdorf, kanhi sa Unang Kapanguloha misugyot og tulo ka tentasyon nga makalikay kanato gikan sa aktibong pag-apil diha sa nagpadayon nga Pagpahiuli sa ebanghelyo. Tun-i kining pakigpulong, hatagi og pagtagad ang mga babag nga iyang gisulti nga makapugong kanato gikan sa pagkab-ot sa atong potensiyal. Hain niini ang mahimo ninyong trabahoon sa pagbuntog? Paghimo og plano sa pagbuhat sa ingon.

  • Ang uban nga mga tawo kinsa nakasaksi sa mga panghitabo sa Pagpahiuli nadasig sa pagsulat kabahin niini. Pagpili og usa ka himno gikan sa “Pagpahiuli sa Ebanghelyo” nga pahina sa hilisgotan diha sa Mga Himno, ug basaha ang mga liriko niini. Unsa ang mga pulong nga magtudlo kaninyo mahitungod sa kahulogan sa Pagpahiuli? Unsa ang inyong gibati niining mga pulong? Unsa ang gibati nimong gidasig nga buhaton?

Mga kalihokan alang sa pagkat-on kauban sa uban

  • Sa usa pakigpulong niadtong 2020 nga giulohan og “Katumanan sa Panagna,” si Elder Ronald A. Rasband naglista og pipila sa mga panagna sa karaan ug sa bag-ong panahon nga natuman isip kabahin sa Pagpahiuli sa ebanghelyo. Mag-uban sa pagtuon niining pakigpulong, ug dayon dapita ang mga sakop sa grupo sa pagpakigbahin kon hain sa mga katumanan sa panagna ang labing makahuloganon ngadto kanila. Sa unsa nga kining kalihokan makapausab sa paagi nga kamo maghunahuna mahitungod sa Pagpahiuli? Unsa ang inyong bation kon kamo maghunahuna sa kahulogan sa pagpuyo niining dugay nang gipaabot nga panahon?

  • Diha sa Artikulo nga “The Nagpadayon nga Pagpahiuli,” si Elder LeGrand R. Curtis Jr., Church Historian and Recorder, naglista og tulo ka paagi nga kita makaapil sa nagpadayon nga Pagpahiuli:

    • Mohimo ug motuman sa sagradong mga pakigsaad

    • Pagtuman sa mga calling ug mga buluhaton nga atong madawat

    • Motabang sa pagpundok sa Israel

    Isip usa ka grupo, basaha kon unsa ang gitudlo ni Elder Curtis mahitungod sa matag usa niining mga natampo ngadto sa buhat. Unsay inyong gibati nga ganahan ninyong apilan niining higayona? Unsaon man ninyo pagbuhat sa ingon? Ipakigbahin ang inyong mga ideya uban sa grupo, ug ilha ang mga paagi nga kamo makatabang sa usag usa sa pagkab-ot sa inyong tumong.

Pagkat-on pa og dugang

Ubang mga Kapanguhaan mahitungod sa Pagpahiuli sa Ebanghelyo

Iprinta